To Sinagọgu Otò Jesu Tọn Tọn Mẹ — WESẸDOTẸN INTẸNẸT JI TỌN Watchtower Tọn

weta 21

To Sinagọgu Otò Jesu Tọn Tọn Mẹ

AYIHAAWE depope matin dọ ayajẹ fọndote to Nazalẹti to whenuena Jesu lẹkọwa whé. Whẹpo e do tọ́nsọn finẹ nado yin bibaptizi gbọn Johanu dali to nuhugan owhe dopo die jẹnukọn, Jesu yin yinyọnẹn taidi atinpatọ de. Ṣigba todin e yin yinyọnẹn lẹdope taidi azọ́njiawu-watọ de. Mẹhe nọ nọ̀ lẹdo lọ mẹ lẹ to jejeji nado mọdọ e wà delẹ to azọ́njiawu ehelẹ mẹ to ṣẹnṣẹn yetọn.

Nukundido yetọn jideji dile Jesu, sọgbe hẹ aṣa etọn, yì sinagọgu lẹdo lọ tọn mẹ. To sinsẹ̀n-bibasi lọ lẹ whenu, e fọnṣite nado hiawe, bọ owe-hiha yẹwhegan Isaia tọn yin zizedo alọmẹ na ẹn. E mọ fie dọho gando Mẹhe yin amisisadode gbọn Jehovah dali go, ehe tin to weta 61 to Biblu mítọn mẹ to egbehe.

To hihia dogbọn lehe Omẹ ehe na dọyẹwheho tundote tọn hlan mẹmẹglọ lẹ, pọngbọ hlan nukun nukuntọnnọ lẹ tọn, podọ owhe alọkẹyi Jehovah tọn dali godo, Jesu gọ̀ owe-hiha lọ jo na devizọnwatọ lọ bo sinai. Nukun lẹpo to pinpọn ẹn. Enẹgodo e dọho, vlavo na ojlẹ he dẹn vude, bo to zẹẹmẹ basi dọmọ: ‘Egbe wẹ Owe-wiwe he di to otó mìtọn mẹ.’

Avò vò gbẹtọ lẹ na “ohó ojọmiọn tọn” etọn bọ yé sọ dọhlan ode awetọ dọmọ: “Ehe ma wẹ ovi Josẹfu tọn lọ?” Ṣigba to yinyọnẹn mẹ dọ yé jlo dọ emi ni wà azọ́njiawu lẹ, Jesu zindonukọn dọmọ: “Matin nuhà mì na dọ oló he hlan mi, dọ, Bokọnọ, hẹnazọ̀ngbọna dewe; nudepope he mí ko sè yè wà to Kapẹlnaumi, wà ẹ to otò towe mẹ tofi ga.” E họnwun dọ, kọmẹnu hoho Jesu tọn lẹ tindo numọtolanmẹ dọ azọ̀nhẹngbọ dona bẹjẹeji to whégbè, na alemọyi omẹ etọn titi lẹ tọn whẹ́. Enẹwutu yé tindo numọtolanmẹ dọ Jesu ma yí nukun nujọnu tọn do pọ́n yé.

Yinyọ́n linlẹn yetọn, Jesu dọ whenuho he yọn-na-yizan delẹ. Asuṣiọsi susu wẹ tin to Islaeli to azán Elija tọn lẹ gbè, wẹ e dọ, ṣigba Elija ma yin didohlan depope to yé mẹ dè gba. Kakatimọ, e yì asuṣiọsi he mayin Islaelivi de dè to Sidoni, fie e wà azọ́njiawu ogbẹ̀-whlẹngán tọn te. Podọ to azán Elija tọn lẹ gbè, pòtọnọ susu wẹ tin, ṣigba Naamani kẹdẹ wẹ Elija lẹwé sọn Silia.

Dile yé yin homẹhẹngblena gbọn nuyijlẹdonugo whenuho tọn ehelẹ he hùngona ṣejannabi po yise matindo yetọn po dali, mẹhe tin to sinagọgu mẹ lẹ fọnṣite bosọ sisẹ́ Jesu jẹgbonu sọn todaho lọ mẹ. To finẹ, to bẹbẹnu osó he ji Nazalẹti yin didoai do tọn, yé tẹnpọn nado sisẹ́ ẹ dlan sọn bẹbẹnu lọ. Ṣigba Jesu họngán sọn alọ yetọn mẹ bosọ yì awuyẹyẹ-afọyẹyẹ. Luku 4:16-30; 1 Ahọlu lẹ 17:8-16; 2 Ahọlu lẹ 5:8-14.

▪ Naegbọn ayajẹ do fọndote to Nazalẹti?

▪ Etẹwẹ gbẹtọ lọ lẹ lẹn gando hodidọ Jesu tọn go, ṣigba to whenẹnu etẹwẹ hẹn homẹgble yé sọmọ?

▪ Etẹwẹ gbẹtọ lọ lẹ tẹnpọn nado wà na Jesu?