Weta 109

Jesu Gblewhẹdo Agọjẹdomẹtọ Etọn Lẹ

JESU ko hẹn agọjẹdomẹtọ sinsẹ̀n tọn etọn lẹ jẹflumẹ sọmọ bọ yé dibu nado kàn nudepope sè e yinukọn dogọ. Enẹwutu e de afọdide tintan lọ nado hùngona wunvinọ-yinyin yetọn. E kanse yé dọmọ: “Nawẹ mì lẹn Klisti tọn do?” “Ovi mẹnu tọn wẹ ewọ yin?”

“Ovi Davidi tọn,” wẹ Falesi lẹ gblọn.

Dile Jesu ma tlẹ gbẹ́ dọ Davidi wẹ yin tọgbo agbasalan Klisti, kavi Mẹssia lọ tọn, e kanse dọmọ: “Be etẹwutu wẹ Davidi to gbigbọmẹ [to Psalm 110] to yiylọ ẹ, Oklunọ, dọmọ, [Jehovah, NW ] dọ hlan Oklunọ ṣie, dọmọ: Hiẹ sinai to adusilọ ṣie mẹ, kaka yẹn nado yí kẹntọ towe lẹ do afọ towe glọ? Be whenẹnu eyin Davidi ylọ ẹ Oklunọ, nawẹ ewọ yin ovi etọn do?”

Falesi lẹ nabọẹ, na yé ma yọ́n mẹhe Klisti, kavi mẹyiamisisadode lọ yin na taun gba. Mẹssia lọ mayin kúnkan gbẹtọvi tọn de sọn Davidi dè poun, dile e họnwun dọ Falesi lẹ yise do gba, ṣigba ewọ ko nọgbẹ̀ to olọn mẹ bosọ yin mẹhe yiaga hugan Davidi, kavi yin Oklunọ lọ.

To lilẹ́ hlan agundaho lọ lẹ podọ hlan devi etọn lẹ todin, Jesu na avase yé gando wekantọ lẹ po Falesi lẹ po go. To whenuena e yindọ omẹ ehelẹ nọ plọnmẹ Osẹ́n Jiwheyẹwhe tọn, bo ko “sinai to aisintẹn Mose tọn mẹ,” Jesu dotuhomẹnamẹ dọmọ: “Onú depope yé degbena mì, ehelẹ mì ni nọ tùnayi e go, bosọ nọ basi.” Ṣigba e yidogọ dọmọ: “Mì basi di azọ́n yetọn blo: na yé nọ dọ, yé ma nọ wà gba.”

Yẹnuwatọ lẹ wẹ yé, podọ Jesu gblewhẹdo yé to ogbè dopolọ mẹ dile e wà do to whenuena e to núdù to owhé Falesi de tọn gbè to osun delẹ die jẹnukọn. E dọmọ: “Azọ́n yetọn lẹpo, wẹ yé nọ wà na nado yin mimọ to gbẹtọ lẹ dè.” Podọ ewọ wleawuna apajlẹ lẹ, bo dọmọ:

“Yé hẹn ayúja [owe-wiwe tọn he yé nọ dó na hihọ́-basinamẹ lẹ, NW ] zun gbigblo.” Ayúja he whè taun ehelẹ, he nọ yin didó do nukọn-gángán kavi do awa go, bẹ adà ẹnẹ Osẹ́n tọn lẹ hẹn: Eksọdusi 13:1-10, 11-16; po Deutelonomi 6:4-9; 11:13-21 po. Ṣigba Falesi lẹ hẹn kiklo ayúja ehelẹ tọn gblodeji nado na nuyiwadomẹji lọ dọ yé yin zohunhunnọ dogbọn Osẹ́n lọ dali.

Jesu zindonukọn dọ yé “hẹn okẹyẹ avọ̀ yetọn tọn zun gbigblo.” To Osọha lẹ 15:38-40 mẹ Islaelivi lẹ yin gbedena nado nọ basi okẹyẹ do avọ̀ yetọn lẹ go, ṣigba Falesi lẹ nọ hẹn yetọn lẹ gblodeji taun hugan dehe mẹdevo depope nọ basi do. Onú lẹpo nọ yin wiwà na dohia bibasi! “Yé yiwanna tẹnmẹ daho,” wẹ Jesu lá.

