Jiwheyẹwhe Wẹ Yin Họntọn Dagbe Hugan He Hiẹ Sọgan Tindo

Lilẹzun họntọn Jiwheyẹwhe tọn yin onú dagbe hugan lọ he sọgan jọ to gbẹzan towe mẹ. Jiwheyẹwhe na plọn we lehe hiẹ na yin ayajẹnọ bo tindo hihọ́ do; e na tún we dote sọn nuyise he jẹagọ lẹ po nuyiwa owùnọ susu lẹ po mẹ. E na dotoai hlan odẹ̀ towe lẹ. E na gọalọna we nado tindo jijọho ahun mẹ tọn po jide po. (Psalm 71:5; 73:28) Jiwheyẹwhe na nọgodona we to ojlẹ nuhahun tọn lẹ mẹ. (Psalm 18:18) Podọ Jiwheyẹwhe na na we nunina etọn heyin ogbẹ̀ madopodo.—Lomunu lẹ 6:23.

Dile hiẹ dọnsẹpọ Jiwheyẹwhe, hiẹ nasọ dọnsẹpọ họntọn Jiwheyẹwhe tọn lẹ. Yé na lẹzun họntọn towe lẹ ga. Na nugbo tọn, yé na tin taidi nọvisunnu po nọviyọnnu po na we. Homẹ yetọn na hùn nado plọn we dogbọn Jiwheyẹwhe dali bo na gọalọna we bosọ na tuli we.

Mí ma sọzẹn hẹ Jiwheyẹwhe gba. Dile hiẹ dín nado ji họntọn hẹ Jiwheyẹwhe, hiẹ dona mọnukunnujẹ nugbo titengbe de mẹ. Họntọnjiji hẹ Jiwheyẹwhe ma yin họntọnjiji to mẹhe sọzẹn lẹ ṣẹnṣẹn gba. Ewọ whẹ́n mẹho, yin nuyọnẹntọ, bosọ yin huhlọnnọ tlala hugan mí. Gandutọ jlọjẹnọ mítọn wẹ Ewọ yin. Enẹwutu eyin mí jlo na yin họntọn etọn, mí dona dotoai na ẹn bo wà nuhe e dọna mí nado wà lẹ. Ehe na yin dagbe na mí to whepoponu.—Isaia 48:18.