Weta 110
Lizọnyizọn to Tẹmpli mẹ lọ Wá Tadona Kọ̀n
JESU to awusọhia godo tọn etọn basi to tẹmpli lọ mẹ. Na nugbo tọn, ewọ to tadona lizọnyizọn gbangba tọn etọn to aigba ji adavo na nujijọ wiwle po hùhù etọn po tọn lẹ, he pò azán atọ̀n poun to nukọn. Todin e zindonukọn to whẹgbledomẹ sinsinyẹn etọn gando wekantọ lẹ po Falesi lẹ po go mẹ.
Na whlaatọ̀n dogọ e lá dọmọ: “Dindọ̀n hlan mì, wekantọ lẹ, po Falesi lẹ po, yẹnuwatọ!” Jẹnukọn whẹ́, e lá dindọ̀n do yé ji na yé nọ klọ́ “gbonu kọfo tọn po agbánvla tọn po wé, ṣigba to homẹ yé tin gọ́ sọn alọslonamẹ po linlankan po mẹ.” Enẹwutu e dotuhomẹnamẹ dọmọ: “Klọ́ homẹ kọfo tọn, po agbánvla tọn po whẹ́, na gbonu yetọn nido lẹzun wiwé ga.”
Enẹgodo e lá dindọ̀n do wekantọ lẹ po Falesi lẹ po ji na yìnyọ̀n po vivó homẹ tọn he yé to tintẹnpọn nado ṣinyọnnudo po gbọn nugbonọ-yinyin sinsẹ̀n tọn gbonu tọn dali. “Mì tin jijlẹ do olido wewe go,” wẹ e dọ, “he sọawuhia whanpẹnọ to gbonu, ṣigba to homẹ tin gọ́ na ohú omẹ kúkú lẹ tọn podọ na mawé lẹpo.”
To tadona mẹ, yẹnuwiwa yetọn sọawuhia to ojlonọ-yinyin yetọn nado gbá yọdo lẹ na yẹwhegán lẹ bosọ doaṣọna yé nado dọn ayidonugo wá nuyiwa walọ dagbe tọn yede titi tọn lẹ ji mẹ. Etomọṣo, dile Jesu dohia do, yé “wẹ ovi yé he hù yẹwhegán lẹ tọn lẹ.” Na nugbo tọn, mẹdepope he tẹnpọn nado hùngona yẹnuwiwa yetọn tin to owù mẹ!
To nukọnzinzindo mẹ, Jesu dọ hogbe whẹgbledomẹ tọn etọn he sinyẹn hugan lẹ tọ́n jẹgbonu. “Mì odàn lẹ, mì ovikun amapoe lẹ tọn,” wẹ e dọ, “nawẹ mì na họngán na whẹdida [Gẹhẹnna, NW ] tọn do?” Gẹhẹnna yin agbàdo he nọ yin yiyizan taidi ogbóji de to Jelusalẹm. Enẹwutu Jesu to didọ dọ na afọdidona nuyiwa kanyinylan tọn yetọn wutu, wekantọ lẹ po Falesi lẹ po na jiya vasudo madopodo tọn.
Gando mẹhe ewọ dohlan gbonu taidi nukunmọnu etọn lẹ go, Jesu dọmọ: “Mẹdelẹ to yé mẹ mì na hù, bo nasọ whè do [yatin, NW ] go: podọ mẹdelẹ to yé mẹ mì nasọ hò to sinagọgu mìtọn lẹ mẹ, bo nasọ dohomẹkẹn sọn otò daho de mẹ jẹ otò daho de mẹ. Na ohùn dodonọ lẹpo tọn he yè ko kọ̀n dai to aihọn mẹ nido tin to mì ji, sọn ohùn Abẹli dodonọ tọn ji jẹ ohùn [Zekalia] ovi Balaki tọn [heyin yiylọ dọ Jehọiada to Otannugbo lẹ Awetọ mẹ] ji, mẹhe mì hù to fiwiwe lọ po agbà lọ po ṣẹnṣẹn. Nugbo wẹ yẹn dọ hlan mì, onú helẹ pó wẹ na wá whẹndo he ji.”
