Weta Wiẹnẹ
Nawẹ Jehovah Nọ Deanana Titobasinanu Etọn Gbọn?
1. Nudọnamẹ nankọ gando titobasinanu Jehovah tọn go wẹ Biblu dehia, podọ etẹwutu e do yin nujọnu na mí?
BE JIWHEYẸWHE tindo titobasinanu de ya? Owe-wiwe gbọdo lọ dọna mí dọ e tindo. E basi zẹẹmẹ adà jiawu titobasinanu olọn mẹ tọn enẹ tọn na mí to Ohó etọn mẹ. (Ezekiẹli 1:1, 4-14; Daniẹli 7:9, 10, 13, 14) Dile etlẹ yindọ mí ma sọgan mọ adà mayinukundomọ ehe, e gando sinsẹ̀n basitọ nugbo lẹ go taun to egbehe. (2 Ahọlu lẹ 6:15-17) Titobasinanu Jehovah tọn sọ tindo adà yinukundomọ de to aigba ji. Biblu gọalọna mí nado yọ́n nuhe e yin podọ lehe Jehovah nọ deanana ẹn do.
Adà Yinukundomọ lọ Yinyọnẹn
2. Agun yọyọ tẹwẹ Jiwheyẹwhe wleawuna?
2 Owhe 1 545 wẹ akọta Islaeli tọn do yin agun Jiwheyẹwhe tọn. (Owalọ lẹ 7:38) Ṣigba Islaelivi lẹ gboawupo nado setonuna osẹ́n Jiwheyẹwhe tọn lẹ bosọ gbẹ́ Ovi etọn dai. Taidi kọdetọn de, Jehovah jo agun enẹ do bosọ gbẹ́ ẹ dai mlẹnmlẹn. Jesu dọna Ju lẹ dọmọ: “Pọ́n, yè jo owhé mìtọn dai hlan mì ovọ́.” (Matiu 23:38) Enẹgodo Jiwheyẹwhe hẹn agun yọyọ de wá tintin mẹ, bo basi alẹnu yọyọ de hẹ ẹ. Agun ehe bẹ gbẹtọ 144 000 he Jiwheyẹwhe ṣinyan nado kọnawudopọ hẹ Ovi etọn to olọn mẹ lẹ hẹn.—Osọhia 14:1-4.
3. Etẹwẹ jọ to Pẹntikọsti owhe 33 W.M. he dekunnu hezeheze dọ Jiwheyẹwhe ko to agun yọyọ de yizan todin?
3 Hagbẹ tintan agun yọyọ enẹ tọn lẹ yin yiyiamisisadode gbọn gbigbọ wiwe Jehovah tọn dali to Pẹntikọsti owhe 33 W.M. Gando nujijọ ayidego tọn enẹ go, mí hia dọmọ: “Whenuena azán [hunwhẹ] Pẹntikọsti tọn wá dinvie, yé omẹ pó tin to fidopo. Ogbè de sọn olọn mẹ wá ajiji di ogbè jẹhọn sinsinyẹn tọn, bosọ gọ́ ohọ̀ he mẹ yé sinai te. Owhẹ̀ odẹ́ tọn taidi miyọ́n tọn tọ́n do yé ji, bosọ jẹ do dopodopo yetọn ji. Yé omẹ pó sọ gọ́ na [gbigbọ wiwe].” (Owalọ lẹ 2:1-4) Gbigbọ Jiwheyẹwhe tọn gbọnmọ dali dohia hezeheze dọ pipli ehe wẹ Jiwheyẹwhe na yizan todin nado hẹn lẹndai etọn di to anademẹ Jesu Klisti tọn glọ to olọn mẹ.
4. Mẹnu lẹ to egbehe wẹ wleawuna titobasinanu yinukundomọ Jehovah tọn?
4 To egbehe, pipòtọ gbẹtọ 144 000 lọ lẹ tọn kẹdẹ wẹ pò to aigba ji. Ṣigba to hẹndi dọdai Biblu tọn mẹ, ‘gbẹtọ susugege lọ’ heyin ‘lẹngbọ devo lẹ,’ he sọha yetọn ko yì livi susu todin, ko yin hinhẹnwa nado dogbẹ́ hẹ pipòtọ mẹyiamisisadode lẹ tọn. Jesu, Lẹngbọhọtọ Dagbe lọ, ko kọ̀n lẹngbọ devo ehelẹ dopọ hẹ pipòtọ lọ na yé nido wleawuna apó dopo to anademẹ etọn glọ taidi Lẹngbọhọtọ yetọn dopo lọ. (Osọhia 7:9; Johanu 10:11, 16) Hagbẹ awe ehelẹ wẹ wleawuna agun he tin to kọndopọmẹ dopo, yèdọ titobasinanu yinukundomọ Jehovah tọn.
