Nupinplọn 15
Alọgọna Mẹdevo lẹ Nado Wà Ojlo Jiwheyẹwhe Tọn
Naegbọn hiẹ dona dọ na mẹdevo lẹ dogbọn nuhe hiẹ to pinplọn lẹ dali? (1)
Mẹnu wẹ hiẹ sọgan má wẹndagbe lọ hẹ? (2)
Nuyiwadomẹji tẹwẹ walọ towe sọgan tindo do mẹdevo lẹ ji? (2)
Whetẹnu wẹ hiẹ sọgan dọyẹwheho to pọmẹ po agun po? (3)
1. Kakajẹ din, hiẹ ko plọn onú dagbedagbe susu sọn Biblu mẹ. Oyọnẹn ehe dona plan we jẹ awuwlena gbẹtọ-yinyin Klistiani tọn towe kọ̀n. (Efesunu lẹ 4:22-24) Oyọnẹn mọnkọtọn yin dandannu na hiẹ nido sọgan mọale ogbẹ̀ mavọmavọ tọn yí. (Johanu 17:3) Ṣigba, mẹdevo lẹ sọ tindo nuhudo nado sè wẹndagbe lọ na yé lọsu nido sọgan yin whinwhlẹngan. Klistiani nugbo lẹpo dona dekunnu na mẹdevo lẹ. Gbedide Jiwheyẹwhe tọn wẹ e yin.—Lomunu lẹ 10:10; 1 Kọlintinu lẹ 9:16; 1 Timoti 4:16.
2. Hiẹ sọgan bẹjẹeji gbọn mimá onú dagbe he hiẹ to pinplọn lẹ hẹ mẹhe sẹpọ we lẹ dali. Dọ yé na whẹndo towe, họntọn lẹ, wehọmẹvi hatọ towe lẹ, po azọ́nwatọgbẹ́ lẹ po. Yin walọ dagbenọ po sọwhiwhenọ po dile hiẹ to mọwà. (2 Timoti 2:24, 25) Flin dọ gbẹtọ lẹ nọ saba pọ́n walọ mẹde tọn hugan lehe yé nọ dotoai hlan nuhe e nọ dọ do. Enẹwutu walọ dagbe mítọn sọgan dọn mẹdevo lẹ nado dotoai hlan owẹ̀n he mí to lilá na yé lọ.—Matiu 5:16; 1 Pita 3:1, 2, 16.
3. To nukọnmẹ, hiẹ sọgan tindo jẹhẹnu nado bẹ kunnudegbe jẹeji po agun Kunnudetọ Jehovah Tọn lẹ tọn he tin to fie hiẹ nọ nọ po. Ehe yin afọdide titengbe de to nukọnyiyi towe mẹ. (Matiu 24:14) Ayajẹ nankọtọn wẹ e na yin eyin hiẹ penugo nado gọalọna mẹdevo de nado lẹzun devizọnwatọ Jehovah tọn bo mọale ogbẹ̀ mavọmavọ tọn yí!—1 Tẹsalonikanu lẹ 2:19, 20.