Lehe Yè Sọgan Mọ Sinsẹ̀n Nugbo lọ Gbọn

Eyin hiẹ jlo na yin họntọn Jiwheyẹwhe tọn, hiẹ dona nọ basi sinsẹ̀n he Jiwheyẹwhe kẹalọyi. Jesu dọ dọ “sinsẹ̀ntọ nugbo lẹ” na sẹ̀n Jiwheyẹwhe to “nugbo” mẹ. (Johanu 4:23, 24) Aliho he sọgbe dopo akàn wẹ tin nado sẹ̀n Jiwheyẹwhe. (Efesunu lẹ 4:4-6) Sinsẹ̀n nugbo lọ nọ planmẹ yì ogbẹ̀ madopodo mẹ, podọ sinsẹ̀n lalo tọn nọ planmẹ yì vasudo mẹ.—Matiu 7:13, 14.

Hiẹ sọgan yọ́n sinsẹ̀n nugbo lọ gbọn didoayi mẹhe nọ basi i lẹ go dali. To whenuena e yindọ mẹdagbe wẹ Jehovah, mẹhe yin sinsẹ̀n-basitọ nugbo etọn lẹ dona yin mẹdagbe lẹ. Kẹdẹdile atin yovozẹ̀n tọn dagbe de nọ sẹ́n yovozẹ̀n dagbe do, sinsẹ̀n nugbo lọ nọ wleawuna mẹdagbe lẹ.—Matiu 7:15-20.

Họntọn Jehovah tọn lẹ tindo sisi sisosiso na Biblu. Yé yọnẹn dọ Jiwheyẹwhe dè wẹ Biblu wá sọn. Yé nọ dike na nuhe e dọ lẹ ni deanana gbẹzan yetọn, nado didẹ nuhahun yetọn lẹ, podọ nado gọalọna yé nado plọnnu dogbọn Jiwheyẹwhe dali. (2 Timoti 3:16) Yé nọ tẹnpọn nado nọ yí nuhe yé to yẹwheho etọn dọ lẹ do yizan mẹ.

Họntọn Jehovah tọn lẹ nọ do owanyi hia ode awetọ yetọn lẹ. Jesu do owanyi hia mẹdevo lẹ gbọn nupinplọn yé gando Jiwheyẹwhe go dali, gbọn azọ̀nhẹngbọna mẹhe to azọ̀njẹ lẹ dali. Mẹhe to sinsẹ̀n nugbo lọ basi lẹ nọ do owanyi hia mẹdevo lẹ ga. Taidi Jesu, yé ma nọ yí nukunpẹvi do pọ́n wamọnọ lẹ kavi mẹhe yin akọ̀ devo lẹ gba. Jesu dọ dọ gbẹtọ lẹ na yọ́n devi etọn lẹ gbọn owanyi he yé nọ dohia ode awetọ yetọn lẹ dali.—Johanu 13:35.

Họntọn Jiwheyẹwhe tọn lẹ nọ na yẹyi oyín Jiwheyẹwhe tọn, yèdọ Jehovah. Eyin mẹde gbẹ́ nado yí oyín towe zan, be omẹ enẹ na yin họntọn alọmayiemẹ towe ya? Lala! Eyin mí tindo họntọn de, mí nọ yí oyín etọn zan podọ mí nọ dọ dagbe họntọn lọ tọn na mẹdevo lẹ. Enẹwutu mẹhe jlo nado yin họntọn Jiwheyẹwhe tọn lẹ dona yí oyín etọn zan bo dọho etọn na mẹdevo lẹ. Jehovah jlo dọ mí ni wàmọ.—Matiu 6:9; Lomunu lẹ 10:13, 14.

Taidi Jesu, họntọn Jiwheyẹwhe tọn lẹ nọ plọn gbẹtọ lẹ dogbọn Ahọluduta Jiwheyẹwhe tọn dali. Ahọluduta Jiwheyẹwhe tọn wẹ yin gandudu sọn olọn mẹ wá lọ he na hẹn aigba zun paladisi. Họntọn Jiwheyẹwhe tọn lẹ nọ lá wẹndagbe ehe na mẹdevo lẹ dogbọn Ahọluduta Jiwheyẹwhe tọn dali.—Matiu 24:14.

Kunnudetọ Jehovah Tọn lẹ tọn lẹ nọ tẹnpọn nado yin họntọn Jiwheyẹwhe tọn. Yé tindo sisi na Biblu bo tindo owanyi to yedelẹ ṣẹnṣẹn. Yé sọ nọ yí oyín Jiwheyẹwhe tọn zan bo nọ na yẹyi i bosọ nọ plọn mẹdevo lẹ dogbọn Ahọluduta Jiwheyẹwhe tọn dali. Kunnudetọ Jehovah Tọn lẹ tọn lẹ wẹ nọ basi sinsẹ̀n nugbo lọ to aigba ji to egbehe.