Nuplọnmẹ de do Homẹdagbenọ-Yinyin Ji

BE A yọ́n nuhe nuvẹun zẹẹmẹdo ya?⁠— Do glido, nuvẹun zẹẹmẹdo nado gbẹwanna mẹde, vlavo na sinmẹ agbasa mẹlọ tọn gbọnvona towe kavi na e nọ dó ogbè he gbọnvona towe wutu poun. Enẹwutu nuvẹun tintindo yin linlẹn kavi pọndohlan ylankan tintindo gando mẹde go whẹpo a ni tlẹ do yọ́n mẹlọ.

Be a lẹndọ e sọgbe nado gbẹwanna mẹde whẹpo do wá yọ́n ẹn kavi na mẹlọ gbọnvona we to ninọmẹ delẹ mẹ poun wutu ya?⁠— Lala, nuvẹun ma sọgbe, podọ e ma do homẹdagbe hia gba. Mí ma dona gbẹwanna mẹde na mẹlọ gbọnvona mí poun wutu gba.

Be a yọ́n mẹde he sinmẹ agbasa etọn tọn gbọnvona towe kavi he nọ dó ogbè he gbọnvona towe ya?⁠— Vlavo a tlẹ sọgan yọ́n mẹdelẹ he agbasa yetọn gbọnvona towe na yé ko gbleawu pọ́n kavi na yé to awutu de jẹ wutu. Be hiẹ nọ do homẹdagbe po owanyi po hia omẹ mọnkọtọn lẹ ya?⁠—

Eyin mí nọ setonuna Mẹplọntọ Daho lọ, Jesu Klisti, mí na nọ do homẹdagbe hia mẹlẹpo. Mí ma dona nọ klan mẹde dovo na otò etọn kavi sinmẹ agbasa etọn tọn gbọnvona mítọn wutu gba. Mí dona nọ do homẹdagbe hia ẹ. Dile etlẹ yindọ e mayin gbẹtọ lẹpo wẹ yí ehe sè do sọ, nuplọnmẹ de wẹ, he Jesu plọn mí. Gbọ mí ni dọhodeji.

Ju he tindo nuvẹun gando mẹdevo lẹ go de wá Jesu dè bo kanbiọ ẹ dọ, ‘Etẹwẹ yẹn dona wà nado nọgbẹ̀ kakadoi?’ Jesu yọnẹn dọ dawe lọ to jijlo dọ emi ni dọ dọ mẹhe yin hẹnnu kavi akọ̀ mítọn lẹ kẹdẹ wẹ mí dona nọ do homẹdagbe hia. Enẹwutu kakati ni na gblọndo dawe lọ tlọlọ, Jesu kanbiọ ẹ dọ: ‘Etẹwẹ Osẹ́n Jiwheyẹwhe tọn dọ mí dona wà?’

Dawe lọ gblọn dọmọ: ‘Hiẹ dona yí ahun towe lẹpo do yiwanna Jehovah Jiwheyẹwhe towe, podọ hiẹ dona yiwanna kọmẹnu towe di dewe.’ Jesu dọmọ: ‘Hiẹ gblọn do ganji. Nọ wà domọ pẹpẹ, a na mọ ogbẹ̀ madopodo.’

Ṣigba, dawe lọ ma jlo na nọ do homẹdagbe kavi owanyi hia mẹhe gbọnvona ẹn lẹ gba. Enẹwutu e tẹnpọn nado dín whẹwhinwhẹn de. E kanse Jesu dọmọ: “Mẹnu ka wẹ kọmẹnu ṣie?” E sọgan ko jlo dọ Jesu ni dọmọ: “Họntọn towe lẹ wẹ yin kọmẹnu towe lẹ” kavi, “Mẹhe tindo sinmẹ agbasa tọn dopolọ hẹ we lẹ.” Ṣigba, nado na gblọndo kanbiọ etọn tọn, Jesu pìntàn de gando Ju po Samalianu de po go. Gbọ ma pìntàn lọ na we.

Dawe de tọ́nsọn tòdaho Jelusalẹm tọn mẹ bo jẹte jei Jẹliko. Juvi de wẹ dawe lọ yin. Dile e to yìyì to aliho ji, ajotọ lẹ gbò e. Yé linú in bo zìn in dai bosọ yí akuẹ etọn lẹ po avọ̀ etọn lẹ po. Ajotọ lọlẹ hò e bo jo e do kúdaa-gbẹ̀daa to aliho pá.

To ojlẹ vude godo, yẹwhenọ de gbọn aliho lọ ji wá jei. E mọ dawe he ko yin awugblena bo yin jijodo bèdebède lọ. Eyin hiẹ wẹ, etẹwẹ a na ko wà?⁠— Do glido, yẹwhenọ lọ lẹ́ okọ̀ etọn do apadopo bo gbọn adà awetọ ji. E ma tlẹ nọte tata. E ma wà nudepope nado gọalọna dawe lọ.

