Weta 28

Yin Hokanse Dogbọn Nùbibla Dali

NUDI owhe dopo ko wayi sọn whenue gbọ́n Jesu yì Juwayi owhe 30 W.M. tọn. Todin, Johanu Baptizitọ ko yin wiwle do ganpamẹ na osun susu. Dile etlẹ yindọ e jlo dọ devi etọn lẹ ni lẹzun hodotọ Klisti tọn lẹ, e mayin yemẹpo wẹ ko wàmọ gba.

Todin delẹ to devi Johanu he tin to ganpamẹ lọ tọn lẹ mẹ wá Jesu dè bo kanse dọmọ: “Etẹwutu wẹ míwlẹ po Falesi lẹ lọ po to nùbla, ṣigba nuplọntọ towe lẹ ma nọ blanù gba?” Falesi lẹ nọ blanù whla awe to osẹ dopo mẹ taidi aṣa sinsẹ̀n yetọn tọn. Podọ vlavo devi Johanu tọn lẹ hodo aṣa dopolọ. E sọgan sọ yindọ yé to nùbla nado nọ aluẹmẹ na wiwle do ganpamẹ Johanu tọn bo yin pipaṣa nuhewutu devi Jesu tọn lẹ ma kọnawudopọ hẹ yé to dohia awubla tọn ehe mẹ.

To gblọndo mẹ Jesu basi zẹẹmẹ dọmọ: “Be yè sọgan hẹn ovi he tin to abò asiyọyọ tọn mẹ lẹ blawu, whenuena asisunọ tin to yé dè? Ṣigba azán ja, whenuena yè na yí asisunọ sọn yé dè, whenẹnu wẹ yé na blanù.”

Devi Johanu tọn lẹ dona flin dọ Johanu lọsu dọho gando Jesu go taidi Asisunọ lọ. Enẹwutu whenuena Jesu tin to finẹ, Johanu ma na pọ́n ẹn taidi nuhe sọgbe nado blanù gba, mọdopolọ wẹ devi Jesu tọn lẹ lọsu. To godo mẹ, to whenuena Jesu kú, devi etọn lẹ nọ aluẹmẹ bo blanù. Ṣigba to whenuena e yin finfọnsọnku bo hẹji yì olọn mẹ, yé ma tindo whẹwhinwhẹ́n depope dogọ na nùbibla aluẹmẹninọ tọn gba.

Bọdego, Jesu dọ oló ehelẹ: “Mẹde ma nọ tọ̀ avọ̀nu yọyọ do awù hoho go: enẹ he yè do súvà na ẹn nikaa dè sọn e go, yọyọ sọn hoho mẹ, yè nasọ hẹn tintlẹ́n de ylanhú. Mẹde ma nọ yí ovẹn yọyọ do ogò hoho mẹ: ovẹn nikaa là ogò lẹ ovẹn nasọ dọ̀n, po ogò lẹ po: ṣigba ovẹn yọyọ wẹ yè nọ yí do ogò yọyọ lẹ mẹ.” Etẹwẹ oló ehelẹ tindo nado yí wà po nùbibla po?

Jesu to alọgọna devi Johanu Baptizitọ lọ tọn lẹ nado mọnukunnujẹemẹ dọ mẹdepope ma dona donukun hodotọ etọn lẹ nado yinuwa to gbesisọmẹ hẹ aṣa hoho sinsẹ̀n Ju lẹ tọn, taidi aṣa nùbibla tọn gba. Ewọ ma wá nado súvàna bo dlẹnkanna aliho sinsẹ̀n-bibasi tọn hoho he ko jẹ na zizedlan gba. Sinsẹ̀n Klistiani tọn ma na yin hinhẹn nado sọgbe hẹ sinsẹ̀n Ju azán enẹ gbè tọn po aṣa gbẹtọ tọn etọn lẹ po gba. Lala, e ma na taidi vàsúsú yọyọ to avọ̀ hoho de go gba kavi taidi ovẹn yọyọ to ogò hoho mẹ gba. Matiu 9:14-17; Malku 2:18-22; Luku 5:33-39; Johanu 3:27-29.

▪ Mẹnu lẹ wẹ to nùbla, podọ na lẹndai tẹ wutu?

▪ Naegbọn devi Jesu tọn lẹ ma blanù whenuena ewọ tin po yé po, podọ to nukọn mẹ nawẹ whẹwhinwhẹ́n na nùbibla na bú sọn aimẹ to madẹnmẹ gbọn?

▪ Oló tẹlẹ wẹ Jesu dọ, podọ etẹwẹ yé zẹẹmẹdo?