Weta 17
Lẹgọwa Klisti Tọn—Nawẹ E Yin Mimọ Gbọn?
1. (a) Opagbe tẹwẹ Jesu Klisti do? (b) Nuhudo tẹwẹ tin to finẹ na lilẹgọwa Klisti tọn?
“YẸN NASỌ LẸGỌ.” (Johanu 14:3) Jesu Klisti dopagbe ehe na apọsteli etọn lẹ whenuena e tin po ye po to ozan lọ mẹ jẹnukọnna oku etọn. Hiẹ na dibla yigbe dọ nuhudo daho mọnkọtọn ma ko tin pọn gbede na jijọho, agbasalilo po ogbẹ̀ po he lilẹgọwa Klisti tọn to huhlọn Ahọluduta tọn mẹ na hẹnwa na gbẹtọvi lẹ. Ṣigba nawẹ Klisti na lẹgọwa gbọn? Mẹnu wẹ mọ ẹn, podọ to aliho tẹ wẹ?
2. (a) To lilẹgọwa etọn whenu, fie wẹ Klisti hẹn hodotọ yiamisisadode etọn lẹ sọyi, gọna apọsteli etọn lẹ, nado nọ? (b) Wunmẹ agbasa tọn tẹwẹ ye tindo to finẹ?
2 To lilẹgọwa etọn whenu, Klisti ma na wa nọ aigba ji gba. Kakati mọ, enẹnọ lẹ he na duahọlu po e po di ahọlu lẹ na yin hinhẹn sọyi nado yi nọ po e po to olọn mẹ. Jesu ko dọ na apọsteli etọn lẹ dọmọ: “Yẹn nasọ lẹgọ, bo hẹn mì yi dee de; na ofi he yẹn te finẹ wẹ mì na nọ ga.” (Johanu 14:3) Enẹwutu, to whenue Klisti lẹgọ, enẹnọ he na yin hinhẹn sọyi olọn mẹ lẹ nọ lẹzun gbẹtọ gbigbọnọ lẹ, podọ yewlẹ na sọ mọ Klisti to agbasa pagigona gbigbọnọ etọn mẹ. (1 Kolintinu lẹ 15:44) Ṣigba be pipotọ gbẹtọvi lẹ tọn, he ma jei olọn mẹ, na mọ Klisti to lilẹgọwa etọn whenu wẹ?
NUHEWUTU E MA SỌGAN LẸGỌ DI GBẸTỌ DE
3. Kunnudenu Biblu tọn tẹwẹ dohia dọ gbẹtọ lẹ ma na sọ mọ Klisti gbede ba?
3 To ozan dopolọ mẹ Jesu to nukọnyi nado dọ na apọsteli etọn lẹ dọ: “To whenu vude, aihọn ma na mọ mi ba.” (Johanu 14:19) “Aihọn” lọ wẹ gbẹtọvi lẹ. Enẹwutu Jesu tofi dọ ẹ gbangba dọ gbẹtọ lẹ to aigba ji ma nasọ mọ ẹn ba to hihẹji yì olọn mẹ etọn godo. Apọsteli Paulu wlanwe dọ: “Yedọ, eyin míwlẹ tlẹ ko yọn Klisti kẹdẹdi agbasalan tọn dai, be sọn dinvie míwlẹ ma sọ yọn ẹn domọ ba.”—2 Kolintinu lẹ 5:16.
4. Etẹwẹ dohia dọ Klisti lẹgọwa di gbẹtọ gbigbọnọ huhlọnnọ de to mayinukundomọ mẹ?
4 Ṣogan gbẹtọ susu yise dọ Klisti na lẹgọwá to agbasa gbẹtọ tọn dopolọ mẹ to ehe mẹ e yin hùhù te, podọ mẹhe tin to aigba ji lẹpo wẹ na mọ ẹn. Ṣigba, Biblu dọ dọ Klisti na lẹgọ to gigo mẹ po angẹli lẹpo po, podọ e sọ sinai to “ofin gigo etọn tọn ji.” (Matiu 25:31) Eyin Jesu na wa bosọ sinai to ofin gbẹtọ tọn de ji to aigba ji, uwọ na yido to ninọmẹ etọn mẹ hú angẹli lẹ. Ṣigba uwọ wá di huhlọnnọ po gigonọ po hú ovi gbigbọnọ Jiwheyẹwhe tọn helẹ podọ na mọtọn uwọ yin ma yi nukundomọ, dile yewlẹ te do.—Filippinu lẹ 2:8-11.
