Weta 130
To Ohù Galili Tọn Ji
TODIN apọsteli lọ lẹ lẹkọwa Galili, dile Jesu ko degbe na yé jẹnukọn nado basi do. Ṣigba yé ma yọ́n nuhe yé dona wà to finẹ gba. To ojlẹ vude godo, Pita dọna Tọmasi, Natanaeli, Jakobu po nọvisunnu etọn Johanu po, gọna apọsteli awe devo lẹ dọmọ: “Yẹn jei whèvi hù gbé.”
Omẹ ṣidopo lọ lẹ gblọn dọmọ: “Mí na yì hẹ we ga.”
To ozán lọ blebu mẹ, yé ma mọ nudepope wle. Ṣigba, dile ai to hinhọ́n, Jesu sọawuhia yé to ohù lọ tó, ṣigba apọsteli lọ lẹ ma yọnẹn dọ Jesu wẹ. E dawhá dọmọ: “Yọpọ emi, mì tindo nude nado dù?”
“Lala,” wẹ yé dlangbè do dọ to otọ̀ lọ ji.
“Mì dlan odọ̀ do adusiwaji vàtlẹ lọ tọn, mì nasọ mọ,” wẹ e dọ. Podọ whenuena yé wà mọ, yé ma penugo nado dọ̀n odọ̀ yetọn do ohún mẹ gba na whèvi lọ lẹpo wutu.
Johanu dawhá dọmọ: “Oklunọ wẹ.”
To ehe sisè mẹ, Pita blá awugbó etọn dogo, na e ko de avọ̀ etọn lẹ dai, bo lọ́n biọ ohù mẹ. Enẹgodo e linsìn na nudi mẹtlu 90 wá hùto. Apọsteli he pò lẹ hodo e to tọjihun pẹvi lọ mẹ, bo to odọ̀ he whèvi gọ́ lọ dọ̀n.
To whenuena yé jẹte to hùto, miyọ́n akán tọn de, he ji whèvi tin te de tin to finẹ, podọ blẹdi tin. Jesu dọmọ: “Mì yí vude to whèvi he mì hù dinvie lẹ mẹ wá.” Pita biọ tọjihun lọ mẹ bo dọ̀n odọ̀ lọ wá hùto. Whèvi gbóogbó 153 wẹ tin to e mẹ!
Jesu basi oylọ na yé dọmọ: “Mì wá dùnú.”
Depope to yé mẹ ma tindo jintli lọ nado kanse dọ, “Mẹnu wẹ hiẹ?” na yemẹpo wẹ yọnẹn dọ Jesu wẹ. Ehe wẹ yin awusọhia fọnsọnku godo tọn etọn ṣinawetọ, podọ atọ̀ntọ etọn hlan apọsteli etọn lẹ taidi pipli de. Todin e má núdùdù afọnnu tọn, bo yí blẹdi po whèvi delẹ po na dopodopo yetọn.
To whenuena yé dùnú fó, Jesu, vlavo to pinpọn hlan whèvi susugege he yin hùhù lọ lẹ, kanse Pita dọmọ: “Simọni, visunnu [Johanu, NW ] tọn, hiẹ yiwanna mi hú ehelẹ?” Matin ayihaawe e to didọ dọ, Be hiẹ yiwanna ajọ́ whèhuhu tọn hugan azọ́n he yẹn ko wleawuna we nado wà ya?
“Hiẹ yọnẹn dọ yẹn yiwanna we,” wẹ Pita gblọn.
Jesu gblọn dọmọ: “Yìn lẹngbọ ṣie lẹ.”
Whladopo dogọ, whla awetọ, e kanse dọmọ: “Simọni, visunnu [Johanu, NW ] tọn, hiẹ yiwanna mi?”
“Mọwẹ, Oklunọ; hiẹ yọnẹn dọ yẹn yiwanna we,” wẹ Pita gblọn sọn ahun mẹ wá.
“Yìn lẹngbọ ṣie lẹ,” wẹ Jesu degbe na ẹn whladopo dogọ.
Enẹgodo, whla atọ̀ntọ ga, e kanse dọmọ: “Simọni, visunnu [Johanu, NW ] tọn, hiẹ yiwanna mi?”
