Weta 104

Ogbè Jiwheyẹwhe Tọn Yin Sisè Whlaatọ̀ntọ

DILE e gbẹ́ pò to tẹmpli mẹ, Jesu ko to awufiẹsa tindo do okú he ewọ dona pannukọn to madẹnmẹ ji. Ahunmẹdunamẹnu tangan etọn wẹ lehe oyín dagbe Otọ́ etọn tọn na yin gingandego do, enẹwutu e hodẹ̀ dọmọ: “Otọ́, pagigona oyín towe.”

To whenẹnu, ogbè gángán de wá sọn olọn mẹ, bo to lilá dọmọ: “Yẹn ko pagigona ẹn, bo nasọ vọ́ gigopana ẹn.”

Agundaho he ṣite lẹdo pé lẹ jẹflumẹ. “Angẹli de ko dọho hlan ẹn,” wẹ mẹdelẹ jẹ didọ ji. Mẹdevo lẹ sọalọakọ́n dọ hẹviosò wẹ yẹnwán. Ṣigba, na nugbo tọn, Jehovah Jiwheyẹwhe wẹ ko dọho! Ṣigba, ehe mayin ojlẹ tintan he mẹ ogbè Jiwheyẹwhe tọn yin sisè to kọndopọmẹ hẹ Jesu gba.

To baptẹm Jesu tọn whenu, to owhe atọ̀n daa he wayi jẹnukọn mẹ, Johanu Baptizitọ sè Jiwheyẹwhe dọ dogbọn Jesu dali dọmọ: “Ehe wẹ Visunnu ṣie; mẹvivẹ ṣie, mẹhe mẹ homẹ ṣie vivi te tlala.” Enẹgodo, ojlẹ de to Juwayi he wayi lọ godo, to whenuena Jesu yin wunmẹdiọna to nukọn yetọn, Jakobu, Johanu, po Pita po sè Jiwheyẹwhe lá dọmọ: “Ehe wẹ Ovi yiwanna ṣie, mẹhe mẹ yẹn yin homẹhunnọ te tlala; mì nọ sè etọn.” Podọ todin, na whlaatọ̀ntọ, to Nisan 10, yèdọ azán ẹnẹ jẹnukọnna okú Jesu tọn, ogbè Jiwheyẹwhe tọn sọ vọ́ yin sisè gbọn gbẹtọ lẹ dali whladopo dogọ. Ṣigba to ojlẹ ehe mẹ Jehovah dọho na gbẹtọgun lọ lẹ nido sọgan sè!

Jesu basi zẹẹmẹ dọmọ: “Ogbè he ma wá na yẹn wutu gba, ṣigba na mìwlẹ wutu wẹ.” E wleawuna kunnudenu de dọ Jesu yin Visunnu Jiwheyẹwhe tọn na nugbo tọn, yèdọ Mẹssia dopagbe lọ. “Dinvie wẹ whẹdida aihọn he tọn de wá,” wẹ Jesu zindonukọn dọ, “dinvie wẹ yè na yàn ahọvi aihọn he tọn jẹgbonu.” To paa mẹ, gbẹzan nugbonọ Jesu tọn zinnudeji dọ Satani Lẹgba, yèdọ ogán aihọn lọ tọn, jẹ nado yin ‘yinyan jẹgbonu,’ yèdọ yin hùhù.

To alọdindlẹndo kọdetọn okú he to sisẹpọ etọn lẹ tọn mẹ, Jesu dọmọ: “Podọ yẹn, eyin yè ze mi daga sọn aigba, na dọn gbẹtọ [wunmẹ, NW ] lẹpo hlan dè e.” Okú etọn mayin mẹhẹnjẹflumẹ to aliho depope mẹ gba, na gbọn dali etọn, ewọ na dọn mẹdevo lẹ do ede dè na yé nido sọgan duvivi ogbẹ̀ madopodo tọn.

Ṣigba agundaho lọ jẹagọdo bo dọmọ: “Mí ko sè sọn osẹ́n mẹ dọ Klisti na nọ kakadoi: nawẹ hiẹ dọ do dọ, Yè ma sọgan nọ ma ze Ovi gbẹtọ tọn daga? Mẹnu wẹ Ovi gbẹtọ tọn he?”

