Agbasa Yí Do Basi Dohia po Awusọhia Nukunta Tọn Po

MẸHE wá sọn aṣa delẹ mẹ nọ yí agbasa do basi dohia po awuvivo po hugan mẹdevo lẹ. Ṣogan, e dibla yindọ mẹde matin he nọ dọho matin diọdo awusọhia nukunta tọn po wunmẹ agbasa yí do basi dohia tọn delẹ po. Ehe yin nugbo to hodọdopọ mẹdetiti tọn mẹ podọ to hodidọ gbangba tọn mẹ.

Agbasa yí do basi dohia yin jọwamọnu na Jesu po devi fliflimẹ tọn etọn lẹ po. To nujijọ de whenu, mẹde wá dọna Jesu dọ onọ̀ etọn po nọvisunnu etọn lẹ po jlo nado dọho hẹ ẹ. Jesu gblọn dọmọ: “Mẹnu wẹ onọ̀ ṣie? Mẹnu sọ wẹ mẹmẹsunnu ṣie lẹ?” Enẹgodo Biblu yidogọ dọmọ: “E sọ dlẹn alọ etọn jẹgbonu hlan nuplọntọ etọn lẹ, bo dọmọ, Mì pọ́n onọ̀ ṣie po mẹmẹsunnu ṣie lẹ po!” (Mat. 12:48, 49, wekun flinflin lẹ yin mítọn.) To alọdlẹndonu devo lẹ mẹ, Biblu dohia to Owalọ lẹ 12:17 po 13:16 po mẹ dọ apọsteli Pita po Paulu po yí agbasa do basi dohia to jọwamọ-liho.

E mayin ogbè kẹdẹ wẹ nọ dọ linlẹn po numọtolanmẹ lẹ po gba ṣigba yé sọ nọ yin didohia gbọn agbasa yí do basi dohia po awusọhia nukunta tọn lẹ po dali ga. Awugbopo nado yí ehelẹ zan ganji sọgan do ojlo matindo hia to adà hodọtọ lọ tọn mẹ. Ṣigba eyin aliho hodọdopọ tọn ehelẹ yin yiyizan dopọ ganji, yé nọ hẹn kọdetọn dagbe hodidọ tọn pọnte tlala. To whenuena hiẹ tlẹ dọho to alokan ji, eyin a yí agbasa po awusọhia nukunta tọn po zan dile e jẹ do, ogbè towe na do nujọnu-yinyin owẹ̀n towe tọn hia po awubibọ po gọna nuhe yin numọtolanmẹ towe gando nuhe dọ hiẹ te go. Gbọnmọ dali, vlavo hiẹ to hodọ tlọlọ kavi to wehia, vlavo mẹplidopọ towe lẹ to pinpọ́n we kavi to vọkan Biblu yetọn tọn lẹ mẹ pọ́n, agbasa yí do basi awusọhia po awusọhia nukunta tọn lẹ po yin nuhọakuẹ tlala.

Agbasa yí do basi dohia po awusọhia nukunta tọn towe lẹ po ma dona yin pinplọn sọn owe mẹ gba. Hiẹ ma na tindo nuhudo nado plọn lehe yè nọ konu kavi gblehomẹ do gbede gba. Mọdopolọ, agbasa yí do basi dohia dona do numọtolanmẹ towe lẹ hia. Lehe agbasa yí do basi dohia towe yin to jọwamọ-liho do, mọwẹ e na pọnte do niyẹn.

Aliho voovo awe mẹ wẹ agbasa yí do basi dohia yin mimá do: yèdọ zẹẹmẹ bibasi tọn po nùzindonuji tọn po. Agbasa yí do basi dohia zẹẹmẹ bibasi tọn nọ do nuyiwa kavi kiklo po nọtẹn nude tọn po hia. To wehọmẹ, to whenuena hiẹ to azọ́nwa do agbasa yí do basi dohia ji, ma lẹzun pekọnọ po dopo kavi awe po poun blo. Tẹnpọn nado yí agbasa do basi dohia to jọwamọ-liho to hodidọ towe pete mẹ. Eyin hiẹ tindo awusinyẹnnamẹnu nado wà ehe, hiẹ sọgan mọ ẹn yin alọgọnamẹnu nado dín hogbe he do anademẹ, tedidi, kiklo-yinyin, nọtẹn, kavi ninọmẹ he gando yedelẹ go hia. Nalete, to whẹho susu mẹ, nuhe hiẹ dona wà lẹpo wẹ nado ze dewe jo pete na hodidọ towe, ma hanú dogbọn nuyiwadomẹji he hiẹ to bibasi dali blo, ṣigba nọ dọ bo nọ wà onú lẹ dile hiẹ na basi do to gbẹninọ egbesọegbesọ tọn mẹ. Eyin mẹde voawu, agbasa yí do basi dohia nọ wá to jọwamọ-liho.

