Nawẹ Yẹn Sọgan Hẹn Pipà Wesise Ṣie Tọn Pọnte Gbọn? — WESẸDOTẸN INTẸNẸT JI TỌN Watchtower Tọn

Weta 18

Nawẹ Yẹn Sọgan Hẹn Pipà Wesise Ṣie Tọn Pọnte Gbọn?

TO WHENUENA delẹ to wehọmẹvi bẹjẹeji tọn lẹ yin kinkanse dọ, ‘Etẹwẹ mìwlẹ nọ savò na hugan?’ 51 to kanweko ji dọ dọ, “Pipà wesise tọn lẹ”!

Abajọ pipà wesise tọn lẹ do yin asisa titengbe ayimajai tọn to jọja lẹ ṣẹnṣẹn. Pipà wesise tọn sọgan zẹẹmẹdo vogbingbọn to gbedewema mimọyi po yinyin jijodo godo po ṣẹnṣẹn, to mimọ agbasazọ́n akuẹgegenu po akuẹ vude tọn kẹdẹ po ṣẹnṣẹn, to mimọ pipà mẹjitọ lẹ tọn yí po mimọ homẹgble yetọn yí po ṣẹnṣẹn. Po gbeyiyi po, pipà wesise tọn po mẹtẹ́npọn po tindo otẹn yetọn lẹ. Enẹwutu wẹ, Jesu Klisti nọ saba tẹ́n nukunnumọjẹnumẹ devi etọn lẹ tọn pọ́n to whẹho delẹ mẹ. (Luku 9:18) Podọ dile owe lọ Measurement and Evaluation in the Schools dọ do: “Kọdetọn mẹtẹ́npọn tọn lẹ sọgan do adà huhlọn po awugbopo wehọmẹvi dopodopo tọn lẹ po hia bo yinuwa taidi ojlo mẹwhinwhàn tọn na nupinplọn sọgodo tọn.” Pipà wesise towe tọn sọ nọ wazọ́n nado na mẹjitọ towe lẹ linlẹn delẹ do lehe hiẹ to bibasi do to wehọmẹ—yèdọ dagbe wẹo kavi ylankan.

Jlẹkajininọ Dindin

Nalete, tintin to lẹnpọn mẹ hugan dogbọn pipà wesise tọn dali sọgan hùn aliho na apọṣimẹ flumẹjijẹ tọn bo nọ hẹn agbàwhinwhlẹn fifiẹ tọn wá. Owe dopo do jọja lẹ ji doayi e go dọ wehọmẹvi wehọmẹ daho lẹ tọn na taun tọn sọgan yin “mimọ to nuwiwa agbàwhinwhlẹn tọn mẹ he zinnudo pipà wesise tọn lẹ po tẹnmẹ klasi tọn lẹ po ji hugan nupinplọn.” Taidi kọdetọn de, nado yihodọ sọn hogbe doto William Glasser tọn mẹ, wehọmẹvi lẹ “nọ plọn jẹnukọn to wehọmẹ nado nọ kàn nuhe na yin bibasi to mẹtẹ́npọn whenu se bo nọ . . . plọn adà enẹ lọ kẹdẹ.”

Ahọlu Sọlọmọni gbẹnunamẹ dọmọ: “Yẹn lẹn yankọ lẹpo, po nuyọnẹn azọ́n tọn lẹpo po, dọ ehe wẹ homẹkẹn mẹde tọn sọn kọmẹnu etọn dè. Ovọ́ wẹ ehe ga, homẹgble gbigbọ tọn wẹ.” (Yẹwhehodọtọ 4:4) Agbàwhinwhlẹn fifiẹ tọn, vlavo na nutindo agbasa tọn lẹ kavi mẹpipa wepinplọn tọn lẹ, yin ovọ́. Jọja he dibusi Jiwheyẹwhe lẹ nọ mọ nuhudo lọ nado yí yedelẹ zan to wehọmẹ. Ṣigba kakati nado yí wepinplọn do basi onú titengbe hugan to gbẹzan mẹ, yé nọ doafọna alemọyinu gbigbọmẹ tọn lẹ, bo nọ dotudo Jiwheyẹwhe go nado penukundo nuhudo agbasamẹ tọn yetọn lẹ go.—Matiu 6:33; pọ́n weta 22 do dide yanwle lẹ tọn bibasi glọ.

