Weta Ao
Ahọluduta de “He Ma Na Yin Viva Gbede”
1. Etẹwẹ nujijọ aihọn tọn lẹ ko dohia to whenuho gbẹtọvi tọn mẹ?
NUJIJỌ aihọn tọn lẹ nọ dohia egbesọegbesọ dọ gbẹtọvi ma ko tindo ayajẹ sọn whenue gbọ́n yé gbẹ́ nupojipetọ-yinyin Jehovah tọn dai bo to tintẹnpọn nado deanana yéde. Wunmẹ gandudu gbẹtọ tọn depope ma ko hẹn alemọyi mlẹnmlẹn wá na gbẹtọvi lẹ gba. Dile etlẹ yindọ gbẹtọ ko yinukọn tlala to lẹnunnuyọnẹn mẹ, yé ma ko penugo nado duto awutu ji kavi de okú sẹ na mẹdopo tata gba. Gandudu gbẹtọ tọn ma ko penugo bo de awhàn, danuwiwa, sẹ́nhẹngba, mẹhodu, kavi ohẹ́n sẹ gba. Gandudu he nọ gbidikọnamẹ lẹ gbẹsọ nọ to yasana gbẹtọ lẹ to otò susu mẹ. (Yẹwhehodọtọ 8:9) Azọ́n nuyọnẹn wintinwintin tọn, nukunkẹn, po agblinọ-yinyin po wẹ yin nuhe nọ hẹn aigba, osin, po jẹhọn po flu. Akuẹ-ṣiṣizan ogán lẹ tọn ko hẹn ninọmẹ sinyẹnawu na mẹsusu nado penukundo nuhudo yede tọn lẹ go. Owhe fọtọ́n susu he gbẹtọ dugán na ko hẹn nugbo ehe họnwun: “Aliho gbẹtọ tọn ma tin to ewọ lọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.”—Jẹlemia 10:23.
2. Etẹwẹ yin pọngbọ dopokẹdẹ lọ na nuhahun gbẹtọvi lẹ tọn?
2 Etẹwẹ yin pọngbọ lọ? Ahọluduta Jiwheyẹwhe tọn wẹ, he Jesu plọn hodotọ etọn lẹ nado hodẹ̀na dọmọ: “Ahọluduta towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:9, 10) Ahọluduta olọn mẹ tọn Jiwheyẹwhe tọn yin hodọ gandego to 2 Pita 3:13 mẹ taidi “olọn yọyọ lẹ,” he na dugán do “aigba yọyọ” ji, yèdọ pipli gbẹtọ dodonọ lẹ tọn. Ahọluduta olọn mẹ tọn Jiwheyẹwhe tọn yin nujọnu sọmọ bọ Jesu yí ì do basi hosọ tangan yẹwhehodidọ etọn tọn. (Matiu 4:17) Jesu do otẹn he mẹ e dona te to gbẹzan mítọn mẹ hia, to whenuena e dọmọ: “Ṣigba mì dín ahọludu Jiwheyẹwhe tọn, po dodo etọn po whẹ́”—Matiu 6:33.
3. Naegbọn nupinplọn gando Ahọluduta Jiwheyẹwhe tọn go dona yin niyaniya hugan gbede pọ́n tọn todin?
3 Nupinplọn dogbọn Ahọluduta Jiwheyẹwhe tọn dali yin niyaniya hugan gbede pọ́n tọn todin, na to madẹnmẹ Ahọluduta enẹ na yinuwa nado diọ gandudu aigba ji tọn lẹ kakadoi. Daniẹli 2:44 dọdai dọmọ: “To azán ahọlu nẹlẹ [gandudu egbehe] tọn lẹ mẹ wẹ Jiwheyẹwhe olọn tọn na ze ahọludu de daga [to olọn mẹ], he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba [gbẹtọ ma nasọ dugán do aigba ji gbede ba]: ṣigba e na gbà ahọludu do flinflin bo sú ahọludu [egbehe tọn] lẹpo do, ewọ bo nasọ nọte kakadoi.” Enẹwutu Ahọluduta lọ na hẹn azán godo tọn ehelẹ wá opodo gbọn titonu ylankan ehe pete vivasudo dali. Mẹdepope ma nasọ dọ̀nnu hẹ Ahọluduta olọn tọn do aigba ji ba. Lehe mí dona dopẹ́ do sọ dọ pọngbọ ehe ko tin to yakẹ!
