Be Mí Dona Yí Nùgo to Nudepope mẹ Wẹ Ya?

ETẸWẸ e zẹẹmẹdo nado yí nùgo? Be a yọnẹn?⁠— Apajlẹ dopo die. Be a ko tẹnpọn nado basi nude he a ma yọ́n basi ganji pọ́n ya? E sọgan yin bọlu hihò. Kavi e sọgan yin nado lọ́n okàn. Be mẹde ko ṣàn we kò pọ́n dọ, “Yeegè, adidọnọ wẹ a yin! Yẹn sọgan basi i hú we” ya?⁠— Nùgo yí wẹ mẹhe dọmọ te.

Etẹwẹ nọ yin numọtolanmẹ towe to whenuena mẹde dọmọ na we? Be e nọ vivi na we wẹ ya?⁠— Eyọn, be a lẹndọ e na vivi na mẹdevo lẹ ga eyin hiẹ lọsu yí nùgo wẹ ya?⁠— Be onú dagbe wẹ e yin nado dọna mẹdevo dọ, “Yẹn pọnte hú we” ya?⁠— Be Jehovah yiwanna mẹhe nọ wàmọ lẹ wẹ ya?⁠—

Mẹplọntọ Daho lọ yọ́n mẹdelẹ he nọ lẹndọ emilẹ pọnte hú mẹdevo lẹ. Yé nọ yí nùgo, kavi doawagun gando yedelẹ go bo nọ yí nukunpẹvi do pọ́n mẹdevo lẹ. Enẹwutu Jesu pìntàn de na yé to gbèdopo nado dohia yé dọ e ylan nado nọ yí nùgo. Gbọ mí ni sè otàn lọ.

Otàn Falesi de po takuẹ-ṣinyantọ de po tọn wẹ. Falesi lẹ yin mẹplọntọ sinsẹ̀nnọ he nọ saba yinuwa taidi dọ yé yin dodonọ kavi mẹwiwe hú mẹdevo lẹ. Falesi he hodọ Jesu te lọ yì tẹmpli mẹ to Jelusalẹm nado hodẹ̀.

Jesu dọ dọ takuẹ-ṣinyantọ de sọ yì tẹmpli dopolọ mẹ nado hodẹ̀ ga. Suhugan gbẹtọ lẹ tọn ma yiwanna takuẹ-ṣinyantọ lẹ gba. Na gbẹtọ lẹ lẹndọ takuẹ-ṣinyantọ lẹ nọ tafu yé. Podọ nugbo wẹ dọ susu takuẹ-ṣinyantọ lẹ tọn wẹ ma nọ dọ nugbo to whepoponu.

Falesi lọ jẹ dẹ̀ho hlan Jiwheyẹwhe ji to tẹmpli mẹ dọmọ: ‘Jiwheyẹwhe E, yẹn dopẹna we dọ yẹn ma yin ylandonọ di mẹdevo lẹ gba. Yẹn ma nọ tafu gbẹtọ lẹ kavi waylan depope gba. Yẹn ma taidi takuẹ-ṣinyantọ he ṣite to finẹ gba. Dodonọ de wẹ yẹn yin. Whlaawe wẹ yẹn ma nọ dùnú to osẹ dopo mẹ na yẹn nido yí whenu susu dogọ zan nado lẹnnupọn dogbọn hiẹ dali. Podọ yẹn nọ na madao nuhe yẹn tindo lẹpo tọn to tẹmpli mẹ.’ Na nugbo tọn, Falesi lọ lẹndọ emi pọnte hú mẹdevo lẹ, kavi e mayin mọwẹ?⁠— Podọ e tlẹ sọ dọmọ na Jiwheyẹwhe ga.