Yinukọn dogọ, wepinplọn zẹẹmẹdo onú hugan tintindo sọha susu lẹ to mẹtẹ́npọn lẹ mẹ. E zẹẹmẹdo awuwlena nuhe Sọlọmọni ylọ dọ ‘nugopipe lẹnpọn tọn,’ yèdọ azọ́nyinyọnẹn lọ nado yí nudọnamẹ yọyọ lẹ bo dè tadona dagbe, he yọn-na-yizan lẹ sọn e mẹ. (Howhinwhẹn lẹ 1:4) Jọja de he tẹnpọn nado mọ pipà wesise tọn yí gbọn avìdidla, nuhẹn-do-apọn mẹ na whenu gli de dali, kavi etlẹ yin mẹfìnpọn na nugbo tọn ma sọgan plọn lehe yè nọ lẹnnupọn do gbede gba. Podọ etẹwẹ yin dagbe to pipà daho wesise tọn de mimọyi to oplọn nulinlẹn tọn mẹ eyin to nukọnmẹ hiẹ mọ dewe taidi mẹhe ma penugo nado basi nulinlẹn akuẹ de tọn?

Nalete eyin nujọnu dọ hiẹ ni pọ́n pipà wesise tọn lẹ hlan, e mayin opodo de to yedelẹ mẹ gba, ṣigba taidi nuyizan alọgọnamẹnu tọn de nado jlẹ nukọnyiyi towe to wehọmẹ pọ́n. Nalete, nawẹ hiẹ sọgan mọ pipà wesise tọn he sọgbe hẹ nugopipe towe lẹ yí gbọn?

Yí Azọngban na Nupinplọn!

Sọgbe hẹ mẹplọntọ Linda Nielsen, wehọmẹvi he ma tindo nukọnyiyi nọ tẹnpọn nado “gblewhẹdo nuwiwa yido [wehọmẹ] yetọn lẹ tọn tọn to dodonu he zẹ̀ nugopipe yetọn lẹ go: kanbiọ mẹtẹ́npọn he ma sọgbe lẹ, mẹplọntọ he tindo nuvẹun de, tadagbe matindo, sẹgbe, po ninọmẹ aimẹ tọn po.” Nalete, Biblu dọmọ: “Ayiha adidọnọ tọn jlo, e ma sọ tindo nude.” (Howhinwhẹn lẹ 13:4) Mọwẹ, adidọnọ-yinyin nọ saba yin whẹwhinwhẹ́n nugbo na pipà wesise tọn matindo to wehọmẹ.

Nalete, wehọmẹvi dagbe lẹ nọ hẹn azọngban na nupinplọn yetọn. Linlinwe ’Teen tọn dindona kọdetọn dagbe delẹ heyin wehọmẹvi wehọmẹ daho lẹ tọn. Aṣli yetọn? “Mẹwhinwhan mẹdetiti tọn nọ gọalọna we nado to nukọnzindo,” wẹ yin nuhe mẹdopo dọ. “Bibasi todohukanji de na dewe po titobasina ganmẹ towe po,” wẹ yin nuhe mẹdevo dọ. “Hiẹ dona yí nuyanwle lẹ donukọn na dewe,” wẹ yin nuhe mẹdevo sọ dọ ga. Mọwẹ, lehe pipà wesise tọn towe te sinai do adà titengbe de ji, e mayin do onú he zẹ̀ huhlọn towe go gba, ṣigba do HIẸ lọsu ji—yèdọ lehe hiẹ tindo ojlo sinsinyẹn nado plọnnu bo yí dewe zan to wehọmẹ do.

