Weta 1

Wẹndomẹ lẹ sọn Olọn mẹ Wá

BIBLU lọ pete, to blebu mẹ, yin wẹndomẹ de sọn olọn mẹ wá, heyin awuwlena na nuplọnmẹ mítọn gbọn Otọ́ olọn mẹ tọn mítọn dali. Etomọṣo, wẹndomẹ vonọtaun awe delẹ yin dido diblayi owhe 2 000 lẹ die wayi gbọn angẹli “he nọ ṣite to Jiwheyẹwhe nukọn” de dali. Yinkọ etọn wẹ Gabliẹli. Gbọ mí ni gbadopọnna whẹwhinwhẹ́n dlapọn titengbe awe ehelẹ tọn wá aigba ji.

Owhe lọ wẹ 3 J.W.M. To pópló Judé tọn lẹ ji, vlavo he ma yí mọ do dẹn do Jelusalẹm, wẹ yẹwhenọ Jehovah tọn de he nọ yin Zakali nọ nọ̀. E ko pòyọnho, mọwẹ asi etọn lọsu, Elizabẹti ga. Podọ yé ma tindo ovi de. Zakali to adà etọn yí basi to sinsẹ̀nzọn yẹwhenọ tọn mẹ to tẹmpli Jiwheyẹwhe tọn he tin to Jelusalẹm mẹ. To ajijimẹ Gabliẹli sọawuhia to adusiwhe agbà nuyọ́nwan lọ tọn.

Obu di Zakali tlala. Ṣigba Gabliẹli na ẹn adọgbigbo bo dọmọ, “A dibu blo, Zakali: na yè sè odẹ̀ towe; asi towe Elizabẹti na ji visunnu de hlan we, hiẹ nasọ ylọ oyín etọn Johanu.” Gabliẹli zindonukọn nado lá dọ Johanu “na klo to Oklunọ nukọn” podọ e na “wleawu gbẹtọ lẹ de tọn dote dai na Oklunọ.”

Etomọṣo, Zakali ma sọgan yí ehe sè gba. E taidi nuhe ma yọnbasi dọ ewọ po Elizabẹti po na jì ovi de po owhe he tin to ota na yé po. Enẹwutu Gabliẹli dọna ẹn dọmọ: “Hiẹ na zun unbọpẹn bo ma na sọgan dọhó, kakajẹ azán he gbè onú helẹ na jọ, na hiẹ ma yí ohó ṣie sè . . . wutu.”

Eyọn, to ojlẹ ehe lẹpo whenu, e to pipaṣa mẹhe tin to gbonu lẹ nuhewutu Zakali do dẹn sọmọ to tẹmpli mẹ. To whenuena e tọ́njẹgbonu to godo mẹ, e ma sọgan dọho ṣigba alọ etọn lẹ kẹdẹ wẹ e do to ohia basi, podọ yé doayi e go dọ e ko mọ nude he hugan huhlọn gbẹtọ tọn.

Zakali lẹkọyi whé, to whenuena e ko fó ojlẹ devizọnwiwa tẹmpli mẹ tọn etọn pó godo. Podọ madẹnmẹ to enẹgodo onú lọ jọ na nugbo tọn—Elizabẹti mọhò! To whenuena e to tenọpọn jiji ovi etọn tọn, Elizabẹti nọla na gbẹtọ lẹ na osun atọ́n.

Enẹgodo Gabliẹli sọawuhia whladopo dogọ. Podọ mẹnu wẹ e dọho na? Viyọnnu awhli he ma ko wlealọ de he nọ yin Malia sọn otò Nazalẹti tọn mẹ wẹ. Wẹndomẹ tẹwẹ e do to ojlẹ ehe mẹ? Dotoai! Gabliẹli dọna Malia dọmọ: “Hiẹ ko mọ nukundagbe to Jiwheyẹwhe dè. Bo doayi e go, hiẹ na mọhò to ohò towe mẹ, bo nasọ ji visunnu de bosọ ylọ oyín etọn JESU.” Gabliẹli Yidogọ dọmọ: “Ewọ na yin kiklo, Ovi Gigogán tọn wẹ yè na nọ ylọ ẹ: . . . e nasọ duahọlu to owhé Jakobu tọn gbè kakadoi; ahọludu etọn ma na do pòdo.”

Mí sọgan deji dọ Gabliẹli tindo numọtolanmẹ lẹblanulọkẹyi tọn nado do wẹndomẹ ehelẹ. Podọ dile mí to hihia onú susu dogọ dogbọn Johanu po Jesu po dali, mí na mọ hezeheze dogọ nuhewutu wẹndomẹ he sọn olọn mẹ wá ehelẹ do yin onú titengbe sọmọ. 2 Timoti 3:16; Luku 1:5-33.

▪ Wẹndomẹ titengbe awe tẹlẹ wẹ yin dido sọn olọn mẹ wá?

▪ Mẹnu wẹ do owẹn lọ lẹ, podọ mẹnu lẹ wẹ e yin didona?

▪ Naegbọn wẹndomẹ lọ lẹ do vẹawu sọmọ nado yise?