5. Naegbọn Klisti ma sọgan lẹgọwa to agbasa gbẹtọ tọn de mẹ?
5 To alọ devo mẹ, to nuhugan owhe 1 900 die e yin nuhe yin dandan na Jesu nado hẹn ede whe bosọ lẹzun gbẹtọ. E yin nuhe jẹ na uwọ nado ze ogbẹ̀ gbẹtọ pipe tọn etọn dai di fligọ de na mí. Jesu to whedenu basi zẹẹmẹ etọn dole: “Akla he yẹn na na lọ wẹ olan ṣie, ehe yẹn na na na ogbẹ̀ aihọn tọn.” (Johanu 6:51) Jesu gbọnmọ dali do na agbasalan etọn to avọsinsan mẹ na gbẹtọvi lẹ tọn wutu. Nawẹ e na dẹnsọ bọ avọsinsan enẹ nado to azọn wa? Apọsteli Paulu na gblọndo: “Yè hẹn mí zun wiwe gbọn yiyi agbasa Jesu Klisti tọn do sanvọ whladopo akan dali.” (Heblu lẹ 10:10) To whenue uwọ ko na agbasalan etọn na ogbẹ̀ aihọn tọn wutu, Klisti ma sọgan sọ gọẹ yi gbede bosọ wa lẹzun gbẹtọ whladopo dogọ gba. Na whẹwhinwhẹn dòdonu tọn enẹ enẹ tọn wutu lilẹgọwa etọn ma sọgan sọ yin to agbasa gbẹtọ tọn mẹ gbede agbasa he uwọ ko yi do sanvọ whladopo akan.
AGBASALAN MA YIN HINHẸN SỌYI OLỌN GBA
6. Naegbọn gbẹtọ susu do yise dọ Klisti yi olọn mẹ po agbasalan gbẹtọ tọn etọn po?
6 Ṣigba, gbẹtọ susu yise dọ Klisti hẹn agbasalan etọn sọyi olọn mẹ. Ye nọ dlẹnalọ dohlan nugbo lọ dọ whenuena Klisti fọn sọn oṣiọ lẹ mẹ, agbasalan etọn ma sọ tin to yọdo lọ mẹ ba. (Malku 16:5-7) Mọga, to oku etọn godo Jesu sọawuhia hlan devi etọn lẹ to agbasalan de mẹ nado dohia ye dọ emi ko sọ tin to ogbẹ̀. To whedenu Uwọ tlẹ hẹn apọsteli Tọmasi nado ze alọ do odo he tin to adaja etọn mẹ na Tọmasi nido yise dọ Uwọ ko fọn nugbo nugbo. (Johanu 20:24-27) Be ehe ma dohia dọ Klisti yin finfọn do ogbẹ̀ to agbasa dopolọ mẹ he mẹ e yin hùhù te?
7. Etẹwẹ dohia dọ Klisti yi olọn mẹ di gbẹtọ gbigbọnọ de?
7 Lala, e ma yin mọ gba. Biblu dọ ẹ taun whenuena e dọmọ: “Klisti jiya whladopo na ylandonọ wutu . . . , mehe ye hu to agbasalan mẹ, ṣigba bọ ye hẹn wa ogbẹ̀ to gbigbọ mẹ.” (1 Pita 3:18) Gbẹtọ lẹ he tindo agbasalan po ohùn po lẹ ma sọgan nọ olọn mẹ gba. Gbọn fọnsọnku do ogbẹ̀ olọn mẹ tọn dali, Biblu dọ dọ: “Ye do e agbasa jọwamọnọ de mẹ; ye ze e tite agbasa gbigbọnọ de mẹ. . . . agbasalan po ohun po ma sọgan dugu ahọludu Jiwheyẹwhe tọn gba.” (1 Kolintinu lẹ 15:44-50) Gbẹtọ gbigbọnọ lẹ kẹdẹ po agbasa gbigbọ tọn po wẹ sọgan nọ olọn mẹ.
