Weta 3
Onú He Ma Na Nọma Wá Jọ to Zandevie Lẹ
1. Nawẹ hiẹ sọgan lúntọn sọn whẹdida Jiwheyẹwhe tọn do aihọn ehe ji gbọn?
HIẸ dona tin to lẹnpọn siso mẹ dogbọn nujijọ aihọn tọn lẹ dali todin. Etẹwutu e dona yin mọ? Na aihọn ehe ma sọgan họ̀nna whẹdida Jiwheyẹwhe tọn wutu. Ṣigba hiẹ sọgan luntọ́n. Hiẹ sọgan basi ehe dogbọn dewe yiyi do basi “ma yin apadewhe aihọn lọ tọn” he yin dẹhodo na vasudo dali. Ehe ma zẹẹmẹdo tintindo aliho gbẹzan tọn mẹdezizewhla, mẹdesudo-họmẹ tọn de gba. E zẹẹmẹdo dọ whenuena hiẹ to gbẹzan dagbe he gọna zẹẹmẹ de zan hiẹ ni klan dewe sọn hẹngble tonudidọ tọn mẹ, sọn ajọwiwà nukunkẹnnọ mẹ, podọ sọn sinsẹ̀n masin kọn do Jiwheyẹwhe go tọ́ mẹ, podọ ga sọn afọdide hunyanhunyan po fẹnnuwiwà po tọn mẹ. To ojlẹ dopolọ mẹ, hiẹ dona hodo nujinọtedo yiaga walọyizan tọn Jiwheyẹwhe tọn bo tin nado wà ojlo etọn. (Johanu 17:14-16; Zẹfania 2:2, 3; Osọhia 21:8) Owe Biblu tọn Osọhia dohia lehe e yin nujọnu sọ na we nado dovivẹnu to whẹho ehelẹ mẹ, bo basi diọdo he jẹ lẹ to gbẹzan towe mẹ do.
2. Nawẹ apọsteli Johanu bẹ dọdai daho Osọhia tọn lọ jẹeji gbọn, podọ hlan mẹnu wẹ Jiwheyẹwhe na wẹ̀ndomẹ pinpẹn ehe?
2 Apọsteli Johanu bẹ dọdai daho ehe jẹeji po hogbe lẹ po: “Osọhia Jesu Klisti tọn, he Jiwheyẹwhe na hlan ẹn nado dohia hlan afanumẹ etọn lẹ, onu he ma na nọma wá jọ to zandevie.” (Osọhia 1:1) Nalete Jesu Klisti fọnsọnku lọ wẹ mọ wẹ̀ndomẹ pinpẹn ehe yi sọn Jiwheyẹwhe de. Kakati nado yin apadewhe Atọ̀n-to-dopomẹ dabla de tọn, Jesu yin didohia tofi nado yin mẹmẹglọ hlan Otọ́ etọn. To aliho dopolọ mẹ, “afanumẹ” lẹ he wleawuna agun Klistiani tọn yin mẹmẹglọ hlan Jesu Klisti, bọ ye ‘nọ hodo e to godo yì fidepope e jei.’ (Osọhia 14:4; Efesunu lẹ 5:24) Ṣigba mẹnu lẹ wẹ yin “afanumẹ” Jiwheyẹwhe tọn lẹ to egbehe nugbo podọ nawẹ Osọhia nọ hẹn ale wá na ye gbọn?
3. (a) Mẹnu wẹ yin “afanumẹ” lẹ he yin mẹmẹglọ hlan Jesu Klisti? (b) Azọn tẹwẹ “afanumẹ” nugbonọ lẹ to wiwà to anademẹ angẹli tọn glọ?