Yin Anadena to Yẹwhehọluduta-Liho
5. Mẹnu wẹ nọ deanana titobasinanu Jiwheyẹwhe tọn, podọ gbọnna?
5 Hogbe Owe-wiwe tọn lọ “agun Jiwheyẹwhe ogbẹ̀nọ lọ tọn” do mẹhe to anadena ẹn lọ hia. Titobasinanu lọ yin yẹwhehọluduta tọn, kavi gandudu gbọn Jiwheyẹwhe dali tọn. Jehovah nọ deanana omẹ etọn lẹ gbọn Jesu gblamẹ, mẹhe Ewọ de nado yin Tatọ́ mayinukundomọ agun lọ tọn, podọ gbọn Ohó gbọdo Edetiti tọn, Biblu dali.—1 Timoti 3:14, 15; Efesunu lẹ 1:22, 23; 2 Timoti 3:16, 17.
6. (a) Nawẹ anadidena agun lọ sọn olọn mẹ wá yin didohia to owhe kanweko tintan whenu gbọn? (b) Etẹwẹ dohia dọ Jesu gbẹ́ pò to Ota agun lọ tọn yin todin?
6 Anadenanu mọnkọtọn sọawuhia hezeheze to Pẹntikọsti. (Owalọ lẹ 2:14-18, 32, 33) E sọawuhia to whenuena angẹli Jehovah tọn deanana wẹndagbe lọ nado gbayipe biọ Aflika, to whenuena Jesu degbè to didiọzun Klistiani Saulu Talsu tọn whenu, podọ to whenuena Pita bẹ azọ́n yẹwhehodidọ tọn jẹeji to Kosi lẹ ṣẹnṣẹn. (Owalọ lẹ 8:26, 27; 9:3-7; 10:9-16, 19-22) Ṣigba, to enẹgodo, ogbè sọn olọn mẹ wá devo depope mayin sise ba, angẹli depope mayin mimọ ba, nunina gbigbọ tọn to azọ́njiawu-liho devo depope mayin ninamẹ ba. Ṣogan, Jesu ko dopagbe dọmọ: “Pọ́n, yẹn tin to mì dè to whepoponu, kakajẹ opodo aihọn tọn.” (Matiu 28:20; 1 Kọlintinu lẹ 13:8) To egbehe, Kunnudetọ Jehovah tọn lẹ kẹalọyi anademẹ Jesu tọn. Eyin enẹ matin, owẹ̀n Ahọluduta lọ tọn lilá to homẹkẹn sinsinyẹn glọ ma sọgan yọnbasi gba.
7. (a) Mẹnu lẹ wẹ yin ‘afanumẹ nugbonọ nuyọnẹntọ lọ,’ podọ etẹwutu? (b) Azọ́n tẹwẹ yin didena “afanumẹ” lọ?
7 Ojlẹ vude jẹnukọnna okú etọn, Jesu dọhona devi etọn lẹ gando ‘afanumẹ nugbonọ nuyọnẹntọ lọ’ go he ewọ, taidi Nukọntọ na ze azọngban vonọtaun de doalọmẹ na. “Afanumẹ” enẹ na tin to aimẹ to whenuena OKLUNỌ yì olọn mẹ bo na gbẹsọ to azọ́nwa sinsinyẹn to tintin tofi mayinukundomọ Klisti tọn to huhlọn Ahọluduta tọn mẹ whenu. Alọdlẹndonu mọnkọtọn ma sọgan yin hlan omẹ dopo akan de gba, ṣigba e sọgbehẹ agun yiamisisadode Klisti tọn. Na Jesu ko yí ohùn etọn titi do họ̀ ẹ wutu, e ylọ ẹ dọ “afanumẹ” etọn. E degbena pipli lọ nado hẹn gbẹtọ lẹ zun devi bosọ nọ na núdùdù yé, yèdọ nado nọ na ‘núdùdù gbigbọmẹ tọn yé to osaa sisọ mẹ.’—Matiu 24:45-47; 28:19; Isaia 43:10; Luku 12:42; 1 Pita 4:10.