4. Gando Ahọluduta lọ go, etẹwẹ jọ to olọn mẹ to 1914, podọ naegbọn enẹ do yin nujọnu de na mí?
4 To 1914, Klisti Jesu yin zizedo ofìn ji taidi Ahọlu bo yin gbedena nado “to ahọludu to ṣẹnṣẹn kẹntọ [etọn] lẹ tọn.” (Psalm 110:1, 2) To owhe enẹ dopolọ mẹ, ‘azán godo tọn’ titonu ylankan ehe tọn bẹjẹeji. (2 Timoti 3:1-5, 13) To ojlẹ dopolọ mẹ, nujijọ he Daniẹli mọ to numimọ dọdai tọn etọn mẹ lẹ jọ to olọn mẹ na taun tọn. “Hohotọ Azán lẹ tọn,” Jehovah Jiwheyẹwhe, ko ze “ahọluigba . . . po gigo po, po ahọludu de po” na Ovi gbẹtọ tọn Jesu Klisti, “na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn.” To whenuena Daniẹli to linlin numimọ lọ tọn dọ, e wlan dọmọ: “Ahọluigba madopodo de wẹ ahọluigba etọn, he ma na juwayi, podọ ahọludu etọn enẹ he ma na yin viva.” (Daniẹli 7:13, 14) Ahọluduta olọn mẹ tọn ehe to anademẹ Klisti Jesu tọn glọ wẹ Jiwheyẹwhe na yizan nado hùn dotẹnmẹ dote na mẹhe yiwanna dodowiwa lẹ nado duvivi dagbenu susugege he e dopagbe etọn lẹ tọn to whenuena e ze mẹjitọ mítọn tintan lẹ do Paladisi mẹ.
5. Zẹẹmẹ Ahọluduta lọ tọn tẹlẹ mẹ wẹ mí dona tindo ojlo te, podọ etẹwutu?
5 Be e jlo we nado yin mẹjidugando nugbonọ Ahọluduta lọ tọn ya? Eyin mọwẹ, be hiẹ na tindo ojlo vẹkuvẹku to lehe gandudu olọn mẹ tọn ehe yin titobasina bo nọ yinuwa do mẹ. A na jlo nado yọ́n nuhe e to wiwà todin, nuhe e na wadotana to sọgodo, po nuhe hiẹ lọsu dona wà lẹ po. Dile hiẹ to dogbapọnna Ahọluduta lọ po sọwhiwhe po, pinpẹn-nutọn-yinyọnẹn towe na ẹn dona siso. Eyin hiẹ nọgodona gandudu etọn, a na yin hinhẹn pegan nado dọ na mẹdevo lẹ gando dagbe jiawu susu he Ahọluduta Jiwheyẹwhe tọn na wà na gbẹtọvi tonusetọ lẹ go.—Psalm 48:12, 13.
Mẹhe na Dugán to Ahọluduta Jiwheyẹwhe Tọn mẹ Lẹ
6. (a) Nawẹ Owe-wiwe do nupojipetọ-yinyin mẹhe tọn Ahọluduta Mẹssia tọn to zizedaga hia gbọn? (b) Nawẹ nuhe mí plọn gando Ahọluduta lọ go lẹ dona yinuwado mí ji gbọn?
