Weta 71
Yise Matindo sọn Ojlo mẹ Wá Falesi lẹ Tọn
OBU di mẹjitọ nukuntọnnọ nubiọdùtọ dai tọn lọ tọn lẹ to whenuena yé yin yiylọ wá Falesi lẹ nukọn. Yé yọnẹn dọ yè ko magbe dọ mẹdepope he do yise hia to Jesu mẹ na yin yinyan sọn sinagọgu mẹ janwẹ. Kansinsán mọnkọtọn na gbẹdido hẹ mẹdevo lẹ to lẹdo lọ mẹ sọgan hẹn awusinyẹnnamẹnu sinsinyẹn lẹ wá, titengbe na whẹndo wamọnọ tọn de. Enẹwutu mẹjitọ lọ lẹ tin to aṣeji.
“Visunnu mìtọn wẹ ehe, mẹhe mì dọ yè ji i nukuntọnnọ?” wẹ Falesi lẹ kanse. “Nawẹ e gbọn do to numọ dinvie?”
“Míwlẹ yọnẹn dọ visunnu mítọn wẹ ehe, podọ yè ji i nukuntọnnọ,” wẹ mẹjitọ lẹ dekunnu dọ. “Ṣigba le e to numọ do dinvie, míwlẹ ma yọnẹn, kavi mẹhe hùn nukun etọn mí ma yọnẹn.” Na jide tọn visunnu yetọn na ko dọ nuhe jọ lẹpo na yé, ṣigba mẹjitọ lọ lẹ dọ po nuyọnẹn po dọmọ: “Nuyọnẹntọ wẹ ewọ, mì kanbiọ ẹ: e na dọ na ede.”
Enẹwutu, Falesi lẹ sọ vọ́ ylọ dawe lọ whladopo dogọ. To ojlẹ ehe mẹ yé tẹnpọn nado dobuna ẹn gbọn didohia dali dọ yé ko mọ kunnudenu sẹ́nhẹngba tọn sọta Jesu. “Na gigo Jiwheyẹwhe,” wẹ yé degbe dọ. “Míwlẹ yọnẹn dọ ylandonọ de wẹ dawe he.”
Dawe nukuntọnnọ dai tọn lọ ma gbẹ́ whẹsadokọnamẹ yetọn dai gba, e dọmọ: “Eyin ewọ yin ylandonọ de, yẹn ma yọnẹn.” Ṣigba e yidogọ dọmọ: “Onú dopo wẹ yẹn yọnẹn, dọ sọle yẹn ko yin nukuntọnnọ, yẹn to numọ dinvie.”
To tintẹnpọn nado dín aklọ̀n to kunnudenu etọn mẹ, Falesi lẹ sọ vọ́ kanse whladopo dogọ dọmọ: “Etẹwẹ e wà hlan we? Nawẹ e hùn nukun towe do?”
“Yẹn ko dọ na mì yèdọ dinvie,” wẹ dawe lọ wulé dọ, “mì ma sọ sè: etẹwutu wẹ mì sọ jlo nado vọ́ sè?” Po hogbe mẹṣanko tọn po, e kanse dọmọ: “Mì jlo na lẹzun nuplọntọ etọn ga wẹ?”
Gblọndo ehe fọ́n adi Falesi lẹ tọn dote. “Hiẹ wẹ nuplọntọ etọn,” wẹ yé dọ, “ṣigba nuplọntọ Mose tọn wẹ míwlẹ. Míwlẹ yọnẹn dọ Jiwheyẹwhe dọho hlan Mose, ṣigba na dawe he tọn, míwlẹ ma yọ́n fihe e sọn wá.”
