Homẹmimiọn Na Ayìmajainanọ Lẹ

“Nudida lẹpo péte wẹ to winwẹn bo sọ to ajipanu to awufiẹsa mẹ hẹ mí kaka jẹ dinvie.” (Lomunu lẹ 8:22) Yajiji gbẹtọvi lẹ tọn klo talala to whenuena enẹ yin kinkan to nuhugan owhe 1 900 lẹ die wayi. Ayiha mẹsusu tọn wẹ ma jai. Enẹwutu, Klistiani lẹ yin tudohomẹna dọmọ: “Mì nọ miọnhomẹna ayi mawhiwhẹnọ lẹ.”—1 Tẹsalonikanu lẹ 5:14.

To egbehe, awufiẹsa gbẹtọvi lẹ tọn tlẹ klo hugan, podọ gbẹtọ susu dogọ yin ayimajainanọ hugan gbede pọn tọn. Ṣigba be enẹ dona paṣa mí wẹ? Gbede pọn, na Biblu do ehelẹ hia taidi “azán godo tọn lẹ” (NW) bo ylọ yé dọ “ojlẹ awusinyẹn tọn lẹ.” (2 Timoti 3:1-5) Jesu Klisti dọdai dọ to azán godo tọn lẹ mẹ “nukunbibia akọta lẹ tọn” na tin podọ “gbẹtọ na to didaku na obú, podọ na nukundo onú nẹlẹ he ja aihọn ji tọn.”—Luku 21:7-11, 25-27; Matiu 24:3-14.

To whenuena gbẹtọ lẹ tindo numimọ dẹn to aimẹ tukla gbẹmẹ tọn, obú, awubla, kavi numọtolanmẹ agọ̀ mọnkọtọn lẹ, yé nọ saba lẹzun ayimajainanọ. Nuhe nọ hẹn ayimajai kavi numọtolanmẹ awubla sisosiso tọn wá sọgan yin okú mẹyiwanna tọn de, gbẹdai de, azọ́n de hinhẹnbú, kavi azọ̀njijẹ mapote. Gbẹtọ lẹ sọ nọ lẹzun ayimajainanọ to whenuena yé tindo numọtolanmẹ nuvọnọ-yinyin tọn, to whenuena yé tindo numọtolanmẹ dọ yé gboawupo, bo ko sọ dowinyan mẹdevo lẹ. Mẹdepope sọgan yin hinhẹn-jẹagba mlẹnmlẹn gbọn ninọmẹ he gọna nuhahun de dali, ṣigba whenuena mẹde tindo linlẹn todido matindo tọn de bo ma penugo nado lùntọ́n sọn ninọmẹ ylankan mẹ, e sọgan dekọtọn do ayimajai sinsinyẹn mẹ.

Gbẹtọ ojlẹ hohowhenu tọn lẹ tindo numimọ numọtolanmẹ dopolọ lẹ tọn. Job jiya awutu po nugbajẹmẹji mẹdetiti tọn po. E tindo numọtolanmẹ dọ Jiwheyẹwhe ko gbẹ́ emi dai, Enẹwutu é gbẹwanna ogbẹ̀. (Job 10:1; 29:2, 4, 5) Jakobu tindo ayimajai gando okú ajiji ovisunnu etọn tọn go, bo gbẹ́ nado yin homẹmiọnna bo to jijlo nado kú. (Gẹnẹsisi 37:33-35) Numọtolanmẹ whẹgbledo tọn gando nuṣiwa sinsinyẹn go, Ahọlu Davidi doavigbe dọmọ: “Yẹn to yìyì to awubla mẹ to azán popo gbè. Yẹn dakú.”—Psalm 38:6, 8; 2 Kọlintinu lẹ 7:5, 6.

To egbehe, mẹsusu ko lẹzun ayimajainanọ na agbàndona yedelẹ zẹjlẹgo wutu, vivẹnudido nado hodo gbẹ̀zan egbesọ tọn he hugan lẹnpọn, numọtolanmẹ, po huhlọn he yé tindo lẹ po. E họnwun taun dọ, awufiẹsa to pọmẹ po lẹnpọn agọ̀ lẹ po podọ numọtolanmẹ lẹ sọgan yinuwa do agbasa ji bosọ yidogọna adi bẹwlu tọn de to apọ̀n mẹ, bo gbọnmọ dali do hẹn ayimajai wá.—Yijlẹdo Howhinwhẹn lẹ 14:30 go.

