Hogbe lẹ Yin Didọtọ́n Hezeheze

NADO sọgan dọhodopọ po kọdetọn dagbe po, hodidọ towe dona họnwun. Nuhe hiẹ jlo na dọ sọgan yin ojlofọndotenamẹnu, bo tlẹ yin nujọnu, ṣigba suhugan etọn na yin hinhẹnbú eyin hogbe towe lẹ ma yin nukunnumọjẹemẹ po awubibọ po.

Hogbe he gbẹtọ lẹ ma mọnukunnujẹemẹ ma nọ whàn yé na taun tọn gba. Eyin mẹde tlẹ tindo ogbè he zìn bo sọgan yin sisè po awubibọ po, eyin hodidọ etọn lẹ ma họnwun bo tátá, yé ma na whàn mẹdevo lẹ nado yinuwa gba. E na taidi dọ jonọgbè dó wẹ e te nkọ, ehe sisètọ lẹ ma sọgan mọnukunnujẹemẹ. (Jẹl. 5:15) Biblu flin mí dọmọ: “Eyin opẹ̀n do ogbè he ma tátá, mẹnu wẹ na hẹn ede dote hlan awhàn? Mọkẹdẹ wẹ mìwlẹ, adavo mì yí odẹ́ do dọho he bọawu yinyọnẹn, nawẹ yè na yọ́n nuhe yè dọ do? Na mìwlẹ na to hodọ do dovlo mẹ.”—1 Kọl. 14:8, 9.

Etẹwẹ Ma Nọ Hẹn Hodidọ Tátá? E sọgan yin awugbopo nado kẹ̀ onù ganji. Aglàn-ká he ko sinyẹn lẹ po nùflo he ma nọ saba whàn lẹ po sọgan yidogọna hodidọ do kọ̀mẹ.

Hodidọ po awuyiya zẹjlẹgo po sọgan sọ dekọtọn do hodidọ he sinyẹnawu nado mọnukunnujẹemẹ mẹ. Enẹ na taidi hoyidokanji de hihò po awuyiya po hugan lehe zomọ núhiho tọn lọ yin awuwlena nado wazọ́n do. Hogbe lọ lẹ tin to finẹ, ṣigba suhugan alemọyi lọ tọn wẹ yin hinhẹnbú.

To whẹho delẹ mẹ, oblọ mape tọn de to awutugonu hodidọ tọn lẹ mẹ wẹ nọ hẹn hodidọ he ma tátá wá. Ṣigba mẹhe tlẹ dona doakọnna nuhahun mọnkọtọn lẹ sọgan wà nususu nado hẹn ninọmẹ yetọn pọnte gbọn ayinamẹ he tin to oplọn ehe mẹ lẹ yiyizan dali.

Nalete, hodidọ he ma tátá nọ saba wá sọn hogbe lẹ zizemì mẹ—yèdọ nado to hodọ plùlù to aliho de mẹ he nọ hẹn yé sinyẹnawu nado yin nukunnumọjẹemẹ. Nuhahun lọ sọgan bẹ linlọ́n dasá hókún lẹ kavi wekun tangan lẹ hẹn. To whenuena mẹde gbọn numakiya dali ylọ hogbe lẹ dopọ, hosetọ etọn lẹ sọgan mọnukunnujẹ linlẹn po hodidọ agbòte delẹ po mẹ, ṣigba yé dona pà devo lẹ dọ. Awugbopo nado dọho to aliho he họnwun mẹ sọgan hẹn kọdetọn dagbe mẹpinplọn mẹde tọn tindo oblọ.

Lehe Yè Nọ Dọho Họnwun Do. Họ̀nhungàn dopo nado ylọ hogbe lẹ tọ́n hezeheze wẹ nado mọnukunnujẹ dodonu hogbe lọ lẹ tọn mẹ to ogbè mìtọn mẹ. To ogbè susu mẹ, hogbe lẹ yin awuwlena po hókún lẹ po. Hókún lẹ nọ yin awuwlena po wekun dopo kavi humọ lẹ po he nọ yin yiylọ taidi onú dopo. To ogbè mọnkọtọn lẹ mẹ, hókún dopodopo na nọ dọnú to paa mẹ dile hiẹ to hodọ, dile etlẹ yindọ popolẹpo ma nọ wàmọ po nùzindonuji dopolọ po. Eyin hiẹ jlo na hẹn hodidọ towe họnwun dogọ, whesọ bo wà nuhe go hiẹ pé lẹpo nado ylọ hókún dopodopo. To tintan whenu ehe sọgan taidi dọ a to nùzindo hogbe lọ ji hugan, ṣigba dile hiẹ to pinplọn ẹn, vudevude hiẹ na jẹ hodọ ji linsinlinsin. Na dẹ́didi wutu, matin ayihaawe hiẹ na nọ ylọ hogbe delẹ dopọ, ṣigba ehe dona yin didapana eyin owù lọ tin to finẹ dọ e na hẹn linlẹn hogbe lọ lẹ tọn dózin.

Hogbe avase tọn lẹ: Nado wleawuna hodidọ he họnwun, hiẹ sọgan plọn nado nọ dọho bo hiawe po nùzindonuji dogọ po. Ṣigba ma dike enẹ ni lẹzun aliho hodidọ whepoponu tọn towe blo. Yin e ma yinmọ, e na dọnú to aliho mọmọ tọn mẹ bo ma na yin to jọwamọ-liho.

