Etẹwẹ Yé Yise?

KUNNUDETỌ JEHOVAH tọn lẹ tindo yise to Jiwheyẹwhe Ganhunupotọ, Jehovah, Mẹdatọ olọn po aigba po tọn mẹ. Tintin-to-aimẹ onú jiawu he doglẹ heyin awuwlena to wẹkẹ he lẹdo mí pé lẹ mẹ dohia po nujikudo po dọ nuyọnẹntọ he yiaga hugan de po Mẹdatọ huhlọnnọ de po wẹ basi popolẹpo yetọn. Kẹdẹdile azọ́n sunnu po yọnnu lẹ po tọn nọ do jẹhẹnu yetọn lẹ hia do, mọkẹdẹ wẹ Jehovah Jiwheyẹwhe tọn lẹ lọsu nọ basi do. Biblu dọna mí dọ “onú mamọ etọn lẹ sọn whẹwhẹwhenu aihọn tọn to wédédé, yè to nuyọnẹn nuhe yè basi lẹ tọn do to yé yọnẹn.” Humọ, matin nùkikẹ̀, “olọn lẹ to gigo Jiwheyẹwhe tọn [lá].”—Lomunu lẹ 1:20; Psalm 19:1-4.

Gbẹtọ lẹ ma nọ mẹ̀n okò-zẹ́n lẹ kavi basi televiziọn lẹ po zomọ nudọnamẹ-sẹdo tọn lẹ po matin lẹndai de gba. Aigba lọ he gọna nudida ogbé po kanlin tọn etọn lẹ po yin onú jiawu taun humọ. Ninọmẹ agbasa gbẹtọvi tọn po nuvikun madosọha liva etọn lẹ po hugan nuhe mí sọgan mọnukunnujẹemẹ—yèdọ apọ̀n he mí nọ yí do lẹnnupọn tlẹ jiawu zẹjlẹgo! Eyin gbẹtọ lẹ tindo lẹndai na anazọ́n yetọn he mayin nujọnu sọmọ lẹ bibasi, na jide tọn Jehovah Jiwheyẹwhe tindo lẹndai de na nudida jiawu etọn lẹ ga! Howhinwhẹn lẹ 16:4 dọ dọ e wàmọ: ‘Onú lẹpo wẹ Jehovah ko dá na lẹndai etọn.’

Jehovah basi aigba lọ na lẹndai de, dile e dọ na gbẹtọ asu po asi po tintan lẹ do dọmọ: “Mì yin sinsẹ́nnọ, . . . bosọ gọ́ aigba ji, bo dugán do e ji: bo duahọlu to whèvi ohù tọn ji, podọ to ohẹ̀ aga tọn ji, po to nuhe to ogbẹ̀ lẹpo ji he nọ lìn to aigba ji.” (Gẹnẹsisi 1:28) Na yé lẹzun tolivẹtọ lẹ wutu, asu po asi po ehe gboawupo nado hẹn aigba lọ gọ́ po whẹndo dodonọ lẹ po he na yí owanyi do penukundo aigba lọ go gọna ogbé po kanlin he tin to e ji lẹ po. Ṣigba awugbopo yetọn ma hẹn lẹndai Jehovah tọn gboawupo gba. Owhe fọtọ́n lẹ to godo mẹ, e yin kinkandai dọmọ: “Jiwheyẹwhe, Didatọ aigba tọn . . . , ma dá ẹ tata poun gba.” E “wleawu etọn yèdọ nado nọ yin ninọ e ji.” E mayin nado yin vivasudo gba, ṣigba “aigba nọte kakadoi.” (Isaia 45:18; Yẹwhehodọtọ 1:4, The New English Bible) Lẹndai Jehovah tọn na aigba na yin hinhẹndi: “Linlẹn ṣie na nọte, yẹn nasọ wà ojlo ṣie lẹpo.”—Isaia 46:10.

Enẹwutu, Kunnudetọ Jehovah tọn lẹ yise dọ aigba na gbọṣi aimẹ kakadoi podọ gbẹtọ lẹpo, he tin to ogbẹ̀ po oṣiọ lẹ po, he na sọgbe hẹ lẹndai Jehovah tọn na aigba fininọ whanpẹnọ lọ, na nọgbẹ̀ to e ji kakadoi. Gbẹtọvi lẹpo wẹ dugu mapé tọn sọn Adam po Evi po dè, bo gbọnmọ dali yin ylandonọ lẹ. (Lomunu lẹ 5:12) Biblu dọna mí dọmọ: “Okú wẹ alè ylando tọn.” “Mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude.” “Alindọn he waylando, e na kú.” (Lomunu lẹ 6:23; Yẹwhehodọtọ 9:5; Ezekiẹli 18:4, 20) To whelọnu lo nawẹ yé sọgan nọgbẹ̀ whladopo dogọ nado duvivi dona aigba ji tọn lẹ gbọn? Gbọn avọ́sinsan ofligọ Klisti Jesu tọn gblamẹ kẹdẹ wẹ, na e dọmọ: “Yẹn wẹ fọnsọnku po ogbẹ̀ po; mẹhe yí mi sè, eyin e kú, e nasọ [gọwá] ogbẹ̀.” “Mẹhe tin to yọdo [oflin tọn] mẹ lẹpo na sè ogbè etọn, bo na tọ́njẹgbonu.”—Johanu 5:28, 29; 11:25; Matiu 20:28.

Nawẹ ehe na jọ gbọn? Zẹẹmẹ etọn yin bibasi to “wẹndagbe ahọludu tọn,” he Jesu bẹ lilá etọn jẹeji to whenuena e tin to aigba ji lọ mẹ. (Matiu 4:17-23) Ṣigba to egbehe Kunnudetọ Jehovah tọn lẹ to wẹndagbe lọ lá to aliho vonọtaun de mẹ.

[Apotin to weda 13]

NUHE KUNNUDETỌ JEHOVAH TỌN LẸ YISE

Nuyise Whẹwhinwhẹ́n Owe-Wiwe Tọn Lẹ

[Yẹdide to weda 12]

AIGBA . . . heyin didá gbọn Jehovah dali . . . bo yin nukunpedego gbọn gbẹtọ dali . . . na yin ninọ e ji kakadoi