Weta 95

Nuplọnmẹ lẹ Do Gbẹdai po Owanyi Na Ovi lẹ po Ji

JESU po devi etọn lẹ po tin to aliho ji jei Jelusalẹm nado yì Juwayi owhe 33 W.M. Yé dasá Otọ̀ Jọdani tọn bo ze aliho he gbọn agbegbe Pelea tọn ji. To osẹ kleun delẹ die jẹnukọn, Jesu tin to Pelea, ṣigba to whenẹnu ewọ yin yiylọ yì Judé na họntọn etọn Lazalọsi to azọ̀njẹ wutu. To whenuena e tin to Pelea to whenẹnu, Jesu dọho na Falesi lẹ dogbọn gbẹdai dali, podọ todin yé fọ́n whẹho lọ dote whladopo dogọ.

To Falesi lẹ ṣẹnṣẹn nuplọnmẹ linlẹn voovo tọn lẹ wẹ tin dogbọn gbẹdai dali. Mose dọ dọ yọnnu de sọgan yin gbigbẹdai na “onú demẹpò de to ewọ mẹ wutu.” Mẹdelẹ yise dọ ehe dlẹnalọdo fẹnnuwiwa kẹdẹ. Ṣigba mẹdevo lẹ pọ́n “onú demẹpò” hlan nado bẹ nuṣiwa flinflin pete lẹ lọsu hẹn. Enẹwutu, nado whlé Jesu pọ́n, Falesi lẹ kanse dọmọ: “Be e jẹ na sunnu de nado gbẹ́ asi etọn dai na whẹho lẹpo?” Yé deji dọ nudepope he Jesu dọ na dọ̀n ẹn do nuhahun mẹ po Falesi he tindo pọndohlan voovo lẹ po.

Jesu penukundo kanbiọ lọ go po azọ́nyinyọnẹn po, bo ma nọgodona pọndohlan gbẹtọvi tọn depope, ṣigba dlẹnalọ hlan tito dowhenu alọwle tọn. “Be mìwlẹ ma ko hia,” wẹ e kanse, “dọ mẹhe dá yé to whẹwhẹwhenu, dá yé asu po asi po? E sọ dọmọ, Na ehe tọn wẹ sunnu na jo otọ́ po onọ̀ etọn po dai, bo na sẹbọ do asi etọn dè: yé omẹ awe lẹ nasọ lẹzun agbasalan dopo. Sọmọ yé ma sọ yin omẹ awe ba gba, adavo agbasalan dopo. Enẹwutu, nuhe Jiwheyẹwhe kọndopọ mì dike gbẹtọ klán ẹn blo.”

Jesu dohia dọ, lẹndai dowhenu Jiwheyẹwhe tọn wẹ yindọ alọwlemẹ lẹ ni tẹdo yedelẹ go, dọ yé ni ma basi gbẹdai blo. Eyin enẹ yinmọ, wẹ Falesi lẹ gblọn, “Etẹwutu wẹ Mose degbè nado nọ na owe gbẹdai tọn de, bosọ jo e dai?”

Jesu gblọn dọmọ: “Sinsinyẹn ayiha mìtọn tọn wutu wẹ Mose do dikena mì nado jo asi mìtọn lẹ dai, ṣigba sọn whẹwhẹwhenu e ma to mọ gba.” Mọwẹ, to whenuena Jiwheyẹwhe ze nujinọtedo nugbo lọ dai na alọwle to jipa Edẹni tọn mẹ, e ma basi awuwledai depope na gbẹdai gba.

Jesu zindonukọn nado dọna Falesi lẹ dọmọ: “Mẹdepope he na jo asi etọn dai, adavo na whẹho ogalilọ tọn [sọn Glẹki mẹ, por·neiʹa], bosọ wlealọ hẹ devo, e deayọ.” E gbọnmọ dali dohia dọ por·neiʹa, ehe yin fẹnnuwiwa zanhẹmẹ tọn sinsinyẹn, kẹdẹ wẹ yin dodonu lọ he Jiwheyẹwhe kẹalọyi na gbẹdai.

