Nupinplọn 8

Gbẹzan Whẹndo Tọn He Nọ Hẹn Homẹ Jiwheyẹwhe Tọn Hùn

Etẹwẹ yin otẹn asu tọn to whẹndo mẹ? (1)

Nawẹ asu de dona yinuwa hẹ asi etọn gbọn? (2)

Azọngban tẹlẹ wẹ otọ́ de tindo? (3)

Etẹwẹ yin azọngban asi tọn to whẹndo mẹ? (4)

Etẹwẹ Jiwheyẹwhe biọ to mẹjitọ lẹ po ovi lẹ po si? (5)

Etẹwẹ yin pọndohlan Biblu tọn gando kinklan po gbẹdai po go? (6, 7)

1. Biblu dọ dọ asu wẹ tatọ whẹndo etọn tọn. (1 Kọlintinu lẹ 11:3) Asu de dona tindo asi dopo kẹdẹ. Yé dona wlealọ dile e jẹ do sọgbe hẹ osẹ́n.—1 Timoti 3:2; Titu 3:1.

2. Asu de dona yiwanna asi etọn kẹdẹ dile e yiwanna ede do. E dona yinuwa hẹ ẹ dile Jesu nọ yinuwa hẹ hodotọ etọn lẹ do. (Efesunu lẹ 5:25, 28, 29) E ma dona hò asi etọn kavi yinuwa hẹ ẹ agọ̀ to aliho depope mẹ gba. Kakatimọ, e dona do yẹyi po sisi po hia ẹ.—Kọlọsinu lẹ 3:19; 1 Pita 3:7.

3. Otọ́ de dona wazọ́n sinsinyẹn nado penukundo whẹndo etọn go. E dona wleawuna núdùdù, avọ̀, po ohọ̀ po na asi etọn po ovi etọn lẹ po. Otọ́ de sọ dona wleawuna nuhudo gbigbọmẹ whẹndo etọn tọn lẹ ga. (1 Timoti 5:8) E nọ yin nukọntọ to alọgọna whẹndo etọn nado plọnnu dogbọn Jiwheyẹwhe po lẹndai Etọn lẹ po dali.—Deutelonomi 6:4-9; Efesunu lẹ 6:4.

4. Asi de dona yin alọgọtọ dagbe de na asu etọn. (Gẹnẹsisi 2:18) E dona gọalọna asu etọn to pinplọn po azọ́npinplọn ovi yetọn lẹ po mẹ. (Howhinwhẹn lẹ 1:8) Jehovah biọ to asi de si nado penukundo whẹndo etọn go po owanyi po. (Howhinwhẹn lẹ 31:10, 15, 26, 27; Titu 2:4, 5) E dona tindo sisi he siso na asu etọn.—Efesunu lẹ 5:22, 23, 33.

5. Jiwheyẹwhe biọ to ovi lẹ si nado setonuna mẹjitọ yetọn lẹ. (Efesunu lẹ 6:1-3) E nọ donukun sọn mẹjitọ lẹ si nado nọ plọnnu bosọ nọ kọhóna ovi yetọn lẹ. Mẹjitọ lẹ dona nọ yí whenu zan po ovi yetọn lẹ po bo plọn Biblu po yé po, bo nọ penukundo nuhudo gbigbọmẹ po numọtolanmẹ tọn yetọn lẹ po go. (Deutelonomi 11:18, 19; Howhinwhẹn lẹ 22:6, 15) Mẹjitọ lẹ ma dona do mẹplọnlọ ovi yetọn lẹ go to fifiẹ po kanyinylan po liho gba.—Kọlọsinu lẹ 3:21.

6. To whenuena alọwlemẹ lẹ tindo nuhahun nado nọpọ, yé dona tẹnpọn nado yí ayinamẹ Biblu tọn do yizan mẹ. Biblu dotuhomẹna mí nado do owanyi hia bosọ nọ jonamẹ. (Kọlọsinu lẹ 3:12-14) Oho Jiwheyẹwhe Tọn ma na tuli kinklan tọn taidi aliho lọ nado didẹ nuhahun flinflin lẹ gba. Ṣigba asi de sọgan dè nado jo asu etọn do eyin (1) e gbẹ́ po tasinsinyẹn po nado penukundo whẹndo etọn go, (2) e nọ wà danu sọmọ bọ agbasalilo po ogbẹ̀ etọn po tin to owù mẹ, kavi (3) nukundiọsọmẹ zẹjlẹgo etọn ma hẹn yọnbasi na ẹn nado basi-sinsẹ̀n na Jehovah.—1 Kọlintinu lẹ 7:12, 13.

7. Alọwlemẹ lẹ dona yin nugbonọ na ode awetọ yetọn lẹ. Ayọdide yin ylando de do Jiwheyẹwhe podọ do alọwlemẹ mẹtọn go. (Heblu lẹ 13:4) Kọndopọ zanhẹmẹ to gbonu alọwle tọn wẹ yin dodonu Owe-wiwe tọn dopo kẹdẹ lọ na gbẹdai he namẹ dotẹnmẹ nado vọ́ alọwle. (Matiu 19:6-9; Lomunu lẹ 7:2, 3) Jehovah gbẹwanna dọ mẹde ni basi gbẹdai matin dodonu Owe wiwe tọn depope bo wlealọ hẹ mẹdevo.—Malaki 2:14-16.

[Yẹdide lẹ to weda 16, 17]

Otọ́ owanyinọ de nọ wleawuna whẹndo etọn to agbasa po gbigbọ po liho

[Yẹdide to weda 17]

Jiwheyẹwhe donukun dọ mẹjitọ lẹ ni plọnnu ovi yetọn lẹ bo nọ kọhóna yé