Adà 11
Dodonu Aihọn Yọyọ lọ Tọn to Yinyin Didoai Todin
1, 2. To hẹndi dọdai Biblu tọn mẹ, etẹwẹ to jijọ to nukun mítọn lẹ mẹ?
NUHE sọ jiawu ga wẹ yin nugbo lọ dọ dodonu aihọn yọyọ Jiwheyẹwhe tọn ko to yinyin didoai yèdọ to alọnu todin, yèdọ aihọn hoho Satani tọn ko to doyì. To nukun mítọn lẹ mẹ, Jiwheyẹwhe to gbẹtọ lẹ ṣinyan sọn akọta lẹpo mẹ bo to yé yí do to dodonu ogbẹ́ aigba yọyọ lọ he na yítẹn madẹnmẹ to aihọn gbemanọpọ egbehe tọn sí basi. To Biblu mẹ, to 2 Pita 3:13, ogbẹ́ yọyọ ehe nọ yin yiylọ dọ “aigba yọyọ de.”
2 Dọdai Biblu tọn sọ dọmọ: “To azán opodo gbè [ojlẹ he mẹ mí tin te] . . . , gbẹtọ susu wẹ na yì bo na dọmọ: mì wá mí ni yì osó Oklunọ [“Jehovah,” NW] tọn ji [sinsẹ̀n nugbo etọn], . . . ewọ na sọ plọn ali etọn mí, mí na sọ zinzọ̀nlin to omọ́ etọn mẹ.”—Isaia 2:2, 3.
3. (a) Mẹnu lẹ ṣẹnṣẹn wẹ dọdai Isaia tọn to yinyin hinhẹndi te? (b) Nawẹ owe he gbọngodo na Biblu basi zẹẹmẹ do ehe ji gbọn?
3 Dọdai enẹ ko to hẹndi mọyi todin to ṣẹnṣẹn enẹnọ he litaina ‘aliho Jiwheyẹwhe tọn lẹ bo to zọ̀nzinlin to omọ́ etọn lẹ mẹ.’ Owe he gbọngodona Biblu dọho dogbọn ogbẹ́ akọjọpli wanyina jijọho tọ ehelẹ dali taidi “gbẹtọ susugege . . . sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ podọ sọn ogbè lẹpo mẹ,” na nugbo tọn mẹmẹsunnu lẹdo globu pé de tọn wẹ he to Jehovah sẹ̀n to kọndopọ mẹ. Podọ Biblu sọ dọmọ: “Ehelẹ wẹ yé he tọn sọn nukunbiba daho mẹ.” Enẹ wẹ yindọ, yé na lùn opodo titonu aovi tọn ehe tọ́n.—Osọhia 7:9, 14; Matiu 24:3.
Mẹmẹsunnu Akọjọpli Tọn De Wẹ Nugbo
4, 5. Naegbọn mẹmẹsunnu-yinyin lẹdo aihọn pé Kunnudetọ Jehovah tọn lẹ do yọnbasi?
4 Livi susu Kunnudetọ Jehovah tọn lẹ nọ dovivẹnu po homẹdopo po nado nọgbẹ̀ sọgbehẹ osẹ́n po aliho Jiwheyẹwhe tọn lẹ po. Ogbẹ̀ madopodo yetọn yin húnsìngan to aihọn yọyọ Jiwheyẹwhe tọn mẹ. Gbọn gbẹ̀zan egbesọegbesọ yetọn lẹ tọn zinzan to tonusise mẹ na osẹ́n Jiwheyẹwhe tọn lẹ dali, yé nọ do ojlo yetọn hia hlan ẹn nado litaina aliho gandudu etọn tọn todin podọ to aihọn yọyọ lọ mẹ. To filẹpo, mahopọnna akọta kavi ogbè yetọn, yé nọ sètonuna nujinọtedo dopolọ lẹ he yin didoai gbọn Jiwheyẹwhe dali to Ohó etọn mẹ. Enẹwutu wẹ yé do yin akọjọpli mẹmẹsunnu tọn nugbo de, yèdọ ogbẹ́ aihọn yọyọ he Jiwheyẹwhe basi de.—Isaia 54:13; Matiu 22:37, 38; Johanu 15:9, 14.
