Weta 37

Naegbọn Yẹn Mado Sọgan Nọ Tindo Ojlẹ Ayajẹ Tọn Whladopodopo?

TO WHÈJAI vendredi tọn lẹ, Paulinea ko nọ yì opli Klistiani tọn lẹ. E nọ duvivi hodọdopọ lọ lẹ tọn, ṣigba to whedelẹnu e nọ gblehomẹ na nugbo lọ dọ e nọ to finẹ bọ wehọmẹvi etọn lẹ nọ tọ́nyi na ojlẹ ayajẹ tọn tintindo.

To whenuena opli fó, Pauline na zẹ̀ lẹdo he jọja lẹ nọ nọwhẹ̀ te de to whenuena e lẹkọja whégbè. E flin dọmọ: “Yin dindọndogo gbọn nuhiho awhá lélé po hinhọ́n mlanmlan lẹ po dali, yẹn nọ tẹ́ awọntin ṣie do fleṣe go dile mí to finẹ gbọn wá jei po jeje po nado pọ́n awuvivi he yé na ko to tintindo.” To madẹnmẹ, ojlo etọn nado duvivi ede tọn po họntọn etọn lẹ po wá lẹzun onú titengbe hugan de to gbẹzan etọn mẹ.

Taidi Pauline, hiẹ sọgan tindo numọtolanmẹ to whedelẹnu dọ na hiẹ yin Klistiani wutu, hiẹ to gbigbọ nude go. Hiẹ jlo nado pọ́n aihundida televiziọn tọn he mẹdevo lẹpo to hodọ dogbọn dali etọn enẹ, ṣigba mẹjitọ towe lẹ dọ e gọna danuwiwa tlala. Hiẹ jlo nado yì nọwhẹ̀ to atinsá po wehọmẹvi towe lẹ po, ṣigba mẹjitọ towe lẹ ylọ yé dọ “ogbẹ́ ylankan.” (1 Kọlintinu lẹ 15:33) Hiẹ jlo nado yì agọ́ enẹ jí ehe wehọmẹvi towe lẹpo na yì, ṣigba Papa po Mama po dọ lala.

E taidi dọ wehọmẹvigbẹ́ towe lẹ nọ to yigọyigọ ji dile e jlo yé do, bo nọ to ohunhiho po agọ́ lẹpo tẹnmẹ yì kakajẹ wunkinkẹn matin anademẹ mẹjitọ yetọn lẹ tọn. Hiẹ sọgan to awuwhàn do mẹdekannujẹ yetọn go. E ma yindọ hiẹ jlo nado wà nuhe ylan depope wẹ gba. Hiẹ jlo nado tindo ojlẹ ayajẹ tọn sọn ojlẹ de mẹ jẹ devo mẹ poun wẹ.

Ayidedai—Pọndohlan Jiwheyẹwhe Tọn

Tindo jide dọ nudepope ma ylan to jijlo nado duvivi dewe tọn mẹ gba. To popolẹpo mẹ, “Jiwheyẹwhe ayajẹ tọn” wẹ Jehovah yin. (1 Timoti 1:11, NW) Podọ gbọn dawe nuyọnẹntọ lọ Sọlọmọni dali, E dọmọ: “Jọja lẹ, mì duvivi jọja whenu mìtọn. Mì yin ayajẹnọ to whenue mì gbẹ́ tin to ovú. Mì wà nuhe mì jlo nado wà, bo doafọna ojlo ahún mìtọn mẹ tọn.” Ṣigba, Sọlọmọni gbẹnunamẹ to enẹgodo dọmọ: “Mì flindọ Jiwheyẹwhe na dawhẹ na mì na nudepope he mì wà.”—Yẹwhehodọtọ 11:9, 10, Français courant.