6 Dopo to onú tintan he dogbapọnnanu mọnkọtọn dohia lẹ mẹ wẹ yindọ Ahọluduta Mẹssia tọn yin dohia nupojipetọ-yinyin Jehovah lọsu tọn. Jehovah wẹ yí ‘gandudu, yẹyi po ahọluduta po’ na Ovi etọn. To whenuena Ovi Jiwheyẹwhe tọn yin huhlọnna nado jẹ gandu ji taidi Ahọlu, ogbè de sọn olọn mẹ lá dọmọ: “Ahọludu aihọn tọn lẹzun ahọludu OKLUNỌ mítọn [Jehovah Jiwheyẹwhe] tọn, po Klisti etọn po tọn; ewọ [Jehovah] nasọ to ahọludu kakadoidoi.” (Osọhia 11:15) Enẹwutu nudepope he go mí doayi dogbọn Ahọluduta ehe dali po nuhe e na wà dotana lẹ po sọgan dọ̀n mí sẹpọ Jehovah. Nuhe mí plọn lẹ sọgan zín ojlo lọ do ahun mítọn mẹ nado yin mẹmẹglọ hlan nupojipetọ-yinyin etọn kakadoi.
7. Naegbọn e dona hẹn homẹhun mí taun dọ Jesu Klisti wẹ Gandutọ Afọzedaitọ Jehovah tọn?
7 Podọ ga, lẹnnupọndeji dọ Jehovah ko ze Jesu Klisti do ofìn ji taidi Gandutọ Afọzedaitọ etọn. Taidi Azọ́nwatọgan he Jiwheyẹwhe yizan nado dá aigba po gbẹtọvi lẹ po, Jesu yọ́n nuhudo mítọn lẹ hugan depope to mí mẹ. Humọ, sọn bẹjẹeji whenuho gbẹtọ tọn, e do ‘homẹhunhun hia to gbẹtọvi lẹ mẹ.’ (Howhinwhẹn lẹ 8:30, 31; Kọlọsinu lẹ 1:15-17) Owanyi he e tindo na gbẹtọvi lẹ klo sọmọ bo whàn ẹn nado wá aigba ji bo yí ogbẹ̀ etọn jo taidi ofligọ de do ota mítọn mẹ. (Johanu 3:16) Enẹwutu e hùn aliho dote na mí nado tọ́nsọn ylando po okú po mẹ bosọ hùn dotẹnmẹ ogbẹ̀ mavọmavọ tọn dote.—Matiu 20:28.
8. (a) Ma taidi gandudu gbẹtọvi lẹ tọn, naegbọn gandudu Jiwheyẹwhe tọn na nọte kakadoi? (b) Haṣinṣan tẹwẹ “afanumẹ nugbonọ, nuyọnẹntọ” lọ tindo hẹ gandudu olọn mẹ tọn?
8 Ahọluduta Jiwheyẹwhe tọn wẹ yin gandudu lọ he na nọte kakadoi. Mí dejido dagbenu etọn lẹ go na Jehovah ma nọ kú wutu. (Psalm 146:3-5, 10) Ma taidi ahọlu gbẹtọ tọn lẹ, Jesu Klisti, mẹhe Jiwheyẹwhe ze ahọludu na lọ lọsu yin jọmaku ga. (Lomunu lẹ 6:9; 1 Timoti 6:15, 16) Sọha mẹhe na dugán hẹ Klisti to ofìn olọn mẹ tọn ji lẹ tọn na yin gbẹtọ 144 000, heyin devizọnwatọ nugbonọ Jiwheyẹwhe tọn lẹ he tọ́nsọn “akọta lẹpo mẹ, sọn ogbè lẹpo mẹ, sọn gbẹtọ lẹpo mẹ, podọ sọn aigba lẹpo ji.” Omẹ ehelẹ lọsu mọ ogbẹ̀ jọmaku yí ga. (Osọhia 5:9, 10; 14:1-4; 1 Kọlintinu lẹ 15:42-44, 53) Suhugan yetọn ko tin to olọn mẹ todin, podọ pipòtọ yetọn he to aigba ji lẹ wẹ wleawuna “afanumẹ nugbonọ, nuyọnẹntọ” egbezangbe tọn, he to nukunpedo dagbenu Ahọluduta lọ tọn lẹ go to aigba ji.—Matiu 24:45-47.
