Weta 133

Jesu Dotana Nuhe Jiwheyẹwhe Biọ Lẹpo

TO WHENUENA Ahọlu-Awhàngbatọ lọ Jesu Klisti na de Satani po aihọn mawadodo tọn etọn po sẹ̀, whẹwhinwhẹ́n nankọ die e na yin nado jaya! Gandudu Owhe Fọtọ́n jijọho tọn heyin Jesu tọn bẹjẹeji to godo mẹ!

To anademẹ Jesu po ahọlu gbẹdohẹmẹtọ etọn lẹ po tọn glọ, mẹhe lùn Amagẹdọni tọ́n lẹ na zà gbakija he yin jijodo gbọn awhàn dodo tọn enẹ dali lẹ sẹ̀. Vlavo, luntọ́ntọ aigba ji tọn lẹ nasọ ji ovi lẹ na ojlẹ de, bọ ehelẹ na tindo mahẹ to azọ́n homẹhunhun tọn heyin hinhẹn aigba lọ zun jipa whanpẹnọ tlala de mẹ.

Enẹgodo Jesu na hẹn sọha livi susu he ma sọgan yin yinyọnẹn gọwa sọn yọdo yetọn lẹ mẹ nado duvivi Paladisi whanpẹnọ ehe tọn. E na basi ehe to hẹndi mẹ na mẹhẹn-deji ede titi tọn he dọmọ: “Ojlẹ lọ ja, to ehe mẹhe tin to yọdo [oflin tọn, NW ] mẹ lẹpo . . . na tọ́njẹgbonu.”

Delẹ to mẹhe Jesu na fọnsọnku lẹ mẹ wẹ ylanwatọ dai tọn he kú to apá etọn to yatin ji lọ. Flindọ Jesu dopagbe na ẹn dọmọ: “Nugbo wẹ yẹn dọ hlan we to egbehe, Hiẹ na nọ̀ hẹ mi to Paladisi mẹ.” (NW ) Lala, dawe enẹ ma na yin zize sọyi olọn mẹ nado dugán taidi ahọlu hẹ Jesu gba, mọjanwẹ Jesu lọsu ma na lẹzun gbẹtọ de whladopo dogọ nado nọgbẹ̀ to Paladisi aigba ji tọn mẹ hẹ ẹ gba. Kakatimọ, Jesu na tin po ylanwatọ dai tọn lọ po to linlẹn lọ mẹ dọ E na fọ́n ẹn wá ogbẹ̀ to Paladisi mẹ bo na mọdọ nuhudo etọn lẹ, to agbasa-liho po gbigbọ-liho po, na yin nukunpedego, dile yẹdide weda he bọdego tọn dohia do.

Lẹnnupọndeji! To ayidonugo owanyinọ Jesu tọn glọ, whẹndo gbẹtọvi tọn pete—yèdọ mẹhe lùn Amagẹdọni tọ́n lẹ, kúnkan yetọn lẹ, po livi livi donu fọtọ́n oṣiọ he yin finfọnsọnku he setonuna ẹn lẹ po—na whẹ́n biọ pipe-yinyin gbẹtọvi tọn mẹ. Jehovah, gbọn Visunnu etọn, Jesu Klisti ahọlu lọ gblamẹ, na nọ̀ hẹ gbẹtọvi lẹ to gbigbọ-liho. Dile ogbè he Johanu sè sọn olọn mẹ dọ do, “[ewọ] nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba.” Mẹdepope to aigba ji ma na jiya kavi jẹ awutu gba.

To vivọnu Gandudu Owhe Fọtọ́n tọn Jesu tọn, ninọmẹ lọ na tin kẹdẹdile Jiwheyẹwhe lẹndai to dowhenu do to whenuena e dọna gbẹtọvi awe tintan lẹ, Adam po Evi po, nado sudeji bo gọ́ aigba ji. Mọwẹ, aigba ji na yin gigọ́ po akọ̀ dodonọ gbẹtọvi pipé lẹ tọn po. Ehe yinmọ na alemọyi avọ́sinsan ofligọ Jesu tọn na ko yin yiyizan na mẹlẹpo. Okú he ylando Adam tọn nọ hẹnwa ma na tin ba!

Gbọnmọ dali, Jesu na ko basi wadotana nuhe Jehovah biọ to e si lẹpo tọn. Enẹwutu, to vivọnu owhe fọtọ́n lọ tọn, e na gọ̀ Ahọluduta lọ po whẹndo gbẹtọvi pipé lẹ tọn po do alọ mẹ na Otọ́ etọn. To whenẹnu Jiwheyẹwhe na tún Satani po aovi etọn lẹ po dote sọn odò mapote nude-mayiwa taidi okú tọn lọ mẹ. Na lẹndai tẹ?

Eyọ́n, to vivọnu owhe fọtọ́n lọ tọn, suhugan mẹhe to gbẹnọ to Paladisi mẹ lẹ tọn na yin mẹhe yin finfọnsọnku lẹ he yise yetọn ma ko yin whiwhlepọn gbede pọ́n. Jẹnukọnna okú, yé ma ko yọ́n opagbe Jiwheyẹwhe tọn lẹ pọ́n gbede podọ enẹwutu ma sọgan do yise hia to yé mẹ. Whenẹnu, to yinyin finfọnsọnku bo yin pinplọn nugbo Biblu tọn godo, e bọawu na yé to Paladisi mẹ nado sẹ̀n Jiwheyẹwhe, matin nukundiọsọmẹ depope. Ṣigba eyin dotẹnmẹ hundote lọ yin nina Satani nado tẹnpọn nado hẹnalọdotena yé sọn Jiwheyẹwhe sinsẹ̀n zọnmii mẹ, be yé na do yedelẹ hia nado yin nugbonọ to whlepọn glọ ya? Nado didẹ kanbiọ ehe, Satani na yin tuntundote.

