Weta 105

Bẹjẹeji Azán Titengbe de Tọn

TO WHENUENA Jesu tọ́n sọn Jelusalẹm to lundi whèjai, e lẹkọyi Bẹtani to agbàdo whèzẹtẹn-waji Osó Olivie tọn ji. Azán awe to lizọnyizọn godo tọn etọn mẹ to Jelusalẹm ko yin tadona. Matin ayihaawe Jesu sọ yí ozán lọ zan hẹ họntọn etọn Lazalọsi whladopo dogọ. Sọn whenue gbọ́n e ko lẹkọwa sọn Jẹliko to vendredi, ehe wẹ yin ozán ẹnẹtọ he e ko yizan to Bẹtani.

Todin, to afọnnu fuu mardi, Nisan 11 tọn, ewọ po devi etọn lẹ po sọ tin to aliho ji whladopo dogọ. Ehe sọawuhia nado yin azán titengbe de to lizọnyizọn Jesu tọn mẹ, yèdọ dehe ko ján hugan lọ kakajẹ din. E yin azán godo tọn he ewọ sọawuhia to tẹmpli mẹ lọ. Podọ e sọ yin azán godo tọn lizọnyizọn gbangba tọn etọn jẹnukọnna whẹdida po yinyin hùhù etọn po.

Jesu po devi etọn lẹ po gbọ̀n aliho dopolọ to Osó Olivie tọn ji pànta Jelusalẹm. To aliho enẹ ji sọn Bẹtani, Pita doayi atin he Jesu hodẹ̀ do to afọnnu he wayi lọ go. “Mẹplọntọ,” wẹ e dawhá dọ, “ovotin he hiẹ hodẹ̀ do lọ ko fiọ.”

Ṣigba etẹwutu wẹ Jesu hù atin lọ? E do nuhewutu wẹ hia to whenuena e zindonukọn nado dọmọ: “Nugbo wẹ yẹn dọ hlan mì, eyin mìwlẹ tindo yise, bo ma do ayi awe, mìwlẹ ma to na basi onú he yè wà do ovotin lọ go kẹdẹ gba, ṣigba yèdọ eyin mì na dọ hlan osó he [Osó Olivie tọn he ji yé ṣite te], dọ, Yè ni ze hiẹ daga bo zedlan biọ ohù mẹ; e na yin wiwà. Onú depope he mì na kanbiọ to odẹ̀ mẹ, bo yise, mì na mọ yí.”

Enẹwutu gbọn atin lọ hinhẹn nado fiọ dali, Jesu to awuwlena nuplọnmẹ tangan de na devi etọn lẹ do nuhudo yetọn ji nado tindo yise to Jiwheyẹwhe mẹ. Dile ewọ dọ do dọmọ: “Nudepope he mì biọ, whenuena mì hodẹ̀, mì ni yise dọ mì mọ yé yí, mì nasọ tindo yé.” Nuplọnmẹ titengbe nankọtọn die na yé nado plọn, titengbe to pọndohlan mẹ na whlepọn budonamẹ tọn he na wá to madẹnmẹ lẹ ji! Ṣogan, kanṣiṣa devo sọ tin to fifiọ ovotin lọ tọn po jẹhẹnu yise tọn po mẹ.

Akọta Islaeli tọn, taidi ovotin ehe, tindo awusọhia oklọ tọn de. Dile etlẹ yindọ akọta lọ tin to haṣinṣan alẹnu tọn de mẹ hẹ Jiwheyẹwhe bo sọgan sọawuhia to gbonu nado to tonusena gbedide etọn lẹ, e ko sọawuhia nado tin matin yise, yèdọ wẹnsinọ gando sinsẹ́n dagbe lẹ go. Na yise matindo wutu, e tlẹ sọ tin to nuyiwa gbigbẹ́ Visunnu Jiwheyẹwhe lọsu titi tọn dai mẹ! Enẹwutu, na hinhẹn ovotin he ma sọgan dè sinsẹ́n tọ́n lọ nado fiọ, Jesu gbọn oló dali basi dohia nuhe kọdetọn godo mẹ tọn na yin na akọta he ma dè sinsẹ́n tọ́n, bo ma tindo yise ehe.

To madẹnmẹ, Jesu po devi etọn lẹ po biọ Jelusalẹm, podọ taidi aṣa yetọn, yé yì tẹmpli mẹ, fie Jesu jẹ mẹplọ́n ji te. Ogán yẹwhenọ lẹ tọn po sunnu mẹho lẹ po sọn gbẹtọ lẹ mẹ, matin ayihaawe to nuyiwa Jesu tọn sọta akuẹ-diọtọ lẹ to azán he wayi lọ gbè tintindo to ayiha mẹ, diọavunnukunsọ ẹ dọmọ: “Aṣẹ tẹwẹ hiẹ do to onú helẹ wà? Podọ mẹnu wẹ na aṣẹ helẹ hiẹ?”

To gblọndo mẹ Jesu dọmọ: “Yẹn ga nasọ kàn onú dopo biọ mì, eyin mì dọ na mi, yẹn ga nasọ dọ na mì aṣẹ he yẹn do to onú helẹ basi. Baptẹm Johanu tọn, fie wẹ e sọn? Sọn olọn mẹ, kavi sọn gbẹtọ dè?”

Yẹwhenọ lẹ po sunnu mẹho lẹ po sọ jẹ hodọ to yedelẹ ṣẹnṣẹn ji gando lehe yé na na gblọndo gbọn ji. “Eyin mí na dọmọ, sọn olọn mẹ, e na dọmọ, be etẹwutu wẹ mì ma yí i sè? Ṣigba eyin míwlẹ nasọ dọmọ, Sọn gbẹtọ dè; mí dibu na agundaho lẹ lọ; na omẹ pó wẹ yí Johanu di yẹwhegán de.”

Nukọntọ lọ lẹ ma yọ́n nuhe yé na gblọn gba. Enẹwutu yé gblọn hlan Jesu dọmọ: “Míwlẹ ma yọnẹn gba.”

To godo mẹ, Jesu dọmọ: “Be yẹn ma sọ to na dọ aṣẹ he yẹn do to onú helẹ basi na mì gba.” Matiu 21:19-27; Malku 11:19-33; Luku 20:1-8.

▪ Etẹwẹ yin vonọtaun dogbọn mardi, Nisan 11 dali?

▪ Nuplọnmẹ tẹlẹ wẹ Jesu wleawuna to whenuena e hẹn ovotin lọ nado fiọ?

▪ Nawẹ Jesu na gblọndo hlan mẹhe kanse dọ gbọn aṣẹpipa tẹ dali wẹ ewọ to onú lẹ wà?