9, 10. (a) Kinklan po nuyiwadomẹji he gblezọn tẹlẹ po wẹ Ahọluduta lọ na desẹ? (b) Nuyiwa tẹlẹ wẹ mí dona dapana, eyin mí ma jlo nado yin kẹntọ na Ahọluduta Jiwheyẹwhe tọn?
9 To madẹnmẹ, to ojlẹ sisọ etọn mẹ, Jehovah na dó huhlọn nuvasudo tọn etọn lẹ hlan sọn olọn mẹ nado klọ aigba wé. Yé na và gbẹtọvi he desọn ojlo mẹ bo gbẹ́ nupojipetọ-yinyin etọn dai lẹ po mẹhe nọ ṣàn tito owanyinọ he e zedai gbọn Jesu Klisti dali kò lẹ po sudo mlẹnmlẹn. (2 Tẹsalonikanu lẹ 1:6-9) Enẹ na yin azán Jehovah tọn, azán he mí to tenọpọn na whenu-dindẹn na whẹsuna Nupojipetọ-yinyin Wẹkẹ mẹ tọn etọn. “Doayi e go, azán [Jehovah] tọn ja, okà gbọn homẹgble po homẹfiọ zozo po dali, . . . e nasọ gbà mẹylankan lẹ sudo sọn e mẹ.” (Isaia 13:9) “Azán homẹgble tọn de wẹ azán nẹ, azán tukla po nukunbia po tọn de, azán hẹngu po ovọ́jẹ po tọn de, azán zinvlu po avivi po tọn de, azán aslọ lẹ po zinvlu titli po tọn de.”—Zẹfania 1:15.
10 Sinsẹ̀n lalo po gandudu gbẹtọ tọn lẹpo po gọna awhànpa yetọn lẹ, he ko yin anadena gbọn gandutọ mayinukundomọ ylankan aihọn ehe tọn dali, na yin vivasudo mlẹnmlẹn. Mẹhe kọnawudopọ hẹ aihọn ehe gbọn afọdidona ṣejannabi, nugbomadọ, po gbẹzan mawé tọn lẹ po dali na yin vivasudo. Satani po aovi etọn lẹ po na yin aliglọnna ma nado yinuwado gbẹtọvi lẹ ji, yé na yin zizedo odò mapote mẹ na owhe fọtọ́n. Enẹgodo Ahọluduta Jiwheyẹwhe tọn kẹdẹ wẹ na deanana whẹho aigba ji tọn lẹpo. Lehe ehe na yin pọngbọ na mẹhe yiwanna dodowiwa lẹpo do sọ!—Osọhia 18:21, 24; 19:11-16, 19-21; 20:1, 2.
Lehe Ahọluduta lọ Na Jẹ Yanwle Etọn lẹ Kọ̀n Do
11. (a) Nawẹ Ahọluduta Mẹssia tọn na hẹn lẹndai Jehovah tọn na aigba di gbọn? (b) Etẹwẹ Ahọluduta lọ na zẹẹmẹdo na mẹhe na tin to aigba ji to whenẹnu lẹ?
11 Ahọluduta Mẹssia tọn na hẹn lẹndai dowhenu Jiwheyẹwhe tọn na aigba di to gigọ́mẹ. (Gẹnẹsisi 1:28; 2:8, 9, 15) Kakajẹ egbehe, gbẹtọvi lẹ ko gboawupo nado nọgodona lẹndai enẹ. Etomọṣo, ‘mẹhe na wá nọ aigba lọ ji lẹ’ na yin mẹmẹglọ hlan Ovi gbẹtọ tọn, Jesu Klisti. Mẹhe lùn vasudo whẹdida hinhẹnṣẹ Jehovah tọn do titonu hoho ehe ji tọ́n lẹpo na wazọ́n to kọndopọmẹ to Klisti Ahọlu lọ glọ, bo na nọ yí homẹhunhun do wà nudepope he e degbè etọn, na aigba nido lẹzun paladisi lẹdo aihọn pé. (Heblu lẹ 2:5-9) Gbẹtọvi lẹpo na duvivi azọ́n alọ yetọn mẹ tọn bo na mọaleyi to gigọ́mẹ sọn jinukun susugege aigba tọn mẹ.—Psalm 72:1, 7, 8, 16-19; Isaia 65:21, 22.