Todin Pita gblehomẹ. E sọgan ko to pipaṣa ẹ eyin Jesu tindo ayihaawe gando nugbonọ-yinyin etọn go. To popolẹpo mẹ, to whenuena Jesu tin to whẹdida nukọn na ogbẹ̀ etọn to agọe, Pita mọ́n whla atọ̀n dọ emi ma yọ́n ẹn. Enẹwutu Pita dọmọ: “Hiẹ yọ́n onú popo, Oklunọ; hiẹ yọnẹn dọ yẹn yiwanna we.”
Jesu degbe whla atọ̀ntọ dọmọ: “Yìn lẹngbọ ṣie lẹ.”
Jesu gbọnmọ dali yí Pita zan taidi nuyizan-gbèzeyiaga tọn de nado dó do ahun mẹ na mẹhe pò lẹ azọ́n he e jlo dọ yé ni wà. E na tọ́n sọn aigba ji to madẹnmẹ, podọ e jlo dọ yé ni yin nukọntọ to devizọnwiwa na mẹdevo lẹ he na yin dindọ̀n biọ lẹngbọpa Jiwheyẹwhe tọn mẹ.
Kẹdẹdile Jesu yin bibla bo yin hùhù na e wà azọ́n he Jiwheyẹwhe degbe na ẹn nado wà wutu, mọdopolọ, e dohia todin dọ, Pita na jiya numimọ dopolọ tọn. Jesu dọna ẹn dọmọ: “Whenuena hiẹ tin to aflanmẹ, hiẹ nọ blagbajana dewe, bo nọ zinzọnlin yì fihe hiẹ jlo: ṣigba whenuena hiẹ poyọnho, hiẹ na dlẹn alọ towe lẹ jẹgbonu, mẹdevo na blagbajana we, bosọ dọ̀n we yì fihe hiẹ ma jlo.” Mahopọnna okú yise tọn he to tenọpọn Pita, Jesu dotuhomẹna ẹn dọmọ: “Hodo mi.”
Dile e lilẹ́ godo, Pita mọ Johanu bo kanse dọmọ: “Oklunọ, etẹwẹ dawe he na wà?”
Jesu gblọn dọmọ: “Eyin yẹn jlo dọ ewọ ni nọte kaka yẹn na do wá, etẹwẹ enẹ yin hlan hiẹ? Hiẹ to hihodo mi.” Hogbe Jesu tọn ehelẹ wá yin nukunnumọjẹemẹ gbọn susu to devi lẹ mẹ dali dọ apọsteli Johanu ma na kú pọ́n gbede. Ṣigba, dile apọsteli Johanu basi zẹẹmẹ do to godo mẹ, Jesu ma dọ dọ ewọ ma na kú gba, ṣigba Jesu dọ poun dọmọ: “Eyin yẹn jlo dọ ewọ ni nọte kaka yẹn na do wá, etẹwẹ enẹ yin hlan hiẹ?”
Johanu basi ayidonugo nujọnu tọn ehe to godo mẹ dọmọ: “Onú susu devo lẹ tin ga he Jesu wà, ehe, eyin yè na wlanwe yé omẹ pó tọn dopodopo, yẹn lẹnpọn dọ aihọn lọsu ma na hẹn owe he yè do wlan ẹn lẹ gba.” Johanu 21:1-25; Matiu 26:32; 28:7, 10.
▪ Etẹwẹ dohia dọ apọsteli lẹ ma yọ́n nuhe yé dona wà to Galili?
▪ Nawẹ apọsteli lẹ yọ́n Jesu to Ohù Galili tọn ji gbọn?
▪ Whla nẹmu wẹ Jesu sọawuhia todin sọn fọnsọnku etọn whenu gbọ́n?
▪ Nawẹ Jesu zinnudo nuhe e jlo dọ apọsteli lẹ ni wà ji gbọn?
▪ Nawẹ Jesu do aliho he mẹ Pita na kú te hia gbọn?
▪ Zẹẹmẹ Jesu tọn dogbọn Johanu dali tẹwẹ susu to devi lẹ mẹ mọnukunnujẹemẹ to aliho agọ̀ mẹ?