Gbigbọ lẹ Ma Ko Nọgbẹ̀ Bosọ Kú to Aigba ji fi Pọn Gba

Gbigbọ lẹ tin! To lẹdo gbigbọnọ mayinukundomọ de mẹ, yedọ gbigbọ dagbe po ylankan lẹ po tin. Be yé yin gbẹtọ he ko nọgbẹ̀ bosọ kú to aigba ji fi pọ́n lẹ wẹ ya?

Lala, yé ma yin mọ gba. To whenuena mẹde kú, ewọ sunnu kavi yọnnu ma nọ juyì lẹdo gbigbọnọ de mẹ gba, dile mẹsusu lẹn do. Nawẹ mí wagbọn do yọn ehe? Na Biblu dọ mọ wutu wẹ. Biblu yin owe nugbo tọn de he wá sọn Jiwheyẹwhe nugbo dopo akan lọ de, yínkọ mẹhe tọn yin Jehovah. Jehovah dá gbẹtọvi lẹ; ewọ yọn nuhe nọ jọ do yé go to okú yetọn whenu ganji.—Psalm 83:18; 2 Timoti 3:16.

Biblu dọ dọ Jiwheyẹwhe dá Adam, sunnu tintan lọ, “sọn kọ́gudu aigba tọn mẹ.” (Gẹnẹsisi 2:7) Jiwheyẹwhe ze é do Paladisi mẹ, jipa Edẹni tọn. Eyin Adam ko setónu na osẹ́n Jehovah tọn wẹ, ewọ ma na ko kú gba; ewọ na gbẹ po to ogbẹ̀ to aigba ji to egbehe. Ṣigba to whenuena Adam de sọn ojlo mẹ do gbà osẹ́n Jiwheyẹwhe tọn, Jiwheyẹwhe dọ hlan ẹn dọmọ: “Hiẹ [na] gọ̀ do aigba de; na e mẹ wẹ yè ko de we sọn: na kọgudu wẹ hiẹ, hlan kọ́gudu dè wẹ hiẹ na sọ gọ̀ do.”—Gẹnẹsisi 3:19.

Etẹwẹ ehe zẹẹmẹdo? Eyọn, fie wẹ Adam tin te whẹpo Jehovah do dá ẹ́ sọn kọ́gudu aigba tọn mẹ? Ewọ ma tin to fidepope gba. Ewọ ma yin gbigbọ de he ma ko yin jiji to olọn mẹ gba. Ewọ matin lala gba. Enẹwutu to whenuena Jehovah dọ dọ Adam na “gọdo aigba de,” nuhe dọ ewọ te zẹẹmẹdo dọ Adam na gọdo ninọmẹ matin tọn mẹ. Ewọ ma dasa yì lẹdo gbigbọ tọn de mẹ gba. To okú whenu, Adam lẹzun mẹhe ma tindo ogbẹ̀ whladopo dogọ, yin matintọ. Okú yin matin ogbẹ̀ tọn.

Ṣigba etẹwẹ dogbọn mẹdevo he ko kú lẹ dali? Be yéwlẹ ga tin to ninọmẹ matin tọn mẹ wẹ ya? Biblu na gblọndo dọmọ:

• “Fidoponẹ wẹ yé omẹ pó [gbẹtọvi lẹ po kanlin lẹ po] jei; Okọ́ mẹ wẹ yé omẹ pó sọn, yé omẹ pó sọ diọ lẹzùn okọ́.”—Yẹwhehodọtọ 3:20.

• “Oṣiọ lẹ ma yọ́n núde. . . ba.”—Yẹwhehodọtọ 9:5.

• “Owanyi yétọn ga, po wangbẹnamẹ yétọn po, po homẹkẹn yétọn po, é súdo to dinvie.”—Yẹwhehodọtọ 9:6.

• “Na azọ́n ma tin, linlẹn ma tin, zinzan ma tin kavi nuyọnẹn to kútòmẹ fie hiẹ jie.”—Yẹwhehodọtọ 9:10.

• “[Gbẹtọ] gọ̀ do okọ́ etọn de; To azán nẹ gbè gee linlẹn etọn lẹ súdo.”—Psalm 146:4.

Be hiẹ mọ wefọ helẹ di nuhe vẹawu nado kẹalọyi wẹ? Eyin e yinmọ, lẹnnupọn dogbọn ehe dali: To whẹndo susu lẹ mẹ, sunnu lọ nọ dín akuẹ nado sọgan penukundo whédo etọn go. Eyin sunnu lọ kú, whẹndo etọn nọ saba jiya awusinyẹnnamẹnu lẹ tọn. To whedelẹnu asi kavi ovi etọn lẹ ma tlẹ nọ saba tindo akuẹ he pe nado họ́ núdùdù gba. Vlavo kẹntọ sunnu lọ tọn lẹ sọgan sayana yé. Todin kanse dewe: ‘Eyin dawe enẹ tin to ogbẹ̀ to lẹdo gbigbọnọ de mẹ, naegbọn ewọ ma do zindonukọn nado penukundo nuhudo whẹndo etọn tọn go? Etẹwutu wẹ ewọ ma do basi hihọ na whẹndo etọn sọn omẹ ylankan lẹ si?’ Ehe yinmọ na Owe Wiwe lẹ sọgbe wutu wẹ. Dawe enẹ ma tin to ogbẹ̀ gba, e ma penugo nado wá onu depope gba.—Psalm 115:17.

Be ehe zẹẹmẹdo dọ oṣiọ lẹ ma na sọ lẹgọwá ogbẹ̀ whladopo dogọ gbede wẹ ya? Lala, e ma yin mọ gba. Mí na dọho dogbọn fọ́nsọnkú dali to nukọn mẹ. Ṣigba e zẹẹmẹdo dọ mẹhe ko kú lẹ ma yọn nuhe wà hiẹ te gba. Yé ma sọgan mọ we, sè ogbè towe, kavi dọho po hiẹ po gba. Hiẹ ma dona dibusi yé gba. Yé ma sọgan gọalọna we, mọwẹ yé ma sọgan gbleawuna we gba.—Yẹwhehodọtọ 9:4; Isaia 26:14.