Weta 69
Nudindọn Do Otẹn Otọ́-Yinyin Tọn Ji
TO HÙNWHẸ lọ whenu, hodọdopọ Jesu tọn hẹ nukọntọ Juvi lẹ tọn sọ vọ́ sinyẹn deji taun. “Yẹn yọnẹn dọ okún Ablaham tọn wẹ mì,” wẹ Jesu yigbe dọ, “ganṣo mì to dindin nado hù mi, na ohó ṣie ma tindo otẹn to mì mẹ wutu. Yẹn to onú he yẹn mọ to Otọ́ ṣie dè dọ; mìwlẹ sọ to onú he mì mọ to otọ́ mìtọn dè wà.”
Dile etlẹ yindọ e ma dọ mẹhe yin otọ́ yetọn, Jesu hẹn ẹn họnwun dọ otọ́ yetọn gbọnvona emitọn. To ma yọ́n mẹhe Jesu tindo to ayiha mẹ, nukọntọ Juvi lẹ tọn lẹ yigbe dọmọ: “Otọ́ mítọn wẹ Ablaham.” Yé tindo numọtolanmẹ dọ yé tindo yise dopolọ taidi Ablaham, mẹhe yin họntọn Jiwheyẹwhe tọn.
Ṣigba, Jesu hẹn yé jọsi po gblọndo lọ po dọmọ: “Eyin ovi Ablaham tọn wẹ mì, mìwlẹ do wà azọ́n Ablaham tọn.” Na nugbo tọn, visunnu jọnun de nọ hodo apajlẹ otọ́ etọn tọn. “Ṣigba dinvie mì to dindin na hù mi,” wẹ Jesu dọ, “mẹhe dọ nugbo na mì, he yẹn sè sọn Jiwheyẹwhe dè: Ablaham ma wà ehe gba.” Enẹwutu Jesu dọ whladopo dogọ dọmọ: “Mìwlẹ to azọ́n otọ́ mìtọn tọn wà.”
Etomọṣo yé ma ko yọ́n mẹhe hodọ Jesu te gba. Yé zinnudeji dọ yé yin visunnu Ablaham tọn lẹ to osẹ́n-liho, bo dọmọ: “Yè ma ji mí sọn ogalilọ mẹ gba.” Gbọnmọ dali, to alọsọakọ́n nado yin sinsẹ̀n-basitọ nugbonọ taidi Ablaham, yé zinnudeji dọmọ: “Míwlẹ tindo Otọ́ dopo, enẹ wẹ Jiwheyẹwhe.”
Ṣigba be Jiwheyẹwhe wẹ Otọ́ yetọn nugbonugbo? “Eyin Jiwheyẹwhe wẹ Otọ́ mìtọn,” wẹ Jesu gblọn, “mì do yiwanna mi: na yẹn tọ́njẹgbonu bosọ sọn Jiwheyẹwhe dè wá; yẹn ma wá na dee gba, ṣigba ewọ wẹ do mi hlan. Etẹwutu wẹ mì ma yọ́n hogbe ṣie?”
Jesu ko tẹnpọn nado do nuhe kọdetọn gbigbẹ́ ẹ dai tọn na yin hia sinsẹ̀ngán ehelẹ. Ṣigba todin e dọ tlọlọ dọmọ: “Otọ́ mìtọn lẹgba tọn wẹ mì, wantuntun otọ́ mìtọn tọn ojlo mìtọn wẹ nado wà.” Otọ́ nankọ wẹ Lẹgba yin? Jesu do e hia taidi hlọnhutọ de bosọ dọmọ: “Lalonọ de wẹ ewọ, podọ otọ́ etọn.” Enẹwutu Jesu dotana dọmọ: “Mẹhe yin Jiwheyẹwhe tọn nọ sè ohó Jiwheyẹwhe tọn lẹ; ehe tọn wutu wẹ mìwlẹ ma sè, na mì ma yin Jiwheyẹwhe tọn wutu.”
Yin homẹgblena gbọn whẹgbledomẹ Jesu tọn dali, Ju lẹ gblọn dọmọ: “Be míwlẹ ma dọ dọ Samaliatọ wẹ hiẹ nugbo, bosọ tindo aovi de?” Hogbe lọ “Samaliatọ” nọ yin yiyizan taidi hogbe wangbẹna po vlẹko po tọn, na Samalianu lẹ yin mẹhe Ju lẹ gbẹwanna.