Yinyọnẹn dọ hiẹ na dogbe na Jiwheyẹwhe na nuyiwa towe lẹ ze ayidedai do otẹn he gbọnvo pete mẹ. Na to whenuena e yindọ Jiwheyẹwhe ma gblewhẹdo mẹde na tintindo ojlẹ ayajẹ tọn, e ma kẹalọyi ‘wanyina aṣọ́ tọ́,’ mẹhe nọ nọgbẹ na ojlẹ ayajẹ tọn he na bọdego kẹdẹ. (2 Timoti 3:1, 4) Naegbọn ehe do yinmọ? Lẹnnupọn dogbọn Ahọlu Sọlọmọni dali. To yiyi adọkunnu susugege etọn lẹ zan dali, e dọ́ nuhe sọgan yin gbẹdudu gbẹtọvi tọn lẹpo pọ́n. E dọmọ: “Onú depope nukun ṣie jlo yẹn ma yí whla do e; yẹn ma sọ whlẹn onú ayajijẹ tọn de do ayiha ṣie.” Kọdetọn lọ? “Doayi e go, ovọ́ wẹ popo lẹpo, podọ homẹgble gbigbọ tọn, alè de ma tin to owhè glọ.” (Yẹwhehodọtọ 2:10, 11) Mọwẹ, Jiwheyẹwhe yọnẹn dọ yigodo-yinukọn, gbẹzan gbẹdudu-dindin tọn de nọ jó we do ovọ́ po flumẹjijẹ kẹdẹ po mẹ.

Jiwheyẹwhe sọ biọ ga dọ hiẹ ni nọ kada na walọyizan mẹhẹnflu tọn lẹ, taidi amasin adínọ ṣiṣizan po zanhẹmẹ jẹnukọnna alọwle po. (2 Kọlintinu lẹ 7:1) Ṣogan, suhugan nuhe jọja aflanmẹ lẹ nọ wà taidi aihundida sọgan dekọtọn do yinyin wiwle to walọ ehelẹ mẹ. Di apajlẹ, viyọnnu dopo, basi dide nado yì agọ́dutẹn wehọmẹvi hatọ etọn delẹ tọn he mayin nukunpedego gbọn mẹho depope dali. “Nuhiho he to tintọnsọn hànjinu lọ mẹ sẹhundaga, wedudu madoalọte, kọfanamẹnu dagbe lẹ po nukiko awhá lélé lẹ po,” wẹ e flin. Ṣigba to enẹgodo, “mẹde hẹn núkàn wá. To enẹgodo wẹ ahàn sinsinyẹn wá. To ojlẹ enẹ mẹ wẹ onú lẹpo biọ bẹwlu mẹ.” E dekọtọn do walọ mawé zanhẹmẹ tọn mẹ. Viyọnnu lọ yigbe dọmọ: “Sọn whenẹnu gbọ́n yẹn ko yin todido matindotọ po ayimajainanọ po.” Matin nukunpedonugo mẹho lẹ tọn, e na bọawu na opli mọnkọtọn lẹ nado lẹzun “agọ́ ylankan lẹ,” kavi paṣadudu tọn!—Galatianu lẹ 5:21, Byington.

Abajọ mẹjitọ towe lẹ sọgan yin ahunmẹduna taun gando lehe hiẹ zan ojlẹ vivomẹninọ towe tọn do, vlavo hẹnalọdotena fie hiẹ sọgan yì po mẹhe hiẹ sọgan kọnawudopọ hẹ lẹ po. Linlẹn he tin to godo na nuwiwa yetọn? Nado hẹnwe setonuna avase Jiwheyẹwhe tọn: “Họ̀n awubla sẹ̀ sọn ayiha towe mẹ, bosọ dè oylan sọn agbasa towe go: Na ovú po yọpọ whenu po ovọ́ wẹ yé.”—Yẹwhehodọtọ 11:10.

Be Hiẹ nọ whànwu Gbẹdudu-dintọ lẹ Wẹ Ya?

E bọawu nado wọnji ehe lẹpo go bo whànwu do mẹdekannujẹ he e taidi dọ jọja devo lẹ nọ duvivi etọn. Pauline doalọtena opli Klistiani tọn lẹ yìyì bo biọ ogbẹ́ gbẹdudu-dintọ lẹ tọn mẹ. “Yẹn mọ dee to wiwà onú agọ̀ he yẹn ko yin nugbẹna ma nado wà lẹpo,” wẹ e flin. Gbẹdudu zẹjlẹgo Pauline tọn to godo mẹ dekọtọn do wiwle etọn po zize e do wehọmẹ viyọnnu tasinyẹntọ lẹ tọn po mẹ!

