OTÀN 80
Omẹ Jiwheyẹwhe Tọn lẹ Tọ́n sọn Babilọni
NUDI owhe awe ko juwayi sọn whenue Medianu lẹ po Pẹlsianu lẹ po gbawhàn Babilọni tọn. Bo pọ́n nuhe to jijọ todin! Mọwẹ, Islaelivi lẹ to tintọ́n sọn Babilọni. Nawẹ yé mọ tundote lọ yí gbọn? Mẹnu wẹ tún yé dote?
Ahọlu Pẹlsia tọn, Kilusi wẹ wàmọ. Ojlẹ dindẹn jẹnukọnna jiji Kilusi tọn, Jehovah dọ gbọn yẹwhegán etọn Isaia ji dọmọ: ‘Nuhe yẹn jlo kẹdẹ wẹ hiẹ na wà. Họngbo lọ lẹ na yin jijodo nùvo na we nado gbawhàn tòdaho lọ tọn.’ Podọ, Kilusi wẹ sọ deanana awhànpa he duto Babilọni ji nugbo. Medianu lẹ po Pẹlsianu lẹ po zọ̀n ozán wá tòdaho lọ mẹ gbọn họngbo he yin jijodo nùvo lọ lẹ nù.
Ṣigba yẹwhegán Jehovah tọn Isaia sọ dọ dọ Kilusi na degbè dọ Jelusalẹm po tẹmpli etọn po ni yin vivọgbá. Be Kilusi wàmọ ya? Mọwẹ. Kilusi dọna Islaelivi lẹ dọmọ: ‘Todin, mì yì Jelusalẹm bo vọ́ tẹmpli Jehovah Jiwheyẹwhe mìtọn tọn gbá.’ Podọ nuhe Islaelivi lẹ jei wiwà gbé todin niyẹn.
Ṣigba e ma yin Islaelivi he to Babilọni lẹpo wẹ sọgan zingbejizọnlin lọ lẹkọyi Jelusalẹm gba. Aliho lọ dẹn taun sọ kilomẹtlu 800 podọ mẹsusu ko poyọnho kavi to azọ̀njẹ sọmọ bọ yé ma sọgan zingbejizọnlin gaa enẹ. Whẹwhinwhẹ́n devo lẹ sọ tin he wutu mẹdelẹ ma sọgan yì. Kilusi dọna mẹhe ma yì lẹ dọmọ: ‘Mì yí fataka po sika po gọna nunina devo lẹ na mẹhe lẹkọ jei nado yì vọ́ Jelusalẹm po tẹmpli etọn po gbá lẹ.’
Enẹwutu, Islaelivi he jei Jelusalẹm lẹ mọ nunina susu yí. Kilusi sọ yí agbán po kọfo he Ahọlu Nẹbukadnẹzali bẹsọn tẹmpli Jehovah tọn mẹ to whenue e và Jelusalẹm sudo lẹ po na yé. Gbẹtọ lẹ tindo nususu todin nado bẹ lẹkọyi whé.
To nudi gbejizọnlin osun ẹnẹ tọn godo, Islaelivi lẹ jẹ Jelusalẹm to ojlẹ he sọgbe lọ mẹ. E ko yì owhe 70 pẹpẹ bọ tòdaho lọ yin vivasudo, podọ aigba etọn sọ yin hinhẹn jẹvọ́ mlẹnmlẹn. Ṣigba, dile etlẹ yindọ Islaelivi lẹ wá otò yetọn titi mẹ todin, yé na pannukọn ninọmẹ sinsinyẹn delẹ dile mí na mọ do to nukọn mẹ.