Weta 102

Klisti Biọ Jelusalẹm po Awhàngbigba Po

TO AFỌNNU he bọdego, yèdọ dimanche Nisan 9, Jesu tọ́n sọn Bẹtani po devi etọn lẹ po bo pànta Osó Olivie tọn ji hlan Jelusalẹm waji. To madẹnmẹ, yé dọnsẹpọ Bẹtfagi, heyin didoai do Osó Olivie tọn ji. Jesu degbè na awe to devi etọn lẹ mẹ dọmọ:

“Mì yì biọ otò pẹvi he pannukọn mì mẹ, to afọdoponẹji mì na mọ kẹtẹkẹtẹ de to sìnsìn, po ovi etọn po: mì tún yé, na mì ni hẹn yé wá dee. Eyin mẹde sọ dọ nude hlan mì, mì na dọmọ, Oklunọ do onú na yí yé do wà; afọdoponẹji e nasọ do yé hlan.”

Dile etlẹ yindọ devi lọ lẹ gboawupo to tintan whenu nado tunwun dọ anademẹ ehelẹ tindo nude nado yí wà hẹ hẹndi dọdai Biblu tọn, to godo mẹ yé yọnẹn dọ yé wàmọ. Yẹwhegán Zekalia dọ dọdai dọ Ahọlu dopagbe Jiwheyẹwhe tọn na dó kẹtẹkẹtẹ de biọ Jelusalẹm mẹ, mọwẹ, “yèdọ [to] kẹtẹkẹtẹ-siwhè de ji, ovu kẹtẹkẹtẹ de tọn.” Mọdopolọ Ahọlu Sọlọmọni ko dó kẹtẹkẹtẹvu de yì fie e yin amisana te.

To whenuena devi lọ lẹ biọ Bẹtfagi bosọ yí kẹtẹkẹtẹvu lọ po onọ̀ etọn po, delẹ to mẹhe ṣite to finẹ lẹ mẹ dọmọ: “Etẹwẹ mì to wiwà.” Ṣigba to whenuena yé yin didọna dọ kanlin lọ lẹ tin na Oklunọ, dawe lọ lẹ dike na devi lẹ nado hẹn yé yì Jesu dè. Devi lẹ tẹ́ awugbo yetọn lẹ do kẹtẹkẹtẹ onọ̀ lọ ji podọ do ovi etọn ji, ṣigba Jesu hẹ́ kẹtẹkẹtẹvu lọ ji.

Dile Jesu to kẹtẹkẹtẹ dó pànta Jelusalẹm, agundaho lọ to susudeji. Suhugan gbẹtọ lọ lẹ tọn tẹ́ awugbo yetọn lẹ do aliho ji, to whenuena mẹdevo lẹ sán alà lẹ sọn atin lẹ go bo tẹ́ yé do aigba. “Donanọ wẹ Ahọlu he ja to oyín Oklunọ tọn mẹ” wẹ yé dawhá dọ. “Jijọho to olọn mẹ, po gigo po to aga petepete.”

Nulila ehelẹ hẹn homẹgblena delẹ to Falesi he tin to agundaho lọ mẹ lẹ bọ yé jẹ koefàn ji hlan Jesu dọmọ: “Mẹplọntọ, wọhẹ [devi] towe lẹ.” Ṣigba Jesu gblọn dọmọ: “Yẹn dọ na mì, dọ, Eyin ehelẹ na nabọẹ, zannu lẹ na dawhá jẹgbonu.”