‘Ṣigba Yẹn Nọ Plọnnu Be’

Ehe wẹ yin nuhe jọja delẹ sọgan dọ. Yé nọ tindo numọtolanmẹ dọ yé ko to azọ́nwa jẹ vivọnu huhlọn yetọn tọn ṣigba ma tindo kọdetọn depope gba. Nalete, to owhe vude lẹ die wayi, dodinnanutọ lẹ to wehọmẹ alavọ Stanford tọn mẹ (États-Unis) kanhose wehọmẹvi 770 delẹ bo kàn vivẹnudido he yé tindo numọtolanmẹ dọ yé to bibasi gando azọ́n wehọmẹ tọn yetọn lẹ go sè. Po pọndohlan agọ̀ po, wehọmẹvi he ma tindo pipà wesise tọn sọmọ lẹ lẹndọ yé ko wazọ́n sinsinyẹn hugan mẹdepope nkọtọn! Ṣogan to whenuena aṣa nupinplọn tọn yetọn lẹ yin dogbapọnna, e yin nukunnumọjẹemẹ dọ azọ́ndenamẹ whégbè tọn yetọn bibasi depò susu hugan wehọmẹvi kọdetọn dagbenọ yetọn lẹ.

Etẹwẹ yin nupinplọn lọ? Vlavo hiẹ lọsu ga ma to nuplọn sinsinyẹn dile hiẹ lẹndọ hiẹ to bibasi do gba, podọ diọdo delẹ na tin to titoji. Hosọ de to Journal de la psychologie de l’enseignement [Glẹnsigbe] mẹ dohia dọ “agayiyi ojlẹ he nọ yin yiyizan to azọ́n whégbè tọn he nọ yin didenamẹ sọn wehọmẹ nọ tindo nugandomẹgo dagbe do pipà wesise wehọmẹvi de tọn ji to wehọmẹ daho.” Na nugbo tọn, “po ganhiho 1 jẹ 3 po na azọ́n whégbè tọn he nọ yin ninamẹ sọn wehọmẹ to osẹ dopo mẹ, wehọmẹvi de he madozẹnzẹn nugopipe tọn etọn yido sọgan tindo pipà wesise tọn dopolọ po wehọmẹvi he yọnwe de po he ma nọ wà azọ́n whégbè tọn heyin dide na ẹn sọn wehọmẹ lẹ.”

Apọsteli Paulu to yẹhiadonu liho dona ‘to nútùn agbasa ede tọn’ nado sọgan jẹ yanwle etọn lẹ kọ̀n. (1 Kọlintinu lẹ 9:27) Mọdopolọ hiẹ sọgan wleawuna walọyizan nunọwhinnusẹ́n tọn na dewe eyin televiziọn kavi ayihafẹsẹnamẹnu devo lẹ diọ nugodoayi towe po awubibọ po sọn nupinplọn go. Hiẹ tlẹ sọgan tẹnpọn nado ze ohia de do televiziọn lọ ji he dọmọ, “televiziọn pinpọn matin kakajẹ whenuena azọ́n whégbè tọn heyin didenamẹ sọn wehọmẹ yin bibasi po godo!”

Lẹdo Nupinplọn Towe Tọn

Suhugan mítọn na mọaleyi sọn tintindo otẹn abọẹ tọn de heyin dide dovo na nupinplọn. Eyin hiẹ nọ nọ abò dopolọ mẹ po mẹdevo po kavi eyin otẹn matin to owhé towe gbè, yí dehe tin lọ zan! Vlavo adohọsa kavi abò mẹdevo tọn sọgan yin didohia nado yin otẹn ofi plọnnu te towe na ganhiho dopo kavi to whèjai dopodopo. Kavi taidi obiọ godo tọn de, tẹ́n wehiatẹn otò tọn kavi owhé họntọn de tọn gbè pọ́n.

Eyin e yọnbasi, yí tafo pẹvi kavi tafo daho he tindo otẹn susu de zan to ehe ji hiẹ sọgan mọ awuvivo te nado yí azọ́n towe wà. Ze nuyizan lẹ taidi wekantin po wema lẹ po do alọji bọ hiẹ ma na do nọ to finfọ́n gbọzangbọzan. Podọ, eyin nuhe vẹnamẹ nado dọ, tintindo televiziọn de kavi ladio de to tita na paa tọn nọ wazọ́n sọta ayihazedofidopo, dile mẹyiylọ alokan tọn lẹ kavi dlapọn basinamẹ te do.

