Weta 90
Todido Fọnsọnku Tọn
TO GODO mẹ Jesu wá lẹdo Bẹtani tọn mẹ, gbetato de he yí nudi kilomẹtlu 3 do dẹn do Jelusalẹm. Azán vude poun wẹ ko juwayi sọn whenue Lazalọsi kú bo yin didi. Nọviyọnnu etọn lẹ Malia po Malta po gbẹ́ pò to aluẹmẹ, bọ mẹsusu ko wá owhé yetọn gbè nado miọnhomẹ na yé.
Dile yé to aluẹmẹ, mẹde dọna Malta dọ Jesu ko tin to aliho ji ja. Enẹwutu e tọ́n yì bo yawu nado yí pé e, vlavo bo ma dọna nọviyọnnu etọn. Dile e wá Jesu dè, Malta vọ́ nuhe ewọ po nọviyọnnu etọn po dona ko dọ whlasusu to azán ẹnẹ he wayi lẹ gblamẹ dọ: “Eyin hiẹ ko tin tofi, nọvisunnu ṣie ma do kú gba.”
Etomọṣo, Malta do todido hia, bo to didohia dọ Jesu sọgan gbẹ́ yí nude wà na nọvisunnu etọn. “Yẹn yọnẹn dọ, onú depope hiẹ kanbiọ sọn Jiwheyẹwhe dè, Jiwheyẹwhe na na we,” wẹ e dọ.
“Nọvisunnu towe nasọ fọ́n,” wẹ Jesu dopagbe dọ.
Malta mọnukunnujẹemẹ dọ Jesu to hodọ dogbọn fọnsọnku aigba ji tọn sọgodo tọn de dali, ehe Ablaham po devizọnwatọ Jiwheyẹwhe tọn devo lẹ po to nukọnpọnhlan na. Enẹwutu e yigbe dọmọ: “Yẹn yọnẹn dọ e nasọ fọ́n to fọnsọnku mẹ to azán podo gbè.”
Ṣigba, Jesu namẹ todido na pọngbọ afọdopolọji tọn, bo dọmọ: “Yẹn wẹ fọnsọnku po ogbẹ̀ po.” E flinnu Malta dọ Jiwheyẹwhe ko na ẹn huhlọn do okú ji, dọmọ: “Mẹhe yí mi sè, eyin e kú, e nasọ tin to ogbẹ̀: mẹhe sọ tin to ogbẹ̀, bosọ yí mi sè, ma na kú gbede.”
Jesu ma to didọna Malta dọ nugbonọ he tin to ogbẹ̀ to whenẹnu lẹ ma na kú gbede gba. Lala, ṣigba nuagokun he ji e to nùzindo lọ wẹ yindọ yise yiyizan to ewọ mẹ sọgan planmẹ yì ogbẹ̀ madopodo mẹ. Mẹsusu wẹ na duvivi ogbẹ̀ mọnkọtọn taidi kọdetọn yinyin finfọnsọnku yetọn tọn to azán godo tọn mẹ. Ṣigba mẹdevo he yin nugbonọ lẹ na lùn vivọnu titonu ehe tọn tọ́n to aigba ji, podọ na omẹ ehelẹ ohó Jesu tọn na yin nugbo na yé to linlẹn paa tọn de mẹ. Yé ma na kú pọ́n gbede! To hogbe ayidonugo tọn ehe godo, Jesu kanse Malta dọmọ: “Hiẹ yí ehe sè?”
“Mọwẹ, Oklunọ,” wẹ e gblọn. “Yẹn ko yise dọ, hiẹ wẹ Klisti lọ, Ovi Jiwheyẹwhe tọn, mẹhe ja aihọn mẹ.”
Enẹgodo Malta lẹkọyi po awuyiya po nado ylọ nọviyọnnu etọn, bo dọna ẹn to nuglọ dọmọ: “Mẹplọntọ tin tofi bo to yiylọ we.” To afọdopolọji Malia tlọ́n owhé lọ gbè. To whenuena mẹdevo lẹ mọ bọ e to yìyì, yé hodo e, bo to linlẹn dọ yọdo lọ kọ̀n wẹ e jei.
To whenuena e wá Jesu dè, Malia jẹklo to afọ etọn kọ̀n bo to avivi. “Oklunọ, eyin hiẹ ko tin tofi, nọvisunnu ṣie ma do kú gba,” wẹ e dọ. Jesu yin whinwhàn sisosiso to whenuena e mọdọ Malia po gbẹtọgun lọ lẹ he to hihodo e po to avivi. “Fie wẹ mì ko tẹ́ ẹ do?” wẹ e kanse.
“Oklunọ, wá pọ́n,” wẹ yé gblọn.
Jesu lọsu viavi, bo hẹn Ju lẹ nado dọmọ: “Mì pọ́n le e yiwanna ẹn do!”
Mẹdelẹ flin dọ, to ojlẹ Hùnwhẹ Gòhọtúntún tọn lọ whenu to osun vude die jẹnukọn, Jesu ko hẹnazọ̀ngbọna dawe jọja de he yin jiji taidi nukuntọnnọ, bọ yé kanse dọmọ: ‘Be dawe he, he hùn nukun nukuntọnnọ tọn, ma sọgan ko hẹnalọdotena okú dawe he tọn?’ Johanu 5:21; 6:40; 9:1-7; 11:17-37.
▪ Whetẹnu wẹ Jesu wá lẹdo he sẹpọ Bẹtani mẹ to godo mẹ, podọ etẹwẹ yin ninọmẹ he tin to finẹ?
▪ Dodonu tẹwẹ Malta tindo na yise tintindo to fọnsọnku mẹ?
▪ Nawẹ okú Lazalọsi tọn yinuwado Jesu ji gbọn?