Weta 50

Awuwiwle Nado Pannukọn Homẹkẹn

TO ANADIDENA apọsteli etọn lẹ to aliho he mẹ yé na basi wadotana azọ́n yẹwhehodidọ yetọn lẹ te mẹ godo, Jesu na avase yé gando nukundiọsọmẹtọ lẹ go. E dọmọ: “Mì pọ́n, yẹn do mì hlan di lẹngbọ do ohla ṣẹnṣẹn . . . Mì payi gbẹtọ lẹ go; na yé na hẹn mì yì tòhódọtọ lẹ dè, yé nasọ hò mì to sinagọgu yetọn lẹ mẹ; yè na hẹn mì yì togán po ahọlu lẹ po nukọn na yẹn wutu.”

Mahopọnna homẹkẹn sinsinyẹn he hodotọ etọn lẹ na pannukọn, Jesu gbọn jidide dali dopagbe dọmọ: “Whenuena yé yí mì do alọ yetọn mẹ, mì lẹn dọ, nawẹ kavi etẹ mì na dọ blo: na yè na na onú he mì na dọ mì to ojlẹ nẹ mẹ. Na e mayin mìwlẹ wẹ to hodọ gba, ṣigba [gbigbọ] Otọ́ mìtọn tọn wẹ to hodọ to mì homẹ.”

Jesu zindonukọn dọmọ: “Nọvisunnu na yí nọvisunnu na okú, otọ́ na yí ovi na okú; ovi na fọ́n do mẹjitọ yetọn lẹ ji, yé nasọ hù yé.” E yidogọ dọmọ: “Yè na gbẹwanna mì gbọn gbẹtọ lẹpo dè na oyín ṣie tọn wutu: ṣigba mẹhe sinyẹnlin kakajẹ opodo wẹ yè na whlẹngán.”

Yẹwhehodidọ lọ yin onú titengbe hugan. Na whẹwhinwhẹ́n ehe tọn wutu Jesu zinnudo nuhudo lọ ji na wuntuntun nado sọgan basi wadotana azọ́n lọ tọn po awuvivo po. “Whenuena yé to homẹkẹndo mì to otò he mẹ, mì họnyi awetọ mẹ,” wẹ e dọ, “nugbo wẹ yẹn dọ hlan mì, Mìwlẹ ma na jugbọn otò Islaeli tọn lẹpo mẹ, whẹpo Ovi gbẹtọ tọn na do wá gba.”

Nugbo wẹ dọ Jesu na anademẹ, avase, po tulinamẹ ehe po apọsteli 12 etọn lẹ, ṣigba e sọ tin na mẹhe na tindo mahẹ to azọ́n yẹwhehodidọ lẹdo aihọn pé lọ tọn mẹ to okú po fọnsọnku etọn po godo lẹ. Ehe yin didohia gbọn didọ etọn dali dọ devi etọn lẹ na yin ‘wangbẹna gbọn mẹlẹpo dali,’ e mayin gbọn Islaelivi he dè apọsteli lọ lẹ yin didohlan nado dọyẹwheho hlan lẹ kẹdẹ dali gba. Yinukọn dogọ, kunnudenu dohia dọ apọsteli lọ lẹ mayin hinhẹn yì togán lẹ po ahọlu lẹ po nukọn to whenuena Jesu do yé hlan to nujijla yẹwhehodidọ whenu-gli tọn yetọn whenu gba. Humọ, yisenọ lọ lẹ mayin hùhù to whenẹnu gbọn hagbẹ whẹndo tọn lẹ dali gba.

Enẹwutu to whenuena e to didọ dọ devi etọn lẹ ma na dotana lẹdo yẹwhehodidọ tọn yetọn “whẹpo Ovi gbẹtọ tọn na do wá,” Jesu gbọn dọdai dali to didọna mí dọ devi etọn lẹ ma na dotana lẹdo fininọ aigba lọ tọn blebu po yẹwhehodidọ dogbọn Ahọluduta heyin zizedai Jiwheyẹwhe tọn po dali whẹpo Ahọlu Jesu Klisti pagigona lọ nado wá taidi ogán whẹdida-hẹnṣẹtọ Jehovah tọn to Amagẹdọni gba.