E blawu dọ, devi etọn titi lẹ lọsu ko yin nuyiwadeji gbọn ojlo na yindidi ehe dali. Enẹwutu e na ayinamẹ dọmọ: “Ṣigba mìwlẹ yin yiylọ dọ Labbi blo: na omẹ dopo wẹ Mẹplọntọ mìtọn podọ mẹmẹsunnu wẹ mì omẹ pó. Mì sọ ylọ mẹde otọ́ mìtọn to aihọn mẹ blo: na omẹ dopo wẹ Otọ́ mìtọn olọn tọn. Mọ yè sọ ylọ mì dọ [nukọntọ blo; na omẹ dopo wẹ Nukọntọ mìtọn, yèdọ Klisti, NW ].” Devi lọ lẹ dona de ojlo nado yin omẹ tintan sẹ̀ sọn ahun yedelẹ tọn mẹ! “Ewọ mẹhe klo hugan to mì ṣẹnṣẹn, wẹ na yin devizọnwatọ mìtọn,” wẹ Jesu dotuhomẹnamẹ dọ.

Enẹgodo e lá dindọ̀n debọdo-dego delẹ do wekantọ lẹ po Falesi lẹ po ji, bo ylọ yé pludopludo dọ yẹnuwatọ. Yé “sú ahọludu olọn tọn to gbẹtọ lẹ nukọn,” wẹ e dọ, podọ “yé dù owhé asuṣiọsi lẹ tọn súdo, yèdọ whenuena [yé] to odẹ̀ dindẹn basi na goyiyi de.”

“Dindọ̀n hlan mì, mì alihiamẹtọ nukuntọ́nnọ lẹ,” wẹ Jesu dọ. E gblewhẹdo nuhọakuẹ gbigbọmẹ tọn matindo Falesi lẹ tọn, ehe yin hinhẹn họnwun gbọn vogbingbọn he ma sọgbe hẹ lẹnpọn dagbe he yé nọ basi lẹ dali. Di apajlẹ, yé dọ dọ, ‘Onú tata de wẹ eyin mẹdepope yí tẹmpli lọ do whlé, ṣigba omẹ lọ na tin to dandannu glọ eyin ewọ yí sika tẹmpli lọ tọn do whlé.’ Gbọn nùzindonuji glanglan zize do sika tẹmpli lọ tọn ji hugan nuhọakuẹ gbigbọmẹ tọn heyin nọtẹn sinsẹ̀n-bibasi enẹ tọn ji dali, yé do nukuntọ́nnọ-yinyin walọdagbe tọn yetọn hia.

Enẹgodo, dile e wà do jẹnukọn wayi, Jesu gblewhẹdo Falesi lẹ na gbigbẹ́ “onú pẹnzin Osẹ́n tọn dai, whẹdida, lẹblanu, po [nugbonọ-yinyin, NW ] po” to whenuena yé ze ayidonugo susugege do madao súsú, kavi madaotọ, ama tata lẹ tọn ji.

Jesu ylọ Falesi lẹ dọ ‘alihiamẹtọ nukuntọ́nnọ lẹ, he nọ de wánvú sẹ̀ ṣigba nọ ze kanklosọpoawenọ mì.’ Yé nọ de wánvú de sẹ̀ sọn ovẹn yetọn mẹ e mayin na e yin wánvú de poun wutu wẹ gba ṣigba na e yin onú mawé to aṣa sinsẹ̀n tọn liho wutu. Ṣogan, kọgbigbẹ́ whẹho pẹnzin Osẹ́n tọn lẹ go yetọn yin onú dopolọ po zize kanklosọpoawenọ de mì po, yèdọ kanlin mawé de to aṣa sinsẹ̀n tọn liho ga. Matiu 22:41–23:24; Malku 12:35-40; Luku 20:41-47; Levitiku 11:4, 21-24.

▪ Naegbọn Falesi lẹ do nabọẹ to whenuena Jesu kanhose yé dogbọn nuhe Davidi dọ to Psalm 110 mẹ dali?

▪ Naegbọn Falesi lẹ nọ hẹn ayúja he bẹ Wefọ hẹn lẹ po okẹyẹ avọ̀ yetọn lẹ tọn po gblodeji?

▪ Ayinamẹ tẹwẹ Jesu na devi etọn lẹ?

▪ Vogbingbọn he ma sọgbe hẹ lẹnpọn dagbe tẹlẹ wẹ Falesi lẹ nọ basi, podọ nawẹ Jesu gblewhẹdo yé na kọgbigbẹ́ whẹho pẹnzin lẹ go gbọn?