To yinyọnẹn mẹ dọ alọwle dona yin kọndopọ tẹgbẹ̀ tọn de he tindo dodonu dopo kẹdẹ ehe na gbẹdai, devi lẹ yin whinwhàn nado dọmọ: “Eyin owhẹ̀ sunnu lọ tọn yin mọ po asi etọn po, e ma jẹ nado wlealọ gba.” Ayihaawe depope ma tin gba dọ mẹde he to linlẹn nado wlealọ dona lẹnnupọn sinsinyẹn dogbọn tẹgbẹ-yinyin kanṣiṣa alọwle tọn dali!

Jesu zindonukọn nado dọho dogbọn tlẹnmẹninọ dali. E basi zẹẹmẹ dọ visunnu delẹ nọ yin jiji taidi ojọ̀, bo ma nọ tindo nugopipe alọwle tọn na mawhẹ́n to zanhẹmẹ-liho wutu. Mẹdevo lẹ ko yin hinhẹn zun ojọ̀ gbọn gbẹtọ lẹ dali, he gbọn kanyinylan dali hẹn yé zun mẹhe ma penugo to zanhẹmẹ-liho. To godo mẹ, mẹdelẹ hùwhẹ ojlo lọ nado wlealọ podọ nado duvivi kọndopọ zanhẹmẹ tọn lẹ na yé nido sọgan ze yedelẹ jo to gigọ́mẹ hugan na whẹho he gando Ahọluduta olọn tọn go lẹ. “Mẹhe tin sọgan nado yí [tlẹnmẹninọ], gbọ e ni yí ì,” wẹ Jesu dotana dọ.

Todin gbẹtọ lẹ jẹ ovi flinflin yetọn lẹ hẹnwa Jesu dè ji. Ṣigba, devi lẹ dawhá do ovi lọ lẹ ji bo tẹnpọn nado yàn yé yì, matin ayihaawe to jijlo nado basi-hihọ́na Jesu sọn tuklajijẹ he ma yin dandan tọn lẹ si. Ṣigba Jesu dọmọ: “Mì gbọ yọpọvu lẹ ni wá dee, mì sọ kọna yé blo: na yé omẹ mọhunkọ lẹ tọn wẹ ahọludu Jiwheyẹwhe tọn. Nugbo wẹ yẹn dọ hlan mì, Mẹdepope he ma yí ahọludu Jiwheyẹwhe tọn di yọpọvu, e ma to na biọ e mẹ.”

Nuplọnmẹ dagbe nankọ die Jesu namẹ tofi! Nado mọ Ahọluduta Jiwheyẹwhe tọn yí, mí dona hodo apajlẹ whiwhẹ po yinyọ́n-plọn ovi flinflin lẹ tọn po. Ṣigba apajlẹ Jesu tọn sọ do lehe e yin nujọnu do sọ hia, titengbe na mẹjitọ lẹ, nado yí whenu zan hẹ ovi yetọn lẹ. Jesu todin do owanyi etọn hia na yọpọvu lẹ gbọn alọ etọn lẹ pipla okọ̀ na yé po didona yé po dali. Matiu 19:1-15; Deutelonomi 24:1; Luku 16:18; Malku 10:1-16; Luku 18:15-17.

▪ Pọndohlan he gbọnvo tẹlẹ wẹ Falesi lẹ tindo do gbẹdai ji, podọ enẹwutu nawẹ yé whlé Jesu pọ́n gbọn?

▪ Nawẹ Jesu yinuwa hẹ vivẹnudido Falesi lẹ tọn nado whlé e pọ́n gbọn, podọ etẹwẹ e na taidi dodonu dopo kẹdẹ lọ na gbẹdai?

▪ Naegbọn devi Jesu tọn lẹ dọ dọ e pọnte hugan ma nado wlealọ, podọ ayinamẹ tẹwẹ Jesu na?

▪ Etẹwẹ Jesu plọn mí gbọn aliho he mẹ e yinuwa hẹ ovi flinflin lẹ te dali?