To ojlẹ dindẹn die wayi kinkantọ Psalm 73 tọn tindo numọtolanmẹ he yin dopolọ po Pauline tọn lẹ po. “Yẹn ko to awuwhàn hẹ awagundotọ lẹ, whenuena yẹn mọ jijọho mẹylankan lẹ tọn,” wẹ ewọ yigbe etọn. E tlẹ jẹ ayihaawe tindo ji na nuhọakuẹ-yinyin gbẹninọ gbọn nunọwhinnusẹ́n dodo tọn lẹ dali. “Nugbo, ovọ́ wẹ yẹn klọ́ ayiha ṣie, bosọ klọ́ afọ ṣie to homẹvọ mẹ,” wẹ e dọ. Ṣigba enẹgodo e tindo wuntuntun he siso de: Mẹylankan lẹ tin to “ofi titlẹ,” bo to zọnlinzin jàujàu sọyi nugbajẹmẹji kọ̀n!—Psalm 73:3, 13, 18.

Pauline plọn ehe—to aliho sinsinyẹn mẹ. To aihọn mẹ titlọ biọ etọn godo, e basi diọdo niyaniya tọn lẹ nado sọgan vọ́ nukundagbe Jiwheyẹwhe tọn mọ. Hiẹ, to alọ devo mẹ, ma dona jiya mẹwiwle tọn, bẹ́ azọ̀n he nọ wá gbọn zanhẹmẹ dali lẹ, kavi lùn awufiẹsa amasin adínọ jijodo tọn lẹ tọ́n nado mọ dọ nuhe ‘ojlẹ awuvivi tọn’ nọ yí to mẹsi sù tlala gba. Aliho dagbe, he jlọmẹdote susu lẹ tin nado duvivi mẹde tọn matin owù mọnkọtọn lẹ. Etẹwẹ yin delẹ to yé mẹ?

Ojlẹ Ayajẹ Tọn Dagbe Lẹ

Dogbapọnnanu jọja Amérique tọn lẹ dohia dọ jọja aflanmẹ tọn lẹ “nọ duvivi jogbé-yìyì ojlẹ de mẹ jẹ devo mẹ tọn po nuwiwa whẹndo tọn lẹ po.” Onú lẹ wiwà dopọ taidi whẹndo de e ma yindọ e nọ hẹn awuvivi wá kẹdẹ wẹ gba ṣigba sọgan yidogọna kọndopọ whẹndo tọn.

Ehe zẹẹmẹdo hugan televiziọn pinpọn dopọ poun. Doto Anthony Pietropinto dọmọ: “Nuhahun he tin to televiziọn pinpọn mẹ wẹ yindọ, whenuena e sọgan yin wiwà to nukun mẹdevo lẹ tọn mẹ, na titengbe tọn nuwiwa mẹdeklandovo tọn wẹ e yin. . . . Ṣogan, onú kleunkleun lẹ wiwà taidi aihundida lanmẹyiya họglọ tọn lẹ, bọlu gbigbá họgodo tọn lẹ, vivi nudida tọn tintindo whẹwhẹ, yanwle alọnuzọn pinplọn tọn lẹ, po wehihia gbezeyiaga tọn po na titengbe tọn nọ na alọgọ dotẹnmẹ hundote tọn lẹ na hodọdopọ, gbekọndopọ, po huhlọn nuyọnẹn hinhẹngblodeji po hugan whẹndo egbezangbe tọn he nọ tin to lẹnpọn sisosiso mẹ po televiziọn po.” Dile Jean, otọ́ ovi ṣinawe tọn, dọ do: ‘Yèdọ agbàji ziza kavi nusado ohọ sọgan vivi to whenuena eyin wiwà taidi whẹndo de.’

