Weta 32
Etẹwẹ Sọgbe hẹ Osẹ́n to Gbọjẹzangbe?
GBỌJẸZANGBE devo wẹ Jesu basi dlapọn na sinagọgu de sẹpọ Ohù Galili tọn kọ̀n. Dawe de tin to finẹ po alọ adusi he ko kusẹ́ po. Wekantọ lẹ po Falesi lẹ po to ṣiṣọ́ ẹ po sọwhiwhe po nado pọ́n vlavo eyin Jesu na hẹnazọ̀ngbọna ẹn. To agọgbọnẹnmẹ yé kanse dọmọ: “E jẹ na hẹnazọ̀ngbọnamẹ to gbọjẹzangbe?”
Sinsẹ̀ngan Juvi lẹ tọn yise dọ azọ̀nhẹngbọ to Gbọjẹzangbe yin nuhe sọgbe hẹ osẹ́n eyin ogbẹ̀ tin to owù mẹ kẹdẹ. Di apajlẹ, yé plọnmẹ dọ nuhe ma sọgbe hẹ osẹ́n wẹ e yin nado dọ̀n ohú kavi nado blá fide he sẹ̀ to Gbọjẹzangbe. Enẹwutu wekantọ lẹ po Falesi lẹ po to kanbiọ kanse Jesu to vivẹnudido mẹ nado mọ owhẹ̀ de sadokọna ẹn.
Ṣigba, Jesu yọ́n linlẹn yetọn lẹ. To ojlẹ dopolọ mẹ, e yọnẹn dọ yé ko kẹalọyi pọndohlan wazẹjlẹgo tọn, he ma sọgbe hẹ Owe-wiwe lẹ na nuhe dù nubiọtomẹsi Gbọjẹzan tọn gbigbà he gbẹ́ azọ́nwiwa. Gbọnmọ dali Jesu fọ́n ninọmẹ agọjẹdomẹ gbangba tọn de dai gbọn didọna dawe he tindo alọ he kusẹ́ lọ dali dọmọ: “Fọ́n, bo ṣite . . . to ṣẹnṣẹn.”
Todin, to lilẹ́ hlan wekantọ lẹ po Falesi lẹ po mẹ, Jesu dọmọ: “Gbẹtọ tẹwẹ tin to mì ṣẹnṣẹn, he na tindo lẹngbọ dopo, ehe flẹ́ jẹ odò mẹ to gbọjẹzangbe, be ewọ ma na tẹdo e go, bo ze e jẹgbonu?” To whenuena e yindọ lẹngbọ de nọtena nutindo de he nọ hẹn ale akuẹ tọn wá, yé ma na jo e do odò mẹ kakajẹ azán awetọ gbè, vlavo nado hẹn ẹn jẹazọ̀n bọ e na yin nuhẹngú na yé. Gbọnvona enẹ, Owe-wiwe lẹ dọmọ: “Gbẹtọ dodonọ de hò ogbẹ̀ kanlin etọn tọn pọ́n.”
Nado do kanṣiṣa lọ hia, Jesu zindonukọn dọmọ: “Be nẹmunẹmu wẹ gbẹtọ do yọnhú lẹngbọ! Enẹwutu e jẹ nado wà dagbe to gbọjẹzangbe.” Sinsẹ̀ngan lọ lẹ ma penugo nado jẹagọdo mẹhẹnlẹnnupọn he gọna nugbo po awuvẹmẹ po mọnkọtọn gba, bọ yé nabọẹ whii.
Po adi po, to pọmẹ po awubla po na walọ hẹngogo nululu tọn yetọn, Jesu pọ́n lẹdo pé. Enẹgodo e dọhlan dawe lọ dọmọ: “Dlẹn alọ towe.” Podọ e sọ dlẹn ẹn bọ alọ lọ yin hinhẹn jẹgangan.
Kakati nado hunhomẹ dọ alọ dawe lọ tọn yin hinhẹn jẹgangan, Falesi lẹ tọ́njẹgbonu bo blasé to afọdopolọji hẹ hodotọ ogbẹ́ Hẹlodi tọn lẹ nado hù Jesu. Na jide tọn ogbẹ́ tòhódọtọ tọn ehe bẹ hagbẹ Sadusi heyin sinsẹ̀nnọ lẹ hẹn. To paa mẹ, ogbẹ́ tòhódọtọ tọn ehe po Falesi lẹ po nọ jẹagọdo ode awetọ yetọn lẹ to gbangba, ṣigba yé tin to kọndopọ sinsinyẹn mẹ to nukundiọsọmẹ yetọn mẹ sọta Jesu. Matiu 12:9-14; Malku 3:1-6; Luku 6:6-11; Howhinwhẹn lẹ 12:10; Eksọdusi 20:8-10.
▪ Etẹwẹ yin dodonu lọ na ninọmẹ agọjẹdomẹ gbangba tọn to Jesu po sinsẹ̀ngan Juvi tọn lẹ po ṣẹnṣẹn?
▪ Etẹwẹ sinsẹ̀ngan Juvi tọn ehelẹ yise gando azọ̀nhẹngbọnamẹ to Gbọjẹzangbe go?
▪ Oló tẹwẹ Jesu yizan nado jẹagọdo pọndohlan agọ̀ yetọn lẹ?