8. Etẹwẹ jọ do agbasa gbẹtọ Klisti tọn go?
8 Eyọn, to whelọnu lo, etẹwẹ jọ do agbasalan Jesu tọn go? Be e ma yin tata wẹ devi lẹ mọ yọdo lọ mẹ do? Ye mọ ẹn domọ, do Jiwheyẹwhe dè agbasa Jesu tọn sẹ wutu. Naegbọn Jiwheyẹwhe do wà ehe? E hẹn nuhe ko yin winwlan do Biblu mẹ di. (Psalm 16:10; Owalọ lẹ 2:31) Gbọnmọ Jehovah mọdọ e yin nuhe jẹ nado dè agbasa Jesu tọn sẹ, yedọ dile e ko basi do dai po agbasa Moṣe tọn po. (Deutelonomi 34:5, 6) Mọga, eyin agbasa lọ ko yin jijodo yọdo lọ mẹ devi Jesu tọn lẹ ma na ko tindo nukunnumọjẹnumẹ etọn dọ e ko yin finfọn sọn oṣiọ lẹ mẹ gba, dile e ko yindọ to whenẹnu ye ma ko yọnpinpẹn onu gbigbọ tọn lẹ tọn to gigọmẹ gba.
9. Nawẹ e yin nuhe yọnbasi gbọn na Tọmasi nado doalọ etọn apa de go to agbasa didiọ Jesu he ye fọnsọnku lọ tọn mẹ?
9 Ṣigba dile e ko yindọ apọsteli Tọmasi ko sọgan zealọ etọn do odò he tin to adaja Jesu tọn mẹ, be enẹ ma ko dohia dọ Jesu yin finfọn po agbasa dopolọ po he mẹ uwọ yin whiwhe do atin go te? Lala, do Jesu diọ agbasa poun wẹ kavi yi agbasalan dè do, dile na angẹli lẹ basi do to hoho dai. Nado sọgan na nujikudo Tọmasi dogbọn mẹhe uwọ yin tọn dali, Uwọ yi agbasa de zan he tindo odò apa he ko ku tọn lẹ to e mẹ. E sọawuhia kavi jlo na taidi, gbẹtọ to gigọ mẹ, he sọgan dùnu bo nùsin, dile na angẹli lẹ basi do mẹhe Ablaham yi jonọ etọn to whedenu.—Gẹnẹsisi 18:8; Heblu lẹ 13:2.
10. Etẹwẹ dohia dọ Jesu ze agbasa jọ agbasa wunmẹ wunmẹ lẹ do?
10 To whenue Jesu sọawuhia hlan Tọmasi to agbasa de mẹ he taidi dopolọ to ehe mẹ Uwọ yin hùhù te, Uwọ ga sọ yi agbasa he gbọnvo lẹ whenuena e to awusọhia hlan hodotọ Etọn lẹ. Gbọnmọ wẹ Malia Magdalene to tintan whẹ do vẹ Jesu do pahọtọ de. To ojlẹ devo lẹ mẹ devi etọn lẹ ma yawu yọnẹn to tintan whenu gba. To ojlẹ helẹ mẹ e ma yin awusọhia mẹdetiti tọn etọn wẹ yinuwa nado do e hia gba, ṣigba hodidọ delẹ kavi nuwiwa de wẹ he ye yọnẹn.—Johanu 20:14-16; 21:6, 7; Luku 24:30, 31.
11, 12. (a) To alọpa tẹ mẹ wẹ Klisti jo aigba do te? (b) Enẹwutu alọpa tẹ mẹ wẹ mí na donukun lilẹgọwa Klisti tọn te?