8. (a) Azọngban tẹlẹ wẹ pipli afanumẹ lọ tọn tindo todin? (b) Naegbọn alọkikẹyi anademẹ he nuyizan Jiwheyẹwhe tọn lọ wleawuna do yin nujọnu?
8 To whenuena e yindọ pipli afanumẹ lọ tọn to azọ́n he Nukọntọ lọ ze na ẹn wà po nugbonọ-yinyin po to kọlilẹwa mayinukundomọ etọn whenu to 1914, e họnwun dọ azọngban daho de yin zizedo alọmẹ na ẹn to 1919. Bẹsọn owhe enẹ mẹ gbọ́n wẹ kunnudide lẹdo aihọn pé gando Ahọluduta lọ go to nukọnzindo, podọ gbẹtọ susugege de he to sinsẹ̀n basi hlan Jehovah to yinyin bibẹpli nado sọgan lùn nukunbibia daho lọ tọ́n. (Matiu 24:14, 21, 22; Osọhia 7:9, 10) Omẹ ehelẹ lọsu tindo nuhudo núdùdù gbigbọmẹ tọn, podọ pipli afanumẹ lọ tọn nọ penukundo ehe go. Nado hẹn homẹhun Jehovah, mí dona kẹalọyi anademẹ he e wleawuna gbọn nuyizan ehe dali bo yinuwa to kọndopọmẹ hẹ ẹ.
9, 10. (a) To owhe kanweko tintan whenu, tito tẹwẹ tin to aimẹ nado didẹ̀ whẹho he gando sinsẹ̀n-nuplọnmẹ po anadidena yẹwheho wẹndagbe tọn didọ po go? (b) Tito tẹwẹ tin to aimẹ todin nado deanana nuwiwa omẹ Jehovah tọn lẹ tọn?
9 To whedelẹnu, kanbiọ lẹ nọ fọndote gando sinsẹ̀n-nuplọnmẹ po aliho he mẹ nulẹ dona yin wiwà te po go. Afọdide tẹwẹ dona yin zize? Owalọ lẹ weta 15 dọna mí lehe whẹho he gando Kosi he diọ sinsẹ̀n yetọn lẹ go yin dididẹ gbọn. Whẹho lọ yin zizedo alọmẹ na apọsteli po mẹho lẹ po to Jelusalẹm, he to nuyiwa taidi hagbẹ anademẹtọ de. Sunnu ehelẹ mayin gbẹtọ pipé gba, ṣigba Jiwheyẹwhe yí yé zan. Yé gbadopọnna wefọ he dọhodo whẹho lọ ji lẹ po kunnudenu lọ po dọ Kosi lẹ lọsu ko mọ gbigbọ Jiwheyẹwhe tọn yí. Enẹgodo yé basi nudide. Jiwheyẹwhe dona aliho nuwiwa tọn enẹ. (Owalọ lẹ 15:1-29; 16:4, 5) Hagbẹ anademẹtọ enẹ wẹ nọ de mẹhe na yin didohlan nado hẹn yẹwhehodidọ Ahọluduta lọ tọn gblodeji lẹ.
10 To egbehe, Hagbẹ Anademẹtọ titobasinanu yinukundomọ Jehovah tọn bẹ mẹmẹsunnu he yè yí gbigbọ do de lẹ hẹn he tọ́nsọn aigba voovo lẹ ji bo tin to tatọ́-tẹnnọ aihọn tọn heyin Kunnudetọ Jehovah tọn lẹ tọn. To tatọ́-yinyin Jesu Klisti tọn glọ, Hagbẹ Anademẹtọ lọ nọ hẹn sinsẹ̀n-bibasi wiwe-ṣeke gbayipe lẹdo aihọn pé, bo to anadena azọ́n yẹwhehodidọ Kunnudetọ Jehovah tọn lẹ tọn to agun fọtọ́n susu lẹ mẹ. Mẹhe tin to Hagbẹ Anademẹtọ lọ mẹ lẹ tindo pọndohlan dopolọ he apọsteli Paulu tindo, mẹhe wlanwe hlan Klistiani hatọ lẹ dọmọ: “E ma yindọ míwlẹ tindo huhlọn to yise mìtọn ji wutu gba, ṣigba alọgọnamẹtọ ayajẹ mìtọn tọn wẹ míwlẹ yin: na gbọn yise dali wẹ mì to ote.”—2 Kọlintinu lẹ 1:24.