5 Kunnudetọ Jehovah tọn lẹ ma nọ yí gigo lọ na yede na yinyin akọjọpli mẹmẹsunnu matin awetọ tọn gba. Yé yọnẹn dọ ehe yin kọdetọn gbigbọ huhlọnnọ Jiwheyẹwhe tọn he to azọ́nwa do gbẹtọ lẹ ji nado litaina osẹ́n etọn lẹ. (Owalọ lẹ 5:29, 32; Galatianu lẹ 5:22, 23) Nuwiwa Jiwheyẹwhe tọn wẹ. Dile Jesu dọ do, “onú he yin giglo to gbẹtọ dè ma glo Jiwheyẹwhe dè gba.” (Luku 18:27) Enẹwutu Jiwheyẹwhe he hẹn wẹkẹ akọndonanu tọn lọ yọnbasi wẹ yin omẹ lọ he sọ hẹn ogbẹ́ aihọn yọyọ akọndonanu tọ lẹ tọn yọnbasi ga.
6. Naegbọn mẹmẹsunnu-yinyin Kunnudetọ Jehovah tọn lẹ do sọgan yin yiylọ dọ azọ́n jiawu egbezangbe tọn de?
6 Nalete, aliho Jehovah tọn na gandudu do aihọn yọyọ lọ ji sọgan yin mimọ tọlọlọ to nuhe ewọ to bibasi to dodonu aihọn yọyọ lọ tọn he ko to yinyin didoai todin mẹ. Podọ nuhe ewọ ko wà po Kunnudetọ etọn lẹ po yin, azọ́njiawu egbezangbe tọn de, to ninọmẹ de mẹ. Etẹwutu? Na ewọ ko bẹ́ Kunnudetọ Jehovah tọn lẹ do akọjọpli mẹmẹsunnu-yinyin nugbo tọn de mẹ, yèdọ dehe ma sọgan gbà gbede gbọn hunyanhunyan akọta, akọ̀, kavi ojlo sinsẹ̀n lẹ tọn dali. To whenue sọha Kunnudetọ lọ lẹ tọn biọ livi susu lẹ mẹ bo tin to aigba he hugan 200 lẹ ji, yé yin dindọndopọ to dopo mẹ to pọninọ he ma sọgan gbà de mẹ. Mẹmẹsunnu akọjọpli tọn ehe, gbọnvo mlẹnmlẹn to whenuho lẹpo mẹ, na nugbo tọn azọ́njiawu egbezangbe tọn de wẹ—yèdọ nuyiwa Jiwheyẹwhe tọn.—Isaia 43:10, 11, 21; Owalọ lẹ 10:34, 35; Galatianu lẹ 3:28.
Yinyọn Omẹ Jiwheyẹwhe Tọn lẹ Dovò
7. Nawẹ Jesu dọ dọ nuplọntọ emitọn lẹ na yin yinyọnẹn gbọn?
7 Nawẹ mẹhe Jiwheyẹwhe to yiyizan taidi dodonu aihọn yọyọ lọ tọn lẹ sọgan yin yinyọnẹn yinukọndogọ gbọn? Eyọn, mẹnu lẹ wẹ hẹn ohó Jesu tọn lẹ to Johanu 13:34, 35 mẹ po di? Ewọ dọmọ: “Osẹ́n yọyọ de wẹ yẹn na hlan mì, dọ mì ni yiwanna mìnọzo: dile yẹn yiwanna mì, na mìwlẹ ga ni yiwanna mìnọzo. Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” Kunnudetọ Jehovah tọn lẹ yí ohó Jesu tọn lẹ sè bo nọ yinuwa do e ji. Dile Ohó Jiwheyẹwhe tọn na ayinamẹ do, yé “tindo owanyi he hùnzo” na ode awetọ yetọn lẹ. (1 Pita 4:8) Yé “zé owanyi dogo, ehe yin pọninọ gbesisọ tọn.” (Kọlọsinu lẹ 3:14) Enẹwutu owanyi mẹmẹsunnu tọn wẹ yin “nutlẹ́nu” lọ he kọ̀n yé dopọ lẹdo aihọn pé.