Dile Jesu to dindọnsẹpọ Jelusalẹm, e pọ́n todaho lọ hlan bo jẹ avivi ji do ota etọn, dọmọ: “Eyin hiẹ ko yọnẹn, to azán he gbè yèdọ hiẹ lọ, onú heyin jijọho towe tọn! ṣigba dinvie yè whlá yé sọn nukun towe mẹ.” Na tolivivẹ sọn ojlo mẹ wá etọn wutu, Jelusalẹm dona suahọ lọ, dile Jesu dọ dọdai do dọmọ:

“Kẹntọ towe lẹ [Lomunu lẹ to Awhàngán Titus glọ] na kùn dokọ lẹdo we, bo nasọ lẹdo we pé, bo nasọ glọn we do whégbè to awà popo ji, bo nasọ họ́ we do odò jẹ aigba, po ovi towe lẹ po to ohò towe mẹ; yé ma to na jo zannu dopo dai to awetọ ji.” Vasudo Jelusalẹm tọn heyin didọdai gbọn Jesu dali ehe wá aimẹ na nugbo tọn to owhe 37 godo, yèdọ to owhe 70 W.M.

Na osẹ kleun delẹ poun jẹnukọn, mẹsusu to agundaho lọ mẹ ko mọ Jesu fọ́n Lazalọsi sọnku. Todin omẹ ehelẹ to didọ na mẹdevo lẹ gando azọ́njiawu ehe go zọnmii. Enẹwutu to whenuena Jesu biọ Jelusalẹm, todaho lọ blebu tin to bẹwlu mẹ. “Mẹnu wẹ ehe?” wẹ gbẹtọ lẹ jlo nado yọnẹn. Podọ agundaho lọ sọ to didọ zọnmii dọmọ: “Ehe wẹ yẹwhegán lọ Jesu, sọn Nazalẹti Galili tọn mẹ.” To mimọ nuhe to jijọ lọ mẹ, Falesi lẹ doavigbe dọ yé ma sọgan wà nudepope gba, na, dile yé dọ do: “Pọ́n, aihọn lẹpo wẹ to yìyì hodo e.”

Dile e yin aṣa etọn do to dlapọn lẹ bibasi na Jelusalẹm whenu, Jesu yì tẹmpli mẹ nado plọnmẹ. To finẹ nukuntọ́nnọ lẹ po sẹkunọ lẹ po wá e dè, bọ e sọ hẹnazọngbọna yé! To whenuena ogán yẹwhenọ tọn lẹ po wekantọ lẹ po mọ onú jiawu he Jesu to wiwà lẹ podọ to whenuena yé sọ sè bọ yọpọ sunnu he tin to tẹmpli mẹ lẹ to awhádo jẹgbonu dọ, “Whlẹn mí, mí vẹ̀ we, Visunnu Davidi tọn!, NW ” yé gblehomẹ. “Hiẹ sè onú he omẹ helẹ to didọ?” wẹ yé dọ po agọjẹdomẹ po.

Jesu gblọn dọmọ: “Mọwẹ mìwlẹ ma ko hia gbede, dọ, Sọn onù yọpọvu lẹ tọn mẹ, podọ sọn ovi he to anọ́nù lẹ tọn mẹ wẹ hiẹ ko hẹn pipà sọgbe te?”

Jesu zindonukọn bo to mẹplọ́n, podọ e sọ pọ́n onú lẹpo he tin to tẹmpli lọ mẹ lẹdo pé. To madẹnmẹ ozán ko kú. Enẹwutu e tọ́n jẹgbonu yì, gọna omẹ 12 lẹ, bosọ basi gbejizọnlin na kilomẹtlu 3 kavi onú mọnkọtọn lẹkọyi Bẹtani. E yí ozán dimanche tọn zan to finẹ, vlavo to owhé họntọn etọn Lazalọsi tọn gbè. Matiu 21:1-11, 14-17; Malku 11:1-11; Luku 19:29-44; Johanu 12:12-19; Zekalia 9:9.

▪ Whetẹnu podọ to ninọmẹ tẹmẹ wẹ Jesu biọ Jelusalẹm mẹ te taidi Ahọlu?

▪ Nawẹ e yin onú titengbe sọ dọ agundaho lẹ ni na pipà Jesu?

▪ Etẹwẹ yin numọtolanmẹ Jesu tọn to whenuena e pọ́n Jelusalẹm hlan, podọ dọdai tẹwẹ e dọ?

▪ Etẹwẹ jọ to whenuena Jesu biọ tẹmpli lọ mẹ?