11. (a) Nawẹ mẹho po devizọnwatọ lizọnyizọnwiwa tọn lẹ po nọ yin dide gbọn? (b) Etẹwutu mí dona kọngbedopọ pẹkipẹki hẹ mẹdide lẹ?
11 Kunnudetọ Jehovah tọn lẹ lẹdo aihọn pé nọ donukun Hagbẹ Anademẹtọ lọ nado de mẹmẹsunnu he pegan lẹ, to enẹgodo, mẹmẹsunnu heyin dide ehelẹ nọ yin azọ́ndena nado de mẹho agun tọn lẹ po devizọnwatọ lizọnyizọnwiwa tọn lẹ po nado penukundo agun lẹ go. Nubiọtomẹsi he kọ̀n mẹhe yin dide lọ lẹ dona jẹ yin didọ to Biblu mẹ podọ mí dona yọnẹn dọ sunnu ehelẹ mayin mẹpipe podọ yé sọgan ṣinuwa. Mẹho he nọ basi mẹpipa po dehe nọ basi mẹdide po lẹ tindo azọngban sinsinyẹn de to Jiwheyẹwhe nukọn. (1 Timoti 3:1-10, 12, 13; Titu 1:5-9) Enẹwutu, yé nọ biọ alọgọ gbigbọ Jiwheyẹwhe tọn gbọn dẹ̀hiho dali bosọ nọ dín anademẹ sọn Ohó gbọdo etọn mẹ. (Owalọ lẹ 6:2-4, 6; 14:23) Mì gbọ mí ni do pinpẹn nutọn hia ‘nunina to sunnu lẹ mẹ’ ehelẹ, he nọ gọalọna mímẹpo nado “nọ dopo to yise mẹ.”—Efesunu lẹ 4:8, 11-16.
12. Nawẹ Jehovah nọ yí yọnnu lẹ zan to tito yẹwhehọluduta tọn mẹ gbọn?
12 Owe-wiwe dohia dọ sunnu lẹ wẹ dona penukundo azọngban nukunpedonugo tọn lẹ go. Ehe ma de yọnnu lẹ pò gba, na delẹ to yé mẹ yin whédutọgbẹ́ Ahọluduta olọn mẹ tọn, podọ yé nọ basi susu to azọ́n yẹwhehodidọ tọn mẹ. (Psalm 68:11) Podọ ga, na yé nọ penukundo azọngban whẹndo tọn lẹ go to gbesisọmẹ wutu, yọnnu lẹ nọ ze oyín dagbe agun lọ tọn daga. (Titu 2:3-5) Ṣigba sunnu he yin dide lẹ wẹ nọ penukundo azọ́n mẹpinplọn tọn go to agun mẹ—1 Timoti 2:12, 13.
13. (a) Nukun tẹwẹ Biblu vẹ̀ mẹho lẹ nado yí do pọ́n otẹn yetọn? (b) Lẹblanulọkẹyi tẹmẹ wẹ mímẹpo sọgan tindo mahẹ te?
13 To aihọn mẹ, mẹhe tin to otẹn nukundeji tọn mẹ lẹ wẹ nọ yin pinpọn taidi mẹjọmẹ, ṣigba to titobasinanu Jiwheyẹwhe tọn mẹ nunọwhinnusẹ́n lọ wẹ yindọ: “Ewọ he whehu to mì omẹ pó mẹ dopolọ wẹ yin kiklo.” (Luku 9:46-48; 22:24-26) Owe-wiwe na ayinamẹ mẹho lẹ nado payi ma nado duklunọ do ogú Jiwheyẹwhe tọn ji ṣigba, kakatimọ nado yin apajlẹ na apó lọ. (1 Pita 5:2, 3) E mayin mẹṣinṣinyan delẹ poun gba, ṣigba Kunnudetọ Jehovah tọn lẹpo, sunnu po yọnnu po, wẹ tindo lẹblanulọkẹyi nado ze afọ Nupojipetọ wẹkẹ tọn lọ dai, bo nọ yí whiwhẹ do dọho to oyín etọn mẹ bosọ nọ dọhona gbẹtọ lẹ to filẹpo gando Ahọluduta etọn go.