8. Nawẹ 1 Johanu 3:10-12 do omẹ Jehovah tọn lẹ hia yinukọn dogọ gbọn?
8 Humọ, 1 Johanu 3:10-12 dọmọ: “Ehe mẹ wẹ yè to ovi Jiwheyẹwhe tọn lẹ sọhia te, po ovi Lẹgba tọn lẹ po: mẹdepope he ma wà dódó, é ma jọ̀ sọn Jiwheyẹwhe dè gba, kavi ewọ he ma yiwanna mẹmẹsunnu etọn. na ehe wẹ owẹn he mì sè sọn whẹ́whẹ́whenu, dọ mì ni yiwanna mìnọzo. E ma yin taidi Kaini, he jọ sọn mẹylankan lọ dè, bo hù nọvisunnu etọn.” Gbọnmọ, omẹ Jiwheyẹwhe tọn lẹ yin, mẹmẹsunnu lẹdo globu pé he ma yin danuwatọ lẹ.
Adà Mẹyinyọnẹn Tọn Devo
9, 10. (a) Gbọn azọ́n tẹ́ dali wẹ devizọnwatọ Jiwheyẹwhe tọn lẹ na yin yinyọnẹn to azán godo tọn lẹ mẹ? (b) Nawẹ Kunnudetọ Jehovah tọn lẹ hẹn Matiu 24:14 di gbọn?
9 Aliho devo tin nado yọn devizọnwatọ Jiwheyẹwhe tọn lẹ dovò. To dọdai etọn dogbọn opodo aihọn tọn dali, Jesu dọ onu susu he na dohiagona ojlẹ ehe taidi azán godo tọn lẹ. (Pọn Adà 9tọ.) Adà titengbe dọdai ehe tọn yin hodọdeji to ohó etọn lẹ mẹ to Matiu 24:14 mẹ: “Yé nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.”
10 Be mí ko mọ dọdai enẹ to yinyin hinhẹndi ya? Mọwẹ, na to whenue azán godo tọn lẹ bẹjẹeji to 1914 gbọ́n, Kunnudetọ Jehovah tọn lẹ ko to yẹwheho Ahọluduta Jiwheyẹwhe tọn dọ lẹdo aihọn lọ blebu pé to aliho he Jesu degbè etọn mẹ, enẹ wẹ yin, to owhé gbẹtọ lẹ tọn gbè. (Matiu 10:7, 12; Owalọ lẹ 20:20) Livi susu Kunnudetọ lẹ tọn nọ dlà gbẹtọ lẹ pọ́n to akọta lẹpo mẹ nado dọho hẹ yé dogbọn aihọn yọyọ lọ dali. Ehe wẹ zọ́n bọ hiẹ do mọ alọnuwe ehe yí, na azọ́n Kunnudetọ Jehovah tọn lẹ tọn bẹ́ owe zinzin po mimá liva susu owe lẹ tọn dogbọn Ahọluduta Jiwheyẹwhe tọn po dali hẹn. Be hiẹ yọn mẹdevo de he nọ dọyẹwheho dogbọn Ahọluduta Jiwheyẹwhe tọn dali sọn whédegbè jẹ whédegbè lẹdo aihọn pé ya? Podọ Malku 13:10 dohia dọ azọ́n yẹwhehodidọ tọn ehe po mẹpinplọn tọn po dona yin wiwa “whẹ́,” whẹpo opodo nido wá.
Nina Gblọndo Whẹho Daho Awetọ Lọ
11. Onu devo tẹwẹ Kunnudetọ Jehovah tọn lẹ wadotana gbọn taliaina gandudu Jiwheyẹwhe tọn dali?
11 Gbọn taliaina osẹ́n po nunọwhinnusẹ́n Jiwheyẹwhe tọn lẹ po dali, Kunnudetọ Jehovah tọn lẹ nọ hẹn onu devo diun. Yé nọ dohia dọ Satani yin lalonọ de to whenuena e sọalọakọn dọ gbẹtọ lẹ ma sọgan yin nugbonọ hlan Jiwheyẹwhe to whlepọn glọ gba, bo gbọnmọ dali do na gblọndo whẹho daho awetọ lọ, he gando tenọgligo hinhẹn gbẹtọvi lẹ tọn go. (Job 2:1-5) To yinyin ogbẹ́ gbẹtọ livi susu de tọn sọn akọta lẹpo mẹ dali, Kunnudetọ lẹ nọ do, nugbonọ-yinyin hlan gandudu Jiwheyẹwhe tọn hia taidi pipli dopo. Dile e tlẹ yindọ yé yin mapénọ, yé nọte masẹafọ to awà Jiwheyẹwhe tọn ji gando whẹho nupojipetọ-yinyin wẹkẹ lẹpo tọn go mahopọnna kọgbidinamẹnu Satani tọn.