Eyin whẹndo towe ma ko to onú mọnkọtọn lẹ wà dopọ todin, ze afọdide tintan bo na ayinamẹ etọn mẹjitọ towe lẹ. Tẹnpọn nado nọ dè linlẹn he vivinamẹ bo fọ́n ojlo dote lẹpo na jogbé-yìyì kavi yanwle whẹndo tọn lẹ tọ́n.

Ṣigba, hiẹ ma dona tin po mẹdevo lẹ po to whepoponu, nado duvivi dewe tọn gba. Marie, jọja de he nọ yí sọwhiwhe do nọ payi gbẹdido etọn go, ko plọn nado duvivi ojlẹ etọn tọn ewọ ṣokẹdẹ. “Yẹn nọ hò piano po violon po, podọ yẹn nọ yí ojlẹ delẹ zan nado nọ plọn yé,” wẹ e dọ. Mọdopolọ Mélissa, viyọnnu aflanmẹ devo dọmọ: “Yẹn nọ yí whenu zan to ojlẹ delẹ mẹ nado nọ kàn otàn lẹ kavi ohó milomilo lẹ na awuvivi ṣie titi tọn.” Hiẹ lọsu sọgan plọn nado yí ojlẹ zan po alemọyi po gbọn awuwlena azọ́nyinyọnẹn lẹ taidi wehihia, atinpipa, kavi hànjinu lẹ hihò dali.

Pipli Klistiani Tọn Lẹ

Sọn ojlẹ de mẹ jẹ devo mẹ, e sọ nọ yin ayajẹnu nado pli po họntọn lẹ po. Podọ to awa susu lẹ ji nuwiwa dagbe susu lẹ wẹ tin he hiẹ sọgan duvivi etọn. Aihun bọlu yinyin gbọn atin whégbè tọn lẹ ṣenṣen, wezunhinhọn po owhlẹ he tindo kẹkẹfọ to oglọ po, kẹkẹ-afọ tọn kùnkùn, bọlu he nọ yin hiho po atin po, gọna bọlu odọ tọn yin nuwiwa he gbayipe to Agewaji Amelika tọn. Hiẹ lọsu sọgan yidogọna nuwiwa lẹ gbọn nuhoho-bẹsẹdotẹn de kavi kanlin pọntẹn de didla-pọn dali. Podọ, mọwẹ, otẹn pipli tọn de tin fie yè na hò hànjigbán lẹ kẹdẹ kavi aihun televiziọn dagbe tọn lẹ pinpọn po hagbẹ jọja Klistiani tọn lẹ po.

Hiẹ tlẹ sọ sọgan kanse mẹjitọ towe lẹ nado gọalọna we nado basi tito pipli to pọmẹ he yin anadena ganji de. Hẹn ẹn tindo awuvivi gbọn tito nuwiwa susu lẹ tọn bibasi dali, taidi aihundida lanmẹyiya ogbẹ́ tọn, po hànjiji pọmẹ tọn po. Eyin delẹ to họntọn towe lẹ mẹ tindo nunina nuhiho tọn, vlavo yé sọgan yin linlẹndiọna nado basi i vude. Núdùdù dagbe sọ nọ yidogọna nuwiwa de, ṣigba e ma dona yin yẹyiwlena zẹjlẹgo kavi vẹahi gba. To whedelẹnu jonọ lẹ sọgan hẹn núdùdù voovo lẹ wá.

Be aihundatẹn kavi lẹdo aihundida tọn de ka tin sẹpọ he nọ na dotẹnmẹ aihundida kavi tọ̀lilẹ ya? Naegbọn hiẹ mado basi tito ayidedai pọmẹ tọn? Dogọ, whẹndo lẹ sọgan tindo mahẹ to hinhẹn núdùdù lẹ wá na e nido yindọ mẹde mayin hinhẹn pẹnagbanna to akuẹzinzan liho.

