Weta 2
Yin Gbégbòna Jẹnukọnna Jiji Etọn
TO WHENUENA angẹli Gabliẹli dọna yọnnu awhlivu lọ Malia dọ e na jì visunnu de he na lẹzun ahọlu madopodo de, Malia kanse dọmọ: “Nawẹ ehe na yin, whenuena yẹn ma yọ́n sunnu gbede?”
Gabliẹli basi zẹẹmẹ dọmọ: “[Gbigbọ wiwe] na wá ojí we, huhlọn Gigogán tọn nasọ ṣinyọ́n oyẹ̀ ojí we, enẹwutu onú wiwé he tin nado yin didetọn sọn hiẹ mẹ, Ovi Jiwheyẹwhe tọn yè na nọ ylọ ẹ.”
Nado gọalọna Malia nado yí wẹndomẹ lọ sè, Gabliẹli zindonukọn dọmọ: “Doayi e go, Elizabẹti mẹmẹyọnnu towe ga ko mọhò visunnu de tọn to yọnho etọn mẹ: ehe wẹ osun ṣidopotọ na ewọ he yin wẹnsinọ. Na ohó de sọn Jiwheyẹwhe dè ma na gbọ̀vọ́ huhlọn tọn gba.”
Malia kẹalọyi ohó Gabliẹli tọn. Podọ etẹwẹ yin gblọndo etọn? E basi zẹẹmẹ dọmọ: “Pọ́n afanumẹ yọnnu Oklunọ tọn; ni nọ hlan mi kẹdẹdi ohó towe.”
Madẹnmẹ to whenuena Gabliẹli ko yì pó godo, Malia sọnú bo yì dlá Elizabẹti pọ́n, he nọ nọ̀ po asu etọn Zakali po, to otò he tin to osó ji to Judé. Sọn owhé Malia tọn gbè to Nazalẹti, gbejizọnlin gaa de wẹ ehe yin vlavo azán atọ̀n kavi ẹnẹ tọn.
To whenuena Malia jẹ owhé Zakali tọn gbè to godo mẹ, e biọ họmẹ bo dọnudo yé. To ojlẹ enẹ mẹ, Elizabẹti gọ́ na gbigbọ wiwe, bọ e dọna Malia dọmọ: “Donanọ wẹ hiẹ to yọnnu lẹ mẹ, donanọ wẹ sinsẹ́n adọ̀ towe mẹ tọn. Fie wẹ ehe sọn wá jẹ dee, bọ onọ̀ Oklunọ ṣie tọn nado wá yẹn dè? Bo pọ́n, le ogbè nudọdomẹ towe tọn jẹ otó ṣie lẹ mẹ, ovi whàngo to adọ̀ ṣie mẹ na ayajẹ.”
To ehe sisè mẹ, Malia gblọn po pinpẹn-nutọn-yinyọnẹn po dọmọ: “Ayiha ṣie jlayinna Oklunọ, gbigbọ ṣie sọ jaya to Jiwheyẹwhe Whlẹngantọ ṣie mẹ. Na e ko hùn nukun pọ́n walọmimiọn afanumẹ yọnnu etọn tọn: na pọ́n, sọn dinvie wẹ whẹndo lẹpo na nọ ylọ mi donanọ. Na ewọ he yin hlọnhlọnnọ ko wà onu he klo lẹ hlan mi.” Ṣogan, mahopọnna nukundagbe he e ko yin didohia, Malia ze gbégbigbò lẹpo na Jiwheyẹwhe. E dọmọ: “Wiwe wẹ oyín etọn. Lẹblanu etọn sọn whẹndo de jẹ whẹndo lẹpo mẹ to yé he dibusi i lẹ ji.”
Malia zindonukọn nado to Jiwheyẹwhe pà to ohàn dọdai tọn mẹ, to lilá mẹ dọmọ: “E ko yí awà etọn do do huhlọn hia; e sọ gbà saklanọ lẹ kija, gbọn homẹgble ayiha yetọn tọn dali. E ko dè ahọvi lẹ jẹte sọn ofìn yetọn lẹ ji, bosọ ze huwhẹnọ lẹ do aga. E ko yí onú dagbe lẹ do pekọna mẹhe huvẹ to hùhù lẹ; bosọ yàn adọkunnọ lẹ yì alọvọ. E ko gọalọna Islaeli devi etọn, na ewọ nido flin lẹblanu; dile e dọhó hlan otọ́ mítọn lẹ, hlan Ablaham dali po okún etọn lẹ po kakadoi.”
Malia nọ Elizabẹti dè na nudi osun atọ̀n, podọ matin ayihaawe, alọgọ daho wẹ ewọ yin to osẹ godo tọn heyin hòmimọ Elizabẹti tọn ehelẹ whenu. Onú dagbe wẹ e yin dọ yọnnu nugbonọ awe ehelẹ, he mọhò gbọn alọgọ Jiwheyẹwhe tọn dali, sọgan tin to pọ to ojlẹ dona tọn ehe mẹ to gbẹzan yetọn lẹ mẹ!
Be hiẹ doayi gbégbigbò he yin nina Jesu whẹpo ewọ tlẹ do yin jiji go ya? Elizabẹti ylọ ẹ dọ “Oklunọ ṣie,” podọ ovi etọn he ma ko yin jiji whàngo po ayajẹ po to whenuena Malia sọawuhia to ojlẹ tintan mẹ. To alọ devo mẹ, to nukọn mẹ mẹdevo lẹ ma yí mọ do na sisi Malia po ovi he na wá yin jiji etọn po, dile mí na mọ do. Luku 1:26-56.
▪ Etẹwẹ Gabliẹli dọ nado gọalọna Malia nado mọnukunnujẹ lehe e na mọhò gbọn mẹ?
▪ Nawẹ Jesu yin gbégbòna jẹnukọnna jiji etọn gbọn?
▪ Etẹwẹ Malia dọ to ohàn dọdai tọn de mẹ nado pagigona Jiwheyẹwhe?
▪ Nawẹ Malia dẹn to Elizabẹti dè sọ, podọ naegbọn e do sọgbe dọ Malia ni nọ Elizabẹti dè to ojlẹ ehe mẹ?