12. Gbọn yise yetọn dali, apajlẹ mẹnu tọn wẹ Kunnudetọ Jehovah tọn lẹ nọ hodo?
12 To egbehe, livi susu Kunnudetọ Jehovah tọn ehelẹ yí kunnudenu yetọn dogọ hukan gaa kunnudetọ devo lẹ tọn to ojlẹ he wayi lẹ mẹ he do nugbonọ-yinyin hlan Jiwheyẹwhe hia. Delẹ to yé mẹ wẹ Abẹli, Noa, Job, Ablaham, Sala, Isaki, Jakob, Debola, Luti, Davidi, po Daniẹli po, na do ylọ vude poun. (Heblu lẹ, weta 11) Dile Biblu dọ do, yé yin ‘gbẹtọgun kunudetọ nugbonọ lẹ tọn’ de. (Heblu lẹ 12:1) Omẹ ehelẹ, po mẹdevo lẹ po gọna nuplọntọ Jesu tọn lẹ hẹn tenọgli go hlan Jiwheyẹwhe. Podọ Jesu lọsu zé apajlẹ he kló hugan de dai gbọn hinhẹn tenọgli pipé go dali.
13. Ohó Jesu tọn tẹlẹ dogbọn Satani dali wẹ ko sọawuhia nado yin nugbo?
13 Ehe dohia dọ nuhe Jesu dọ dogbọn Satani dali hlan sinsẹ̀ngan lẹ yin nugbo: “Ṣigba dinvie mì to dindin na hù mi, mẹhe dọ nugbo na mì, he yẹn sè sọn Jiwheyẹwhe dè: . . . Otọ́ mìtọn Lẹgba tọn wẹ mì, wantúntún otọ́ mìtọn tọn ojlo mìtọn wẹ nado wà. Hlọnhutọ de wẹ ewọ sọn whẹ́whẹ́whenu, é ma nọ nọte to nugbo mẹ gbede, na nugbo ma tin to ewọ mẹ wutu. Whenuena é dọ lalo de, é dọho etọn titi tọn: na lalonọ de wẹ ewọ, podọ otọ́ etọn.”—Johanu 8:40, 44.
Etẹwẹ Yin Dide Towe?
14. Etẹwẹ to jijọ do dodonu aihọn yọyọ lọ tọn go todin?
14 Dodonu aihọn yọyọ lọ tọn heto yinyin didoai gbọn Jiwheyẹwhe dali to ogbẹ́ akọjọpli Kunnudetọ Jehovah tọn lẹ mẹ to huhlọn de-to-deji tindo. To owhe dopodopo mẹ kanweko fọtọ́n susu gbẹtọ lẹ tọn wẹ to ojlo mẹdekannujẹ yetọn tọn yizan, he sinai do oyọnẹn pipé ji, nado kẹalọyi gandudu Jiwheyẹwhe tọn. Yé lẹzun apadewhe ogbẹ́ aihọn yọyọ lọ tọn, bo nọte masẹafọ to adà Jiwheyẹwhe tọn mẹ gando whẹho nupojipetọ-yinyin wẹkẹ lẹpo tọn go, bo do Satani hia nado yin lalonọ de.
15. Azọ́n klandovo tọn tẹwẹ Jesu to hinhẹndi to azán mítọn gbè?
15 Gbọn dide gandudu Jiwheyẹwhe tọn dali, yé pegan nado yin zizédo “adusilọ” Klisti tọn mẹ dile ewọ klán “lẹngbọ” lẹ sọn “gbọgbọẹ” lẹ go do. To dọdai etọn mẹ dogbọn azán godo tọn lẹ dali, Jesu dọdai dọmọ: “Nukọn etọn wẹ yè na bẹ́ akọta lẹpo pli do: é nasọ klán yé dovo sọn yénọzo go, dile lẹngbọhọtọ nọ klán lẹngbọ etọn lẹ sọn gbọgbọẹ lẹ go do. E nasọ yí lẹngbọ lẹ do adusilọ etọn mẹ, ṣigba gbọgbọẹ lẹ do amiyọn etọn mẹ.” Lẹngbọ lẹ yin gbẹtọ whiwhẹ́nọ lẹ he nọ kọnawudopọ bosọ nọ nọgodona mẹmẹsunnu Klisti tọn lẹ, he nọ litaina gandudu Jiwheyẹwhe tọn. Gbọgbọẹ lẹ wẹ yin gbẹtọ tasinyẹntọ lẹ he gbẹ́ mẹmẹsunnu Klisti tọn lẹ dai bo ma wà nudepope nado nọgodona gandudu Jiwheyẹwhe tọn. Po kọdetọn tẹ po? Jesu dọmọ: “Ehelẹ [gbọgbọẹ lẹ] wẹ na jùyi oya madopodo mẹ; ṣigba dodonọ [lẹngbọ] lẹ biọ ogbẹ̀ madopodo mẹ.”—Matiu 25:31-46.