Eyin hodidọ towe nọ taidi nuhe dọnú do kọ̀mẹ, plọn nado nọ jlọ otà towe daga bo ma dike agbakọ towe ni sẹpọ akọ́nnu towe blo. To Biblu hihia whenu, hẹn owe lọ daga ganji na nukun towe dide sọn mẹplidopọ lẹ ji yì Biblu towe mẹ nido biọ odò pinpọ́n vude poun. Ehe na na dotẹnmẹ hogbe towe lẹ nado tọ́n po awubibọ po.

Pinplọn nado de ayimajai pò sọgan sọ hẹn hodidọ towe pọnte. E yin yinyọnẹn ganji dọ ayimajai to okàn nukunmẹ tọn lẹ mẹ kavi to dehe nọ deanana lehe hiẹ nọ gbọ̀ do mẹ sọgan tindo nugandomẹgo ylankan do hodidọ ji. Ayimajai mọnkọtọn nọ hẹnalọdotena kanṣiṣa pẹkipẹki he dona tin to ayiha towe, awutugonu hodidọ tọn lẹ, po lehe hiẹ nọ gbọ̀ do po ṣẹnṣẹn—yèdọ nuyiwa de he dona to yìyì linsinlinsin to jọwamọ-liho.

Aglàn-ká lẹ dona yin hinhẹn voawu nado sọgan yawu yigbe hlan anademẹ sọn apọ̀nmẹ. Nùflo lẹ dona yin hinhẹn voawu ga. Yé dona tin to gbesisọmẹ nado kẹ̀ bo yawu bọ̀ nado sọgan nọ ylọ kọnugbè voovo he to wiwá sọn onù po vẹgo po mẹ lẹ. Eyin aglàn po nùflo lẹ po sinyẹn, onù ma na kẹ̀ ganji, bọ hogbe lẹ na yin hinhẹn gánnu-gánnu nado tọ́n gbọn adú lẹ gblamẹ. Ehe na dekọtọn do hodidọ do kọ̀mẹ, he ma didẹ́, bo ma tátá mẹ. Ṣigba, hinhẹn aglàn po nùflo lẹ po voawu ma zẹẹmẹdo vọ́donanu to lehe mí nọ ylọ hogbe lẹ do mẹ gba. Ehe dona yin hinhẹn do jlẹkaji po nuyiwa lọ po nado wleawuna kọnugbè lẹ nado hẹn hodidọ họnwun.

To dogbapọnna ninọmẹ towe mẹ, hiẹ sọgan mọ ẹn yin alọgọnamẹnu nado nọ hiawe daga. Doayi lehe hiẹ to awutugonu jiawu hodidọ tọn lẹ yizan do go pẹkipẹki. Be hiẹ nọ kẹ̀ onù towe ganji na hogbe lẹ nido sọgan tọ́n po awubibọ po ya? Hiẹ dona flin dọ odẹ́ mayin awutugonu hodidọ tọn dopo akàn lọ gba, dile etlẹ yindọ dopo to dehe nọ wazọ́n hugan lẹ mẹ wẹ e yin. Okọ̀, aglàn, nùflo lẹ, okàn nukunmẹ tọn lẹ, po vẹgo-kàn lẹ po, popolẹpo wẹ nọ yí adà de basi. Dile hiẹ to hodọ, be e taidi dọ hiẹ to mọwà matin wunmẹdidiọ nukunmẹ tọn wẹ ya? Eyin mọwẹ, to whelọnu lo e yọnbasi taun dọ hodidọ towe ma na tátá.

Eyin hiẹ tindo zomọ hoyidokanji tọn, yí ogbè towe do kanji dile hiẹ to hodọ to jọwamọ-liho, dile hiẹ na dọho na mẹde do to whenuena hiẹ tin to lizọnyizọn kunnudegbe tọn mẹ. Yí ogbè hodọdopọ tọn do kanji na nukunwhiwhe susu. Todidoai na hoyidokanji enẹ sọgan gọalọna we nado dlẹnalọdo nuhahun depope he hiẹ sọgan tindo to hogbe delẹ didọtọ́n hezeheze mẹ. Doayi fie hiẹ ze hogbe lẹ mì, dọhodo kọ̀mẹ, kavi lọ́n dasá yé te go, bo tẹnpọn nado yọ́n nuhewutu wẹ. To paa mẹ madogán lọ sọgan mọ pọngbọ yí gbọn azọ́nwiwa do nuagokun heyin hodọdeji to aga lẹ ji dali.

Be hiẹ tindo nuhahun hodidọ tọn wẹ ya? Plọn nado kẹ̀ onù towe vude dogọ hugan lehe hiẹ nọ wà do dai, bo tẹnpọn nado dọho tọ́n po sọwhiwhe dogọ po. Hẹn afuje towe lẹ gọ́ to whenuena hiẹ gbọ̀, bo dọho dẹẹdẹ. Ehe wiwà ko hẹn suhugan mẹhe tindo nuhahun hodidọ tọn lẹ penugo nado dọho to aliho he họnwun jẹ obá de mẹ. Dile etlẹ yindọ nuhahun towe sọgan nọ ma yin dididẹ mlẹnmlẹn, ma hẹn todido bu blo. Flin dọ Jehovah de Mose, yèdọ dawe de he sọgan ko tindo nuhahun hodidọ tọn, nado dó owẹ̀n titengbe lẹ na omẹ Islaeli tọn lẹ po Falo Egipti tọn po. (Eks. 4:10-12) Eyin hiẹ jlo, e na yí hiẹ lọsu zan ga, podọ e na dona lizọnyizọn towe po kọdetọn dagbe po.