Weta 100

Oló Mina lẹ Tọn

VLAVO Jesu gbẹ́ pò to owhé Zaṣé tọn gbè, fie e ko nọte te to aliho ji jei Jelusalẹm. Devi etọn lẹ yise dọ to whenuena yé jẹ Jelusalẹm, e na lá dọ emi wẹ Mẹssia lọ bo nasọ ze Ahọluduta etọn dai. Nado jla linlẹn ehe do bo dohia dọ Ahọluduta lọ gbẹ́ dẹn taun, Jesu dó oló de.

E dọmọ: “Dawe aglosu de yì biọ otò dindẹn de mẹ, nado yí ahọludu de na ede, podọ nado lẹkọ.” Jesu wẹ “dawe aglosu” lọ, podọ olọn wẹ “otò dindẹn” lọ. To whenuena Jesu na lẹkọyi dọ́n, Otọ́ etọn na na ẹn huhlọn ahọludu tọn.

Ṣigba, whẹpo do yì, dawe aglosu lọ ylọ afanumẹ ao bosọ na mina fataka tọn de dopodopo yetọn, dọmọ: “Mì yí ehe do wàjọ, kaka yẹn na do gọ̀.” Afanumẹ ao lọ lẹ to hẹndi tintan tọn mẹ nọtena devi fliflimẹ Jesu tọn lẹ. To yizan he gbloada de mẹ, yé nọtena mẹhe yin whédutọgbẹ́ sọgodo tọn hẹ ewọ to Ahọluduta olọn tọn mẹ lẹpo.

Mina fataka tọn lẹ yin gàn-kuẹ he họakuẹ lẹ, he dopodopo yetọn sọ nudi azọ́nkuẹ osun atọ̀n tọn na glesi de. Ṣigba etẹwẹ mina lọ lẹ nọtena? Podọ ajọ́ wunmẹ tẹwẹ afanumẹ lẹ na yí yé do wà?

Mina lọ lẹ nọtena nutindo he devi heyin dide-gbọn-gbigbọ dali lẹ sọgan yizan nado wleawuna whédutọgbẹ́ Ahọluduta olọn mẹ tọn dogọ lẹ kakajẹ wiwá Jesu tọn taidi Ahọlu to Ahọluduta heyin opagbe etọn do lọ whenu. To fọnsọnku etọn po awusọhia devi etọn lẹ po godo, e na mina yẹhiadonu tọn lọ lẹ yé na awuwiwlena devi dogọ lẹ bo gbọnmọ dali yidogọna hagbẹ Ahọluduta-olọn-mẹ tọn.

Jesu zindonukọn dọmọ: “Ṣigba tovi etọn lẹ gbẹwanna ẹn, bo do mẹdagun de hlan to godo etọn, dọmọ, míwlẹ ma jlo na dawe he ni duahọlu do mí ji gba.” Tovi lọ lẹ wẹ Islaelivi lẹ, kavi Juvi lẹ, he ma bẹ devi etọn lẹ hẹn. To olọn mẹ yìyì Jesu tọn godo, Juvi ehelẹ gbọn homẹkẹndido devi etọn lẹ dali hẹn ẹn zun yinyọnẹn dọ yé ma jlo dọ ewọ ni yin ahọlu yetọn gba. To aliho ehe mẹ yé to nuyiwa taidi tovi he do pipli afọzedaitọ lẹ tọn hlan.

Nawẹ afanumẹ ao lọ lẹ yí mina yetọn lẹ zan gbọn? Jesu basi zẹẹmẹ dọmọ: “E sọ wá jọ, whenuena e yí ahọludu bo lẹgọ, wẹ e degbè yè ni ylọ afanumẹ nẹlẹ wá, yé mẹhe e ko na mina, na e nido yọ́n ale nẹmu mẹdopodopo dù gbọn ajọwiwa dali. Mẹtintan wá nukọn etọn, dọmọ, Oklunọ, mina towe basi mina ao dogọ́. E sọ dọ hlan ẹn dọmọ, [hiẹ] wà dagbe, hiẹ afanumẹ dagbe; na yè mọ hiẹ yin nugbonọ to onú pẹvi ṣiun mẹ wutu, tindo aṣẹ do otò daho ao ji. Awetọ sọ wá dọmọ, Oklunọ, mina towe ko basi mina atọ́n. E sọ dọ hlan ẹn ga, dọmọ, hiẹ ga ni tin to otò daho atọ́n ji.”

