Jehovah Na Osẹ́n Etọn Lẹ

NUDI osun awe to whenuena Islaelivi lẹ tọ́n sọn Egipti godo, yé wá Osó Sinai he sọ nọ yin yiylọdọ Holẹbi kọ̀n. Finẹ wẹ Jehovah dọhona Mose sọn ogbé he to miyọ́n ji lọ mẹ te. Islaelivi lẹ dosla bo nọ finẹ na ojlẹ de.

Dile gbẹtọ lẹ nọte to odò, Mose hẹ́ osó lọ ji. To aga osó lọ tọn finẹ, Jehovah dọna Mose dọ Emi jlo dọ Islaelivi lẹ ni setonuna Emi bo lẹzun akọta dide Emitọn. To whenuena Mose jẹte, e dọ nuhe Jehovah dọna ẹn lẹ na Islaelivi lẹ. Gbẹtọ lọ lẹ sọ yigbe dọ yé na setonuna Jehovah na yé jlo na yin omẹ etọn lẹ wutu.

Todin Jehovah wà nujiawu de. E hẹn osó lọ nado tì azọ̀ to aga bo hẹn hẹviosò nado dọnú. E sọ dọna Islaelivi lẹ dọmọ: ‘Yẹn wẹ Jehovah Jiwheyẹwhe mìtọn he plan mì tọ́n sọn Egipti.’ Enẹgodo e degbè dọmọ: ‘Mì ma dona sẹ̀n yẹwhe devo depope adavo yẹn.’

Jiwheyẹwhe sọ na Islaelivi lẹ gbedide kavi osẹ́n ṣinẹnẹ devo lẹ dogọ. Obu di gbẹtọ lọ lẹ taun. Yé dọna Mose dọmọ: ‘Hiẹ wẹ ni nọ dọhona mí, na mí to budi dọ mí sọgan kú eyin Jiwheyẹwhe dọhona mí.’

To nukọn mẹ Jehovah dọna Mose dọmọ: ‘Hẹ́ osó lọ ji wá dè e. Yẹn na na we zannu plẹ́bẹ́ awe he ji yẹn ko wlan osẹ́n he yẹn jlo dọ gbẹtọ lọ lẹ ni setonuna lẹ do.’ Enẹwutu Mose sọ hẹ́ osó lọ ji whladopo dogọ. E nọ finẹ na okle 40 ozán 40.

Osẹ́n he Jiwheyẹwhe jlo na na omẹ etọn lẹ sù taun. Mose basi kandai osẹ́n ehelẹ tọn. Jiwheyẹwhe sọ ze zannu plẹ́bẹ́ awe lọ lẹ na Mose. Jiwheyẹwhe lọsu ko wlan osẹ́n ao he e na gbẹtọ lọ lẹpo do zannu ehelẹ ji. Osẹ́n ehelẹ nọ yin yiylọdọ Gbedide Ao lẹ.

Gbedide Ao lọ lẹ yin osẹ́n titengbe lẹ. Mọjanwẹ osẹ́n susu devo he Jiwheyẹwhe na Islaelivi lẹ sọ yin nujọnu do. Dopo to osẹ́n ehelẹ mẹ wẹ yindọ: ‘Hiẹ dona yí ahun towe lẹpo, ayiha towe lẹpo, alindọn towe lẹpo po huhlọn towe lẹpo po do yiwanna Jehovah Jiwheyẹwhe towe.’ Podọ devo sọ die: ‘Hiẹ dona yiwanna kọmẹnu towe di dewe.’ Ovi Jiwheyẹwhe tọn, Jesu Klisti, dọ dọ osẹ́n awe ehelẹ wẹ klohugan to osẹ́n he Jehovah na omẹ etọn he yin Islaelivi lẹ mẹ. To nukọn mẹ, mí na plọn nususu gando Ovi Jiwheyẹwhe tọn po nuplọnmẹ etọn lẹ po go.