12. Nawẹ mẹjidugando Ahọluduta lọ tọn lẹ na yin hinhẹnzun pipé to ayiha po agbasa po mẹ gbọn?
12 To whenuena Adam po Evi po yin didá, mẹpipe wẹ yé yin, podọ lẹndai Jiwheyẹwhe tọn wẹ yindọ okún yetọn ni gọ́ aigba ji, bọ yemẹpo na to vivi pipé ayiha po agbasa mẹ po tọn dù. Lẹndai enẹ na mọ hẹndi to aliho jiawu de mẹ to Ahọluduta lọ glọ. Ehe biọ dọ nugandomẹgo ylando tọn lẹpo dona yin didesẹ, podọ na lẹndai enẹ tọn wutu, Klisti na wadevizọn e mayin taidi Ahọlu kẹdẹ ṣigba taidi Yẹwhenọ Daho ga. E na yí sọwhiwhe do gọalọna mẹjidugando etọn tonusetọ lẹ nado mọaleyi sọn nuhọakuẹ avọ́sinsan ovẹsè ylando tọn he e yí ogbẹ̀ gbẹtọvi tọn etọn do basi mẹ.
13. Alemọyi agbasa tọn tẹlẹ wẹ na tin to Ahọluduta lọ glọ?
13 To Ahọluduta lọ glọ, gbẹtọvi lẹ na duvivi nususu tọn to agbasa-liho. “Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin, odẹ́ unbọpẹn tọn nasọ jihàn.” (Isaia 35:5, 6) Agbasa he yọnhowhe kavi awutu ko hẹn wló lẹ na dídí taidi ovivu de tọn, podọ agbasalilo na diọtẹnna madogán sinsinyẹn lẹ. “Agbasalan etọn na yin jẹemẹ hú ovi de tọn; e lẹgọ do azán ovú etọn tọn lẹ kọ̀n.” (Job 33:25) Azán lọ na wá to whenuena mẹdepope ma na dọmọ, “Yẹn to azọ̀njẹ.” Etẹwutu? Na gbẹtọvi he dibusi Jiwheyẹwhe lẹ na yin tuntundote sọn agbàn-pinpẹn ylando po nugandomẹgo awubla tọn etọn lẹ po mẹ. (Isaia 33:24; Luku 13:11-13) Mọwẹ, Jiwheyẹwhe na “súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.”—Osọhia 21:4.
14. Etẹwẹ jijẹ pipenọ-yinyin gbẹtọ tọn kọ̀n bẹhẹn?
14 Ṣigba, pipenọ-yinyin bẹ nususu hẹn hugan agbasalilo po ayiha dagbe de po tintindo. E bẹ jẹhẹnu Jehovah tọn lẹ didohia to gbesisọmẹ hẹn, na mí yin didá ‘to ojlẹmọ Jiwheyẹwhe tọn mẹ, yèdọ to apajlẹ etọn mẹ’ wutu. (Gẹnẹsisi 1:26) Nado wleawuna enẹ, mí dona plọn nususu. ‘Dodowiwa wẹ na nọ’ aihọn yọyọ lọ mẹ. Enẹwutu, dile Isaia dọ dọdai etọn do, “omẹ he to aihọn mẹ lẹ na plọn dodo.” (2 Pita 3:13; Isaia 26:9) Jẹhẹnu ehe nọ dekọtọn do jijọho mẹ—to gbẹtọ akọ̀ lẹpo tọn mẹ, to họntọn vivẹ́ lẹ ṣẹnṣẹn, to whẹndo mẹ podọ, hú popolẹpo hẹ Jiwheyẹwhe lọsu titi. (Psalm 85:10-13; Isaia 32:17) Mẹhe plọn dodowiwa lẹ na jẹ ojlo Jiwheyẹwhe tọn plọn ji vudevude. Dile owanyi Jehovah tọn doadọ̀do to ahun yetọn lẹ mẹ, yé na hodo aliho etọn lẹ to gbẹzan yetọn lẹpo mẹ. Yé na penugo nado dọ dile Jesu wà do, ‘Yẹn nọ wà nuhe yin homẹhunnu na Otọ́ ṣie to whepoponu.’ (Johanu 8:29) Lehe gbẹ̀ninọ na vivi do sọ to whenuena gbẹtọvi lẹpo na penugo nado dọ hogbe enẹ lọ!