Ṣigba takuẹ-ṣinyantọ lọ ma wàmọ. E ma tlẹ ze nukunmẹ etọn daga nado pọ́n olọn mẹ to whenuena e to dẹ̀ho. E ṣite do olá bo dẹ́ ota etọn do odò. Takuẹ-ṣinyantọ lọ blawu taun na ylando etọn lẹ wutu, bo biọ jona vẹkuvẹku. E ma tẹnpọn nado dọna Jiwheyẹwhe dọ emi yin mẹdagbe gba. Kakatimọ, e hodẹ̀ dọmọ: ‘Jiwheyẹwhe E, yẹn yin ylandonọ, do nukundagbe hia mi.’

To omẹ awe ehelẹ mẹ, mẹnu wẹ a lẹndọ e hẹn homẹhun Jiwheyẹwhe? Be Falesi lọ, he lẹndọ emi wẹ yin mẹdagbe hugan wẹ ya? Kavi takuẹ-ṣinyantọ lọ, he blawu na ylando etọn lẹ wutu wẹ?⁠—

Jesu dọ dọ takuẹ-ṣinyantọ lọ go wẹ homẹ Jiwheyẹwhe tọn hùn do. Etẹwutu wẹ? Jesu basi zẹẹmẹ dọ: ‘Na mẹdepope he tẹnpọn nado yinuwa taidi dọ ewọ wẹ pọnte hú mẹdevo lẹ na yin zize whè. Ṣigba mẹhe ze ede whè to nukun ede tọn mẹ na yin zizedaga.’—Luku 18:​9-​14.

Etẹ plọnmẹ wẹ Jesu te to otàn ehe mẹ?⁠— E to pinplọnmẹ dọ e ma sọgbe nado nọ lẹndọ mí pọnte hú mẹdevo lẹ. Mí sọgan gọ̀n ma nọ dọmọ, ṣigba nuyiwa mítọn lẹ sọgan dohia dọ mí nọ lẹn mídelẹ nado pọnte hú mẹdevo lẹ. Be hiẹ ko yinuwa to aliho enẹ nkọ mẹ pọ́n ya?⁠— Flin apọsteli Pita.

To whenuena Jesu dọna apọsteli etọn lẹ dọ yemẹpo wẹ na họ̀n jo emi do to whenuena emi na yin wiwle, Pita yí nùgo dọmọ: ‘Eyin mẹlẹpo tlẹ họ̀n jo we do, yẹn ma na wàmọ pọ́n gbede!’ Ṣigba nuhe Pita dọ ma sọgbe. E dejido ede go gbau. To godo mẹ, e họ̀n jo Jesu do. Ṣigba e lẹkọwa, dile mí na wá mọ to Weta 30tọ owe ehe tọn mẹ do.—Matiu 26:31-33.

Gbọ mí ni pọ́n apajlẹ egbezangbe tọn dopo. Vlavo yè kàn kanbiọ delẹ biọ hiẹ po klasigbẹ́ towe de po to wehọmẹ. Eyin hiẹ penugo bo na gblọndo lọ to afọdopolọji, ṣigba bọ wehọmẹvi awetọ lọ ma penugo nado wàmọ, etẹwẹ hiẹ na wà? Nugbo wẹ dọ homẹ towe na hùn eyin a na gblọndo he sọgbe. Ṣigba be e na yọ́n nado yí dewe jlẹdo mẹhe ma penugo nado na gblọndo to afọdopolọji go ya?⁠— Be e sọgbe nado tẹnpọn bo ze dewe daga gbọn winyandido hatọ towe awetọ dali ya?⁠—

Nuhe Falesi lọ wà pẹpẹ niyẹn. E doawagun dọ emi pọnte hú takuẹ-ṣinyantọ lọ. Ṣigba Mẹplọntọ Daho lọ dọ dọ nuhe Falesi lọ dọ ma sọgbe. Nugbo wẹ dọ mẹde sọgan penugo nado yọ́n nude basi hú mẹdevo. Ṣigba enẹ ma dohia dọ e pọnte hú mẹdevo lẹ gba.