Mahopọnna kunnudenu lọ lẹpo, gọna ogbè Jiwheyẹwhe titi tọn sisè, suhugan gbẹtọ lọ lẹ tọn ma yise dọ Jesu wẹ Visunnu gbẹtọ tọn nugbo lọ, yèdọ Mẹssia dopagbe lọ gba. Ṣogan, dile e wà do to osun ṣidopo die jẹnukọn to Hùnwhẹ Gòhọtúntún tọn lọ whenu, Jesu whladopo dogọ dọho gando ede go taidi “hinhọ́n” bosọ na tuli todoaitọ etọn lẹ dọmọ: “Whenuena mì tindo hinhọ́n, mì ni yí hinhọ́n sè, na mì nido yin ovi hinhọ́n tọn lẹ.” To onú ehelẹ didọ godo, Jesu fọnyi bosọ whlá ede, na e họnwun dọ ogbẹ̀ etọn tin to owù mẹ wutu.

Yise matindo to Jesu mẹ Ju lẹ tọn hẹn hogbe Isaia tọn lẹ di dogbọn ‘nukun mẹhe tọn yin tintọ́n lẹ tọn bọ ahun yetọn lẹ yin hinhẹn sinyẹn na yé nikaa diọ nado yin azọ̀nhẹngbọna dali.’ Isaia mọ akanmaho olọn mẹ tọn Jehovah tọn lẹ to numimọ mẹ, gọna Jesu to gigo jẹnukọnna gbẹtọ-yinyin tọn etọn mẹ to pọmẹ hẹ Jehovah. Ṣogan, Ju lẹ, to hẹndi mẹ na nuhe Isaia wlan, gbọn tasinsinyẹn dali gbẹ́ kunnudenu lọ dọ Omẹ ehe lọ wẹ yin Mẹwhlẹngántọ heyin opagbe etọn do lọ dai.

To alọ devo mẹ, mẹsusu etlẹ yin to togán lẹ mẹ (he e họnwun dọ e yin hagbẹ whẹdọtẹn daho Juvi lẹ tọn, yèdọ Tòhódọtọ lẹ) do yise hia to Jesu mẹ na nugbo tọn. Nikodemi po Josẹfu Alimate tọn po yin awe to togán ehelẹ mẹ. Ṣigba togán lọ lẹ, e whè gbau to alọnu todin, gboawupo nado lá yise yetọn, na obu yinyin yinyan jẹgbonu sọn otẹn yetọn lẹ mẹ to sinagọgu mẹ wutu. Lehe onú gbọ̀ omẹ mọnkọtọn lẹ go do sọ!

Jesu zindonukọn nado doayi e go dọmọ: “Ewọ he yí mì sè, yẹn ma wẹ e yise gba, adavo ewọ he do mi hlan. Mẹhe sọ mọ mi, mọ mẹhe do mi hlan. . . . Podọ eyin mẹdepope sè ohó ṣie lẹ bo ma yìn yé, yẹn ma dawhẹna ẹn gba: na yẹn ma wá nado dawhẹna aihọn gba, adavo nado whlẹn aihọn gán. . . . Ohó he yẹn dọ lọ, dopolọ wẹ nasọ dawhẹna ẹn to azán pòdo gbè.”

Owanyi Jehovah tọn na aihọn gbẹtọvi lẹ tọn whàn ẹn nado do Jesu hlan na mẹhe yí yise zan to ewọ mẹ lẹ nido sọgan yin whinwhlẹngan. Tonusisena nuhe Jiwheyẹwhe degbena Jesu nado dọ lẹ wẹ na dohia eyin vlavo gbẹtọ lẹ na yin whinwhlẹngan. Whẹdida lọ na wá aimẹ to “azán pòdo gbè,” to Gandudu Owhe Fọtọ́n Klisti tọn whenu.

Jesu dotana gbọn didọ dali dọmọ: “Na yẹn ma dọho sọn dee dè gba; ṣigba Otọ́ he do mi hlan, ewọ ko na gbedide de mi, onú he yẹn na nọ dọ, po ohó he yẹn na nọ gblọn po. Podọ yẹn sọ yọnẹn dọ gbedide etọn wẹ ogbẹ̀ madopodo: enẹwutu nuhe yẹn to didọ lẹ depope, yèdọ dile Otọ́ dọ hlan mi do, mọwẹ yẹn to didọ do.” Johanu 12:28-50; 19:38, 39; Matiu 3:17; 17:5; Isaia 6:1, 8-10.

▪ To nujijọ atọ̀n tẹlẹ whenu wẹ ogbè Jiwheyẹwhe tọn yin sisè gando Jesu go?

▪ Nawẹ yẹwhegán Isaia mọ gigo Jesu tọn gbọn?

▪ Mẹnu lẹ wẹ togán he do yise hia to Jesu mẹ, ṣigba naegbọn yé ma yigbe ewọ tọn to gbangba?

▪ Etẹwẹ “azán pòdo gbè” tọn lọ yin, podọ to dodonu tẹ ji wẹ gbẹtọ lẹ na yin whẹdana te to whenẹnu?