Weta 4

Mọhò Ṣigba Ma Wlealọ

MALIA tin to ohò osun atọ̀ntọ tọn mẹ. Hiẹ na flindọ e yí bẹjẹeji azán hòmimọ etọn tọn zan nado dlá Elizabẹti pọ́n, ṣigba todin e ko lẹkọwa whé to Nazalẹti. To madẹnmẹ gbẹtọ lẹpo na yọ́n ninọmẹ etọn to otò etọn mẹ. Na nugbo tọn, ninọmẹ ayimajai tọn mẹ wẹ e tin te!

Nuhe hẹn ninọmẹ lọ ylan wẹ yindọ Malia ko dopà alọwle tọn nado yin asi atinpatọ Josẹfu tọn. Podọ e yọnẹn dọ, to osẹ́n Jiwheyẹwhe tọn mẹ hlan Islaeli, yọnnu de he dopà alọwle tọn hẹ sunnu de ṣigba de sọn ojlo mẹ wá nado tindo zanhẹmẹ po sunnu devo po dona yin zannu dlando kakajẹ okú. Nawẹ e sọgan basi zẹẹmẹ hòmimọ etọn tọn na Josẹfu gbọn?

To whenuena e yindọ Malia ko tọ́n na osun atọ̀n, mí sọgan deji dọ Josẹfu na to jejeji nado mọ ẹn. To whenuena yé mọ yede, vlavo Malia dọ linlin lọ na ẹn. E sọgan wà nuhe go e pé nado basi zẹẹmẹ dọ gbọn gbigbọ wiwe Jiwheyẹwhe tọn dali wẹ emi mọhò. Ṣigba, dile hiẹ sọgan yọnẹn do, ehe yin nude he vẹawu na Josẹfu nado yise.

Josẹfu yọ́n oyín dagbe he Malia tindo. Podọ e họnwun dọ ewọ yiwanna ẹn taun. Ṣogan, mahopọnna nuhe e sọgan sọalọakọ́n nado dọ, e taidi dọ sunnu de wẹ dóho na ẹn janwẹ. Etomọṣo, Josẹfu ma jlo dọ ni yin hùhù gbọn yinyin zannu dlan do dali kavi yin winyan do to gbangba gba. Enẹwutu e magbe nado gbẹ́ ẹ dai to nuglọ. To azán enẹlẹ mẹ, mẹhe dopà alọwle tọn lẹ nọ yin pinpọnhlan taidi mẹhe wlealọ lẹ, podọ gbẹdai yin nubiọtomẹsi nado sánkanna pàdido alọwle tọn de.

Enẹgodo, dile Josẹfu gbẹ́ pò to nulẹnpọn do whẹho ehelẹ ji, e yì damlọn. Angẹli Jehovah tọn sọawuhia ẹ to odlọ mẹ bo dọmọ: “A dibú nado plan Malia asi towe blo, na enẹ he to ohò etọn mẹ, [gbigbọ wiwe] si wẹ e sọn. E nasọ ji visunnu de, Jesu wẹ hiẹ na ylọ oyín etọn, na ewọ wẹ na whlẹn omẹ etọn lẹ gán sọn ylando yetọn lẹ mẹ.”

Lehe Josẹfu gọna pẹdido, to whenuena e fọ́n do sọ! Matin gbandindọn e wà nuhe angẹli lọ dọ pẹpẹ. E yí Malia yì owhé etọn gbè. Enẹwutu, nuyiwa gbangba tọn ehe, wazọ́n taidi hùnwhẹ alọwle tọn bo dohia dọ Josẹfu po Malia po wlealọ todin to osẹ́nliho. Ṣigba Josẹfu ma tindo zanhẹmẹ po Malia po dile e dẹnsọ bọ e do tin to ohò Jesu tọn.

Pọ́n! Ohò Malia tọn ko whẹ́n, ṣogan Josẹfu ze e do kanklosọpoawenọ ji. Fie wẹ yé jei, podọ naegbọn yé do to gbejizọnlin basi to whenuena Malia ko pọ́ ovi ji? Luku 1:39-41, 56; Matiu 1:18-25; Deutelonomi 22:23, 24.

▪ Etẹwẹ yin ninọmẹ ayiha Josẹfu tọn to whenuena e sè dogbọn hòmimọ Malia tọn dali, podọ etẹwutu?

▪ Nawẹ Josẹfu sọgan gbẹ́ Malia dai gbọn to whenuena e yindọ yé ma ko wlealọ?

▪ Nuyiwa gbangba tọn tẹwẹ wazọ́n taidi hùnwhẹ alọwle Josẹfu po Malia po tọn?