Osọhia he yin nina Johanu dohia dọ to Gandudu Owhe Fọtọ́n Jesu tọn godo, Satani na tindo kọdetọn dagbe to lilẹ́ gbẹtọ susu he ma tindo sọha sọn Jiwheyẹwhe sinsẹ̀n mẹ. Ṣigba to whenẹnu, to whenuena mẹtẹnpọn godo tọn wá vivọnu, Satani, aovi etọn lẹ, po mẹhe e tindo kọdetọn dagbe nado klọ lẹpo po na yin vivasudo kakadoi. To alọ devo mẹ, mẹhe yin tintẹnpọn to gigọ́mẹ lẹ, luntọ́ntọ nugbonọ lẹ na nọgbẹ̀ nado duvivi dona Otọ́ olọn mẹ tọn yetọn tọn kakadoi.

E họnwun dọ, Jesu ko yinuwa, bo nasọ zindonukọn nado to nuyiwa, to azọngban titengbe de hinhẹndi mẹ to wadotana lẹndai gigonọ Jiwheyẹwhe tọn lẹ mẹ. Sọgodo daho hugan nankọ die he mí sọgan duvivi etọn taidi kọdetọn nulẹpo he e wadotana taidi Ahọlu daho sọn olọn mẹ Jiwheyẹwhe tọn. Etomọṣo, mí ma sọgan wọnji nuhe e wà lẹpo to whenuena e gbẹ́ yin gbẹtọ de gba.

Jesu desọn ojlo mẹ wá nado wá aigba ji bo plọn mí dogbọn Otọ́ etọn dali. Gbọnvona ehe, e ze apajlẹ jẹhẹnu họakuẹ Jiwheyẹwhe tọn lẹ dai. Ahun mítọn lẹ nọ yin whinwhàn to whenuena mí lẹnnupọndo adọgbigbo po hlọnhlọn yiaga hugan etọn po ji, nuyọnẹn matin awetọ etọn, nugopipe sẹhundaga etọn taidi mẹplọntọ de, nukọntọ-yinyin madibu etọn, gọna awuvẹmẹ lẹblanu tọn po mẹtọnhihopọn etọn po. To whenuena mí flin lehe e jiya sinsinyẹn dile e to awuwlena ofligọ lọ do, gbọn ehe dali kẹdẹ mí sọgan mọale ogbẹ̀ tọn yí, na jide tọn ahun mítọn lẹ nọ yin whinwhàn po pinpẹn-nutọn-yinyọnẹn po na ẹn!

Na nugbo tọn, dawe nankọ die mí ko mọ to nupinplọn ehe mẹ gando gbẹzan Jesu tọn go! Kiklo etọn họnwun bo sẹhundaga. Mí yin whinwhàn nado vọ́ hogbe togán Lomu tọn Pọntiu Pilati tọn dọ dọmọ: “Mí pọ́n dawe lọ!” Mọwẹ, na nugbo tọn, “Dawe lọ,” dawe klohugan lọ he nkọtọn ma nọgbẹ̀ pọ́n!

Gbọn alọkikẹyi awuwledainanu avọ́sinsan ofligọ etọn tọn mítọn dali, agbàn pinpẹn ylando po okú po tọn he yin ogú etọn dù sọn Adam dè sọgan yin didesẹ sọn mí ji, bọ Jesu sọgan lẹzun “Otọ́ Madopodo” mítọn. Mẹhe na mọale ogbẹ̀ madopodo tọn yí lẹpo dona tindo oyọnẹn e mayin Jiwheyẹwhe tọn kẹdẹ gba ṣigba Visunnu etọn, Jesu Klisti tọn ga. Na hihia po pinplọn owe ehe po ni gọalọna we nado tindo oyọnẹn ogbẹ̀-namẹ tọn mọnkọtọn! 1 Johanu 2:17; 1:7; Johanu 5:28, 29; 3:16; 17:3; 19:5; Luku 23:43; Gẹnẹsisi 1:28; 1 Kọlintinu lẹ 15:24-28; Osọhia 20:1-3, 6-10; 21:3, 4; Isaia 9:6.

▪ Lẹblanulọkẹyi homẹhunhun tọn tẹwẹ mẹhe lùn Amagẹdọni tọ́n lẹ po ovi yetọn lẹ po na tindo?

▪ Mẹnu wẹ na duvivi Paladisi tọn gọna mẹhe lùn Amagẹdọni tọ́n lẹ po ovi yetọn lẹ po, podọ to linlẹn tẹ mẹ wẹ Jesu na tin po yé po te?

▪ Etẹwẹ na yin ninọmẹ lọ to vivọnu owhe fọtọ́n lọ tọn, podọ etẹwẹ Jesu na wà to whenẹnu?

▪ Naegbọn Satani na yin tuntundote sọn odò mapote lọ mẹ, podọ etẹwẹ na jọ do ewọ po mẹhe hodo e lẹpo po go to godo mẹ?

▪ Nawẹ Jesu sọgan lẹzun “Otọ́ Madopodo” mítọn gbọn?