Hẹn diun, ga dọ hiẹ tindo miyọ́n he mọnukunnu ganji, bo pé mẹnu. Miyọ́n dagbe nọ dè agbọ́pemẹ nupinplọn tọn pò bo nọ họ́ nukun towe lẹ ga. Podọ eyin e yọnbasi, dindona jẹhọn po yozo abò lọ mẹ tọn po. Abò he fá de nọ namẹ lẹdo nupinplọn tọn dagbe de hugan abò yozonọ de.

Etẹwẹ na taun tọn eyin hiẹ ma tin to ninọmẹ lọ mẹ nado plọnnu ka lo? Gbẹninọ ma nọ saba na mí dotẹnmẹ nado hẹn pekọ wá na ninọmẹ mítọn lẹ. To agbasazọ́n de mẹ, hiẹ dona wazọ́n egbesọegbesọ—vlavo hiẹ tin to ninọmẹ lọ mẹ na ẹn kavi lala. Enẹwutu pọ́n azọ́ndenamẹ sọn wehọmẹ hlan taidi nuwiwa mẹplọnlọ-dido-mẹdetiti go tọn de, yèdọ dlapọn de bibasi na numimọ azọ́n nukọnmẹ tọn de. Tin taidi ajọwatọ de dogbọn dali etọn. Mẹplọntọ de na ayinamẹ dọmọ: “Eyin e yọnbasi, nupinplọn dona yin bibasi to otẹn dopolọ mẹ podọ to ogan dopolọ mẹ to azán lẹpo gbe. Gbọnmọ, nupinplọn gbesisọ tọn na lẹzun aṣa, bo . . . na dè ninọmẹ numaplọn towe tọn pò.”

Aliho Nupinplọn Egbesọegbesọ Towe Tọn

To Filippinu lẹ 3:16 mẹ, Paulu na tuli Klistiani lẹ nado “to zọnlinzin gbọn ojlẹ dopolọ mẹ.” Paulu to hodọ gando ojlẹ gbẹninọ Klistiani tọn go. Ṣigba, aliho egbesọegbesọ tọn de kavi ninọmẹ nulẹ bibasi tọn, lọsu yin alọgọ ga to whenue e wá jẹ aliho nupinplọn towe tọn ji. Di dohia tẹnpọn, nado wleawuna nuhe hiẹ jlo nado plọn. Dapana pinplọn hosọ dopolọ lẹ (taidi jonọgbè awe) to ojlẹ dopolọ mẹ. Basi tito na gbọjẹ kleun to ṣẹnṣẹn hosọ lẹ tọn, titengbe eyin agbàn azọ́ndenamẹ sọn wehọmẹ tọn towe pẹnzin.

Eyin azọ́ndenamẹ towe bẹ́ wehihia susu hẹn, hiẹ sọgan tẹ́n aliho he bọdego helẹ pọ́n. Tintan, DINDONA hosọ towe ganji. Yìnnukun gbọn hosọ heyin didenamẹ lẹ ji, pọ́n hovila lẹ, nudọnamẹ apotin tọn lẹ, po mọmọ po, nado sọgan tindo pọndohlan bladopọ etọn tọn. Bọdego, wleawuna KANBIỌ he sinai do hosọ weta tọn lẹ ji kavi hogo hodidọ tọn lẹ ji. (Ehe nọ hẹn ayiha towe tin to nuhe hiẹ hia ji.) Todin HIA, bo to gblọndo lẹ din do kanbiọ ehelẹ ji. Podọ whenuena hiẹ dotana hukan kavi adà dopodopo tọn, VỌ́ẸDỌ, kavi dọna dewe sọn apọnmẹ, nuhe hiẹ ko hia, to ma pọ́n owe lọ mẹ. To whenuena hiẹ ko dotana azọ́ndenamẹ lọ lẹpo godo, basi DLAPỌN gbọn nukunyìn do hosọ lọ lẹ jí bo tẹ́n apọn towe pọ́n na adà dopodopo. Mẹdelẹ sọalọakọn dọ aliho ehe ko gọalọna wehọmẹvi lẹ nado flin kanwe to kanweko ji nuhe yé ko hia tọn!