Jlẹkajininọ wẹ họ̀nhungan lọ. Nuhiho ma dona yin awhá lélé tọn nado sọgan duvivi etọn gba, mọjanwẹ wedudu ma dona yin bibasi po zingidi po kavi po zanhẹmẹ po nado yin awuvivinu gba. Mọdopolọ, aihundida lanmẹyiya gbonu tọn lẹ sọgan yin vivi etọn dù matin nudindọ̀n egblemaku tọn lẹ. Ṣogan, mẹjitọ dopo na linlin dọmọ: “To ojlẹ delẹ mẹ jọja delẹ nọ dọ̀nnu, yèdọ nọ dibla hoavun.” Hẹn nuwiwa mọnkọtọn lẹ tindo awuvivi gbọn hihodo ayinamẹ Biblu tọn lọ nado dapana ‘nudindọn po ode awetọ po’ dali.—Galatianu lẹ 5:26.

Mẹnu wẹ hiẹ dona basi oylọna? Biblu dọmọ, “Mì yiwanna mẹmẹsunnu lẹ.” (1 Pita 2:17) Naegbọn hiẹ nado hẹn pipli towe lẹ pote do hagbẹ towe lẹ kẹdẹ ji? Hẹn gbẹdido towe lẹ gblo. (Yijlẹdo 2 Kọlintinu lẹ 6:13 go.) Mẹjitọ dopo doayi e go dọmọ: “Dile etlẹ yindọ, mẹhomẹ lẹ ma nọ saba tindo mahẹ to delẹ to nuwiwa lọ lẹ mẹ, yé nọ duvivi wiwá po pinpọn lehe onú lẹ to yìyì do po tọn.” Tintin to finẹ mẹhomẹ lẹ tọn nọ saba hẹnalọdotena onú lẹ ma nado yin wiwà zẹjlẹgo. Ṣigba, e ma yọnbasi, nado basi oylọ na “mẹmẹsunnu” lẹpo wá pipli dopo tẹnmẹ gba. Gbọnvo na ehe, opli he whè lẹ nọ bọawu nado deanana.

Pipli Klistiani tọn lẹ sọ nọ ze dotẹnmẹ hundote lọ dai nado na tuli ode awetọ to gbigbọmẹ. Nugbo, jọja delẹ tindo numọtolanmẹ dọ yíyí onú gbigbọmẹ tọn lẹ gọna pipli de nọ dè vivi he tin to e mẹ sẹ̀. “To whenuena mí tindo pipli de,” wẹ visunnu Klistiani dopo wule dọ, “ ‘Sinai, dè Biblu towe tọ́n, bo dà aihun Biblu tọn lẹ,’ wẹ e nọ yin.” Etomọṣo, psalmkantọ lọ dọmọ: “Donanọ wẹ omẹ . . . [he] homẹhunhun etọn tin to osẹ́n Oklunọ tọn mẹ.” (Psalm 1:1, 2) Hodọdopọ lẹ—kavi etlẹ yin aihundida lanmẹyiya tọn lẹ—he sinai do Biblu ji sọgan vivi taun. Vlavo hiẹ dona hẹn oyọnẹn Biblu tọn towe gblodeji nado sọgan tindo mahẹ to gigọ́mẹ.

Linlẹn devo wẹ yin nado dike na mẹsusu ni na numimọ lehe yé lẹzun Klistiani gbọn. Kavi yí zohunhun po nukiko po gọna gbọn oylọ bibasi na mẹdelẹ nado dọ otangblo lẹ dali. Ehelẹ nọ saba plọnmẹ nupinplọn nuhọakuẹ lẹ. Delẹ to weta owe ehe tọn lẹ mẹ tlẹ sọgan yin dodonu lọ na hodọdopọ hagbẹ tọn he vivinamẹ to pipli de tẹnmẹ.

Hẹn Ayidedai lẹ do Jlẹkaji!

Na nugbo tọn Jesu Klisti ma hugan mẹhe nọ tindo ojlẹ awuvivi tọn sọn ojlẹ de mẹ jẹ devo mẹ gba. Biblu dọ dọ e yì alọwle de tẹnmẹ to Kana, matin ayihaawe fie núdùdù, nuhiho, wedudu, po ogbẹ́ he jlọmẹdote lẹ po tin te. Jesu tlẹ sọ basi nunina na kọdetọn dagbe alọwle lọ tọn gbọn awuwlena ovẹn to azọ́njiawu liho dali!—Johanu 2:3-11.