Enẹwutu eyin mí yọnnuin hú mẹdevo, be enẹ dona zọ́n bọ mí na nọ yí nùgo wẹ ya?⁠— Lẹnnupọndo ehe ji. Be mílọsu wẹ basi apọ̀n mítọn ya?⁠— Lala, Jiwheyẹwhe wẹ na apọ̀n dopodopo mítọn lẹ. Podọ suhugan nuhe mí yọnẹn lẹ tọn, mẹde dè wẹ mí plọn yé sọn. Vlavo owe de mẹ wẹ mí hia yé te. Kavi e sọgan yin mẹde wẹ dọ yé na mí. Eyin mílọsu wẹ tlẹ de linlẹn lọ tọ́n na míde, etẹwẹ hẹn mí penugo nado basi i?⁠— Mọwẹ, apọ̀n he Jiwheyẹwhe na mí lọ wẹ mí yizan.

Eyin mẹde dovivẹnu sinsinyẹn to nude wiwà mẹ, e na yọ́n hugan dọ hiẹ ni dọ nuhe na hẹn homẹ etọn hùn. Dọ na ẹn dọ a yiwanna nuhe e wà. Vlavo a sọgan sọ gọalọna ẹn nado basi nulọ ganji. Mọwẹ hiẹ na jlo dọ mẹdevo lẹ ni yinuwa hẹ we gbọn, kavi e mayin mọwẹ?⁠—

Mẹdelẹ nọ dohuhlọn hú mẹdevo lẹ. Nawẹ hiẹ na yinuwa gbọn, eyin a dohuhlọn hú nọvi towe lẹ? Be enẹ dona hẹn we yí nùgo wẹ ya?⁠— Lala, e ma dona yinmọ. Núdùdù he mí nọ dù lẹ wẹ nọ na huhlọn mí. Podọ Jiwheyẹwhe wẹ na mí owhè, jikun po nulẹpo he nọ hẹn núdùdù lẹ whẹ́n po, kavi e mayin mọwẹ?⁠— Enẹwutu, Jiwheyẹwhe wẹ mí dona dopẹna eyin mí dohuhlọn.—Owalọ lẹ 14:16, 17.

Depope to mí mẹ ma nọ yiwanna dọ mẹde ni to nùgo yí gba, kavi e mayin mọwẹ?⁠— Gbọ mí ni flin ohó Jesu tọn lẹ dọmọ: ‘Nuhe a jlo dọ mẹdevo ni wà na we, mọkẹdẹ wẹ hiẹ lọsu ni wà hlan yé do.’ Eyin mí nọ wàmọ, mí ma na taidi Falesi lọ he doawagun to otàn he Mẹplọntọ Daho lọ pìn mẹ.—Luku 6:31.

Dawe de ylọ Jesu dọ mẹdagbe to gbèdopo. Be Mẹplọntọ Daho lọ yigbe dọ, ‘Mọwẹ, mẹdagbe wẹ yẹn yin’ wẹ ya?⁠— Lala, e ma dọmọ. Kakatimọ, e dọmọ: “Mẹdagbe de ma tin, adavo omẹ dopo, enẹ wẹ Jiwheyẹwhe.” (Malku 10:18) Dile etlẹ yindọ mẹpipe de wẹ Mẹplọntọ Daho lọ yin, e ma doawagun gba. Kakatimọ, e ze pipà lẹpo hlan Otọ́ etọn, Jehovah.

Ṣigba be mẹdepope tin he mẹ mí sọgan doawagun te ya?⁠— Mọwẹ, e tin. Mí sọgan doawagun to Mẹdatọ mítọn, Jehovah Jiwheyẹwhe mẹ. Eyin mí mọ họyìyì whanpẹnọ owhè tọn kavi nudida jiawu devo lẹ, mí sọgan dọna mẹdevo dọ, ‘Pọ́n, Jehovah, Jiwheyẹwhe jiawu mítọn wẹ basi i!’ Gbọ mí ni nọ tin to jejeji to whepoponu nado dọ onú jiawu he Jehovah ko basi lẹ po dehe e nasọ basi to sọgodo lẹ po.