Alọgọ He Yé Tindo Nuhudo Etọn

Epafloditu, Klistiani owhe kanweko tintan tọn de sọn Filippi, lẹzun mẹhe “gọna awubla, na [họntọn etọn lẹ] sè dọ é ko jẹawutu.” Epafloditu, mẹhe jẹawutu to whenuena é yin didohlan Lomu gbọn họntọn etọn lẹ dali po nuzinzán lẹ po na apọsteli Paulu po godo, vlavo é tindo numọtolanmẹ dọ é ko dowinyan họntọn etọn lẹ bọ yé pọn ẹn dohlan taidi winyandomẹtọ de. (Filippinu lẹ 2:25-27; 4:18) Nawẹ apọsteli Paulu gọalọ gbọn?

E do Epafloditu hlan whé po wekanhlanmẹ de po hlan họntọn Filippinu lẹ he dọmọ: “Mì yí ayajijẹ susu do yí i [Epafloditu] to Oklunọ mẹ; na mì ni sọ nọ na yẹyi omẹ mọhunkọ tọn lẹ.” (Filippinu lẹ 2:28-30) Nugbo lọ dọ Paulu pa ẹ podọ Filippinu lẹ kẹalọyi i po zohunhun po gọna owanyi sisosiso, na jide tọn na ko miọnhomẹna Epafloditu podọ gọalọ to mimọ kọgbọ sọn ayimajai etọn si.

Matin ayihaawe, ayinamẹ Biblu tọn nado “nọ miọnhomẹna ayi mawhiwhẹnọ lẹ” wẹ yin dagbe hugan taun lọ. “Hiẹ dona yọnẹn dọ mẹdevo lẹ nọ hò towe pọn taidi gbẹtọ de,” wẹ yọnnu he jiya ayimajai tọn de dọ. “Hiẹ dona sè mẹde ni dọmọ, ‘Yẹn mọnukunnujẹemẹ; lanmẹ towe na yá.’”

Ayimajainanọ de dona nọ saba zé afọdide tintan gbọn dindin awuvẹmẹtọ he ewọ sọgan dọ aṣli etọn na de dali. Omẹ ehe dona yin tódoaitọ dagbe de bo yin whiwhẹnọ taun. Ewọ sunnu kavi yọnnu dona dapana pinplọn ayimajainọ lọ kavi hogbè lwhẹgbledomẹ tọn lẹ yiyizan, taidi, ‘Hiẹ ma dona tindo numọtolanmẹ mọnkọtọn gba’ kavi, ‘Walọ enẹ ma sọgbe gba.’ Numọtolanmẹ ayimajainanọ lọ tọn ẹ madogan gba, podọ gblọndo sinsinyẹn mọkọtọn lẹ na hẹn ẹn tindo numọtolanmẹ he tlẹ ylan dogbọn ede dali poun wẹ.

Mẹhe tindo ayimajai lọ sọgan tindo numọtolanmẹ nuvọnọ-yinyin tọn. (Jona 4:3) Ṣogan, mẹde dona flin dọ nuhe yin titengbe hugan wẹ yin lehe Jiwheyẹwhe yí mẹlọ do do nujọnu sọ. Gbẹtọ lẹ pọn Jesu hlan “taidi mẹvọ́nu,” ṣigba ehe ma diọ nuhọakuẹ-yinyin etọn to Jiwheyẹwhe nukọn gba. (Isaia 53:3) Tindo jide, kẹdẹdile Jiwheyẹwhe yiwanna Ovisunnu etọn do, mọwẹ e yiwanna hiẹ lọsu ga do niyẹn.—Johanu 3:16.

Jesu walẹblanuna mẹhe tin to ayimajai mẹ lẹ podọ é dovivẹnu nado gọalọna yé nado mọ nuhọakuẹ-yinyin dopodopo yetọn tọn. (Matiu 9:36; 11:28-30; 14:14) E basi zẹẹmẹ dọ Jiwheyẹwhe yọn nuhọakuẹ-yinyin etlẹ yin oblẹnọ flinflin, he ma tindo nuhọakuẹ depope lẹ tọn. “Ode to yé mẹ ma yin winwọ̀n to Jiwheyẹwhe nukọn gba,” wẹ ewọ dọ. Nẹmunẹnu wẹ ewọ yọn nuhọakuẹ-yinyin gbẹtọvi lẹ he to vivẹnudo nado wà ojlo etọn do sọ! Gando omẹ ehelẹ go Jesu dọmọ: “Yèdọ odà he tin to ota mìtọn lẹpo wẹ yè hia.”—Luku 12:6, 7.

