Weta 126

“Nugbo, Ovi Jiwheyẹwhe Tọn Wẹ Ehe”

JESU ma ko dẹn hugan to atin lọ go gba to whenuena, to owhè ṣadada mẹ, zinvlu gọ̀ngọ̀n ganhiho-atọ̀n tọn he dabla de wá aimẹ. Ehe ma yin nujijọ osun-wle-owhè tọn gba, to whenuena e yindọ ehelẹ nọ jọ to ojlẹ osun yọyọ tọn kẹdẹ mẹ podọ osun lọ ka ko dọjí to ojlẹ Juwayi tọn mẹ. Humọ, nujijọ osun-wle-owhè tọn nọ dẹn-to-aimẹ na nukunwhiwhe vude poun. Enẹwutu zinvlu lọ tindo asisa sọn olọn mẹ wá! Vlavo e doalọtena mẹhe to Jesu vlẹko lẹ na ojlẹ vude, bo tlẹ doalọtena mẹṣanko yetọn lẹ.

Eyin nujijọ budonamẹ tọn lọ ko jọ whẹpo ylanwatọ lọ do gbẹnuna awetọ etọn bo biọ to Jesu si nado flin in wẹ, e sọgan ko yin whẹwhinwhẹ́n he hẹn ẹn nado lẹnvọjọ. Vlavo to zinvlu lọ whenu wẹ yọnnu ẹnẹ, yèdọ, onọ̀ Jesu tọn po nọviyọnnu etọn Salomi po, Malia Magdaleni, po Malia onọ̀ apọsteli Jakobu heyin Pẹvi lọ tọn po, tẹnpọn bo dọnsẹpọ yatin lọ. Johanu, heyin apọsteli yiwanna Jesu tọn, tin to finẹ hẹ yé.

Lehe ahun onọ̀ Jesu tọn na ko ‘hòapa’ do sọ dile e to pinpọ́n visunnu he go e penukundo bosọ pọ́n e go whẹ́n yin zizepla do núgo to awufiẹsa mẹ! Ṣogan Jesu ma lẹn awufiẹsa etọn titi pọ́n gba, ṣigba dagbemẹ-ninọ onọ̀ etọn tọn. Po vivẹnudido daho po, e mimí ota dohlan Johanu bo dọhlan onọ̀ etọn dọmọ: “Yọnnu, pọ́n visunnu towe.” Enẹgodo, to ota mimí hlan Malia godo, e dọhlan Johanu dọmọ: “Pọ́n onọ̀ towe.”

Jesu gbọnmọ dali ze nukunpipedo onọ̀ etọn go, mẹhe kunnudenu dohia dọ e yin asuṣiọsi de todin, do alọ mẹ na apọsteli etọn he e yiwanna tlala. E wà ehe na visunnu Malia tọn he pò lẹ ma ko do yise hia to ewọ mẹ todin wutu. Gbọnmọ dali e ze apajlẹ dagbe dai e mayin to awuwiwlena nuhudo agbasa tọn onọ̀ etọn tọn mẹ kẹdẹ gba ṣigba na gbigbọnu etọn lẹ lọsu ga.

To nudi ogàn atọ̀n mẹ to whèmẹ, Jesu dọmọ: “Ovẹ́ hú mi.” Jesu lẹndọ Otọ́ etọn, to yẹhiadonu liho, ko doalọtena hihọ bibasina ẹn bọ tenọgligo-hinhẹn etọn nado sọgan yin whiwhlepọn jẹ otẹn godo tọn mẹ. Enẹwutu e dawhá jẹgbonu po ogbè lélé po dọmọ: “Jiwheyẹwhe ṣie, Jiwheyẹwhe ṣie, etẹwutu hiẹ gbẹ́ mi dai?” To ehe sisè mẹ, delẹ to mẹhe nọte sẹpọ finẹ lẹ mẹ dọmọ: “Pọ́n, e to [Elija, NW ] ylọ.” To afọdopolọji dopo to yé mẹ họ̀nwezun, bo yí tèkan he yin yinylọ́n do ovẹn he vẹsin mẹ to onù atin hisọpe tọn, bo na ẹn nado nù. Ṣigba mẹdevo lẹ dọmọ: “Mì gbọ sọn e go; na mí ni pọ́n, eyin [Elija, NW ] na wá nado hẹn ẹn jẹte.”

