Yé Yin Didesọn Gànpamẹ

PỌ́N angẹli he tofi bo hùn ohọ̀n gànpa lọ tọn dote. Apọsteli Jesu tọn lẹ wẹ yin dawe he e to didetọn lọ lẹ. Gbọ mí ni dindona nuhewutu yé do yin zizedo gànpamẹ.

E ma dẹn susu todin bọ gbigbọ wiwe yin kinkọ̀n do devi Jesu tọn lẹ ji. Podọ nuhe jọ lọ die: To whèmẹ gbèdopo wẹ Pita po Johanu po jei tẹmpli mẹ to Jelusalẹm. Dawe de he ko yin sẹkunọ sọn adọ̀ onọ̀ etọn tọn mẹ tin to họntonu tẹmpli lọ tọn. Gbẹtọ lẹ nọ ze e wá finẹ egbesọegbesọ nado biọ akuẹ sọn mẹhe jei tẹmpli mẹ lẹ si. Whenuena e mọ Pita po Johanu po, e vẹ̀ yé dọ yé ni na nude emi. Etẹwẹ apọsteli ehelẹ na wà?

Yé nọte bo pọ́n dawe wamọnọ lọ. Pita dọmọ: ‘Yẹn ma tindo akuẹ, ṣigba yẹn na na we nuhe tin to asi e. To oyín Jesu tọn mẹ, fọ́n bo zinzọnlin!’ Whenẹnu wẹ Pita hẹn adusilọ dawe lọ tọn, podọ e fọnṣite bleun bosọ jẹ zọnlinzin ji to afọdopolọji. To whenue gbẹtọ lẹ mọ ehe, homẹ yetọn hùn taun na azọ́njiawu ehe wutu.

Pita dọmọ: ‘To huhlọn Jiwheyẹwhe, mẹhe fọ́n Jesu sọn oṣiọ lẹ mẹ tọn mẹ wẹ míwlẹ wà azọ́njiawu ehe te.’ To whenue ewọ po Johanu po to hodọ to alọnu, nukọntọ sinsẹ̀n tọn delẹ wá. Homẹgble yé na Pita po Johanu po to hodọna gbẹtọ lẹ do fọnsọnku Jesu tọn ji wutu. Enẹwutu, yé wle yé, bosọ ze yé do gànpamẹ.

To wunkẹngbe, nukọntọ sinsẹ̀n tọn lẹ basi opli daho de. Yé hẹn Pita po Johanu po gọna dawe he yé hẹnazọ̀ngbọna lọ wá. ‘Huhlọn tẹwẹ mì yí do wà azọ́njiawu ehe?’ wẹ nukọntọ sinsẹ̀n tọn lẹ kanse.

Pita dọna yé dọ huhlọn Jiwheyẹwhe, mẹhe fọ́n Jesu sọn oṣiọ lẹ mẹ tọn wẹ. Yẹwhenọ lẹ masọ yọ́n nuhe yé na wà ba, na yé ma sọgan gbẹ́ dọ azọ́njiawu mọnkọtọn ma yin wiwà nugbonugbo. Enẹwutu, yé gbẹna apọsteli lẹ dọ yé masọ dona plọnmẹ gando Jesu go ba, podọ yé jo yé do nado yì.

Dile azán lẹ to yìyì, devi lẹ to yẹwhehodọ madoalọte dogbọn Jesu dali bosọ to azọ̀nhẹngbọna awutunọ lẹ. Linlin lẹ sọ gbayipe gando azọ́njiawu ehelẹ go. Enẹwutu, gbẹtọgun lẹ hẹn awutunọ lẹ wá apọsteli lẹ dè sọn tòdaho he lẹdo Jelusalẹm lẹ mẹ na yé nido hẹnazọ̀ngbọna yé. Ehe fọ́n awuwhàn nukọntọ sinsẹ̀n tọn lẹ tọn dote, bọ yé sọ wle apọsteli lẹ bo bẹ yé do gànpamẹ. Ṣigba yé ma nọ finẹ dẹn.

To ozán lọ mẹ, angẹli Jiwheyẹwhe tọn hùn ohọ̀n gànpa lọ tọn, dile a sọgan mọ do tofi. Angẹli lọ sọ dọmọ: ‘Mì yì bo nọte to tẹmpli mẹ, bosọ zindonukọn to hodidọ na gbẹtọ lẹ mẹ.’ To wunkẹngbe afọnnu, whenuena nukọntọ sinsẹ̀n tọn lẹ domẹhlan gànpa lọ mẹ nado yì plan apọsteli lẹ wá, yé masọ to finẹ ba. Enẹgodo, dawe lọ lẹ wá yì mọ yé to mẹplọn to tẹmpli mẹ, bọ yé sọ hẹn yé wá Whẹdatẹn Daho Ju lẹ tọn.

Nukọntọ sinsẹ̀n tọn lọ lẹ dọna yé dọmọ: ‘Mí ko gbẹna mì sinsinyẹn dọ mì ma hà bosọ plọnmẹ to oyín Jesu tọn mẹ ba. Ṣigba mìwlẹ ko yí nuplọnmẹ mìtọn do gọ́ Jelusalẹm.’ Whenẹnu wẹ apọsteli lẹ gblọn bo dọmọ: ‘Míwlẹ dona setonuna Jiwheyẹwhe taidi ogán kakati nido yin gbẹtọ lẹ.’ Enẹwutu yé zindonukọn nado to “wẹndagbe” lọ lá. Be e ma yin apajlẹ dagbe de wẹ ehe yin na mí nado hodo ya?