Nupinplọn 7

Dindọnsẹpọ Jiwheyẹwhe to Odẹ̀ Mẹ

Naegbọn e do yin onú titengbe nado nọ hodẹ̀ to gbesisọmẹ? (1)

Mẹnu wẹ hiẹ dona nọ hodẹ̀ hlan, podọ gbọnna? (2, 3)

Etẹwẹ yin hosọ he sọgbe na odẹ̀ lẹ? (4)

Whetẹnu wẹ hiẹ dona hodẹ̀? (5, 6)

Be Jiwheyẹwhe nọ dotoai hlan odẹ̀ lẹpo ya? (7)

1. Odẹ̀ yin hodidọ po whiwhẹ po hlan Jiwheyẹwhe. Hiẹ dona hodẹ̀ hlan Jiwheyẹwhe to gbesisọmẹ. Gbọnmọ dali hiẹ na tindo numọtolanmẹ dindọnsẹpọ ẹ pẹkipẹki tọn taidi họntọn vivẹ de. Jehovah klo bo tindo huhlọn taun, ṣogan e nọ sè odẹ̀ mítọn lẹ! Be hiẹ nọ hodẹ̀ hlan Jiwheyẹwhe to gbesisọmẹ ya?—Psalm 65:2; 1 Tẹsalonikanu lẹ 5:17.

2. Odẹ̀ yin ada sinsẹ̀n-bibasi mítọn tọn. Gbọnmọ, mí dona hodẹ̀ hlan Jiwheyẹwhe, yèdọ Jehovah kẹdẹ. To whenuena Jesu tin to aigba ji, e nọ hodẹ̀ to whepoponu hlan Otọ́ etọn, e ma yin hlan mẹdevo depope gba. Mí dona wà onú dopolọ. (Matiu 4:10; 6:9) Etomọṣo, odẹ̀ mítọn lẹpo dona yin hihò to oyin Jesu tọn mẹ. Ehe dohia dọ mí tindo sisi na otẹn Jesu tọn podọ mí tindo yise to avọ́sinsan ofligọ etọn tọn mẹ.—Johanu 14:6; 1 Johanu 2:1, 2.

3. To whenuena mí to odẹ̀ hò mí dona dọhó hlan Jiwheyẹwhe sọn ahun mítọn mẹ wá. Mí ma dona hodẹ̀ mítọn sọn tamẹ kavi hia ẹ sọn owe odẹ̀ tọn de mẹ gba. (Matiu 6:7, 8) Mí sọgan hodẹ̀ to ninọmẹ he yin sisi tọn depope mẹ, to whedepopenu, podọ to nọtẹn depope mẹ. Jiwheyẹwhe sọgan sè yèdọ odẹ̀ he mí hò abọẹ whui to ahun mítọn mẹ. (1 Samuẹli 1:12, 13) E yọ́n nado din nọtẹn he tin to abọẹ whui de bo to olá na mẹdevo lẹ nado hodẹ̀ mẹdetiti tọn mítọn lẹ.—Malku 1:35.

4. Hosọ alọpa tẹlẹ wẹ hiẹ sọgan hodẹ̀ dogbọn dali etọn? Onú depope he sọgan yinuwa gando haṣinṣan towe hẹ ẹ go. (Filippinu lẹ 4:6, 7) Odẹ̀ apajlẹ tọn lọ dohia dọ mí dona hodẹ̀ dogbọn yinkọ po lẹndai Jehovah tọn po dali. Mí sọ sọgan biọ awuwle nuhudo agbasa tọn mítọn lẹ, na ylando mítọn lẹ nido yin jijona, podọ na alọgọ nado nọavunte sọta whlepọn. (Matiu 6:9-13) Odẹ̀ mítọn lẹ ma dona yin ṣejannabi tọn. Mí dona hodẹ̀ na nuhe tin to kọndopọmẹ hẹ ojlo Jiwheyẹwhe tọn kẹdẹ.—1 Johanu 5:14.

5. Hiẹ sọgan hodẹ̀ to whedepopenu he ahun towe whàn we nado dopẹna kavi pagigona Jiwheyẹwhe. (1 Otannugbo lẹ 29:10-13) Hiẹ dona hodẹ̀ whenuena hiẹ tindo nuhahun lẹ bọ yise towe sọ yin whiwhlepọn. (Psalm 55:22; 120:1) Onú he sọgbe wẹ e yin nado hodẹ̀ whẹpo hiẹ nido dùnú. (Matiu 14:19) Jehovah basi oylọ na mí nado “nọ yí whepoponu do hodẹ̀.”—Efesunu lẹ 6:18.

6. Mí tindo nuhudo taun nado hodẹ̀ eyin mí ko waylando sinsinyẹn de. To ojlẹ mọnkọtọn lẹ mẹ mí dona vẹvẹ na lẹblanu po jona Jehovah tọn po. Eyin mí yigbe ylando mítọn lẹ tọn na ẹn bo wà nuhe go mí pe lẹpo ma nado vọ́ yé basi, Jiwheyẹwhe ko ‘wleawu nado jonamẹ.’—Psalm 86:5; Howhinwhẹn lẹ 28:13.

7. Jehovah nọ dotoai hlan odẹ̀ gbẹtọ dodonọ lẹ tọn kẹdẹ. Na odẹ̀ towe nido yin sise gbọn Jiwheyẹwhe dali, hiẹ dona to vivẹnudo nado nọgbẹ̀ sọgbe hẹ osẹ́n etọn lẹ. (Howhinwhẹn lẹ 15:29; 28:9) Hiẹ dona whiwhẹ dewe to whenuena hiẹ to odẹ̀ho. (Luku 18:9-14) Hiẹ dona wazọ́n do nuhe hiẹ hodẹ̀ na lẹ ji. Hiẹ na gbọnmọ dali dohia dọ hiẹ tindo yise podọ dọ hiẹ tindo nujikudo nuhe hiẹ dọ tọn. Kiki to whenẹnu kẹdẹ wẹ Jehovah na sè odẹ̀ towe lẹ.—Heblu lẹ 11:6.