Na Zekalia gbẹnuna nukọntọ Islaeli tọn lẹ wutu, “yé sọ blanú do e go, bo dlan zannu lẹ do e to gbedide ahọlu lọ tọn ji to awánu ohọ̀ OKLUNỌ tọn tọn mẹ.” Ṣigba, dile Jesu dọ dọdai do, Islaeli na suahọ na ohùn dodonọ mọnkọtọn lẹ tọn heyin sinsọndai. Yé suahọ lọ to owhe 37 godo, to owhe 70 W.M., to whenuena awhànpa Lomunu lẹ tọn và Jelusalẹm sudo bọ hugan livi dopo Juvi lẹ tọn sọ dọ̀n.
Dile Jesu to dogbapọnna ninọmẹ budonamẹ tọn ehe, ewọ yin ayimajainọ. “Jelusalẹm E, Jelusalẹm,” wẹ ewọ sọ lá dọ whladopo dogọ, “whla nẹmu wẹ yẹn do ko bẹ ovi towe lẹ pli, dile koklosi de nọ bẹ ovi etọn lẹ do awà etọn glọ do, bọ mìwlẹ ma jlo! Pọ́n, yè jo owhé mìtọn dai hlan mì ovọ́.”
Enẹgodo Jesu yidogọ dọmọ: “Sọn dinvie yì mì ma to na mọ mi ba, kaka mì na dọmọ, Donanọ wẹ ewọ he ja to oyín Oklunọ tọn mẹ.” Azán enẹ na yin to tintin tofi Klisti tọn whenu to whenuena ewọ na wá biọ Ahọluduta olọn tọn etọn mẹ bọ gbẹtọ lẹ na mọ ẹn po nukun yise tọn lẹ po.
Todin Jesu sẹtẹn jẹ nọtẹn fie ewọ sọgan mọ adọkun potin he tin to tẹmpli lọ mẹ lẹ te po gbẹtọgun he to akuẹ dlan do yé mẹ lẹ po. Adọkunnọ lẹ dlan abọgan-kuẹ susu lẹ do e mẹ. Ṣigba enẹgodo wẹ asuṣiọsi wamọnọ de wá bosọ dlan abọgan-kuẹ pẹvi pẹvi awe he tindo nuhọakuẹ vude do e mẹ.
To devi etọn lẹ hihopli mẹ, Jesu dọmọ: “Nugbo wẹ yẹn dọ hlan mì, asuṣiọsi wamọnọ he sọ susu dlan e mẹ hú omẹ popo he to dindlan do adọkunnu potin mẹ lẹpo.” E dona paṣa yé lehe ehe sọgan yin mọ gbọn. Enẹwutu Jesu basi zẹẹmẹ dọmọ: “Na yé omẹ pó wẹ dlan do e mẹ sọn adọkun susu yetọn mẹ; ṣigba ewọ sọn matindo etọn mẹ, e yí onú he e tindo lẹpo dlan e mẹ, yèdọ gbẹ̀mẹnu etọn lẹpo.” To onú ehelẹ didọ godo, Jesu tọ́n sọn tẹmpli lọ mẹ na ojlẹ godo tọn.
Na yinyin awujinọ na kiklo po whanpẹ tẹmpli lọ tọn po wutu, dopo to devi etọn lẹ mẹ dawhá dọmọ: “Mẹplọntọ, pọ́n zannu hunkọ po didó he hunkọ po tin tofi lẹ”! Na nugbo tọn, zannu lọ lẹ yin didọ nado dite hugan mẹtlu 11, gblo hugan mẹtlu 5, bosọ yiaga hugan mẹtlu 3!
“Hiẹ mọ didó daho helẹ?” wẹ Jesu gblọn. “Zannu dopo ma to na pò bọ yè na jo dai do awetọ ji bọ yè ma na họ́ liai.”
To onú ehelẹ didọ godo, Jesu po apọsteli etọn lẹ po dasá Agbàdo Kidlọni tọn bosọ hẹ Osó Olivie tọn ji. Sọn finẹ yé sọgan pọ́n whanpẹ-yinyọ́n tẹmpli lọ tọn hlan odò. Matiu 23:25–24:3; Malku 12:41–13:3; Luku 21:1-6; 2 Otannugbo lẹ 24:20-22.
▪ Etẹwẹ Jesu wà to dlapọn etọn godo tọn yì tẹmpli lọ mẹ whenu?
▪ Nawẹ yẹnuwiwa wekantọ lẹ po Falesi lẹ po tọn sọawuhia gbọn?
▪ Etẹwẹ “whẹdida Gẹhẹnna tọn” zẹẹmẹdo?
▪ Naegbọn Jesu dọ dọ asuṣiọsi lọ na nunina hugan adọkunnọ lẹ?