16. Etẹwẹ hiẹ dona wà eyin hiẹ jlo nado nọgbẹ̀ to Paladisi he jà lọ mẹ?
16 Na nugbo tọn, Jiwheyẹwhe nọ hò mítọn pọn! To madẹnmẹ ewọ na wleawu paladisi whanpẹnọ aigba ji tọn de. Be hiẹ jlo nado nọ Paladisi enẹ mẹ ya? Eyin mọwẹ, do pinpẹn nutọn yinyọnẹn towe hia na nuwleawudai Jehovah tọn lẹ gbọn nupinplọn dogbọn dali etọn po nuyiwa do nuhe hiẹ plọn ji po dali. “Mì din Oklunọ [“Jehovah,” NW], whenu yè sọgan mọn ẹn do, mì ylọ ẹ, whenuena e tin to yakẹ, omẹ ylankan ni gbẹ́ aliho etọn dai, mawàdodonọ linlẹn etọn: bo gbọ é ni gọ̀ do Oklunọ [“Jehovah,” NW] dè, ewọ nasọ walẹblanu nẹẹ.”—Isaia 55:6, 7.
17. Naegbọn whenu de ma pò nado hẹngú bà to dide mẹhe na yin sinsẹ̀n basina mẹ?
17 Whenu de ma sọ pò nado hẹngú bà. Opodo whenu-nu ehe tọn ko sẹpọ pete. Ohó Jiwheyẹwhe tọn na ayinamẹ dọmọ: “Mì yiwanna aihọn blo, kavi onu he tin to aihọn mẹ. Eyin mẹde yiwanna aihọn, owanyi Otọ́ tọn ma tin to ewọ mẹ gba. . . . Aihọn to juju jei po wantúntún etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:15-17.
18. Yanwle nuyiwa tẹ tọn wẹ na gọalọna we nado pọnnukọn po jide po hlan gbẹ̀ninọ to aihọn yọyọ jiawu Jiwheyẹwhe tọn mẹ?
18 Yè ko to azọ́n plọn omẹ Jiwheyẹwhe tọn lẹ todin na ogbẹ̀ madopodo to aihọn yọyọ lọ mẹ. Yé to onu gbigbọ tọn po azọ́n yinyọnẹn he yin nuhudo devo lẹ tọn po plọn nado wleawuna paladisi de. Mí vẹwe nado dè Jiwheyẹwhe taidi Ahọlu bo nọgodona azọ́n mẹwhlẹngantọ lọ tọn he ewọ to hinhẹn yọnbasi lẹdo aigba lọ blebu pé to egbehe. Plọn Biblu hẹ Kunnudetọ Jehovah tọn lẹ, bo wá yọ́n Jiwheyẹwhe he nọ hò towe pọn nugbo nugbo lọ po omẹ lọ he na hẹn yajiji wá vivọnu po. To aliho ehe mẹ hiẹ lọsu sọgan lẹzun apadewhe dodonu aihọn yọyọ lọ tọn ga. To whelọnu lo hiẹ sọgan pọn nukọn hlan po nujikudo po na mimọ lẹblanu Jiwheyẹwhe tọn yí po gbẹ̀ninọ kakadoi po to aihọn yọyọ jiawu enẹ mẹ po.
[Yẹdide to weda 31]
Kunnudetọ Jehovah tọn lẹ tindo akọjọpli mẹmẹsunnu-yinyin nugbo tọn de
[Yẹdide to weda 32]
Dodonu aihọn yọyọ Jiwheyẹwhe tọn ko to yinyin didoai todin