Weta 41

Mẹhe Ji Nudindọ̀n lọ Sinaido

TO MADẸNMẸ he e ko yin johẹ to owhé Simọni tọn gbè godo, Jesu bẹ gbejizọnlin yẹwhehodidọ tọn awetọ Galili tọn jẹeji. To gbejizọnlin lẹdo tọn tintan etọn whenu, devi etọn tintan lẹ Pita, Andlé, Jakobu, po Johanu po hodo e. Ṣigba todin apọsteli 12 lẹ, gọna yọnnu delẹ, hodo e. Ehelẹ bẹ Malia Magdaleni, Susana, po Joana, asu mẹhe tọn yin azọ́nwatọ nukundeji Ahọlu Hẹlodi tọn po hẹn.

Dile lizọnyizọn Jesu tọn to nukọnzindo po awuyiya po, mọwẹ nudindọn gando nuwiwa etọn go to wiwà do niyẹn. Dawe he tindo gbigbọ aovi tọn de, he sọ yin nukuntọ́nnọ po unbọpẹnnọ po, yin hinhẹnwa Jesu dè. To whenuena Jesu hẹnazọngbọna ẹn, na ewọ nido vò sọn nuyiwadomẹji aovi tọn si bo penugo nado dọho bo mọnú, gbẹtọgun lọ lẹpo wẹ e paṣa. Yé jẹ didọ ji dọmọ: “Ehe wẹ visunnu Davidi tọn lọ nugbo?”

Gbẹtọ lẹ pli vlili lẹdo ohọ̀ he mẹ Jesu to ninọ lọ sọmọ bọ ewọ po devi etọn lẹ po ma tlẹ sọgan dùnú. To yidogọ mẹ na mẹhe lẹndọ ewọ sọgan ko yin “Visunnu Davidi tọn” dopagbe lọ, wekantọ lẹ po Falesi lẹ po he ko wá sọn Jelusalẹm gbọ́n nado hẹn ẹn gble lẹ sọ tin to finẹ ga. To whenuena hẹnnumẹ Jesu tọn lẹ sè dogbọn bẹwlu he mẹ Jesu tin te dali, yé wá nado plan ẹn. Na whẹwhinwhẹ́n tẹ wutu?

Eyọn, nọvisunnu Jesu tọn titi lẹ ma tlẹ ko yise to ojlẹ lọ mẹ dọ ewọ wẹ yin Visunnu Jiwheyẹwhe tọn lọ gba. Mọdopolọ, bẹwlu po wiwọ́ gbangba tọn he e ko fọndote lọ po yin nude he gbọnvo mlẹnmlẹn do walọyizan Jesu he yewlẹ yọnẹn to whenuena e to whinwhẹ́n to Nazalẹti. Enẹwutu, yé yise dọ nude jẹdò tlala to apọ̀n Jesu tọn mẹ. “Otamẹ etọn gble,” wẹ yin tadona he kọ̀n yé wá, podọ yé jlo nado wle e bo plan ẹn sọyi.

Ṣogan kunnudenu lọ họnwun dọ Jesu hẹnazọngbọna dawe he tindo aovi lọ. Wekantọ lẹ po Falesi lẹ po yọnẹn dọ yé ma sọgan gbẹ́ nugbo-yinyin ehe tọn gba. Enẹwutu nado hẹn Jesu gble yé dọna gbẹtọ lẹ dọmọ: “Dawe he ma yan lẹgba lẹ jẹgbonu gba, adavo gbọn Beẹzebuli ogán aovi lẹ tọn dali.”

To linlẹn yetọn yinyọnẹn mẹ, Jesu ylọ wekantọ lẹ po Falesi lẹ po do ede dè bo dọmọ: “Ahọludu depope he klán do ede ji, yè hẹn ẹn wá vọjẹ; podọ todaho depope kavi owhé he sọ klán do ede ji, ma na nọte gba? Eyin Satani yàn Satani jẹgbonu, e klán do ede ji; be nawẹ ahọludu etọn na nọte do?”

Nuyọnẹn mẹhẹnjẹflumẹ nankọ die! To whenuena e yindọ Falesi lẹ sọalọakọ́n dọ mẹdelẹ sọn hagbẹ yetọn titi lẹ mẹ ko yan aovi lẹ jẹgbonu, Jesu sọ kanse ga dọmọ: “Eyin yẹn gbọn Beẹzebuli dali yan aovi lẹ jẹgbonu, mẹnu dali wẹ visunnu mìtọn lẹ ka to yé yan jẹgbonu gbọn?” To hogbe devo lẹ mẹ, whẹsadokọnamẹ yetọn sọta Jesu dona yin yiyizan na yé lọsu ga dile e yin do na ewọ. Enẹgodo Jesu na avase dọmọ: “Ṣigba eyin yẹn to aovi lẹ yan jẹgbonu to [gbigbọ] Jiwheyẹwhe tọn mẹ, be ahọludu Jiwheyẹwhe tọn wá mì ji.”

Nado dohia dọ aovi lẹ yinyan jẹgbonu etọn yin kunnudenu huhlọn etọn do Satani ji, Jesu dọmọ: “Nawẹ mẹde sọgan biọ owhé adántọ lọ tọn gbè do, bo gbà agbàn etọn lẹ, adavo e blá adántọ lọ whẹ́? whenẹnu wẹ e na wla owhé etọn. Ewọ he ma nọ hẹ mi, e jẹagọ do ogo e; mẹhe masọ bẹ pli hẹ mi, e vúnvúnvúnvún pé.” E họnwun dọ Falesi lẹ jẹagọ do Jesu, bo do yedelẹ hia nado yin nuyizan Satani tọn lẹ. Yé to Islaelivi lẹ vúnvún pé sọn ewọ dè.

Enẹwutu, Jesu na avase agọjẹdomẹtọ jijọ-di-Satani nọ ehelẹ dọ to “nùzinzan do [gbigbọ wiwe] go, yè ma to na jona ẹn” gba. E basi zẹẹmẹ dọmọ: “Mẹdepope he dọho do Ovi gbẹtọ tọn go, yè na jona ẹn: ṣigba mẹdepope he dọho do [gbigbọ wiwe] go, yè ma na jona ẹn to aihọn he mẹ, podọ to aihọn he ja mẹ.” Wekantọ po Falesi enẹlẹ po ko waylando he ma sọgan yin jijona enẹ na yé ko gbọn kanyinylan dali yí nuhe yin nuyiwa azọ́njiawu họnwun gbigbọ wiwe Jiwheyẹwhe tọn na Satani. Matiu 12:22-32; Malku 3:19-30; Luku 8:1-3; Johanu 7:5.

▪ Nawẹ gbejizọnlin Jesu tọn awetọ Galili tọn gbọnvona tintan tọn gbọn?

▪ Naegbọn hẹnnumẹ Jesu tọn lẹ tẹnpọn nado wle e?

▪ Nawẹ Falesi lẹ tẹnpọn nado hẹn azọ́njiawu Jesu tọn lẹ gble gbọn, podọ nawẹ Jesu dè lalo yetọn hia gbọn?

▪ Owhẹ̀ etẹ tọn wẹ Falesi enẹlẹ hù, podọ etẹwutu?