Nuhe Ko Yin Wiwadotana Lẹ
15. Yí kanbiọ he tin to hukan ehe mẹ lẹ zan, bo zinnudo wadotana he Ahọluduta lọ ko basi lẹ ji bosọ do nuhe mí dona to wiwà todin hia.
15 Onú dagbe he Ahọluduta Jiwheyẹwhe tọn po mẹjidugando etọn lẹ po wadotana ko sọawuhia hezeheze. Kanbiọ po wefọ he bọdego lẹ po na flinnu we gando delẹ to wadotana ehelẹ mẹ go, gọna nuhe mẹjidugando Ahọluduta lọ tọn lẹpo sọgan wà, bo dona to wiwà todin.
Mẹnu wẹ Ahọluduta lọ yinuwa sọta to tintan whenu, podọ etẹwẹ yin kọdetọn lọ? (Osọhia 12:7-10, 12)
Bibẹpli pipòtọ pipli tẹ tọn wẹ yin nina ayidonugo sọn whenue Klisti ko yin zizedo ofìn ji gbọ́n? (Osọhia 14:1-3)
Azọ́n tẹwẹ Jesu dọ dọdai etọn dọ emi na wà to whenuena nukunbibia daho na ko gbajẹgbonu godo, dile eyin kinkàndai to Matiu 25:31-33 mẹ do?
Azọ́n tintan tẹwẹ to yinyin wiwà to egbehe? Mẹnu lẹ wẹ to mahẹ tindo to e mẹ? (Psalm 110:3; Matiu 24:14; Osọhia 14:6, 7)
Naegbọn tonudọtọ lẹ po sinsẹ̀nnọ agọjẹdomẹtọ lẹ po ma do penugo nado doalọtena azọ́n yẹwhehodidọ tọn? (Zekalia 4:6; Owalọ lẹ 5:38, 39)
Diọdo tẹlẹ wẹ ko sọawuhia to gbẹzan mẹhe yin mẹmẹglọ hlan Ahọluduta lọ lẹ tọn mẹ? (Isaia 2:4; 1 Kọlintinu lẹ 6:9-11)
Ahọluduta Owhe Fọtọ́n Tọn
16. (a) Owhe nẹmu wẹ Klisti na dugán na? (b) Nujiawu tẹlẹ wẹ na yin wiwà to whenẹnu podọ to enẹ godo?
