Weta 63

Ayinamẹ Mẹjlọdote Yinukọn Dogọ Lẹ

DILE Jesu po apọsteli etọn lẹ po gbẹ́ pò to ohọ̀ lọ mẹ to Kapẹlnaumi, onú devo he gbọnvona nudindọn apọsteli lọ lẹ tọn gando mẹhe klohugan go sọ yin hodọdeji. Ehe yin nujijọ de he sọgan ko jọ to whenuena yé tin to aliho ji ja Kapẹlnaumi, to whenuena Jesu lọsu ma tin to finẹ. Apọsteli Johanu na ẹn linlin dọmọ: “Míwlẹ mọ mẹde to oyín towe yí do to aovi lẹ yàn jẹgbonu, ewọ ma hodo mí: mí sọ kọ́ na ẹn, na e ma hodo mí wutu.”

E họnwun dọ Johanu pọ́n apọsteli lẹ hlan taidi, ogbẹ́ de he tindo tẹnmẹ-yinkọ azọ̀nhẹngbọnamẹ tọn he gbọnvo de. Enẹwutu e lẹndọ dawe lọ to azọ́n huhlọnnọ lẹ wà to aliho agọ̀ mẹ na e ma yin apadewhe pipli yetọn tọn wutu.

Ṣigba, Jesu na ayinamẹ dọmọ: “Mì sọ kọ́ na ẹn blo: na mẹde ma tin he na wazọ́n jiawu de to oyín ṣie mẹ, bo na sọgan yawu dọ oylan do ogo e. Na mẹhe ma jẹagọ do mí, mítọn wẹ. Na mẹdepope he na osin kọfo dopo mì nù to oyín ṣie mẹ, na mì yin Klisti tọn wutu, nugbo yẹn dọ hlan mì, ale etọn ma na gú i gba.”

E ma yin dandan dọ dawe ehe ni hodo Jesu to agbasa-liho nado sọgan tin to adà etọn mẹ gba. Agun Klistiani tọn ma ko yin didoai to whenẹnu gba, enẹwutu na e ma yin apadewhe pipli yetọn tọn ma zẹẹmẹdo dọ ewọ yin agun he yin kinklandovo de gba. Dawe lọ na nugbo tọn tindo yise to oyín Jesu tọn mẹ bo gbọnmọ dali tindo kọdetọn dagbe to aovi lẹ yinyan jẹgbonu mẹ. Ewọ to onú de wà he yin onú dopolọ pẹpẹ po nuhe Jesu dọ dọ e jẹ na ale po. Jesu dohia dọ na ehe wiwà wutu, ewọ ma na hẹn ale etọn bu gba.

Ṣigba etẹwẹ lo eyin dawe lọ yin hinhẹn dahli gbọn ohó po nuyiwa apọsteli lẹ tọn po dali? Ehe na sinyẹn taun! Jesu dohia dọmọ: “Mẹdepope he na hẹn dopo to pẹvipẹvi he yí mi sè helẹ de mẹ dahli, e bọawu na ẹn na yè ni blá osé do okọ̀ etọn, bo siọ ẹ do ohù mẹ.”

Jesu dọ dọ hodotọ emitọn lẹ dona de nudepope he họakuẹ na yé taidi alọ, afọ, kavi nukun he sọgan hẹn yé dahli sẹ̀ sọn gbẹzan yetọn mẹ. E pọnte hugan nado tin matin onú họakuẹ ehe bo biọ Ahọluduta Jiwheyẹwhe tọn mẹ hugan nado tindo e bo yin dindọ̀n dlan Gẹhẹnna mẹ (okiti ogbóji tọn de he to miyọ́n ji sẹpọ Jelusalẹm), ehe nọtena vasudo mavọmavọ.

Jesu sọ na avase dọmọ: “Mì payi, dọ mì vlẹ dopo to pẹvi helẹ de mẹ blo: na yẹn dọ hlan mì, dọ, to olọn mẹ, whepoponu wẹ angẹli yetọn lẹ nọ pọ́n nukun mẹ Otọ́ ṣie he tin to olọn mẹ tọn.” Enẹgodo e basi dohia nuhọakuẹ-yinyin “dopo to pẹvi” lẹ mẹ tọn to whenuena e dọna yé dogbọn dawe de he tindo lẹngbọ kanweko ṣigba bo hẹn dopo bu dali. Dawe lọ na jo 99 he pò lẹ do bo dín dopo he bu lọ mọ, wẹ Jesu basi zẹẹmẹ dọ, podọ to mimọ ẹn godo e na jaya do e ji hugan 99 he pò lẹ. Enẹgodo Jesu dotana dọmọ: “Mọkẹdẹ wẹ e ma yin onú jijlo de to Otọ́ mìtọn he tin to olọn mẹ nukọn, dọ dopo to pẹvi helẹ de mẹ ni dọ̀n.”