3 Apọsteli Johanu, he kan Osọhia lọ dai, basi zẹẹmẹ ede tọn taidi afanumẹ de. E yin apọsteli godo tọn he pò to ogbẹ̀ lọ podọ dopo to pipli he yin “afanumẹ” didè lẹ he yin amisana po gbigbọ po tọn lọ mẹ he nọ dugu ogbẹ̀ jọmaku tọn to olọn lẹ mẹ. To egbehe, fọtọ́n vude ehelẹ tọn wẹ pò to aigba ji. Jiwheyẹwhe tindo devizọnwàtọ devo lẹ ga, yedọ “gbẹtọ susugege” yetọn, sunnu lẹ, yọnnu lẹ, po ovi lẹ po, he to sọha livilivi lẹ mẹ biọ todin. To anademẹ angẹli tọn glọ, omẹ ehelẹ to mahẹ tindo po “afanumẹ” yiamisisadode lẹ po to “wẹndagbe madopodo” lọ lilá na gbẹtọvi lẹpo mẹ. Etẹ, lehe “afanumẹ” ehe lẹpo to yede yizan sọ nado sọgan gọalọna homẹmimiọnnọ lẹ to aigba ji nado mọ whlẹngan yí! (Matiu 24:14; Osọhia 7:9, 14; 14:6) Osọhia do nuhe hiẹ dona wà lọ hia nado mọ ale yi sọn “wẹndagbe” ayajẹnamẹtọ lọ mẹ.
4. (a) To whenuena e yindọ nuhe hugan owhe 1 900 lẹ die wẹ Johanu wlan Osọhia lọ, nawẹ e sọgan dọho “onu he ma na nọma wá jọ to zandevie” lẹ tọn gbọn? (b) Etẹwẹ kunnudenu lọ todin dohia dogbọn onu dọdai lẹ dali?
4 Ṣigba nawẹ Johanu sọgan dọ dọ “afanumẹ” ehelẹ na yin didohia “onu he ma na nọma wá jọ to zandevie” gbọn? Be hogbe enẹlẹ ma ko yin didọ to nuhe hugan owhe 1 900 lẹ die? Sọn pọndohlan Jehovah tọn mẹ, he sin nukunmẹ owhe fọtọ́n de tin taidi “osọ̀,” owhe 1 900 lẹ yin ojlẹ vude whenuena e yin yiyijlẹdo ojlẹ madosọha he e ko yizan to aigba lọ bibasi po awuwlena etọn po na fininọ gbẹtọvi lẹ tọn mẹ. (Psalm 90:4) Apọsteli Paulu wlan dogbọn “nukundido po todido” etọn titi po dali, na matin ayihaawe hẹndi ahọsuyi etọn tọn taidi nuhe tin to yakẹ na ẹn. (Filippinu lẹ 1:20) Ṣigba to egbehe kunnudenu lọ su dọ onu lẹpo he yin didọdai na jọ do ganmẹ. Gbede pọn to whenuho mẹ lunluntọ́n gbẹtọvi lẹ tọn ma ko tin to owu mẹ sọle pọn gba. Jiwheyẹwhe kẹdẹ wẹ tindo pọngbọ lọ!—Isaia 45:21.
Nuyizan na Nudọnamẹ
5. Nawẹ Osọhia lọ yin yiyina apọsteli Johanu podọ to enẹgodo hlan agun lẹ gbọn?
5 Osọhia 1:1b, 2 zindonukọn dọmọ: “E [Jesu] sọ domẹhlan bo do ye [Osọhia] hia gbọn angẹli etọn dali hlan Johanu, mẹmẹglọ etọn: mẹhe dekunnuna ohọ Jiwheyẹwhe tọn, na okunnu Jesu Klisti tọn, podọ na onu he e mọ lẹpo.” Nalete, Johanu mọ kandai gbọdo lọ yi gbọn mẹdagun angẹli de gblamẹ. E wlan ẹn do owe hiha de mẹ, bo yi i dohlan agun ojlẹ etọn mẹ tọn lẹ. Po ayajẹ po na mí, Jiwheyẹwhe ko hẹn ẹn pò to aimẹ na tulinamẹ agun diblayi 100 000 lẹ tọn he yin devizọnwàtọ kọndopọ etọn lẹ tọn to aigba ji todin.