16 To whenuena Satani po aovi etọn lẹ po na ko yin zizedo odò mapote mẹ godo, Jesu Klisti po gbẹtọ 144000 heyin whédutọgbẹ́ etọn lẹ po na dugán taidi ahọlu po yẹwhenọ lẹ po na owhe fọtọ́n. (Osọhia 20:6) To ojlẹ enẹ mẹ, gbẹtọvi lẹ na yin hinhẹnwa pipenọ-yinyin kọ̀n, bọ ylando po okú he mí dugu etọn sọn Adam dè po na yin didesẹ mlẹnmlẹn. Na Jesu ko gbọn kọdetọn dagbe dali hẹn azọ́ndenamẹ etọn taidi Mẹssia Ahọlu po Yẹwhenọ po tọn di wutu, e na ‘gọ̀ ahọluduta lọ jo’ na Otọ́ etọn, to vivọnu Gandudu Owhe Fọtọ́n enẹ tọn ‘bọ Jiwheyẹwhe nado yin popo to popo ji.’ (1 Kọlintinu lẹ 15:24-28) To ojlẹ enẹ mẹ, Satani na yin tuntundote na ojlẹ kleun de nado tẹ́n gbẹtọvi heyin fifligọ lẹ pọ́n nado yọnẹn eyin yé tin to adà nupojipetọ wẹkẹ tọn Jehovah tọn mẹ nugbonugbo. To whenuena mẹtẹnpọn godo tọn enẹ na wá vivọnu, Jehovah na và Satani po atẹṣitọ he hodo e lẹ po sudo. (Osọhia 20:7-10) Mẹhe kẹalọyi nupojipetọ-yinyin Jehovah tọn lẹ—jlọjẹ etọn nado dugán—na ko do nugbonọ-yinyin mawhango yetọn hia. To enẹgodo, yé na yin hinhẹnwa haṣinṣan dagbe mẹ hẹ Jehovah, na yé ko yin alọkẹyi gbọn ewọ dali taidi visunnu po viyọnnu etọn lẹ po nado nọgbẹ̀ kakadoi.—Lomunu lẹ 8:21.
17. (a) Etẹwẹ na jọ do Ahọluduta lọ go to vivọnu owhe fọtọ́n tọn? (b) Linlẹn tẹmẹ wẹ e yin nugbo dọ Ahọluduta lọ “ma na yin viva gbede” te?
17 Enẹwutu, azọngban Jesu po gbẹtọ 144000 lẹ tọn po na diọ gando aigba go. Etẹwẹ na yin azọ́n sọgodo tọn yetọn? Biblu ma dọ gba. Ṣigba eyin mí tẹdo nupojipetọ-yinyin Jehovah tọn go po nugbonọ-yinyin po, mí na pò to ogbẹ̀ to vivọnu Gandudu Owhe Fọtọ́n lọ tọn nado mọ nuhe Jehovah ko lẹndai na yé podọ na wẹkẹ jiawu etọn. Etomọṣo, gandudu owhe fọtọ́n Klisti tọn na yin “madopodo” podọ Ahọluduta etọn “ma na yin viva.” (Daniẹli 7:14) To linlẹn tẹmẹ? Onú dopo wẹ yindọ, aṣẹpipa lọ ma na yin zizena mẹdevo lẹ he na tindo yanwle he gbọnvo gba, yèdọ Jehovah lọsu wẹ na yin Gandutọ. Podọ ga, Ahọluduta lọ “ma na yin viva gbede” na nuhe e wadotana lẹ na nọ aimẹ kakadoi. (Daniẹli 2:44) Podọ Mẹssia he to Ahọlu po Yẹwhenọ po yin lọ gọna gbẹdohẹmẹtọ etọn heyin ahọlu bosọ yin yẹwhenọ lẹ ga na yin gbégbòna kakadoi na sinsẹ̀nzọn nugbonọ yetọn hlan Jehovah wutu.
Hodọdopọ Dogbapọn Tọn
• Naegbọn Ahọluduta Jiwheyẹwhe tọn wẹ yin pọngbọ dopokẹdẹ lọ na nuhahun gbẹtọvi tọn lẹ? Whetẹnu wẹ Ahọlu Ahọluduta Jiwheyẹwhe tọn bẹ gandudu jẹeji?
• Etẹwẹ fọnjlodotena we taun gando Ahọluduta Jiwheyẹwhe tọn po nuhe e na wadotana po go?
• Wadotana Ahọluduta lọ tọn tẹlẹ wẹ mí sọgan mọ todin, podọ etẹwẹ yin adà mítọn to ehe mẹ?
[Yẹdide to weda 93]
To Ahọluduta Jiwheyẹwhe tọn glọ, gbẹtọvi lẹpo wẹ na plọn dodowiwa