Ṣigba gbẹzan Jesu tọn mayin agọ́ dùdù madoalọte tọn gba. E yí suhugan whenu etọn tọn zan do to afọdona alemọyinu gbigbọmẹ tọn lẹ, bo to ojlo Jiwheyẹwhe tọn plọn gbẹtọ lẹ. E dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.” (Johanu 4:34) Ojlo Jiwheyẹwhe tọn wiwà hẹn awuvivi madopodo wá na Jesu hugan lehe ayihafẹsẹnamẹnu whenu vude tọn na ko wà do. To egbehe, “susu [gbẹ́ po] nado wà to azọ́n Oklunọ tọn mẹ.” (1 Kọlintinu lẹ 15:58; Matiu 24:14) Ṣigba to whenuena e yindọ, sọn ojlẹ de mẹ jẹ devo mẹ, hiẹ nọ tindo numọtolanmẹ nuhudo ayidedai delẹ tọn, duvivi etọn to aliho dagbe he tin to jlẹkaji tọn de mẹ. Dile wekantọ dopo dọ ẹ do: “Gbẹzan ma sọgan yin gigọ́ pete po nuwiwa po numọtolanmẹ ayajẹ tọn po gba—podọ matin ayihaawe onú na ṣikọ na we eyin e yinmọ janwẹ!”

[Nudọnamẹ Odò Tọn]

Kanbiọ Hodọdopọ Tọn Lẹ

◻ Naegbọn jọja Klistiani delẹ do nọ whanwu jọja aihọnmẹ tọn lẹ? Be hiẹ ko tindo numọtolanmẹ to aliho enẹ mẹ pọ́n ya?

◻ Avase tẹwẹ Jiwheyẹwhe na jọja lẹ gando walọyizan yetọn go, podọ nawẹ ehe dona gando nudide ayidedai yetọn lẹ tọn go gbọn?

◻ Naegbọn e do yin oklenọnu nado whànwu jọja he nọ gbà osẹ́n po nunọwhinnusẹ́n Jiwheyẹwhe tọn lẹ po?

◻ Etẹwẹ yin delẹ to aliho nado duvivi ayidedai dagbe tọn lẹ (1) po hagbẹ whẹndo tọn lẹ po, (2) gbọn hiẹ lọsu dali, podọ (3) po hagbẹ Klistiani lẹ po?

◻ Nawẹ Jesu ze apajlẹ jlẹkaji tọn dai na nuhe du ayidedai lẹ gbọn?

[Nudọnamẹ tangan lẹ to weda 297]

“Yin dindọndogo gbọn nuhiho awhá lélé po hinhọ́n mlanmlan lẹ po dali, yẹn nọ tẹ́ awọntin ṣie do fleṣe go dile mí to finẹ gbọn wá jei po jeje po nado pọ́n awuvivi he yé na ko to tintindo”

[Nudọnamẹ tangan lẹ to weda 302]

“Mẹde hẹn núkàn wá. To whenẹnu wẹ ahàn sinsinyẹn wá. To ojlẹ enẹ mẹ wẹ onú lẹpo biọ bẹwlu mẹ”

[Yẹdide to weda 299]

Be Jọja he nọ hodo nunọwhin-nusẹ́n Biblu tọn lẹ nọ gbọ ojlẹ awuvivi tọn go taun wẹ ya?

[Yẹdide to weda 300]

Yíyí nuwiwa kleunkleun lẹ basi yin aliho dagbe dopo to ojlẹ vivomẹninọ towe zinzan mẹ

[Yẹdide to weda 301]

Pipli Klistiani tọn lẹ nọ tindo awuvivi tlala to whenuena nuwiwa voovo lẹ yin titobasina bọ gbẹtọ owhe voovo tọn lẹ tin to finẹ