To didapana mẹbàdu wangbẹnamẹ tọn lọ dogbọn yinyin Samalianu de dali, Jesu gblọn dọmọ: “Yẹn ma tindo aovi de gba; ṣigba yẹn to gbégbòna Otọ́ ṣie, mìwlẹ ma sọ gbògbéna mi.” To nukọnyiyi mẹ, Jesu do opagbe mẹhẹn-jọsi tọn lọ dọmọ: “Eyin mẹde yí ohó ṣie hẹn, e ma na mọ okú gbede.” Na nugbo tọn, Jesu ma to didọ dọ mẹhe hodo emi lẹpo ma na mọ okú gbede to paa mẹ gba. Kakatimọ, e to didọ dọ yé ma na mọ vasudo mavọmavọ gbede, kavi “okú awetọ,” sọn ehe mẹ fọnsọnku depope ma tin te.
Ṣigba, Ju lẹ mọnukunnujẹ ohó Jesu tọn lẹ mẹ do agọ̀. Enẹwutu, yé dọmọ: “Dinvie wẹ míwlẹ yọnẹn dọ hiẹ tindo aovi de. Ablaham kú po yẹwhegán lẹ po; hiẹ sọ dọmọ, Eyin mẹde yí ohó ṣie hẹn, e ma na dọ́ okú pọ́n gbede. Hiẹ klohú otọ́ mítọn Ablaham, mẹhe kú? Yẹwhegán lẹ sọ kú: mẹnu wẹ hiẹ yí dewe do basi?”
To hodọdopọ ehe pete mẹ, e họnwun dọ alọdlẹndo nugbo lọ na sunnu helẹ wẹ Jesu te dọ emi wẹ Mẹssia dopagbe lọ. Ṣigba kakati nado na gblọndo na kanbiọ yetọn tlọlọ gando mẹhe ewọ yin go, Jesu dọmọ: “Eyin yẹn pagigona dee, gigo ṣie ma yin nude: Otọ́ ṣie wẹ mẹhe gigopana mi; mẹhe mì dọ, ewọ wẹ Jiwheyẹwhe mìtọn. Mìwlẹ ma yọ́n ẹn; ṣigba yẹn yọ́n ẹn: eyin yẹn dọ, Yẹn ma yọ́n ẹn, yẹn na tin jijlẹ do mìwlẹ go, lalonọ de.”
To nukọnyiyi mẹ, Jesu dlẹnalọdo Ablaham nugbonọ whladopo dogọ, dọmọ: “Ablaham otọ́ mìtọn jaya dọ ewọ ni do mọ azán ṣie: [bọ ewọ mọ ẹn, NW ] bosọ yin homẹhunnọ.” Mọwẹ, po nukun yise tọn lẹ po, Ablaham pọ́n nukọn dohlan na wiwá Mẹssia dopagbe lọ tọn. To mayise mẹ, Ju lẹ yigbe dọmọ: “Owhe towe ma yì kande-ao, hiẹ ko sọ mọ Ablaham?”
“Nugbo, nugbo, wẹ yẹn dọ hlan mì,” wẹ Jesu gblọn, “Whẹpo yè ji Ablaham, yẹn tin.” Na nugbo tọn, Jesu to alọdlẹndo tintin etọn taidi gbẹtọ gbigbọnọ de to olọn mẹ jẹnukọnna lilẹzun gbẹtọvi de.
Yin homẹgblena gbọn alọsọakọ́n Jesu tọn nado ko tin jẹnukọnna Ablaham dali, Ju lẹ fọ̀ zannu lẹ nado dlan do e. Ṣigba e whla ede bo tọ́nsọn tẹmpli lọ mẹ awuyẹyẹ-afọyẹyẹ. Johanu 8:37-59; Osọhia 3:14; 21:8.
▪ Nawẹ Jesu dohia dọ ewọ po kẹntọ etọn lẹ po tindo otọ́ he gbọnvo lẹ gbọn?
▪ Etẹwẹ hogbe lọ Samalianu he Ju lẹ yizan nado ylọ Jesu zẹẹmẹdo?
▪ To linlẹn tẹ mẹ wẹ Jesu to didọ te dọ hodotọ etọn lẹ ma na mọ okú gbede?