Po yọnbasi lọ po dọ e tindo nudindọn apọsteli etọn lẹ tọn to yedelẹ ṣẹnṣẹn to ayiha mẹ, Jesu dotuhomẹna yé dọmọ: “Mì do ojẹ̀ to mìlọsu homẹ, na mì ni sọ nọ nọ̀ jijọho hẹ mìnọzo.” Núdùdù he ma tindo otọ́n nọ yin hinhẹn víví gbọn ojẹ̀ dali. Gbọnmọ dali, ojẹ̀ yẹhiadonu tọn nọ hẹn nuhe mẹde dọ bọawu nado kẹalọyi. Ojẹ̀ mọnkọtọn tintindo na gọalọ nado hẹn jijọho go.

Ṣigba na mapenọ-yinyin gbẹtọvi tọn wutu, to whedelẹnu wiwọ́ sinsinyẹn lẹ nọ jọ. Jesu sọ wleawuna anademẹ lẹ na nukunpipedo yé go. “Eyin mẹmẹsunnu towe waylan do ogo we,” wẹ Jesu dọ, “yì, do oylan etọn hia ẹ to hiẹ po ewọ po awe ṣẹnsẹn kẹdẹ: eyin e sè towe, hiẹ duale mẹmẹsunnu towe tọn.” Eyin ewọ ma dotoai, Jesu na ayinamẹ dọ, “hiẹ ni yí omẹ dopo kavi awe devo dogọ́ dewe, dọ to onù kunnudetọ awe kavi atọ̀n tọn mẹ, yè ni do yí ohó lẹpo hẹn ai.”

Jesu dọ dọ, afọdide godo tọn lọ kẹdẹ wẹ, nado dọ whẹho lọ hlan “agun,” yèdọ, hlan nugopọntọ azọngbannọ agun lọ tọn lẹ he sọgan basi nudide whẹdida dodo tọn. Eyin ylanwatọ lọ ma na setonu na nudide yetọn, Jesu dotana dọ, “gbọ ni tin hlan we di Kosi lẹ, po tòkuẹ-ṣinyantọ lẹ po.”

To nudide mọnkọtọn bibasi mẹ, nugopọntọ lọ lẹ dona tẹdo anademẹ he tin to Ohó Jehovah tọn mẹ lẹ go pẹkipẹki. Gbọnmọ dali, to whenuena yé mọdọ mẹde huwhẹ̀ bo jẹ na yasanamẹ, whẹdida lọ ‘na ko yin bibla to olọn mẹ.’ Podọ to whenuena yé ‘tún in to aigba ji,’ yèdọ, mọ mẹde nado yin homẹvọnọ, e na ko yin “túntún to olọn mẹ.” To dodinnanu whẹdida dodo tọn mọnkọtọn mẹ, Jesu dọ, “ofi he omẹ awe kavi atọ̀n bẹ yede pli dopọ to oyín ṣie mẹ te, yẹn tin to gblagbla yetọn mẹ to finẹ.” Matiu 18:6-20; Malku 9:38-50; Luku 9:49, 50.

▪ Naegbọn e ma do yin dandannu to azán Jesu tọn gbè nado kọnawudopọ hẹ ẹ?

▪ Nawẹ whẹho omẹ pẹvi dopo hinhẹn dahli tọn sinyẹn sọ, podọ nawẹ Jesu basi dohia nujọnu-yinyin omẹ pẹvi mọnkọtọn lẹ tọn gbọn?

▪ Vlavo etẹwẹ whàn tulinamẹ Jesu tọn na apọsteli lẹ nado tindo ojẹ̀ to yedelẹ ṣẹnṣẹn?

▪ Zẹẹmẹ tẹwẹ tin na ‘bibla’ po ‘túntún’ po?