Agbasa yí do basi dohia nùzindonuji tọn nọ do numọtolanmẹ po nujikudo po hia. Yé nọ zinnudo linlẹn lẹ ji, nọ hẹn yé tin to ogbẹ̀, bo nọ hẹn yé tindo huhlọn. Agbasa yí do basi dohia nùzindonuji tọn yin nujọnu. Ṣigba payi dewe go! Agbasa yí do basi dohia nùzindonuji tọn sọgan lẹzun aṣa na we po awubibọ po. Eyin hiẹ yí agbasa do basi dohia to aliho dopolọ mẹ pludopludo, a sọgan jẹ ayidonugo dọ̀n wá dewe ji kakati nado hẹn hodidọ towe pọnte. Eyin nugopọntọ wehọmẹ tọn towe dohia we dọ hiẹ tindo nuhahun ehe, tẹnpọn nado yí agbasa yí do basi dohia zẹẹmẹ bibasi tọn kẹdẹ zan na ojlẹ de. To whenu vude godo, jẹ agbasa yí do basi dohia nùzindonuji tọn yizan ji whladopo dogọ.

Nado yọ́n obá he mẹ hiẹ dona yí agbasa yí do basi dohia nùzindonuji tọn zan jẹ po wunmẹ agbasa yí do basi dohia he sọgbe tọn po, lẹnnupọndo numọtolanmẹ mẹhe hiẹ to hodọna lẹ tọn ji. Alọ dindlẹn do mẹplidopọ lẹ sọgan hẹn ayimajai wá na yé. To aṣa delẹ mẹ eyin sunnu yí agbasa do basi dohia to aliho tangan delẹ mẹ, taidi alọ etọn zize do onù nado do nupaṣamẹ hia, ehe na yin pinpọnhlan taidi nuyiwa yọnnu tọn. To awà aihọn lọ tọn delẹ ji, e nọ yin pinpọnhlan taidi nuhe ma jẹ na yọnnu lẹ nado yí alọ do basi dohia po awuvivo po. Enẹwutu to awà enẹlẹ ji, mẹmẹyọnnu lẹ na titengbe tọn dona yí awusọhia nukunta tọn lẹ zan ganji. Podọ to adà aihọn lọ tọn lẹpo mẹ wẹ agbasa yí do basi dohia glanglan to pipli pẹvi de nukun sọgan yin pinpọnhlan te taidi nuhe whẹ́n kikò.

Dile hiẹ jẹ numimọ tindo ji bo voawu dogọ to hodidọ mẹ, agbasa yí do basi dohia nùzindonuji tọn depope he hiẹ yizan na do numọtolanmẹ sisosiso towe hia to jọwamọ-liho, bo do nujikudo po ahundoponọ-yinyin towe po hia. Yé na hẹn hodidọ towe tindo zẹẹmẹ.

Awusọhia Nukunta Towe Tọn. Nukunta towe nọ saba do nuhe yin numọtolanmẹ towe nugbo hia hugan agbasagonu devo depope. Nukun towe lẹ, ninọmẹ onù towe tọn, ninọmẹ ota towe tọn, popolẹpo wẹ nọ yí adà de wà. Matin hodidọ, nukunta towe sọgan do ojlo matindo, wangbẹna, nupaṣamẹ, awujimẹ, kavi homẹhunhun hia. To whenuena awusọhia nukunta tọn mọnkọtọn lẹ zọnpọ hẹ nuhe yin didọ, yé nọ yí nugandomẹgo nukun po numọtolanmẹ tọn po dogọ. Mẹdatọ lọ ko wleawuna agbasa-kàn he ló susu do nukunmẹ towe—yèdọ hugan 30 to lẹndopọ mẹ. Dibla yì odaa ehelẹ tọn wẹ nọ yin yiyizan to whenuena hiẹ konu yẹsẹ.

Vlavo hiẹ tin to oplò ji kavi to mahẹ tindo to lizọnyizọn kunnudegbe tọn mẹ, owẹ̀n awuvivi tọn, he sọgan hẹn ahun jaya wẹ a to vivẹnudo nado má hẹ gbẹtọ lẹ. Nukiko yẹsẹ de nọ do enẹ hia. To alọ devo mẹ, eyin hiẹ ylan nukunmẹ, ehe sọgan fọ́n ayihaawe dote gando ahundoponọ-yinyin towe go.

Humọ, nukiko yẹsẹ nọ dohia mẹdevo lẹ dọ hiẹ yiwanna yé. Na taun tọn, enẹ yin onú titengbe to ojlẹ ehelẹ mẹ to whenuena gbẹtọ lẹ nọ saba dibu na jonọ lẹ. Nukiko yẹsẹ towe sọgan gọalọ nado hẹn gbẹtọ lẹ voawu nado dotoaina nuhe dọ hiẹ te.