Nugbo, e sọgan vẹawu na mẹhe tin to ayimajai sinsinyẹn mẹ de, mẹhe yin gigọ́ po madogan po awugbopo etọn lẹ po, nado yise dọ Jiwheyẹwhe yọn nuhọakuẹ etọn talala. E sọgan tindo numọtolanmẹ po jide po dọ emi ma jẹ na owanyi po mẹgopinpọn Jiwhe-yẹ-whe tọn po gba. “Ayiha mítọn [sọgan] gblewhẹdo mí,” wẹ Ohó Jiwheyẹwhe tọn dọ. Ṣigba be enẹ wẹ yin nujinọtedo lọ ya? Lala e ma yin mọ gba. Jiwheyẹwhe yọnẹn dọ gbẹtọvi ylandonọ lẹ sọgan tindo linlẹn agọ̀ bo tlẹ sọ gblewhẹdo yedelẹ. Enẹwutu Ohó etọn miọnhomẹna yé dọmọ: “Jiwheyẹwhe klo hu ayiha mítọn bo sọ yọn onú popo.”—1 Johanu 3:19, 20.

Mọwẹ, Otọ́ owanyinọ olọn mẹ tọn mítọn nọ mọ hugan ylando mítọn po nuṣiwa mítọn lẹ po. E yọn ninọmẹ he hugan huhlọn mítọn lẹ, yanwle gbẹzán mítọn lẹpo tọn, linlẹn he tin to godona nuwiwa mítọn lẹ po lẹndai mítọn lẹ po. E yọnẹn dọ mí dugú ylando, awutu, po okú po tọn podọ na enẹwutu tindo awugbopo lẹ. Nugbo lọ dọ mí tindo numọtolanmẹ awubla tọn bo nọ gblehomẹ do mídelẹ to ede mẹ yin kunnudenu dọ mí ma jlo nado waylando gba bo ma ko yì zẹjlẹgo. Biblu dọ dọ mí “yin mẹmẹglọ hlan ovọ́,” sọta ojlo mítọn. Enẹwutu ninọmẹ ylankan mítọn nọ walẹblanu na Jiwheyẹwhe, podọ ewọ nọ zé madogan-yinyin mítọn lẹ do lẹnpọn mẹ po mẹtọnhopọn po.—Lomunu lẹ 5:12; 8:20.

“Lẹblanunọ, dagbenọ wẹ Oklunọ [“Jehovah,” NW],” wẹ jide he yè na mí. “Dile whèzẹtẹn dẹ̀n do whèyihọ do, dẹ̀n sọmọ wẹ ewọ do zé sẹ́nmẹjijẹ mítọn yì dẹ̀n sọn mí de. Na ewọ yọn dida mítọn; É sọ flin dọ okọgudú wẹ mí.” (Psalm 103:8, 12, 14) Na nugbo tọn, Jehovah yin “Jiwheyẹwhe homẹmimiọn lẹpo tọn; mẹhe to homẹmiọn na mí to tukla mítọn lẹpo mẹ.”—2 Kọlintinu lẹ 1:3, 4.

Hudo alọgọ tọn he ayimajainanọ lẹ tindo hugan nọ wá sọn dindọn sẹpọ Jiwheyẹwhe lẹblanunọ yetọn po alọkẹyi oylọ etọn nado ‘zé agbàn yetọn dlan do e ji po.’ Ewọ na nugbo tọn sọgan “hẹn ayiha vọjọnọ lẹ tọn zéta.” (Psalm 55:22; Isaia 57:15) Enẹwutu Ohó Jiwheyẹwhe tọn na tuli odẹhiho, bo dọmọ: “Mì bẹ́ magbọjẹ mìtọn lẹpo do alọ [Jehovah tọn] mẹ; na ewọ to tukla mìtọn jẹ wutu.” (1 Pita 5:7) Mọwẹ, gbọn odẹhiho po ovẹvivẹ po dali gbẹtọ lẹ sọgan dọ̀nsẹpọ Jiwheyẹwhe bo dùvivi “jijọho Jiwheyẹwhe tọn he hú nuyọnẹn lẹpo” tọn.—Filippinu lẹ 4:6, 7; Psalm 16:8, 9.