To whenuena Jesu yí ovẹn vẹsin lọ, e dawhá jẹgbonu dọmọ: “E vọ̀.” Mọwẹ, e ko dotana nuhe Otọ́ etọn do e hlan aigba ji nado wà lẹpo. To godo mẹ, e dọmọ: “Otọ́, alọ towe mẹ wẹ yẹn jo gbigbọ ṣie do.” Gbọnmọ dali Jesu ze huhlọn ogbẹ̀ etọn tọn do alọ mẹ na Jiwheyẹwhe po jide po dọ Jiwheyẹwhe na gọ̀ ẹ jo na ẹn whladopo dogọ. Enẹgodo e dokọdò bo kú.

To ojlẹ he mẹ Jesu gbọ̀ gbigbọ etọn godo tọn, aigba sisọsisọ daho tlala de jọ, bo hùn osó dahodaho lẹ do nùvo. Sisọsisọ lọ do huhlọn sọmọ bọ yọdo oflin tọn he tin to gbonu Jelusalẹm tọn lẹ gbà bo hùn do nùvo bọ oṣiọ lẹ yin zizedlan jẹ gbonu sọn yé mẹ. Aligbọntọ he mọ oṣiọ he ko yin didetọn jẹ gbangba lẹ yì tòdaho lọ mẹ bo na linlin etọn.

Yinukọn dogọ, to ojlẹ he mẹ Jesu kú, avọ̀ daho he gbò Fiwiwe lọ po Fiwiwe Gbahugbahu lọ po to tẹmpli Jiwheyẹwhe tọn mẹ tlẹ́n do awe, sọn aga kaka wá odò. E sọawuhia dọ avọ̀ dagbedagbe he yọnwhanpẹ ehe yiaga sọ mẹtlu 18 bosọ pẹ̀n taun! Azọ́njiawu he paṣamẹ ehe ma do homẹgble Jiwheyẹwhe tọn sọta mẹhe hù Visunnu Etọn lẹ hia kẹdẹ gba ṣigba dohia dọ okú Jesu tọn ko hẹn ẹn yọnbasi todin nado biọ Fiwiwe Gbahugbahu, olọn mẹ tọn lọsu mẹ.

Eyọn, to whenuena gbẹtọ lẹ doayi aigba sisọsisọ lọ go bo mọ nuhe to jijọ lẹ, yé dibu tlala. Awhàngán lọ heyin nukọntọ to mẹhuhu lọ mẹ pagigona Jiwheyẹwhe. “Nugbo, Ovi Jiwheyẹwhe tọn wẹ ehe,” wẹ e lá dọ. E yọnbasi dọ ewọ tin to finẹ to whenuena alọsọakọ́n visunnu-yinyin sọn olọn mẹ wá yin hodọdeji to whẹdida Jesu tọn whenu to Pilati nukọn. Podọ todin e kudeji dọ Jesu yin Visunnu Jiwheyẹwhe tọn, mọwẹ, dọ e yin dawe klohugan lọ he nkọtọn ma nọgbẹ̀ pọ́n nugbonugbo.

Nujijọ azọ́njiawu tọn ehelẹ yinuwado mẹdevo lẹ ji ga, bọ yé jẹ kọlẹyi whégbè ji bo to akọ́nnu yetọn lẹ hò taidi dohia awubla sisosiso po winyan yetọn tọn po. Yọnnu susu heyin devi Jesu tọn devo he nọte to olá lẹ sọ yin whinwhàn sisosiso gbọn nujijọ ayidego tọn ehelẹ dali. Apọsteli Johanu lọsu tin to finẹ ga. Matiu 27:45-56; Malku 15:33-41; Luku 23:44-49; 2:34, 35; Johanu 19:25-30.

▪ Naegbọn nujijọ osun-wle-owhè tọn ma sọgan yin nuhe hẹn zinvlu ganhiho atọ̀n tọn lọ wá?

▪ Tlolo jẹnukọnna okú etọn, apajlẹ dagbe tẹwẹ Jesu zedai na mẹhe tindo mẹjitọ yọnhonọ lẹ?

▪ Etẹwẹ yin hodidọ ẹnẹ he Jesu dọ gbọngodo whẹpo do kú lẹ?

▪ Wadotana tẹwẹ aigba sisọsisọ lọ basi, podọ etẹwẹ yin nujọnu-yinyin avọ̀ tẹmpli lọ tọn he tlẹ́n do awe tọn?

▪ Nawẹ azọ́njiawu lọ lẹ yinuwado awhàngán heyin nukọntọ to mẹhuhu lọ whenu ji gbọn?