Weta 85

Dehe Bú lọ Dindin Mọ

JESU to jejeji nado dín mẹhe na sẹ̀n Jiwheyẹwhe po whiwhẹ po lẹ mọ. Enẹwutu ewọ nọ to díndín bo nọ to hodọna mẹlẹpo dogbọn Ahọluduta lọ dali, gọna ylandonọ he diyin lẹ ga. Todin omẹ mọnkọtọn lẹ dọnsẹpọ ẹ nado dotoai hlan ẹn.

To ayidido ehe go, Falesi lẹ po wekantọ lẹ po mọhodọdo Jesu go na gbẹdido hẹ gbẹtọ he yewlẹ nọ pọnhlan taidi mẹhe ma jẹ lẹ. Yé hlún dọmọ: “Dawe he to ylandonọ lẹ yí, bosọ to núdù hẹ yé.” Lehe enẹ hẹn yẹyi yetọn whè do sọ! Falesi lẹ po wekantọ lẹ po nọ yinuwa hẹ gbẹtọ paa lẹ taidi dihó he afọ yetọn bẹ lẹ. Na nugbo tọn, yé nọ yí hogbe Heblu tọn lọ ‛am ha·’aʹrets zan, heyin “gbẹtọ kọmẹ [aigba] tọn” lẹ, nado do nukun pẹvi he yé nọ yí do pọ́n omẹ mọnkọtọn lẹ hia.

To alọ devo mẹ, Jesu yinuwa hẹ mẹlẹpo po yẹyi, homẹdagbe, awuvẹmẹ po. Taidi kọdetọn de, susu mẹhe yè nọ yí nukun pẹvi do pọ́n ehelẹ, gọna mẹhe yin yinyọnẹn ganji na ylanwiwa lẹ, tin to jejeji nado dotoai hlan ẹn. Ṣigba etẹwẹ dogbọn homọdọdomẹgo Falesi lẹ tọn do Jesu go na vivẹnudido do ota mẹhe yewlẹ nọ pọnhlan taidi mẹhe ma jẹ lẹ tọn dali?

Jesu na gblọndo agọjẹdomẹ yetọn gbọn oló de yiyizan dali. E dọho sọn pọndohlan Falesi lẹ tọn titi mẹ, taidi dọ yé yin dodonọ lẹ bo tindo hihọ́ to apó Jiwheyẹwhe tọn mẹ, bọ mẹgbẹdai ‛am ha·’aʹrets lẹ ko buali bo tin to ninọmẹ búbú tọn mẹ nkọtọn. Dotoai dile e kanse dọmọ:

“Dawe tẹwẹ to mì mẹ, he tindo lẹngbọ kanweko, eyin e hẹn dopo bú to yé mẹ, bọ e ma na jo kanwe-fọtọ̀n-nukunẹnẹ he pò dai to zungbo mẹ, bo doafọna ehe bú, kaka e na do mọ ẹn. Whenuena e sọ mọ ẹn, e ze e do abọ́ etọn ji, e to ayajẹ. Whenuena e sọ biọ whégbè, e ylọ họntọn etọn lẹ, po kọmẹnu etọn lẹ po plidopọ, bo dọ hlan yé, dọmọ, Mì jaya hẹ mi; na yẹn ko mọ lẹngbọ ṣie he bú.”

Enẹgodo Jesu basi yọn-na-yizan otàn etọn tọn, dọmọ: “Yẹn dọ hlan mì, mọkẹdẹ wẹ ayajijẹ na tin to olọn mẹ to ylandonọ dopo he [lẹnvọjọ, NW] ji, hú to dodonọ kanwe-fọtọ̀n-nukunẹnẹ he ma [tindo lẹnvọjọ, NW] ji.”

Falesi lẹ pọ́n yedelẹ hlan taidi dodonọ bo gbọnmọ dali ma tindo nuhudo lẹnvọjọ tọn. To whenuena delẹ to yé mẹ mọhodọdo Jesu go to owhe delẹ die jẹnukọn na e to núdù hẹ takuẹ-ṣinyantọ po ylandonọ lẹ po wutu, e dọna yé dọmọ: “Yẹn ma wá nado ylọ dodonọ lẹ gba, adavo ylandonọ lẹ.” Falesi dodonọ mẹdetiti tọn jlatọ lẹ, he gboawupo nado mọ nuhudo yetọn nado lẹnvọjọ, ma hẹn ayajẹ depope wá to olọn mẹ gba. Ṣigba ylandonọ he lẹnvọjọ nugbonugbo lẹ wà mọ.

Nado hẹn nuagokun lọ dohuhlọn do whla awe ji dọ hinhẹngọwa ylandonọ he ko bú lẹ tọn yin nuhe nọ hẹn ayajẹ daho wá, Jesu dó oló devo. E dọmọ: “Yọnnu tẹwẹ he tindo fataka-kuẹ ao, eyin e hẹn dopo bú, bọ e ma na tá zògbán, bo zà whégbè, bosọ dín in tlala kaka e na do mọ ẹn? Whenuena e sọ mọ ẹn, e ylọ họntọn etọn lẹ, po kọmẹnu etọn lẹ po plidopọ, bo dọmọ, Mì jaya hẹ mi; na yẹn ko mọ akuẹ he yẹn hẹn bú.”

Enẹgodo Jesu na yọn-na-yizan dopolọ. E zindonukọn nado dọmọ: “Yẹn dọ hlan mì, mọkẹdẹ wẹ ayajijẹ tin to angẹli Jiwheyẹwhe tọn lẹ nukọn to ylandonọ dopo he [lẹnvọjọ, NW] ji.”

Lehe ahunmẹdunamẹ owanyi tọn heyin angẹli Jiwheyẹwhe tọn lẹ tọn na hinhẹngọwa ylandonọ he bú lẹ tọn yin ayidego tọn do sọ! Ehe yinmọ titengbe to whenuena e yindọ gbẹtọ ‛am ha·’aʹrets he yè ko nọ yí nukunpẹvi do pọ́n, bo nọ yin vivlẹko dai lẹ wá hukan lọ ji to godo mẹ na hagbẹ-yinyin to Ahọluduta olọn tọn Jiwheyẹwhe tọn mẹ. Taidi kọdetọn de, yé mọ otẹn de yí to olọn mẹ he yiaga hugan angẹli lẹ lọsu tọn! Ṣigba kakati nado tindo numọtolanmẹ awuwhàn kavi mẹdèpo tọn, angẹli lẹ yí whiwhẹ do mọnukunnujẹemẹ dọ gbẹtọvi ylandonọ ehelẹ ko pehẹ bo ko duto ninọmẹ lẹ ji to gbẹ̀mẹ ehe na hẹn yé penugo nado wadevizọn taidi ahọlu po yẹwhenọ mẹtọnhopọntọ po lẹblanunọ lẹ po. Luku 15:1-10; Matiu 9:13; 1 Kọlintinu lẹ 6:2, 3; Osọhia 20:6.

▪ Naegbọn Jesu do dogbẹ́ hẹ ylandonọ he diyin lẹ, podọ homọdọdomẹgo tẹwẹ e detọn sọn Falesi lẹ dè?

▪ Nukun tẹwẹ Falesi lẹ nọ yí do pọ́n gbẹtọ paa lẹ?

▪ Oló tẹlẹ wẹ Jesu yizan, podọ etẹwẹ mí sọgan plọn sọn yé mẹ?

▪ Naegbọn ayajijẹ angẹli lẹ tọn do yin ayidego tọn de?