Mẹplọntọ de dọ dogọ dọmọ: “E yin onú titengbe nado hẹn wehọmẹvi lọ yọnẹn dọ nugbo ma nọ tin na ede gba ṣigba nọ saba gando nudọnamẹ devo go.” Enẹwutu, tẹnpọn nado yí nuhe hiẹ plọn jlẹdo nuhe hiẹ ko yọnẹn dai bo ko tindo numimọ etọn go. Dindona nuhọakuẹ yọn-na-yizan nuhe hiẹ to pinplọn tọn.

Po awuvivi po, jọja budisi Jiwheyẹwhe tọ tindo alemọyinu taun de to ehe mẹ. Na Biblu dọmọ: “Dodo oyọnẹn tọn wẹ osi [Jehovah, NW ] tọn.” (Howhinwhẹn lẹ 1:7) Taidi apajlẹ, pinplọn osẹ́n agbasa tọn lẹ, sọgan taidi azọ́n vẹawu taun de. Ṣigba yinyọnẹn dọ gbọn nudida dali ‘jẹhẹnu mayọnmọ Jiwheyẹwhe tọn lẹ yin mimọ hezeheze’ nọ na zẹẹmẹ dogọ hlan nuhe hiẹ plọn. (Lomunu lẹ 1:20) Whenuho sọ nọ dọho do azọ́n gbangba lẹndai Jehovah tọn lẹ ji. Huhlọn Ṣinawe aihọn tọn lẹ (he bẹ́ Anglo-Amérique dintọn hẹn) yin hodọdeji tlọlọ to Biblu lọsu mẹ!—Osọhia 17:10; Daniẹli, weta 7.

Gbọn yiyi nuhe hiẹ ko plọn jlẹdo nuhe hiẹ ko yọnẹn go kavi gando yise Klistiani towe tọn go, nugbo na jẹ zizẹemẹdo nude na we ji, yèdọ oyọnẹn nọ whẹ́n biọ nukunnumọjẹnumẹ mẹ. Podọ dile Sọlọmọni doayi e go do, “Nuyọnẹn ma sinyẹnawuna mẹhe zin gba.”—Howhinwhẹn lẹ 14:6.

‘Mẹtẹnpọn Na Tin To Osẹ He Ja’

Hogbe ehelẹ ma dona hẹnwe dibu gba. Tintan whẹ́, tẹnpọn nado yọnẹn sọn zẹẹmẹ mẹplọntọ towe tọn mẹ mẹtẹ́npọn alọpa he tọn e na yin, mẹtẹ́npọn wekinkan tọn kavi mẹtẹ́npọn onú de-jẹ-deji tọn. Humọ, azán lẹ jẹnukọnna mẹtẹ́npọn lọ, dotoai na nudọnamẹ he go yè deji do gando onú he na sọawuhia to mẹtẹ́npọn lọ mẹ go. (“Onú agokun he bọdego ehe yin onú titengbe taun” kavi “Hẹn diun nado flin enẹ” yin onú agokun ayidego tọn lẹ, wẹ linlinwema Senior Scholastic tọn dọ.) Enẹgodo, gbadopọnna kandai towe lẹ, owe towe lẹ, po azọ́ndenamẹ whégbè tọn towe lẹ po.

“Ogàn na gàn ogàn: mọwẹ sunnu nọ gàn nukunmẹ họntọn etọn tọn,” wẹ yin nuhe Sọlọmọni flin mí. (Howhinwhẹn lẹ 27:17) Vlavo họntọn de kavi dopo to mẹjitọ towe lẹ mẹ na yin homẹhunnọ nado kàn kanbiọ lẹ sè we kavi dotoai hlan we dile hiẹ to vivọ nuhe yin pinplọn to klasi lẹ dọ do. Podọ ozán lọ jẹnukọnna mẹtẹ́npọn lọ, na gbọjẹ dewe bo tẹnpọn nado tindo amlọn didọ dagbe zanmẹ tọn de. “Mẹnu wẹ sọgan yí vivẹnu do yí awàgba dopo dogọ whinwhẹ́n etọn to mì mẹ?” wẹ Jesu kanse.—Matiu 6:27.