Enẹgodo dawe sinsẹ̀nnọ devo sọ gbọn aliho lọ ji wá jei. Levinu de wẹ ewọ bo nọ wà sinsẹ̀nzọn to tẹmpli mẹ to Jelusalẹm. Be e nọte bo gọalọ ya?⁠— Lala. E wà nudopolọ he yẹwhenọ lọ wà.

To godo mẹ, dawe Samalianu de wá jei. Be a sọgan mọ ẹn ja sọn agọlilẹ lọ mẹ ya?⁠— E mọ Juvi heyin awugblena bo yin jijodo bèdebède lọ to kọmẹ. Ṣigba, suhugan Samalianu lẹ po Juvi lẹ po tọn ma yiwanna yedelẹ. (Johanu 4:9) Be enẹwutu Samalianu ehe lọsu jo dawe lọ do bo ma gọalọna ẹn wẹ ya? Be e dọ dọ: ‘Etẹwutu wẹ yẹn nado gọalọna Juvi ehe? Eyin ewọ wẹ, be e na gọalọna mi to ninọmẹ ehe mẹ’ ya?

To whenuena Samalianu lọ mọ dawe he tin to kọmẹ to alipá lọ, lẹblanu etọn wà ẹ. E ma sọgan jo e do finẹ bọ e na kú gba. Enẹwutu, e jẹte sọn kanlin etọn ji, bo yì dawe lọ dè, bosọ jẹ nukunpedo apà etọn lẹ go ji. E kọ̀n amì po ovẹn po do apà lọ lẹ mẹ. Ehe na yawu hù apà lọ lẹ. Enẹgodo e yí avọ̀ do blá apà lọ lẹ.

To ehelẹ bibasi godo, Samalianu lọ wadẹẹdẹ bo ze dawe heyin awugblena lọ do kanlin etọn titi ji. Bọ yé zọ̀n dẹẹdẹ to aliho lọ ji kaka yì dohọ̀, kavi hotẹli pẹvi de mẹ. Samalianu lọ haya ohọ̀ de na dawe lọ nado nọ e mẹ to finẹ, bosọ penukundego ganji.

Todin Jesu kanbiọ dawe he e to hodọna lọ dọmọ: ‘Mẹnu to omẹ atọ̀n ehelẹ mẹ wẹ hiẹ lẹndọ e yin kọmẹnu dagbe de?’ Mẹnu wẹ hiẹ na dọ? Yẹwhenọ lọ, kavi Levinu lọ, kavi Samalianu lọ?⁠—

Dawe lọ gblọn dọ: ‘Dawe he nọte bo penukundo mẹhe yin awugblena lọ go wẹ yin kọmẹnu dagbe lọ.’ Jesu dọna ẹn dọmọ: ‘A dọ nugbo. Bo yì na hiẹ lọsu ni nọ wà domọ pẹpẹ.’—Luku 10:25-37.

Be otàn lọ ma vivi ya? E do mẹhe yin kọmẹnu mítọn lẹ hia hezeheze. Yé ma yin họntọn vivẹ mítọn lẹ kẹdẹ gba. Podọ yé ma yin mẹhe tindo sinmẹ agbasa tọn dopolọ po mí po lẹ kavi mẹhe nọ dó ogbè dopolọ hẹ mí lẹ kẹdẹ gba. Jesu plọn mí nado nọ do homẹdagbe hia gbẹtọ lẹpo mahopọnna fie yé wá sọn, lehe yé te, kavi ogbè he yé nọ dó.

Mọwẹ Jehovah Jiwheyẹwhe nọ yinuwa do. E ma tindo nuvẹun. ‘Otọ́ mìtọn he tin to olọn mẹ nọ hẹn owhè etọn hùn do mẹylankan lẹ po mẹdagbe lẹ po ji,’ wẹ Jesu dọ. ‘Podọ e sọ nọ hẹn jikun ja do mẹdagbe lẹ po mẹylankan lẹ po ji.’ Enẹwutu, mí dona nọ do homẹdagbe hia mẹlẹpo, dile Jiwheyẹwhe nọ wà do.⁠—Matiu 5:44-48.

Enẹwutu eyin a mọ mẹde gbleawu, etẹwẹ a na wà?⁠— Eyin mẹlọ ma sọn otò towe mẹ lo kavi sinmẹ agbasa etọn tọn gbọnvona towe, etẹwẹ a na wà? Mẹlẹpo wẹ yin kọmẹnu towe, enẹwutu a dona gọalọna ẹn. Eyin a mọdọ emi whè gbau nado gọalọna ẹn, a sọgan dọna mẹhomẹ de nado gọalọna ẹn. Kavi a sọgan ylọ ponọ de kavi mẹplọntọ towe. Enẹ yin homẹdagbe didohia di dawe Samalianu lọ.

Mẹplọntọ Daho lọ jlo dọ mí ni nọ do homẹdagbe hia. E jlo dọ mí ni nọ gọalọna mẹdevo lẹ, mahopọnna mẹhe nkọtọn yé yin. Enẹ wẹ zọ́n bọ e pìntàn Samalianu homẹdagbenọ lọ tọn.