11 Na azan 40 to fọnsọnku etọn godo, Jesu basi awusọhia agbasalan tọn lẹ hlan devi etọn lẹ. (Owalọ lẹ 1:3) Enẹgodo e wa yi olọn mẹ. Ṣigba mẹdelẹ sọgan kanse: ‘Be angẹli awe he tin to finẹ lẹ ma dọ na apọsteli lẹ dọ Klisti “nasọ lẹgọ wa dile mì mọ ẹn bọ e jei olọn do”?’ (Owalọ lẹ 1:11) Mọwẹ, ye dọ mọ. Ṣigba doayi e go dọ ye dọ mọ “dile mì mọ ẹn,” e ma yin to agbasa dopolọ mẹ gba. Podọ etẹwẹ yin ninọmẹ lọ hetọn Jesu yì do? E yin abọẹ, dohia gbangba tọn de ma tin. Kiki apọsteli etọn lẹ kẹdẹ wẹ yọn nude dogbọn dali etọn. Aihọn ma yọn ẹn.
12 Lẹnnupọn do alọpa he mẹ Biblu basi zẹẹmẹ lehe Jesu jo apọsteli etọn lẹ do bo dokọ olọn do ji: “Le ye to pinpọn, ye ze e yi aga; aslọ sọ yi i sọn nukunmẹ na ye.” (Owalọ lẹ 1:9) Enẹwutu whenuena Jesu jẹ agahomẹ yi ji, aslọ de ze e whla sọn mimọ mẹ na nukun apọsteli etọn lẹ. Jesu he to yiyi lọ, na mọtọn wutu, lẹzun mayinukundomọ hlan ye. Ye ma sọgan mọ ẹn. To whelọnu lo to agbasa gbigbọnọ etọn mẹ e hẹjiyi olọn. (1 Pita 3:18) Gbọnmọ wẹ lilẹgọwa etọn ga na yin to mayinukundomọ mẹ, to agbasa gbigbọnọ de mẹ.
LEHE NUKUN LẸPO MỌ ẸN DO
13. Nawẹ mí sọgan mọnukunnujẹ hogbe lọ mẹ dọ “nukun lẹpo wẹ na mọ” Klisti whenuena e lẹgọwa to aslọ mẹ gbọn?
13 Nawẹ, to whelọnu lo, mí na mọnukunnujẹ hogbe lọ lẹ mẹ gbọn he yin Osọhia 1:7 tọn? To finẹ apọsteli Johanu wlanwe dọ: “Do ayi e go, e ja po aslọ po; nukun lẹpo wẹ na mọ ẹn, ye he sọwhan ẹn lẹ ga: hẹnnu aigba tọn lẹpo wẹ na blawu to e ji.” Tofi Biblu dọho mimọ ẹn tọn, e ma yin po nukun jọ nukun lẹ po wẹ gba, ṣigba to wuntun mẹ kavi nukunnumọjẹnumẹ mẹ. Gbọnmọ, eyin gbẹtọ de yọn whẹho de kavi tindo nukunnumọjẹnumẹ etọn, e sọgan dọ dọ, ‘Yẹn ko mọ ẹn.’ Biblu na nugbo tọn, dọho dogbọn “nukun nuyọnẹn mìtọn tọn” lẹ dali. (Efesunu lẹ 1:18) Enẹwutu hogbe lọ “nukun lẹpo wẹ na mọ ẹn” zẹẹmẹdo dọ mẹlẹpo to whelọnu wẹ na mọnukunnujẹ e mẹ kavi yọnẹn dọ Klisti ko tin tofi.
14. (a) Mẹnu wẹ ye ylọ “mẹhe sọwhan lẹ”? (b) Naegbọn awubla daho nado tin whenuena mẹlẹpo na wá doayi tintin-tofi Klisti tọn go?
14 Omẹ lọ lẹ taun he “sọwhan” Jesu ma sọ tin to ogbẹ̀ to aigba ji ba. Enẹwutu ye nọte na gbẹtọ lẹ, mẹhe gbọn awugblena hodotọ Klisti tọn egbezangbe tọn lẹ dali, hodo walọ gbẹtọ nẹlẹ to owhe kanweko tintan whenu tọn lẹ. (Matiu 25:40, 45) Ojlẹ lọ na wa to madẹnmẹ na Klisti nado hù mẹylankan mọnkọtọn lẹ. Ye ko yin nugbẹna dai jẹnukọn dogbọn ehe lọ dali. Whenuena mẹhùhù ehe na jọ, ye na “mọ” kavi yọn nuhe to jijọ lọ. Podọ awubibla yetọn na yin daho talala!