Awugbopo

Awugbopo to mẹtẹ́npọn de mẹ—titengbe to vivẹnu sinsinyẹn dido godo nado mọ kọdetọn dagbe to e mẹ—sọgan gbà osí mẹdetiti towe tọn kija. Ṣigba mẹplọntọ Max Rafferty flinnu mí dọmọ: “Dile e na dẹnsọ bọ mí na gbẹ́ po to ogbẹ̀, mí nọ mọ pipà yí do nuhe mí yọnẹn ji, lehe kọdetọn mítọn yin dagbe do sọ . . . Wehọmẹ de he nọ sisẹ yọpọvu lẹ biọ lẹnpọn lọ mẹ dọ ogbẹ̀ na yín onú sinsinyẹn husudo tọn poun e mayin wehọmẹ de gba. E yin azọ́nwhé odlọ tọn de.” Whiwhẹ tintindo to awugbopo mẹtẹ́npọn de tọn mẹ sọgan yin nuhọakuẹ ganji eyin e sisẹ we nado plọnnu sọn nuṣiwa towe lẹ mẹ bo basi vọjlado.

Ṣigba etẹwẹ dogbọn pinpannukọn mẹjitọ he hiẹ dowinyan lẹ po kalti gbedido ylankan tọn de po dali? Obu enẹ bibasi tọn to whedelẹnu ko jì ovi ayiha gigẹdẹ he gblo lẹ tọn. “Yẹn nọ saba ze kalti gbedido tọn ṣie do tafo adohọsa tọn ji, bo nọ yì abò aga tọn mẹ to petlezìn ji bo nọ tẹnpọn nado damlọn jẹ azán awetọ gbè,” wẹ jọja dopo flin. “Nuhe yẹn nọ basi wẹ, nado nọte kakajẹ nukunwhiwhe godo tọn mẹ nado do e hia onọ̀ ṣie” wẹ devo dọ. “Yẹn nọ ze e yì na ẹn to afọnnu to whenuena ewọ wleawu fó nado yì agbasazọ́n mẹ bọ yẹn nọ dọmọ, ‘E die, e jẹ dọ hiẹ ni doalọ e mẹ.’ Ewọ ma nọ tindo tẹnmẹ nado yinuwa hẹ mi gba”—yèdọ e ma tlẹ yin to ojlẹ enẹ mẹ gba. Jọja delẹ ko tlẹ kàn nuhe sọgan blẹ mẹ do kalti pipà wesise wehọmẹ tọn yetọn lẹ ji!

Nalete, mẹjitọ towe lẹ tindo jlọjẹ lọ nado yọ́n lehe hiẹ to bibasi do to wehọmẹ. To jọwamọ liho, yé donukun dọ pipà wesise tọn towe lẹ ni sọawuhia to nugopipe towe lẹ mẹ, podọ eyin pipà towe lẹ to wehọmẹ yido, hiẹ sọgan donukun nado mọ mẹplọnlọ he jẹnamẹ dagbe yí. Enẹwutu yin nugbonọ hẹ mẹjitọ towe lẹ. Podọ “sè mẹplọngbe otọ́ towe tọn, a gbẹ́ osẹ́n onọ̀ towe tọn dai blo.” (Howhinwhẹn lẹ 1:8) Eyin hiẹ lẹndọ nususu yin nukundo to hiẹ si, dọhodeji po yé po.—Pọ́n owe-to-wemẹ ehe hosọ etọn yin “Nawẹ Yẹn Sọgan Dọna Mẹjitọ Ṣie lẹ Gbọn?” to weta 2 mẹ.