14. Yí wefọ heyin dide lẹ zan, bo na gblọndo kanbiọ heyin sislẹ to vivọnu hukan lọ tọn lẹ.
14 Mí na wà dagbe nado kanse míde dọmọ: ‘Be yẹn mọnukunnujẹemẹ bo yọ́n pinpẹn lehe Jehovah to anadena titobasinanu yinukundomọ etọn gbọn ya? Be walọyizan, hodidọ, po nuyiwa ṣie lẹ po nọ do enẹ hia ya?’ Nulinlẹnpọndo nuagokun he bọdego lẹ ji sọgan gọalọna dopodopo mítọn nado basi dodinnanu mọnkọtọn.
Eyin yẹn litaina Klisti taidi Tatọ́ agun lọ tọn nugbonugbo, to whelọnu lo, dile wefọ he bọdego lẹ dohia do, etẹwẹ yẹn dona to wiwà? (Matiu 24:14; 28:19, 20; Johanu 13:34, 35)
Eyin yẹn gbọn pinpẹn nutọn yinyọnẹn dali kẹalọyi tito gbigbọmẹ tọn he pipli afanumẹ lọ tọn po Hagbẹ Anademẹtọ etọn po nọ wleawuna, mẹnu wẹ yẹn to sisi na? (Luku 10:16)
Nawẹ mẹhe to agun mẹ lẹpo, titengbe mẹho lẹ, dona nọ yinuwa hẹ ode awetọ gbọn? (Lomunu lẹ 12:10)
15. (a) Etẹwẹ walọyizan mítọn gando titobasinanu yinukundomọ Jehovah tọn go nọ dohia? (b) Dotẹnmẹ hundote tẹlẹ wẹ mí tindo nado do Lẹgba hia di lalonọ podọ nado hẹn homẹhun Jehovah?
15 Jehovah to anadena mí to egbehe gbọn titobasinanu yinukundomọ etọn gblamẹ to Klisti glọ. Walọyizan mítọn hlan tito ehe nọ do linlẹn he mí tindo gando whẹho nupojipetọ-yinyin tọn go hia. (Heblu lẹ 13:17) Satani dọ dọ ojlo ṣejannabi tọn wẹ nọ whàn mí. Ṣigba eyin mí nọ wà sinsẹ̀nzọn to aliho depope he mẹ nuhudo tin te bo dapana nuhe nọ dọ̀n ayidonugo he mayin dandan tọn wá mẹdetiti ji lẹ, mí na do Lẹgba hia di lalonọ. Eyin mí yiwanna mẹhe to nukọntọ yin to ṣẹnṣẹn mítọn lẹ bo na sisi yé, bosọ gbẹ́ nado ‘homẹnukuntapọ́n na ale mídetiti tọn lẹ wutu,’ mí nọ hẹn homẹhun Jehovah. (Juda 16; Heblu lẹ 13:7) Eyin mí yin nugbonọ hlan titobasinanu Jehovah tọn, mí na dohia dọ Jehovah wẹ Jiwheyẹwhe mítọn podọ dọ mí to sinsẹ̀n ẹn to kọndopọmẹ.—1 Kọlintinu lẹ 15:58.
Hodọdopọ Dogbapọn Tọn
• Etẹwẹ yin titobasinanu yinukundomọ Jehovah tọn to egbehe? Etẹwẹ yin lẹndai etọn?
• Mẹnu wẹ yin dide di Tatọ́ agun lọ tọn, podọ tito yinukundomọ tẹwẹ e nọ yizan nado wleawuna anademẹ owanyinọ na mí?
• Walọyizan dagbe tẹlẹ wẹ mí dona tindo hlan mẹhe tin to titobasinanu Jehovah tọn mẹ lẹ?
Yẹdide to weda 133]
Jehovah nọ deanana mí gbọn titobasinanu yinukundomọ etọn gblamẹ to Klisti glọ