6. Nawẹ Jesu do ohia ogo na nuyizan lọ he e na yizan nado wleawuna núdùdù gbigbọmẹ tọn na ‘afanumẹ’ etọn lẹ todin gbọn?
6 Jiwheyẹwhe tindo nuyizan de na Osọhia lọ didọ namẹ to azan Johanu tọn gbe, podọ Johanu yin apadewhe aigba ji tọn nuyizan enẹ tọn. Mọdopolọ, Jiwheyẹwhe tindo nuyizan de na núdùdù gbigbọmẹ tọn nina ‘afanumẹ’ etọn lẹ todin. To dọdai daho etọn he gando opodo titonu lọ tọn go, Jesu do ada aigba ji tọn nuyizan ehe tọn hia taidi “afunumẹ nugbonọ, nuyọnẹntọ, mẹhe klunọ etọn do basi ogán whédo etọn tọn, nado na núdùdù yetọn ye to osaa sisọ mẹ.” (Matiu 24:3, 45-47) E yi hagbẹ Johanu tọn ehe zan nado hun zẹẹmẹ dọdai lọ tọn.
7. (a) Nawẹ ohia lẹ he yin mimọ to Osọhia mẹ dona yinuwa do mí go gbọn? (b) Nawẹ mẹdelẹ to hagbẹ Johanu tọn mẹ tindo mahẹ to hẹndi numimọ Osọhia tọn lẹ me dẹn sọ?
7 Apọsteli Johanu wlan dọ Jesu ze Osọhia lọ donukọnnamẹ “to ohia” kavi yẹhiadonu lẹ mẹ. Ehelẹ họnwun bo nọ fọn numọtolanmẹ dote nado gbadopọnna. Ye basi yẹdide na azọn sinsinyẹn wiwà bo dona, to godomẹ, whan mí hlan vivẹnudido zohunhunnọ to hinhẹn dọdai lọ po zẹẹmẹ etọn po yin yinyọnẹn hlan mẹdevo lẹ mẹ. Osọhia lọ ze numimọ zodolanmẹnamẹtọ sọha de donukọnna mí, dopodopo he mẹ Johanu yin mahẹtọ te kavi taidi nupọntọ de. Enẹnọ lẹ he yin hagbẹ Johanu tọn todin, delẹ to ye mẹ he ko tindo mahẹ to hẹndi numimọ ehelẹ tọn mẹ na owhe susu lẹ, yin ayajẹnọ dọ gbigbọ Jiwheyẹwhe tọn ko hun zẹẹmẹ lọ na ye nido sọgan basi zẹẹmẹ etọn na mẹdevo lẹ.
8. (a) Etẹwẹ yin tangan dogbọn dopodopo numimọ ehelẹ tọn dali? (b) Nawẹ dọdai Daniẹli tọn gọalọna mí nado mọnukunnujẹ nuhe kanlin Osọhia tọn lẹ yin mẹ gbọn?
8 Numimọ ehelẹ to Osọhia mẹ ma yin zizedonukọnnamẹ to tito debọdo-dego tọn de mẹ gba. Dopodopo yetọn tindo ojlẹ hẹndi etọn tọn titi. Susu numimọ lẹ tọn bẹ hogbe dọdai tintan lẹ tọn de hẹn he wleawuna nudọnamẹ lẹ na nuhe du tadena yetọn. Di apajlẹ, dọdai Daniẹli tọn basi zẹẹmẹ na kanlin obudonamẹtọ ẹnẹ lẹ, bo na zẹẹmẹ dọ ehelẹ nọtena huhlọn gandutọ lẹ to aigba ji. Nalete, mí yin alọgọna nado mọnukunjẹemẹ dọ kanlin lẹ to Osọhia mẹ nọtena nuyizan tonudidọ tọn lẹ, gọna dehe tin to aimẹ todin lẹ.—Daniẹli 7:1-8, 17; Osọhia 13:2, 11-13; 17:3.
9. (a) Taidi Johanu, ninọmẹ tẹwẹ hagbẹ Johanu tọn dohia? (b) Nawẹ Johanu do aliho lọ hia mí nado lẹzun ayajẹnọ gbọn?