Dile pipà wesise tọn lẹ yin titengbe do sọ, yé ma yin opodo whẹdida tọn do nuhọakuẹ-yinyin towe ji taidi gbẹtọ de gba. Etomọṣo, yí dotẹnmẹ ojlẹ he hiẹ tin to wehọmẹ tọn zan, bo plọn onú susu dile hiẹ sọgan basi do. Na paa tọn vivẹnudido enẹ na sọawuhia to pipà wesise tọn towe lẹ mẹ he na hẹn hiẹ—po mẹjitọ towe lẹ po—tindo numọtolanmẹ homẹhun po pekọ tọn po.

Kanbiọ Hodọdopọ Tọn Lẹ

◻ Lẹndai tẹwẹ pipà wesise tọn lẹ nọ wazọ́n na, podọ naegbọn e do yin onú titengbe nado tindo pọndohlan jlẹkaji tọn na yé?

◻ Naegbọn e do yin nujọnu dọ hiẹ dona yí azọngban mẹdetiti tọn na nupinplọn?

◻ Etẹwẹ yin onú delẹ nado gbadopọnna dogbọn kikẹalọyi nuwiwa to wehọmẹ godo lẹ dali?

◻ Etẹwẹ yin aliho delẹ to ehe mẹ hiẹ sọgan hẹn pipà wesise tọn towe lẹ pọnte te?

◻ Nawẹ hiẹ sọgan wleawuna mẹtẹ́npọn lẹ gbọn?

◻ Nawẹ hiẹ na pọ́n awugbopo gbọn, podọ be awugbopo mọnkọtọn dona yin zizéwhla sọn mẹjitọ towe lẹ dè wẹ?

[Nudọnamẹ tangan lẹ to weda 141]

Jọja de he nọ tẹnpọn nado mọ pipà wesise tọn yí gbọn avìdidla, nuhẹn-do-apọn mẹ na whenu gli de, kavi etlẹ yin mẹfìnpọn na nugbo tọn ma sọgan plọn lehe yè nọ lẹnnupọn do gbede gba

[Apotin/Yẹdide to weda 144, 145]

Etẹwẹ Dogbọn Nuwiwa Wehọmẹ Godo Tọn lẹ Dali?

Susu gbẹtọ jọja lẹ tọn nọ mọdọ nuwiwa wehọmẹ godo tọn lẹ nọ na yé numọtolanmẹ wadotana tọn. “Diblayin ogbẹ́ lẹpo mẹ wẹ yẹn tin te,” wẹ visunnu dopo sọn Baltimore, Maryland (États-Unis) flin. “E nọ hẹn mi tindo numọtolanmẹ dagbe nado wazọ́n po nuhe yẹn yiwanna lẹ po. Yẹn tin to ogbẹ́ mọto kuntọ lẹ tọn mẹ na yẹn nọ duvivi mọto lẹ jijlado tọn wutu. Yẹn yiwanna zomọ nudọnamẹ-sẹdo tọn lẹ, enẹwutu yẹn kọnawudopọ hẹ ogbẹ́ enẹ. Yẹn yiwanna hànjinu lẹ, enẹwutu yẹn kọnawudopọ hẹ ogbẹ́ enẹ.” Wehọ daho mẹvi lẹ na taun tọn nọ yin tudohomẹna nado tindo mahẹ to nuwiwa wehọmẹ godo tọn lẹ mẹ.

Ṣigba, nukunmọnu ahọlu tọn heyin otò États-Unis tọn de—yèdọ mẹhe ewọ lọsu ko yin mẹplọntọ de pọ́n—dọna Réveillez-vous! dọmọ: “Vlavo wehọmẹvi lẹ nọ yí whenu susu zan to nuwiwa aihundida lanmẹyiya tọn lẹ mẹ hugan azọ́n wehọmẹ tọn, he nọ hẹn ẹn vẹawu na yé nado tindo gbedewema.” Mọwẹ, e ma nọ bọawu nado hẹn jlẹkaji go to whenuena e wá jẹ whẹho nuwiwa aihundida lanmẹyiya tọn lẹ ji gba. Viyọnnu de he oyín etọn nọ yin Cathy he ko nọ gbá bọlu to bọlu-hògbẹ́ softball wehọmẹ lọ tọn mẹ dọmọ: “To bọlu-hihò lọ godo, agbọ́ nọ pé mi susu nado basi onú devo depope. Azọ́ndenamẹ wehọmẹ tọn ṣie yin gingandego. Enẹwutu yẹn ma ze yinkọ dai na ẹn to owhe ehe mẹ gba.”