To nukọnzinzindo to anademẹ yẹwhehodidọ tọn etọn mẹ, Jesu dọmọ: “Mẹhe yè to pinplọn ma nọ hugan mẹplọntọ etọn gba, mọ afanumẹ ma nọ hugan oklunọ etọn.” Enẹwutu hodotọ Jesu tọn lẹ dona donukun nado mọ nuyiwahẹmẹ ylankan po homẹkẹn dopolọ po yí dile ewọ wà do na yẹwheho wẹndagbe Ahọluduta lọ tọn didọ wutu. Ṣogan e dotuhomẹnamẹ dọmọ: “Mì dibusi yé he nọ hù agbasa, ṣigba bọ yé ma sọgan hù gbigbọ blo: ṣigba mì kúkú dibusi ewọ he sọgan hù agbasa po gbigbọ po sudo to [Gẹhẹnna] mẹ.”

Jesu wẹ dona ze apajlẹ lọ dai to whẹho ehe mẹ. Ewọ na doakọnna okú po adọgbigbo po kakati nado jogbe nugbonọ-yinyin etọn tọn hlan Omẹ lọ he tindo huhlọn lẹpo, yèdọ Jehovah Jiwheyẹwhe. Mọwẹ, Jehovah wẹ yin omẹ lọ he sọgan hù ‘alindọn’ mẹde tọn sudo (to whẹho ehe mẹ he zẹẹmẹdo nukundido sọgodo tọn mẹde tọn taidi alindọn gbẹ̀te de) kavi kakatimọ sọgan fọ́n mẹde sọnku nado duvivi ogbẹ̀ madopodo tọn. Otọ́ owanyinọ, awuvẹmẹtọ olọn mẹ tọn nankọtọn die Jehovah yin!

Enẹgodo Jesu na tuli devi etọn lẹ po oló de he zinnudo mẹtọnhopọn owanyinọ Jehovah tọn na yé po ji. “Be oblẹnọ awe ma wẹ yé nọ sà yin abọgankuẹ pẹvi de?” wẹ e kanse. “Mọ dopo yetọn ma na flẹ jẹ aigba to Otọ́ mìtọn godo. Ṣigba yèdọ oda ota mìtọn tọn lẹpo wẹ yè hia pé. Enẹwutu mì dibu blo, mìwlẹ doale hú oblẹnọ susu.”

Owẹ̀n Ahọluduta tọn he Jesu degbena devi etọn lẹ nado lá na klán whédo lẹ, eyin hagbẹ whẹndo tọn delẹ kẹalọyi i bọ devo lẹ gbẹ́ ẹ dai. “Mì lẹn dọ yẹn wá nado do jijọho hlan aigba ji blo,” wẹ e basi zẹẹmẹ dọ. “Yẹn ma wá nado do jijọho hlan gba, adavo ohi.” Gbọnmọ dali, e biọ adọgbigbo to hagbẹ whẹndo tọn de si nado kẹalọyi nugbo Biblu tọn. “Mẹhe yiwanna otọ́ kavi onọ̀ hú mi, e ma jẹ na mi,” wẹ Jesu doayi e go, “mẹhe sọ yiwanna visunnu, kavi viyọnnu hú mi, e ma jẹ na mi.”

To tadidona anademẹ etọn lẹ mẹ, Jesu basi zẹẹmẹ dọ mẹhe yí devi etọn lẹ yí ewọ lọsu ga. “Mẹdepope he na yí kọfo osin mimiọn tọn de ṣokẹdẹ na dopo to yé omẹ [pẹvipẹvi] helẹ mẹ to oyín nuplọntọ tọn mẹ, nugbo wẹ yẹn dọ hlan mì, ewọ ma na bà ale etọn pò to alọ depope mẹ gba.” Matiu 10:16-42.

▪ Avase tẹlẹ wẹ Jesu wleawu etọn na devi etọn lẹ?

▪ Tulinamẹ po homẹmiọnnamẹ tẹ po wẹ e na yé?

▪ Naegbọn anademẹ Jesu tọn lẹ gando Klistiani egbezangbe tọn lẹ lọsu go ga?

▪ Aliho tẹmẹ wẹ devi Jesu tọn de ma hugan mẹplọntọ etọn te?