Afanumẹ he tindo mina ao lọ nọtena pipli de, kavi hagbẹ, devi lẹ tọn de sọn Pẹntikọsti owhe 33 W.M. gbọ́n kakajẹ din he bẹ apọsteli lẹ hẹn. Afanumẹ he duale mina atọ́n tọn lọ nọtena pipli de to ojlẹ dopolọ mẹ, he hẹn nutindo ahọlu yetọn tọn lẹ jideji to aigba ji, sọgbe hẹ dotẹnmẹ hundote po nugopipe yetọn lẹ po. Pipli awe lọ lẹ gbọn zohunhun dali dọyẹwheho wẹndagbe lọ tọn, podọ taidi kọdetọn de, omẹ ahun-jijlọnọ susu lẹ lẹzun Klistiani lẹ. Ṣinẹnẹ to afanumẹ lọ lẹ mẹ wàjọ kọdetọn dagbe tọn bosọ hẹn nutindo yetọn lẹ jideji.

Jesu zindonukọn dọmọ: “[Ṣigba] devo sọ wá, dọmọ, Oklunọ, pọ́n mina towe tin to ofi, he yẹn sọ whlá do dúkù de mẹ: na yẹn nọ dibuna we, na hiẹ yin gbẹtọ fifiẹtọ wutu; hiẹ nọ yí nuhe hiẹ ma sọdai, bosọ nọ gbẹ̀n nuhe hiẹ ma dó. E sọ dọ hlan ẹn, dọmọ, Sọn onù hiẹ lọsu tọn mẹ wẹ yẹn na dawhẹna we, hiẹ afanumẹ ylankan. Hiẹ yọnẹn dọ gbẹtọ fifiẹtọ de wẹ yẹn, yẹn nọ yí nuhe yẹn ma sọdai, bosọ nọ gbẹ̀n nuhe yẹn ma dó: be etẹwutu hiẹ ma ka yí akuẹ ṣie do akuẹhọtẹn, bọ yẹn to gigọ̀ ṣie mẹ nido ko kàn ẹn biọ po ale po? E sọ dọ hlan mẹhe ṣite to finẹ lẹ, dọmọ, Mì yí mina lọ sọn e si, bo yí ì na mẹhe tindo mina ao.”

Na afanumẹ ylankan lọ, mina yẹhiadonu tọn lọ hinhẹnbú zẹẹmẹdo otẹn de hinhẹnbú to Ahọluduta olọn tọn mẹ. Mọwẹ, to yẹhiadonu liho, ewọ hẹn lẹblanulọkẹyi gandudu do todaho ao kavi atọ́n ji tọn bú. Doayi e go ga, dọ afanumẹ lọ mayin lilá taidi mẹylankan na ylando depope he ewọ ko wà wutu gba ṣigba, kakatimọ, na awugbopo nado wazọ́n na jideji adọkun ahọluduta ogán etọn tọn wutu.

To whenuena mina afanumẹ ylankan lọ tọn yin yíyí na afanumẹ tintan lọ, agọjẹdonu lọ yin bibasi dọmọ: “Oklunọ, e tindo mina ao.” Ṣogan, Jesu gblọn dọmọ: “Mẹdepope he tindo wẹ yè na na; podọ sọn ewọ he ma tindo si, wẹ yè na yí yèdọ onú he e tindo sọn. Ṣigba kẹntọ ṣie nẹlẹ, he ma jlo dọ yẹn ni dugán to yé ji lẹ, mì hẹn yé wá ofi, bo hù yé to nukọn ṣie.” Luku 19:11-27; Matiu 28:19, 20.

▪ Etẹwẹ whàn Jesu nado yí oló mina lẹ tọn zan?

▪ Mẹnu wẹ yin dawe aglosu lọ, podọ etẹwẹ yin aigba he ji ewọ yì?

▪ Mẹnu wẹ afanumẹ lọ lẹ yin, podọ etẹwẹ mina lọ lẹ nọtena?

▪ Mẹnu wẹ yin tovi lọ lẹ, podọ nawẹ yé do wangbẹna yetọn hia gbọn?

▪ Naegbọn afanumẹ dopo yin yiylọ dọ mẹylankan, podọ etẹwẹ mina etọn hinhẹnbú zẹẹmẹdo?