Weta 113

Whiwhẹ to Juwayi Godo Tọn Whenu

PITA po Johanu po, to anademẹ lẹ sọn Jesu dè glọ, ko wá Jelusalẹm nado basi awuwiwle lẹ dai na Juwayi lọ. E họnwun dọ, Jesu to pọmẹ hẹ apọsteli 10 devo he pò lẹ, wá to godo mẹ to whèmẹ. Owhè ko to họyì dile Jesu po hagbẹ etọn lẹ po jẹte sọn Osó Olivie tọn ji. Ehe wẹ yin ojlẹ godo tọn he Jesu na mọ todaho lọ to okle sọn osó ehe ji kakajẹ fọnsọnku etọn godo.

To madẹnmẹ Jesu po hagbẹ etọn lẹ po jẹ todaho lọ mẹ bo pànta owhé he gbè yé na basi hùnwhẹ Juwayi tọn lọ te. Yé hẹ pèkán lọ lẹ ji yì abò daho aga tọn lọ mẹ, fie yé mọ onú lẹpo ko yin awuwledai te na hùnwhẹ Juwayi tọn bibasi nuglọ tọn yetọn. Jesu ko to nukọn pọ́n hlan na nujijọ ehe, dile e dọ do dọmọ: “Homẹhunhun yẹn jlo nado dù juwayi he hẹ mì, whẹpo yẹn nado jiya.”

To aṣa liho, ovẹn kọfo ẹnẹ wẹ nọ yin nùnù gbọn mahẹ tindotọ Juwayi tọn lẹ dali. To alọkikẹyi nuhe kunnudenu dohia nado yin kọfo atọ̀ntọ lọ godo, Jesu dopẹ́ bo dọmọ: “Mì yí ehe, bo má ẹn to mìde ṣẹnṣẹn: na yẹn dọ hlan mì, Yẹn ma to na nù to sinsẹ́n ovẹn tọn mẹ ba, kaka ahọludu Jiwheyẹwhe tọn na do wá.”

To ojlẹ de mẹ dile núdùdù to yìyì to alọnu, Jesu fọ́n ṣite, dè awugbo etọn do apadopo, yí duku de, bo bà osin gọ́ sinhẹnnu de mẹ. To paa mẹ, jonọ-yitọ de dona hẹn ẹn diun dọ afọ jonọ de tọn lẹ yin kiklọ. Ṣigba to whenuena e yindọ jonọ-yitọ depope matin to nujijọ ehe tẹnmẹ, Jesu penukundo devizọnwiwanamẹ mẹdetiti tọn ehe go. Depope to apọsteli lẹ mẹ sọgan ko yí dotẹnmẹ hundote lọ zan nado wà ehe; ṣogan, e họnwun dọ na nudindọn delẹ gbẹ́ tin-to-aimẹ to ṣẹnṣẹn yetọn wutu, mẹdepope ma wàmọ gba. Todin winyan hù yé to whenuena Jesu jẹ afọ yetọn lẹ klọ́ ji.

To whenuena Jesu jẹ ewọ dè, Pita jẹagọdo dọmọ: “Hiẹ ma na klọ́ afọ ṣie gbede.”

“Eyin yẹn ma klọ́ we, hiẹ ma tindo tẹnmẹ de to dee,” wẹ Jesu dọ.

Pita sọ gblọn dọmọ: “E mayin afọ ṣie kẹdẹ gba, Oklunọ, ṣigba alọ ṣie po ota ṣie po ga.”

Jesu gblọn dọmọ: “Mẹhe yè klọ́ ma dín hú dọ yè ni klọ́ afọ etọn, ṣigba e wé to ofi popo: mìwlẹ wé, ṣigba e mayin mì omẹ pó gba.” E dọ ehe na e yọnẹn dọ Juda Iskaliọti to tito basi nado dè e hia wutu.

To whenuena Jesu ko klọ́ afọ omẹ 12 lẹpo tọn, gọna afọ mẹdehiatọ etọn tọn, yèdọ Juda, e ze awugbo etọn do, bo jagla to tafo kọ̀n whladopo dogọ. To enẹgodo e kanse dọmọ: “Be mì yọ́n nuhe yẹn wà hlan mì? Mìwlẹ to yiylọ mi dọ Mẹplọntọ, bo to yiylọ mi dọ Oklunọ; mì dọ dagbe; na mọwẹ yẹn yin. Enẹwutu eyin yẹn mẹhe yin Oklunọ mìtọn, bosọ yin Mẹplọntọ mìtọn klọ́ afọ mìtọn; e sọ jẹ na mìwlẹ ni sọ klọ́ afọ mìnọzo tọn ga. Na yẹn ko na ohia mì, na mì nido nọ wà dile yẹn wà hlan mì do. Nugbo, nugbo, wẹ yẹn dọ hlan mì, Afanumẹ ma klohu oklunọ etọn gba; podọ mẹdohlan ma klohu mẹhe do e hlan gba. Eyin mì yọ́n onú helẹ, donanọ wẹ mì eyin mì basi yé.”

Nuplọnmẹ whanpẹnọ nankọtọn die nado wà devizọn po whiwhẹ po! Apọsteli lọ lẹ ma dona to otẹn tintan dín, bo na to linlẹn dọ yé yin nujọnu sọmọ bọ mẹdevo lẹ dona nọ yilizọn na yé to whepoponu gba. Yé dona hodo apajlẹ heyin zizedai gbọn Jesu dali. Ehe mayin afọ kiklọnamẹ to aṣaliho de gba. Lala, ṣigba e yin ojlonọ-yinyin tọn nado wadevizọn matin mẹnukuntahihopọn, mahopọnna lehe azọngban lọ sọgan whè kavi sinyẹnawu sọ. Matiu 26:20, 21; Malku 14:17, 18; Luku 22:14-18; 7:44; Johanu 13:1-17.

▪ Etẹwẹ yin vonọtaun dogbọn pinpọn Jelusalẹm hlan Jesu tọn dali dile e to tòdaho lọ mẹ biọ nado basi hùnwhẹ Juwayi tọn?

▪ To Juwayi lọ whenu, kọfo tẹwẹ kunnudenu dohia dọ Jesu yí na apọsteli 12 lẹ to odẹ̀ de hihò godo?

▪ Devizọnwiwa mẹdetiti tọn tẹwẹ nọ yin awuwlena na jonọ lẹ gbọn aṣa dali to whenuena Jesu tin to aigba ji, podọ naegbọn e mayin awuwlena to hùnwhẹ Juwayi tọn he Jesu po apọsteli etọn lẹ po basi lọ tẹnmẹ?

▪ Etẹwẹ yin lẹndai Jesu tọn to wiwà devizọn he whè taun heyin afọ apọsteli etọn lẹ tọn lẹ kiklọ mẹ?