Odlọ Falo Tọn Lẹ

OWHE awe juwayi bọ Josẹfu gbẹ́ pò to gànpamẹ. Ahànkọnnọtọ lọ wọn ẹn pete. To zánmẹ gbèdopo, Falo kúdlọ titengbe awe delẹ bo jlo na yọ́n zẹẹmẹ yetọn. Be a mọ ẹn dile e to amlọndọ tofi ya? To aihọngbè, Falo ylọ nuyọnẹntọ etọn lẹ bo dọ odlọ etọn lẹ na yé. Ṣigba yé ma penugo nado dọ zẹẹmẹ odlọ lẹ tọn na ẹn gba.

Ahànkọnnọtọ lọ wá flin Josẹfu todin lo. E dọna Falo dọmọ: ‘To whenuena yẹn tin to gànpamẹ, dawe de tin to finẹ he sọgan dọ zẹẹmẹ odlọ lẹ tọn.’ Falo degbè to afọdopolọji bọ Josẹfu yin didetọn sọn gànpamẹ.

Falo dọ odlọ etọn lẹ na Josẹfu dọmọ: ‘Yẹn mọ oyìn whanpẹnọ ṣinawe he dojó. Enẹgodo yẹn sọ mọ oyìn ṣinawe he húgo bosọ gblekàn taun. Podọ oyìn he húgo lọ lẹ dù oyìn he dojó lọ lẹ pete.

‘To odlọ ṣie awetọ mẹ, yẹn mọ bọ ohín gbado tọn ṣinawe he gọ́ bosọ whẹ́n ganji to wúwú to gbado-tin de ji. Enẹgodo yẹn sọ mọ ohín tóflo gbado tọn ṣinawe he ko hú pete. Podọ ohín gbado tọn tóflo lọ lẹ ze ohín dagbe ṣinawe lẹ mì.’

Josẹfu dọna Falo dọmọ: ‘Nudopolọ dọ wẹ odlọ awe lẹpo te. Oyìn ṣinawe he dojó lọ lẹ po ohín gbado tọn ṣinawe he gọ́ ganji lẹ po nọtena owhe ṣinawe, podọ oyìn ṣinawe he húgo lọ lẹ po ohín tóflo ṣinawe lẹ po nọtena owhe ṣinawe devo. Jinukun susu na wú to Egipti na owhe ṣinawe. Enẹgodo, owhe ṣinawe devo na wá bọ jinukun vude poun wẹ na wú.’

Enẹwutu Josẹfu dọna Falo dọmọ: ‘Deazọ́nna dawe nuyọnẹntọ de nado penukundo núdùdù bibẹpli go na owhe ṣinawe he mẹ jinukun na yọ́n te lẹ. Gbọnmọ dali, gbẹtọ lẹ ma na kú huvẹ to owhe ṣinawe he mẹ jinukun ma na yọ́n te lọ lẹ gblamẹ.’

Linlẹn lọ yọ́n to nukun Falo tọn mẹ. E sọ de Josẹfu nado deanana tito núdùdù bibẹpli do agbànhọ mẹ tọn lọ. Josẹfu wá lẹzun omẹ titengbe de to Egipti na ewọ wẹ bọdo Falo go.

To owhe ṣinatọ̀n godo whenuena huvẹ ko tọ́n, Josẹfu mọ mẹdelẹ ja sọn olá. Be a yọ́n mẹlọ lẹ ya? Mẹdaho etọn 10 lẹ wẹ! Otọ́ yetọn Jakọbu do yé hlan Egipti na núdùdù vọ̀ do yé to Kenani wutu. Josẹfu yọ́n nọvisunnu etọn lẹ, ṣigba yewlẹ ma yọ́n ẹn. Be a yọ́n nuhewutu wẹ? Na Josẹfu ko whẹ́n bọ nusisọ́ etọn sọ gbọnvo wutu wẹ.

Josẹfu flindọ to whenuena e gbẹ́ pò to pẹvi, e kúdlọ dọ nọvisunnu etọn lẹ wá e dè bo litaina ẹn. Be a flindọ mí ko hia enẹ dai ya? Po enẹ po, Josẹfu mọdọ Jiwheyẹwhe wẹ do emi hlan Egipti na whẹwhinwhẹ́n dagbe de wutu. Etẹwẹ a lẹndọ Josẹfu wà? Gbọ mí ni pọ́n.