Nupinplọn 12

Sisi Didohia Na Ogbẹ̀ po Ohùn Po

Nukun tẹwẹ mí dona yí do pọ́n ogbẹ̀? (1) hòdide ka lo? (1)

Nawẹ Klistiani lẹ nọ dohia dọ yé yin ahunmẹduna gbọn gingán dali gbọn? (2)

Be e ylan nado hù kanlin lẹ wẹ ya? (3)

Etẹwẹ yin walọ delẹ he ma do sisi hia na ogbẹ̀? (4)

Etẹwẹ yin osẹ́n Jiwheyẹwhe tọn gando ohùn go? (5)

Be ehe bẹ ohùndido hẹn ga wẹ ya? (6)

1. Jehovah wẹ yin Asisa ogbẹ̀ tọn. Nugbẹ̀te lẹpo duahọ ogbẹ̀ yetọn tọn do Jiwheyẹwhe. (Psalm 36:9) Ogbẹ̀ yin onú wiwe na Jiwheyẹwhe. Etlẹ yin ogbẹ̀ ovi he ma ko yin jiji de tọn to onọ̀ etọn homẹ yin nuhọakuẹ na Jehovah. Nado yọnẹn bo hù ovi yẹyẹ he to whinwhẹ́n mọnkọtọn de ma sọgbe to nukun Jiwheyẹwhe tọn mẹ.—Eksọdusi 21:22, 23; Psalm 127:3.

2. Gingán nọ duahunmẹ na Klistiani nugbo lẹ. Yé nọ hẹn ẹn diun dọ mọto yetọn po owhé yetọn po ma gọna owù. (Deutelonomi 22:8) Devizọnwatọ Jiwheyẹwhe tọn lẹ ma nọ ze ogbẹ̀ yetọn do owù mẹ to aliho he ma yin dandan mẹ na gbẹdudu kavi awuvivi poun wutu gba. Enẹwutu yé ma nọ tindo mahẹ to aihundida lanmẹyiya tọn he gọna danuwiwa he mẹ yé nọ yọnẹn ganan bo nọ gbleawuna mẹdevo lẹ te gba. Yé nọ dapana ayidedai he nọ na tuli danuwiwa.—Psalm 11:5; Johanu 13:35.

3. Ogbẹ̀ kanlin tọn sọ yin onú wiwe na Mẹdatọ lọ ga. Klistiani de sọgan hù kanlin lẹ nado wleawuna núdùdù po avọ̀ po kavi basi-hihọ́ na ede sọta azọ̀n po owù po. (Gẹnẹsisi 3:21; 9:3; Eksọdusi 21:28) Ṣigba nuhe ma sọgbe wẹ e yin nado doyana kanlin lẹ kavi nado hù yé na aihundida lanmẹyiya tọn kavi awuvivi wutu poun.—Howhinwhẹn lẹ 12:10.

4. Azọ̀ nùnù, okún betel tọn dùdù, po amansin adínọ zinzan na gbẹdudu po ma yin na Klistiani lẹ gba. Walọ ehelẹ ylan na (1) yé nọ hẹn mí zun afanumẹ yetọn lẹ, (2) yé nọ gbleawuna agbasa mítọn, podọ (3) yé yin onú mawé. (Lomunu lẹ 6:19; 12:1; 2 Kọlintinu lẹ 7:1) E sọgan vẹawu taun nado jo walọ ehelẹ do. Ṣigba mí dona wà mọ nado hẹn homẹ Jehovah tọn hùn.

5. Ohùn sọ yin onú wiwe de to nukun Jiwheyẹwhe tọn mẹ ga. Jiwheyẹwhe dọ dọ alindọn, kavi ogbẹ̀, tin to ohùn mẹ. Enẹwutu e ma sọgbe nado dù ohùn. E ma sọ sọgbe nado dù olàn kanlin he yè ma sọnhùn etọn dai ganji tọn. Eyin kanlin de yin kọslona kavi kú do omọ̀ mẹ, e ma dona yin dùdù gba. Eyin yè sọnú in kavi desòdo e, yè dona yawu gbògbèna ẹn eyin e na yin dùdù.—Gẹnẹsisi 9:3, 4; Levitiku 17:13, 14; Owalọ lẹ 15:28, 29.

6. Be e ylan nado kẹalọyi ohùndido wẹ ya? Flindọ, Jehovah biọ dọ mí ni jagọ̀ sọn ohùn kọ̀n. Ehe zẹẹmẹdo dọ mí ma dona yí ohùn mẹdevo lẹ tọn do agbasa mítọn mẹ to aliho depope mẹ kavi ohùn mítọn titi he yin yíyí dai. (Owalọ lẹ 21:25) Enẹwutu Klistiani nugbo lẹ ma na kẹalọyi ohùndido gba. Yé na kẹalọyi nukunpedomẹgo dotowhé tọn alọpa devo lẹ, taidi amasin he mẹ ohùn ma tin te lẹ yíyí do lanmẹ. Yé jlo na nọgbẹ̀, ṣigba yé ma na tẹnpọn nado whlẹn ogbẹ̀ yetọn gbọn osẹ́n Jiwheyẹwhe tọn lẹ gbigbà dali gba.—Matiu 16:25.

[Yẹdide lẹ to weda 25]

Nado hẹn homẹ Jiwheyẹwhe tọn hùn, mí dona dapana ohùndido, walọ mawé lẹ, po owù he ma yin dandan lẹ po