BE KLISTI NA LẸGỌ WA AIGBA JI WẸ?
15. To aliho tẹ mẹ wẹ hogbe lọ “lẹgọwa” nọ saba nọ yin zinzan te?
15 Nado lẹgọ ma yin whepoponu do zẹẹmẹdo yìyì otẹn tangan de mẹ gba. Gbọnmọ wẹ gbẹtọ he ko jẹazọn lẹ nọ yin didọ gbọn yetọn dali dọ ye ‘gọ do agbasalilo mẹ.’ Podọ togan dai tọn de wẹ yè sọgan dọ dogbọn etọn dali dọ ‘e ko sọ gọ wá ogán ji.’ To ninọmẹ dopolọ mẹ, Jiwheyẹwhe dọ na Ablaham: “Yẹn na lẹgọ wá de we, whenuena osa lọ wa, Sala na tindo visunnu de.” (Gẹnẹsisi 18:14; 21:1) Jehovah sin lilẹgọwa, ma yin lilẹgọwa titengbe tọn gba, ṣigba lilẹ nugodoayi etọn dohlan Sala dè nado wà nuhe e ko dopagbe etọn.
16. (a) To aliho tẹ mẹ wẹ Klisti lẹgọwa aigba ji? (b) Whetẹnu wẹ Klisti lẹgọwa, podọ etẹwẹ jọ to whelọnu?
16 To aliho dopolọ mẹ, Klisti sin lilẹgọwa ma zẹẹmẹdo wiwá etọn tọlọlọ di gbẹtọ de wa aigba ji gba. Kakati mọ, e zẹẹmẹdo dọ uwọ yí huhlọn Ahọluduta tọn dohlan aigba ehe bosọ lẹ nugodoayi etọn dohlan ẹn. E ma yin nuhe jẹ na uwọ dandan nado jo ofin etọn olọn tọn do bosọ jẹte wa aigba ji nado basi ehe gba. Dile na mí ko mọ do to weta dai tọn mẹ, kunnudenu Biblu tọn dohia dọ to owhe 1914 W.M. tọn wẹ ojlẹ Jiwheyẹwhe tọn wá na Klisti nado lẹgọwa bosọ jẹ gandu ji. To whelọnu sọ wẹ awhagbe lọ yin sise to olọn mẹ: “Dinvie wẹ whlẹngan, huhlọn, ahọludu Jiwheyẹwhe mítọn tọn, po huhlọn Klisti etọn tọn po wá.”—Osọhia 12:10.
17. Dile e ko yindọ lilẹgọwá Klisti tọn yin mayinukundomọ, etẹwẹ e na bọ mí nido sọgan yọnẹn dọ e ko lẹgọwa?
17 To whenue lilẹgọwa Klisti tọn ma na yin mimọ po nukun po, be aliho de tin nado namẹ nujikudo etọn dọ e ko jọ nugbo nugbo? Mọwẹ, e tin. Klisti lọsu na “ohia” yinukundomọ de dogbọn ehe dali mí sọgan yọnẹn dọ e ko tin tofi to mayinukundomọ mẹ podọ opodo aihọn tọn ko sẹpọ. Gbọ mí ni gbadopọnna “ohia” nẹ lọ.
[Yẹdide to weda 142]
Klisti na agbasa etọn di avọsinsan de. E ma sọgan sọ gọ ẹ yi gbede bo sọ lẹzun gbẹtọ de gba
[Yẹdide to weda 144, 145]
Naegbọn Malia Magdalene do vẹ Jesu do pahọtọ de to fọnsọnku etọn godo?
Do agbasalan tẹ mẹ wẹ Jesu he yè fọnsọnku lọ biọ to Tọmasi si nado do alọ etọn?
[Yẹdide to weda 147]
Klisti dona lẹgọwa dile e yì sọn aigba ji do. Nawẹ uwọ yì gbọn?