To nupaṣamẹ didohia mẹ, nubiọdùtọ whiwhẹnọ lọ yigbe dọmọ: “Etẹwutu, ehe mẹ wẹ nujawu te, na mìwlẹ ma yọ́n fihe ewọ sọn wá, ṣigba ewọ ko hùn nukun ṣie.” Tadona tẹwẹ dona yin dindọ̀n sọn ehe mẹ? Nubiọtọ lọ dlẹnalọdo ohó he dona yin alọkẹyi lọ dọmọ: “Míwlẹ yọnẹn dọ Jiwheyẹwhe ma nọ sè ylandonọ tọn: ṣigba eyin mẹde yin sinsẹ̀ntọ Jiwheyẹwhe tọn, bosọ wà ojlo etọn, ewọ wẹ e nọ sè etọn. Sọn dodo aihọn tọn yè ma ko sè dọ, mẹde hùn nukun mẹhe yè ji nukuntọnnọ de tọn gbede.” Gbọnmọ dali, tadona lọ dona họnwun hezeheze dọmọ: “Eyin dawe ehe ma tin sọn Jiwheyẹwhe dè gba, e ma sọgan wà nudepope.”
Falesi lẹ ma tindo gblọndo na linlẹn tlọlọ, mẹhẹnlẹnnupọn tọn mọnkọtọn gba. Yé ma sọgan jẹagọdo nugbo lọ, podọ enẹwutu yé dọ danú na dawe lọ dọmọ: “Hiẹ he yè ji patapata to ylando mẹ, hiẹ to míwlẹ plọn?” Na ehe tọn, yé yàn dawe lọ tọ́n jẹgbonu, e họnwun dọ e yin yinyan sọn sinagọgu mẹ.
To whenuena Jesu sè dogbọn nuhe yé ko wà dali, e dín dawe lọ mọ bo dọmọ: “Hiẹ yí Ovi [Gbẹtọ, NW ] tọn sè?”
To gblọndo mẹ, nubiọdùtọ nukuntọnnọ dai tọn lọ kanse dọmọ: “Mẹnu wẹ ewọ, Oklunọ, na yẹn nido yí ì sè?”
“Ewọ sọ wẹ mẹhe to hodọ hẹ we,” wẹ Jesu gblọn.
To afọdopolọji, dawe lọ litai to Jesu nukọn bo dọmọ: “Yẹn yise, Oklunọ.”
Enẹgodo Jesu basi zẹẹmẹ dọmọ: “Whẹdida [ehe] wẹ yẹn wá aihọn he mẹ na, na mẹhe ma mọnú dai lẹ nido mọnú; podọ mẹhe mọnú lẹ nido lẹzun nukuntọnnọ.”
Po enẹ po, Falesi he to todoai lẹ kanse dọmọ: “Míwlẹ yin nukuntọnnọ ga?” Eyin yé na mọnukunnujẹemẹ dọ yé yin nukuntọnnọ to ayiha mẹ, whẹwhinwhẹ́n na tin na nukundiọsọmẹ yetọn sọta Jesu. Dile Jesu dọ na yé do dọmọ: “Eyin mìwlẹ yin nukuntọnnọ, mì ma do tindo ylando gba.” Ṣogan, yé yí tasinsinyẹn do tẹkudeji dọ yé ma yin nukuntọnnọ podọ ma tindo nuhudo nukunnumọjẹnumẹ gbigbọmẹ tọn. Enẹwutu Jesu dohia dọmọ: “Dinvie mì dọ, Míwlẹ mọnú; enẹwutu ylando mìtọn to ote.” Johanu 9:19-41.
▪ Naegbọn obu do di mẹjitọ nubiọdùtọ nukuntọnnọ dai tọn lọ lẹ to whenuena yé yin yiylọ wá Falesi lẹ nukọn, podọ enẹwutu nawẹ yé na gblọndo po mẹdehihọ́ po gbọn?
▪ Nawẹ Falesi lẹ tẹnpọn nado dobuna dawe nukuntọnnọ dai tọn lọ gbọn?
▪ Nudindọn mẹhẹnlẹnnupọn dawe lọ tọn tẹwẹ fọ́n adi Falesi lẹ tọn dote?
▪ Naegbọn Falesi lẹ ma tindo whẹwhinwhẹ́n depope na nukundiọsọmẹ yetọn sọta Jesu?