9 Johanu yin nugbonọ to kunnudidena wẹ̀ndomẹ lọ he Jiwheyẹwhe na ẹn gbọn Jesu Klisti gblamẹ lọ mẹ. E basi zẹẹmẹ to gigọ mẹ “na onu he e mọ lẹpo.” Hagbẹ Johanu tọn dinvie tọn ko gbọn vivẹnu dali do din anademẹ sọn Jiwheyẹwhe po Jesu Klisti po dè nado sọgan mọnukunnujẹ dọdai lọ mẹ to gigọ mẹ bo hẹn hogo dagbe etọn lẹ yin yinyọnẹn hlan omẹ Jiwheyẹwhe tọn lẹ. Na alemọyi agun yiamisisadode lọ tọn (podọ ga “gbẹtọ susugege” akọjọpli tọn lọ he Jiwheyẹwhe na hẹn do ogbẹ̀ gbọn “nukunbibia daho” lọ gblamẹ), Johanu wlan: “[Ayajẹnọ] wẹ ewọ he to hihia, podọ ye he to oho dọdai he tọn sè, bo sọ to onu he yè wlan do e mẹ lẹ yí hẹn: na whenu to sisẹpọ wutu.”—Osọhia 1:3.
10. Etẹwẹ mí dona wà po Osọhia lọ po nado mọ ayajijẹ enẹ yí?
10 Hiẹ na mọ ale susu yí dogbọn Osọhia hihia dali podọ etlẹ na hugan mọ dogbọn nuhe yin winwlan do e mẹ lẹ yìnyìn dali. Johanu basi zẹẹmẹ to dopo to wekanhlanmẹ etọn lẹ mẹ dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn ma sọ yin nupẹnagbanmẹ gba. Na mẹdepope he ye detọn sọn Jiwheyẹwhe de, gbawhan aihọn tọn: ehe sọ wẹ awhangba he gbawhan aihọn tọn, yedọ yise mítọn.” (1 Johanu 5:3, 4) Hiẹ sọgan lẹzun ayajẹnọ talala dogbọn awuwlena yise mọnkọtọn de dali!
11. (a) Etẹwutu e yin niyaniyanu de nado yìn hogbe dọdai lọ tọn lẹ? (b) Ojlẹ tẹwẹ dona ko sẹpọ po owu po todin?
11 E yin niyaniyanu de dọ mí ni payi hogbe dọdai lọ tọn lẹ go, “na whenu to sisẹpọ wutu.” Whenu didè na etẹ? Na hẹndi dọdai Osọhia tọn tọn lẹ gọna whẹdida Jiwheyẹwhe tọn lẹ ga. Ojlẹ lọ sẹpọ na Jiwheyẹwhe po Jesu Klisti po nado hẹn whẹdida godo tọn lọ ṣẹ titonu aihọn tọn Satani tọn ji. Whenuena Jesu tin tofi to aigba ji, e dọ dọ Otọ́ emitọn kẹdẹ wẹ yọn “azan nẹ, kavi ojlẹ nẹ.” Whenuena e to nukọn pọndohlan nugbajẹmẹji lẹ he ko to susudeji to aigba ji to azan mítọn gbè, Jesu sọ dọ ga dọmọ: “Whẹndo he ma to na juwayì kaka yè nado hẹn onu lẹpo di.” Nalete ojlẹ didè na nudide Jiwheyẹwhe tọn bibasi dona ko to dindọnsẹpọ po owu po. (Malku 13:8, 30-32) Dile Habbakuk 2:3 dọ do: “Na numimọ lọ gbẹ sọ tin na ojlẹ dide lọ, podọ e to unklẹn hlan opodo lọ dali, bo ma na dolalo: yin e tlẹ dọngban, nọtepọn ẹn; na e ma na nọma wá wutu, e ma na gọn gba.” Whlẹngan mítọn gbọn “nukunbibia daho” lọ gblamẹ gando Ohó dọdai tọn Jiwheyẹwhe tọn yìnyìn mítọn go.—Matiu 24:20-22.
[Apotin to weda 15]
Nado mọnukunnujẹ owe Osọhia tọn mẹ mí tindo nuhudo
● Nado mọ alọgọ gbigbọ Jehovah tọn yí
● Nado yọn whenuena azan Oklunọ tọn lọ bẹjẹeji
● Nado kẹalọyi afanumẹ nugbonọ, nuyọnẹntọ lọ todin