Jesu Hẹnazọ̀ngbọna Awutunọ Lẹ

DILE Jesu to gbejizọnlin basi gbọn aigba lọ ji, e to azọ̀nhẹngbọna awutunọ lẹ. Linlin azọ́njiawu ehelẹ tọn gbayipe to gbétatò po tòpẹvi he to lẹdo lọ mẹ lẹ po mẹ. Enẹwutu, gbẹtọ lẹ nọ hẹn sẹkunọ lẹ, nukuntọ́nnọ lẹ, tókunọ lẹ, po awutunọ susu devo lẹ po wá e dè. Jesu nọ hẹnazọ̀ngbọna yemẹpo.

E ko hugan owhe atọ̀n todin sọn whenue Johanu baptizi Jesu. Jesu sọ dọna apọsteli etọn lẹ dọ, emi na yì Jelusalẹm to madẹnmẹ, fihe emi na yin hùhù te podọ to enẹgodo fọ́n sọn oṣiọ lẹ mẹ. Todin whẹ́, Jesu zindonukọn nado to azọ̀nhẹngbọna awutunọ lẹ.

To gbèdopo, Jesu to mẹplọn to Gbọjẹzangbe. Gbọjẹzan yin azán he gbè Ju lẹ nọ gbọjẹ te. Nawe he hiẹ mọ tofi lọ to awutu sinsinyẹn de jẹ. Sọn owhe 18 die wẹ e nọ zọ̀n tọ́tọ́ bo ma sọgan jlọ. Enẹwutu Jesu ze alọ etọn do e ji bọ e sọ jlọ. Ewọ sọ jẹgangan!

Ehe hẹn nukọntọ sinsẹ̀n tọn lẹ nado gblehomẹ. Dopo to yé mẹ dawhá hlan agundaho lọ dọmọ: ‘Azán ṣidopo wẹ mí dona wazọ́n na. Azán enẹlẹ gblamẹ wẹ mí dona hẹnazọ̀ngbọ te, e ma yin to Gbọjẹzangbe gba!’

Jesu sọ gblọn dọmọ: ‘Mì gbẹtọ ylankan lẹ. Dopodopo mìtọn wẹ nọ tún kẹtẹkẹtẹ etọn bo nọ plan ẹn nado yì nùsin to Gbọjẹzangbe. Be e ma jẹ nado hẹnazọ̀ngbọna nawe wamọnọ ehe, he to awutujẹ sọn owhe 18 die ya?’ Gblọndo Jesu tọn dowinyan gbẹtọ ylankan ehelẹ.

Enẹgodo, Jesu po apọsteli etọn lẹ po zingbejizọnlin yì Jelusalẹm. To whenue yé tọ́n sọn tòpẹvi Jẹliko tọn mẹ, nukuntọ́nnọ nubiọtọ awe sè dọ Jesu wá jei. Enẹwutu yé dawhá dọmọ: ‘Jesu, gọalọna mí!’

Jesu sọ ylọ dawe nukuntọ́nnọ lọ lẹ, bo kanse yé dọmọ: ‘Etẹwẹ mì jlo dọ yẹn ni wà na mì?’ Yé sọ dọmọ: ‘Oklunọ, gbọ nukun mítọn lẹ ni hùn.’ Jesu zealọ do nukun yetọn lẹ ji, podọ to afọdopolọji yé jẹ numọ ji! Be hiẹ yọ́n nuhewutu Jesu do wà azọ́njiawu ehe lẹpo ya? Na e yiwanna gbẹtọ lẹ bosọ jlo dọ yé ni yí emi sè wutu. Enẹwutu, mí sọgan deji dọ to whenue ewọ na dugán taidi Ahọlu, mẹdepope ma nasọ jẹ awutu to aigba ji ba.