Owùnu gbigbọmẹ tọn sọ tin ga. Dawe Klistiani de he pọ́n godo hlan owhe jọja mẹ etọn lẹ tọn dọmọ: “Yẹn lẹndọ yẹn sọgan kọ̀n nuwiwa atọ̀n dopọ wẹ sin: yèdọ azọ́n wehọmẹ tọn, zepọn bọlu gbigbá tọn po bọlu-hògbẹ́ po, gọna nuwiwa gbigbọmẹ tọn lẹ. Ṣigba adà gbẹzan gbigbọmẹ ṣie tọn nọ yin avọ́sanna to whedepopenu he atọ̀n lẹ sọta yede.”

Jọja Thierry, mẹhe biọ ogbẹ́ aihundida lanmẹyiya tọn awe mẹ to wehọmẹ, yigbe dọmọ: “Yẹn ma sọgan nọ yì opli lẹ to Plitẹnhọ [Ahọluduta] lọ tọn mẹ [na ayinamẹ gbigbọmẹ tọn] gba na to mardi mí nọ tọnyì todaho lọ mẹ, jeudi mí nọ tọnyì todaho lọ mẹ, samedi mí nọ tọnyì todaho lọ mẹ bo ma na lẹkọ kakajẹ ogàn awe mẹ to afọ́nnu gba.” Nalete “nuyiwa lanmẹyiya agbasa tọn yin alemọyinu na whenu vude,” eyin onú tangan nado flin dọ “jijọ-di-Jiwheyẹwhe yin alemọyinu na onú lẹpo.”—1 Timoti 4:8.

Lẹnnupọn, do owù walọ dagbe tọn lẹ ji ga. Be hiẹ na to gbẹdo hẹ họntọn dagbe he na tindo nuyiwadomẹji walọ dagbe tọn lẹ ya? Etẹwẹ na yin hosọ hodọdopọ lọ tọn? Be nuyiwadomẹji bọlu-hògbẹ́ lẹ tọn kavi ogbẹ́ de tọn na tindo nugandomẹgo he ylan do ji we ya? “Ogbẹ́ ylankan nọ hẹn walọ dagbe gble,” wẹ 1 Kọlintinu lẹ 15:33 dọ.

Po awuvivi po, jọja susu to Kunnudetọ Jehovah Tọn lẹ ṣẹnṣẹn ko dè nado yí whenu wehọmẹ godo tọn yetọn zan na onú he yin alemọyinu tlala hugan aihundida lanmẹyiya tọn lẹ: yèdọ alọgigọna mẹdevo lẹ nado yọ́n Mẹdatọ lọ. Kọlọsinu lẹ 4:5 na ayinamẹ dọmọ: “Mì nọ zinzọnlin to nuyọnẹn mẹ hlan yé he tin to gbonu lẹ, na mì ni sọ nọ basi ofligọ ojlẹ tọn.”

[Yẹdide to weda 143]

Wehọmẹvi lẹ nọ saba suahọ walọyizan numaplọn tọn yetọn lẹ . . . po awugbopo pipà wesise wehọmẹ tọn lẹ po

[Yẹdide to weda 146]

Hinhẹn nuwiwa wehọmẹ godo tọn lẹ po azọ́ndenamẹ whégbè tọn sọn wehọmẹ po do jlẹkaji ma bọawu gba

[Yẹdide to weda 148]

Mẹjitọ lẹ dona gblehomẹ do kalti gbedido ylankan tọn de go janwẹ. Ṣigba eyin hiẹ lẹndọ yé to onú susu donukun to dewe, dọhodeji hẹ yé