Vọjlado yọn-na-yizan to aliho gbẹzán tọn lẹ mẹ sọ sọgan gọalọna mẹde nado dùto numọtolanmẹ ayimajai de tọn ji. Aihundida lanmẹyiya agbasa tọn, nududu he dojo dudu, mimọ jẹhọn fífá yí po gbọjẹ he pé po, podọ didapana television pinpọn zẹjlẹgo lẹpo yin onu titengbe. Yọnnu dopo ko gọalọna ayimajainanọ lẹ gbọn hinhẹn yé nado zinzọnlin po huhlọn po. To whenuena yọnnu ayimajainanọ de dọmọ: “Yẹn ma jlo nado yì zinzọnlin gba,” yọnnu lọ dọ po awubibọ po ṣigba po nujikudo po dọmọ: “Mọwẹ, hiẹ jei.” Yọnnu lọ na linlin dọmọ: ‘Mí zinzọnlin hugan kilometlu ṣidopo. To whenuena mí lẹkọ, agbọ́ pé e, ṣigba numọtolanmẹ etọn pọ́nte. Hiẹ ma sọgan yí lehe aihundida lanmẹyiya tọn yin alọgọ do sọ gba adavo hiẹ tẹn ẹn pọn.’

Ṣigba, to whedelẹnu e ma nọ yọnbasi nado gbawhàn ayimajai tọn mlẹnmlẹn gba, yèdọ eyin onu lẹpo tlẹ ko yin tintẹnpọn, gọna amasin doto lẹ tọn. “Yẹn ko tẹn onú lẹpo pọn,” wẹ yọnnu mẹhomẹ de dọ, “ṣigba ayimajai gbọṣi aimẹ.” Mọdopolọ, e ma nọ saba bọawu todin nado hẹn nukuntọnnọ, tókúnọ, kavi sẹkunọ de jẹ gángán gba. Ṣogan, ayimajainanọ lẹ sọgan mọ homẹmimiọn po todido po gbọn Ohó Jiwheyẹwhe tọn hihia whẹwhẹ dali, ehe wleawu todido nujikudo tẹgbẹ tọn na pọngbọ whepoponu tọn sọn awutu gbẹtọvi tọn lẹ po si.—Lomunu lẹ 12:12; 15:4.

Whenuena Mẹde Ma Nasọ Tindo Ayimajai Bà

To whenuena Jesu basi zẹẹmẹ onu ylankan he jà aigba ji lẹ to azán godo tọn lẹ mẹ, é yidogọ dọmọ: “Whenuena onu helẹ na ṣẹ jijọ, mì ni pọ́n aga, bo sọ zé ota mìtọn do aga; na ofligọ̀ mìtọn to dindọ̀n sẹpọ́ wutu.” (Luku 21:28) Jesu to hodọ dogbọn whlẹngan biọ aihọn yọyọ dodo Jiwheyẹwhe tọn tọn mẹ, fie “yè na whlẹ́n nudida lọsu sọn mẹglọnọ hẹngble tọn mẹ do mẹdekannujẹ he do gido ovi Jiwheyẹwhe tọn lẹ tọn mẹ.”—Lomunu lẹ 8:21.

Kọgbọ nankọtọn wẹ e na yin na gbẹtọvi lẹ nado yin hinhẹn jẹ mẹdekannu sọn nupẹnagbànmẹ dai tọn lẹ si podọ nado fọ́n to azán dopodopo gbè po ayiha wiwe ṣeke lẹ po, bosọ tin to jejeji nado bẹ́ azọ́n gbèlọgbe tọn jẹeji! Mẹde ma nasọ yin tuklado gbọn aslọ ayimajai tọn dali bà. Opagbe jide tọn lọ na gbẹtọvi lẹ wẹ yindọ Jiwheyẹwhe “nasọ súnsún dasin lẹpo sẹ sọn nukun yetọn mẹ; okú ma nasọ tin bà, kavi awúbla, kavi avi, mọ awufiẹsa ma na tin bà; na onu tintan lẹ ko jiwayì.”—Osọhia 21:3, 4.

Adavo é yin didohia to alọpa devo mẹ, Wefọ he yin dide to owe ehe mẹ lẹ wá sọn Biblu Wiwe lọ, Gun-Alada mẹ.