Weta 11
Johanu Wleawuna Aliho Lọ
OWHE 17 ko juwayi sọn whenue gbọ́n Jesu yin owhe 12 mẹvi bo to kanbiọ kanse mẹplọntọ lẹ to tẹmpli mẹ. Amàkikọ-whenu owhe 29 W.M. tọn wẹ, podọ e taidi dọ mẹlẹpo, wẹ to hodọ dogbọn nafẹylọvi Jesu tọn Johanu dali, mẹhe to yẹwhehodọ to otò lọ lẹpo mẹ lẹdo Otọ̀ Jọdani tọn.
Na nugbo tọn Johanu yin gbẹtọ he nọ dọn ayidonugo mẹtọn de, to awusọhia po hodidọ po mẹ. Ofún kanklosọpoawenọ tọn wẹ avọ̀ etọn, podọ e nọ sìn gbaja ayú tọn do alinkàn. Owẹ̀n lẹ po owín akú po wẹ yin núdùdù etọn. Podọ etẹwẹ yin wẹndomẹ etọn? “Mì lẹnvọjọ: na ahọludu olọn tọn sẹpọ.”
Wẹndomẹ ehe fọnjlodotena hosetọ etọn lẹ. Mẹsusu doayi nuhudo yetọn go nado lẹnvọjọ, yèdọ, nado diọ walọyizan yetọn bo gbẹ́ aliho gbẹzan yetọn hoho dai taidi nuhe mayin alọkẹyi. Enẹwutu sọn aigba he lẹdo Jọdani pé lẹpo ji, podọ etlẹ yin sọn Jelusalẹm ga, gbẹtọ lẹ tọ́n wá Johanu dè to sọha susugege mẹ, bọ ewọ sọ baptizi yé, bo to yé ylọ́n do osin Jọdani tọn mẹ. Etẹwutu?
Johanu baptizi gbẹtọ lẹ to yẹhiadonu, kavi nukunnumọjẹnumẹ, lẹnvọjọ sọn ahun mẹ wá yetọn na ylando lẹ sọta alẹnu Osẹ́n Jiwheyẹwhe tọn. Gbọnmọ dali, to whenuena Falesi po Sadusi delẹ po tọ́n wá Jọdani, Johanu gblewhẹdo yé. ‘Mì ovi amapoe tọn,’ wẹ e dọ. “Mì sẹ́n sinsẹ́n he jẹ na lẹnvọjọ: mì sọ lẹn to mì homẹ, dọ Mí tindo Ablaham na otọ́ mítọn blo: na yẹn . . . dọna mì, dọ, Jiwheyẹwhe sọgan de ovi sọn zannu helẹ mẹ na Ablaham. Asiọvi lọ mlọnai to adọ̀ atin lẹ tọn lọ kọ̀n dinvie: enẹwutu atin depope he ma sẹ́n sinsẹ́n dagbe, yè sán liai, bosọ dlan do miyọ́n mẹ.”
Na ayidonugo he Johanu to mimọyi lẹpo wutu, Juvi lẹ do yẹwhenọ lẹ po Levinu lẹ po hlan ẹn. Omẹ ehelẹ kanse dọmọ: “Mẹnu wẹ hiẹ?”
“Yẹn ma wẹ Klisti lọ gba,” wẹ e yigbe dọ.
“Be mẹnu wẹ?” wẹ yé dindona dọ. “Be [Elija] wẹ hiẹ?”
“Yẹn ma yin ewọ gba,” wẹ e gblọn dọ.
“Be hiẹ wẹ yẹwhegan nẹ?”
‘Lala!’
Enẹwutu yé tẹ́kú deji dọmọ: “Mẹnu wẹ hiẹ? na mí nido nagbè mẹhe do mí hlan lẹ. Etẹwẹ hiẹ dọ gbọn dewe tọn dali?”
Johanu basi zẹẹmẹ dọmọ: “Yẹn wẹ ogbè mẹhe tọn to awhádo to zungbo mẹ, Mì basi ali Oklunọ tọn do titengbe, dole yẹwhegan Isaia dọ do.”
“Etẹwutu wẹ hiẹ to bibaptizi,” wẹ yé jlo nado yọnẹn, “eyin hiẹ ma yin Klisti lọ, kavi [Elija], kavi yẹwhegan nẹ?”
“Yẹn yí osin do baptizi,” wẹ e gblọn dọ. “Dawe de to ote to ṣẹnṣẹn mìtọn, mẹhe mì ma yọnẹn; mẹhe ja to godo ṣie.”
Johanu to awuwledaina aliho lọ gbọn hinhẹn ninọmẹ ahun gbẹtọ lẹ tọn tin to ninọmẹ dagbe mẹ dali nado kẹalọyi Mẹssia lọ, mẹhe na lẹzun Ahọlu. Dogbọn Omẹ ehe dali, Johanu dọmọ: “Mẹhe ja to godo ṣie [tindo] huhlọn hú mi, afọpa mẹhe tọn yẹn ma jẹ na ze.” Na nugbo tọn, Johanu tlẹ dọmọ: “Mẹhe ja to godo ṣie, e hugan mi; na e ko lẹzun nukọntọ na mi wutu.”
Gbọnmọ dali, wẹndomẹ Johanu tọn, yèdọ “ahọludu olọn tọn sẹpọ,” yinuwa taidi avase gbangba tọn de dọ lizọnyizọn Ahọlu dide Jehovah tọn lọ, yèdọ Jesu Klisti, ko dibla bẹjẹeji. Johanu 1:6-8, 15-28; Matiu 3:1-12; Luku 3:1-18; Owalọ lẹ 19:4.
▪ Gbẹtọ nankọtọn wẹ Johanu yin?
▪ Naegbọn Johanu do baptizi gbẹtọ lẹ?
▪ Naegbọn Johanu do sọgan dọ dọ Ahọluduta lọ ko sẹpọ?